Mungu Atafuta Waombezi

“Nimeweka walinzi juu ya kuta zako, Ee Yerusalemu, ambao hawatanyamaza kamwe, mchana wala usiku. Ninyi mnaomkumbusha Bwana, msinyamaze, wala msimpe raha, hata atakapoifanya Yerusalemu kuwa sifa duniani.”—Isaya 62:6, 7.

“Naye aliona ya kuwa hapana mtu, akastaajabu ya kuwa hapana mwombezi.”—Isaya 59:16.

“Nami nikatazama, wala hapakuwa na msaidizi; nikastaajabu, wala hapakuwa na mtegemezaji.”—Isaya 63:5.

“Hakuna aliitiaye jina lako, ajitahidiye ili akushike wewe.”—Isaya 64:7.

“Nami nikatafuta mtu atakayesimama mahali palipobomoka mbele zangu kwa ajili ya nchi, ili nisiiharibu; lakini sikupata mtu.”—Ezekieli 22:30.

“Si ninyi mlionichagua mimi, bali ni mimi niliyewachagua ninyi; nami nikawaweka mwende mkazae matunda, na matunda yenu yapate kudumu; ili kwamba lo lote mmwombalo Baba kwa jina langu awapeni.”—Yohana 15:16.

Katika kuzichunguza mbingu zenye nyota, ni mengi kiasi gani yategemeayo kuelewa vyema ukubwa wa vitu. Pasipo kuwa na hisia fulani ya ukubwa wa vile viumbe vya mbinguni, vinavyoonekana vidogo mno machoni, na hata hivyo ni vikubwa sana, na ya upana usio na mpaka wa maeneo yale ambamo vinatembea, ijapokuwa vinaonekana karibu sana na kuzoeleka, hapawezi kuwa na ujuzi wa kweli wa ulimwengu wa mbinguni wala uhusiano wake na dunia hii. Ni vivyo hivyo katika mbingu za kiroho, na maisha ya mbinguni ambayo tumeitwa kuishi. Ni hivyo hasa katika maisha ya maombezi, ile mawasiliano ya ajabu kuliko yote kati ya mbingu na dunia. Kila kitu hutegemea kuelewa vyema ukubwa wa mambo.

Fikiri tu juu ya vitu vitatu vinavyokuja kwanza: Kuna ulimwengu, ambao mahitaji yake yote yategemea maombezi na yangoja kusaidiwa kwayo; kuna Mungu mbinguni, mwenye riziki itoshayo kwa mahitaji yote hayo, akingoja kuombwa; kuna Kanisa, lenye wito wake wa ajabu na ahadi zake za hakika, likingoja kuamshwa lipate kutambua wajibu wake wa ajabu na nguvu zake.

Mungu atafuta waombezi.—Kuna ulimwengu wenye mamilioni yake yanayoangamia, ambao maombezi ndiyo tumaini lake pekee. Ni kiasi gani cha upendo na kazi ni bure kwa kadiri fulani, kwa sababu maombezi ni kidogo mno. Milioni elfu wakiishi kana kwamba hakuna kamwe aliyekuwa Mwana wa Mungu wa kufa kwa ajili yao. Milioni thelathini kila mwaka wakiingia gizani la nje pasipo tumaini. Milioni hamsini wakichukua jina la Kikristo, na wengi wao wakiishi katika ujinga mtupu au kutojali. Mamilioni ya Wakristo dhaifu na wagonjwa; maelfu ya watenda kazi waliochoka, ambao wangeweza kubarikiwa kwa maombezi, wangeweza kujisaidia kuwa hodari katika maombezi. Makanisa na misheni yakitoa uhai na juhudi mara nyingi bila matokeo makubwa, kwa kukosa maombezi. Roho za watu, kila moja ya thamani kuliko dunia nzima, isiyopungua thamani ya bei iliyolipwa kwa ajili yao katika damu ya Kristo, na zilizo karibu na nguvu ipatikanayo kwa maombezi. Bila shaka hatuna fikira yo yote juu ya ukubwa wa kazi itakayofanywa na waombezi wa Mungu, ama sivyo tungemlilia Mungu kuliko kila kitu atupe kutoka mbinguni ile roho ya maombezi.

Mungu atafuta waombezi.—Kuna Mungu wa utukufu awezaye kukidhi mahitaji haya yote. Twaambiwa ya kuwa hupendezwa na rehema, ya kuwa hungoja ili apate kufadhili, ya kuwa hutamani sana kuimwaga baraka yake; ya kuwa upendo uliomtoa Mwana afe ndio kipimo cha upendo unaozunguka juu ya kila mwanadamu kila dakika. Na hata hivyo hasaidii. Nao huko wanaangamia, milioni moja kwa mwezi katika China peke yake, na ni kana kwamba Mungu hajitikisi. Ikiwa hupenda hivyo na kutamani sana kubariki, ni lazima kuwe na sababu fulani isiyoeleweka ya yeye kujizuia. Yaweza kuwa nini? Maandiko yasema, ni kwa sababu ya kutokuamini kwenu. Ni kutokuwa na imani, na, kutokana na hilo, kutokuwa waaminifu, kwa watu wa Mungu. Amewatwaa kuwa washirika pamoja naye mwenyewe; amewaheshimu, na kujifunga mwenyewe, kwa kufanya maombi yao kuwa mojawapo ya vipimo vya kawaida vya utendaji wa nguvu yake. Kukosa maombezi ni mojawapo ya sababu kuu za kukosa baraka. Laiti tungeuondoa macho na moyo mbali na kila kitu kingine na kuvikaza juu ya huyu Mungu asikiaye maombi, hata fahari ya ahadi zake, na nguvu yake, na kusudi lake la upendo vituzidi nguvu! Jinsi gani maisha yetu yote na moyo wetu vingekuwa maombezi.

Mungu atafuta waombezi.—Kuna ukubwa wa tatu ambao macho yetu lazima yafumbuliwe: yaani pendeleo la ajabu na nguvu za waombezi. Kuna unyenyekevu wa uongo, unaofanya kujidharau kuwa fadhila kuu, kwa sababu haujaona kamwe ubatili wake kabisa. Kama ungalijua hilo, usingaliomba radhi kamwe kwa udhaifu wake, bali ungalijisifu katika unyonge wake kabisa, kama sharti pekee la nguvu za Kristo kukaa juu yake. Ungalijihukumu wenyewe, nguvu na uvutano wake mbele za Mungu katika maombi, kwa kadiri ndogo ya kile ukionacho au kihisicho, kama vile tunavyohukumu ukubwa wa jua au nyota kwa kile jicho liwezalo kuona. Imani humwona mwanadamu aliyeumbwa kwa mfano na sura ya Mungu awe mwakilishi wa Mungu katika ulimwengu huu na kuutawala. Imani humwona mwanadamu aliyekombolewa na kuinuliwa hata kuungana na Kristo, akikaa ndani yake, akihesabiwa kuwa mmoja naye, na kuvikwa nguvu zake katika maombezi. Imani humwona Roho Mtakatifu akikaa na kuomba moyoni, akifanya maombezi katika kuugua kwetu sawasawa na Mungu. Imani huyaona maombezi ya watakatifu kuwa sehemu ya uzima wa Utatu Mtakatifu—mwaminio kama mtoto wa Mungu akimwomba Baba, katika Mwana, kwa njia ya Roho. Imani huona kitu fulani cha ufaao na uzuri wa Kimungu wa mpango huu wa wokovu kwa njia ya maombezi, huiamsha nafsi ipate kutambua majaliwa yake ya ajabu, na kuivika nguvu kwa ajili ya kujitoa sadaka kwa baraka ambako huiitia.

Mungu atafuta waombezi.—Alipowaita watu wake kutoka Misri, aliitenga kabila la ukuhani, ili wamkaribie, na kusimama mbele zake, na kuwabariki watu kwa jina lake. Mara kwa mara alitafuta na kupata na kuwaheshimu waombezi, ambao kwa ajili yao aliwahurumia au kuwabariki watu wake. Bwana wetu alipoiacha dunia aliwaambia wale wa mzunguko wa ndani aliokuwa amewakusanya kumzunguka—mzunguko wa ndani wa kujitoa hasa kwa utumishi wake, ambao mlango wake bado wazi kwa kila mwanafunzi: “Mimi niliwachagua ninyi, nikawaweka, ili lo lote mtakalomwomba Baba kwa Jina langu awapeni.” Tumekwisha kuyaona yale maneno matatu ya ajabu yaliyorudiwa mara sita—Lo lote—Kwa Jina langu—Litafanyika. Katika hayo Kristo aliweka nguvu za ulimwengu wa mbinguni mikononi mwao—si kwa faida yao wenyewe ya ubinafsi, bali kwa manufaa ya ufalme wake. Jinsi walivyozitumia kwa ajabu twajua. Na tangu wakati ule, kupitia vizazi vyote, watu hao wamekuwa na warithi wao, watu waliothibitisha jinsi Mungu afanyavyo kazi kwa hakika katika kujibu maombi. Nasi twaweza kumsifu Mungu ya kuwa, katika siku zetu pia, kuna idadi izidiyo kuongezeka ya wale wanaoanza kuona na kuthibitisha ya kuwa katika kanisa na misheni, katika vyama vikubwa na miduara midogo na juhudi za mtu mmoja mmoja, maombezi ndilo jambo kuu, ile nguvu imwondoayo Mungu na kuzifungua mbingu. Wanajifunza, nao hutamani kujifunza vyema zaidi, na kwamba wote wapate kujifunza, ya kuwa katika kazi yote kwa ajili ya roho za watu maombezi lazima yashike nafasi ya kwanza, na kwamba wale ambao ndani yake wamepokea kutoka mbinguni, kwa nguvu za Roho Mtakatifu, yale watakayowapa wengine, ndio watakaoweza kuifanya kazi ya Bwana vyema zaidi.

Mungu atafuta waombezi.—Ijapokuwa Mungu alikuwa na watumishi wake walioteuliwa katika Israeli, walinzi waliowekwa naye mwenyewe wamlilie mchana na usiku wala wasimpe raha, mara nyingi ilimbidi astaajabu na kulalamika ya kuwa hapana mwombezi, hapana ajitiaye moyo kuishika nguvu yake. Naye bado angoja na kustaajabu katika siku zetu, ya kuwa hakuna waombezi zaidi, ya kuwa watoto wake wote hawajitoi kwa kazi hii iliyo juu na takatifu kuliko zote, ya kuwa wengi wao wafanyao hivyo, hawajishughulishi nayo kwa bidii na kudumu zaidi. Hustaajabu kuwaona watumishi wa injili yake wakilalamika ya kuwa kazi zao haziwaruhusu kupata wakati kwa ajili ya hili, ambalo yeye hulihesabu kuwa kazi yao ya kwanza, iliyo juu, ipendezayo zaidi, na iliyo na matokeo peke yake. Hustaajabu kuwaona wana wake na binti zake, walioyaacha makao na rafiki kwa ajili yake na kwa ajili ya injili, wakipungukiwa sana katika kile alichokusudia kiwe nguvu yao ya kudumu—wakipokea siku kwa siku yale yote waliyohitaji kuwapa wapagani walio gizani. Hustaajabu kuwaona makutano ya watoto wake ambao karibu hawana fikira yo yote juu ya maombezi ni nini. Hustaajabu kuwaona makutano zaidi ambao wamejifunza ya kuwa ni wajibu wao, nao hutafuta kuutii, lakini hukiri ya kuwa wanajua kidogo tu juu ya kumshika Mungu au kushinda naye.

Mungu atafuta waombezi.—Hutamani kutoa baraka kubwa zaidi. Hutamani kuidhihirisha nguvu yake na utukufu wake kama Mungu, na upendo wake wa kuokoa, kwa wingi zaidi. Hutafuta waombezi wa idadi kubwa zaidi, wa nguvu iliyo kuu zaidi, ili kuitengeneza njia ya Bwana. Huwatafuta. Angewatafuta wapi ila katika Kanisa lake? Naye anatazamiaje kuwaona? Alilikabidhi Kanisa lake kazi ya kutangaza uhitaji wa Bwana wao, kazi ya kutia moyo na kufundisha, na kuwaandaa kwa utumishi wake mtakatifu. Naye huja tena siku zote, akitafuta matunda, akitafuta waombezi. Katika Neno lake amenena juu ya “wajane kweli kweli, wanaomtumaini Mungu, na kudumu katika dua na maombi usiku na mchana.” Hutazama kama Kanisa linalifundisha lile jeshi kubwa la wazee wanaume na wanawake, ambao wakati wao wa kazi ya nje umepita, lakini ambao waweza kuliimarisha jeshi la “wateule, wamliao mchana na usiku.” Hutazama kwa lile kundi kubwa la Bidii ya Kikristo, wale milioni tatu au nne wa maisha machanga waliojitoa katika ile ahadi nzito ya, “Namwahidi Bwana Yesu Kristo ya kwamba nitajitahidi kufanya lo lote apendalo mimi nilifanye,” naye hushangaa ni wangapi wanaofundishwa kupita kutoka katika mwangaza wa mkutano wa maombi wa kila juma na ungamo lake la uaminifu, hata kuyaongeza maombezi ya siri yatakayookoa roho za watu. Hutazama kwa maelfu ya vijana wanaume na wanawake wanaofundishwa kwa kazi ya huduma na misheni, naye hukazia macho kwa shauku kuona kama Kanisa linawafundisha ya kuwa maombezi, yaani nguvu pamoja na Mungu, lazima yawe jambo lao la kwanza, na kutafuta kuwafundisha na kuwasaidia kufikia hilo. Hutazama kuona kama watumishi na wamisionari wanautambua wasaa wao, na kujitaabisha kuwafundisha waaminio wa kusanyiko lao wawe wale wawezao “kusaidiana” kwa maombi yao, na wawezao “kushindana pamoja nao katika maombi yao.” Kama vile Kristo aitafutavyo kondoo aliyepotea hata amwone, ndivyo Mungu awatafutavyo waombezi. (Kidokezo F.)

Mungu atafuta waombezi.—Hataki, wala hawezi, kuitwaa kazi kutoka mikononi mwa Kanisa lake. Kwa hiyo huja, akiita na kusihi kwa njia nyingi. Mara kwa mtu ambaye humwinua aishi maisha ya imani katika utumishi wake, na kuthibitisha jinsi ajibuvyo maombi kwa kweli na kwa wingi. Kisha kwa hadithi ya kanisa lifanyalo maombi kwa ajili ya roho za watu kuwa mwanzo wake, na kushuhudia uaminifu wa Mungu. Wakati mwingine katika misheni ithibitishayo jinsi maombi maalum yawezavyo kukidhi hitaji maalum, na kuiteremsha nguvu ya Roho. Na wakati mwingine tena kwa majira ya uamsho yajayo kwa kujibu dua ya bidii iliyoungana. Kwa njia hizi na nyingine nyingi Mungu anatuonyesha yale maombezi yawezayo kufanya, na kutusihi tuamke na kulifundisha jeshi lake kubwa liwe, kila mmoja, taifa la waombezi.

Mungu atafuta waombezi.—Huwatuma watumishi wake waende kuwaita. Watumishi na walifanye hili kuwa sehemu ya wajibu wao. Na walifanye kanisa lao kuwa shule ya kufundishia maombezi. Wapeni watu mambo dhahiri ya kuwaombea. Watieni moyo watenge wakati dhahiri kwa ajili yake, hata ukiwa dakika kumi tu kila siku. Wasaidieni waelewe ujasiri wawezao kutumia mbele za Mungu. Wafundisheni kutazamia na kutafuta majibu. Waonyesheni maana ya kuomba kwanza na kupata jibu kwa siri, na kisha kulichukua lile jibu na kuitoa baraka. Mwambieni kila mtu aliye bwana wa wakati wake mwenyewe ya kuwa yu kama malaika, aliye huru kukaa mbele ya kiti cha enzi na kisha kutoka nje na kuwahudumia warithi wa wokovu. Zitangazeni habari njema za baraka ya kuwa heshima hii ni kwa watu wote wa Mungu. Hakuna tofauti. Yule msichana mtumishi, huyu kibarua wa mchana, yule mgonjwa aliyelala kitandani, huyu binti nyumbani mwa mamaye, hawa watu na vijana katika biashara—wote wameitwa, wote, wote wanahitajika. Mungu atafuta waombezi.

Mungu atafuta waombezi.—Watumishi wanapoichukua kazi ya kuwatafuta na kuwafundisha, itawahimiza wao wenyewe kuomba zaidi. Kristo alimtoa Paulo kuwa kielelezo cha neema yake kabla ya kumfanya kuwa mhubiri wake. Imesemwa vyema, “Wajibu wa kwanza wa mchungaji ni kumsihi Mungu kwa unyenyekevu kwamba yote apendayo yatendeke katika watu wake yatendeke kwanza kwa kweli na kwa ukamili ndani yake mwenyewe.” Juhudi ya kuleta ujumbe huu wa Mungu yaweza kusababisha kujichunguza moyo sana na kunyenyekezwa. Ni afadhali zaidi. Mazoezi bora ya kufanya jambo ni kuwasaidia wengine kulifanya. Enyi watumishi wa Kristo, mliowekwa kuwa walinzi mmlilie Mungu mchana na usiku, na tuamke tuutambue wito wetu mtakatifu. Na tuiamini nguvu ya maombezi. Na tuifanye. Na tutafute kwa ajili ya watu wetu kupokea kutoka kwa Mungu mwenyewe ile Roho na Uzima tuuhubiriao. Na roho zetu na maisha yetu yakiwa yametolewa kwa Mungu katika maombezi, ile Roho na Uzima ambao Mungu huwapa kwa kupitia sisi hauwezi kukosa kuwa Uzima wa Maombezi pia.

WITO WA KUOMBA ZAIDI