Mungu Wangu Atanisikia

“Kwa hiyo Bwana atangoja, ili awafadhili ninyi. Heri wote wamngojao. Atakufadhili sana kwa sauti ya kilio chako; atakaposikia, atakuitikia.”—Isaya 30:18, 19.

“Bwana atasikia nimwitapo.”—Zaburi 4:3.

“Nimekuita, kwa kuwa utanisikia, Ee Mungu!”—Zaburi 17:6.

“Nitamtazamia Bwana; nitamngoja Mungu wa wokovu wangu; Mungu wangu atanisikia.”—Mika 7:7.

Nguvu ya maombi hukaa katika imani ya kwamba Mungu huyasikia. Kwa maana zaidi ya moja jambo hili ni kweli. Ni imani hii impayo mtu ujasiri wa kuomba. Ni imani hii impayo nguvu ya kushinda mbele za Mungu. Mara nihakikishiwapo ya kuwa Mungu ananisikia mimi nami, najihisi navutwa kuomba na kudumu katika maombi. Najihisi mwenye nguvu ya kudai na kupokea kwa imani jibu alitoalo Mungu. Sababu moja kuu ya upungufu wa maombi ni kukosa ule uhakika ulio hai na wenye furaha: “Mungu wangu atanisikia.” Kama watumishi wa Mungu wangepata mara moja maono ya Mungu aliye hai akingojea kuwajalia haja yao, na kuwapa vipawa vyote vya mbinguni vya Roho wanavyovihitaji, kwa ajili yao wenyewe au wale wanaowahudumia, jinsi gani kila kitu kingewekwa kando ili kupata wakati na nafasi kwa ajili ya nguvu hii pekee iwezayo kuhakikisha baraka ya mbinguni—maombi ya imani!

Mtu awezapo, na kwa kweli akasema, kwa imani iliyo hai, “Mungu wangu atanisikia!” hakika hakuna kitu kiwezacho kumzuia asiombe. Yeye anajua ya kuwa lile asiloliweza wala kulifanya duniani, laweza na litafanyika kwa ajili yake kutoka mbinguni. Kila mmoja wetu na ainame kimya mbele za Mungu, na kumngojea ili ajidhihirishe kuwa Mungu asikiaye maombi. Katika uwepo wake mawazo ya ajabu yakusanyikayo kuizunguka ile kweli kuu yatajifunua kwetu.

1. “Mungu wangu atanisikia.”—Ni hakika iliyobarikiwa kama nini!—Tunalo neno la Mungu juu ya jambo hili katika ahadi zisizo na hesabu. Tunao mashahidi maelfu ya kwamba wameiona kuwa kweli. Tumekuwa na uzoefu wake katika maisha yetu. Tumepata Mwana wa Mungu akija kutoka mbinguni na ujumbe wa kwamba tukiomba, Baba atatupa. Tumempata yeye mwenyewe akiomba duniani, naye akasikiwa. Nasi tunaye sasa mbinguni, ameketi mkono wa kuume wa Mungu akituombea. Mungu husikia maombi—Mungu hufurahia kusikia maombi. Amewaacha watu wake wajaribiwe mara elfu, ili walazimishwe kumlilia, na kujifunza kumjua kuwa ndiye Asikiaye Maombi.

Na tuungame kwa haya jinsi tulivyoiamini kidogo kweli hii ya ajabu, kwa maana ya kuipokea mioyoni mwetu, na kuiacha imiliki na kuutawala utu wetu wote. Kukubali kweli hakutoshi; Mungu aliye hai, ambaye kweli hunena juu yake, sharti adhihirishwe katika nuru yake hata maisha yetu yote yatumike katika uwepo wake, tukiwa na fahamu iliyo wazi kama ya mtoto mdogo kwa mzazi wake wa kidunia—najua kwa hakika baba yangu ananisikia.

Mpendwa, mwana wa Mungu! wewe wajua kwa uzoefu jinsi kufahamu kweli kwa akili tu kulivyokufaidia kidogo. Msihi Mungu ajidhihirishe kwako. Kama wataka kuishi maisha ya maombi yaliyo tofauti, inama kila mara kabla ya kuomba kwa kimya ili kumwabudu Mungu huyu; kungoja hata ikae juu yako hisia sahihi ya ukaribu wake na utayari wake wa kuitikia. Ndivyo utakavyoanza kuomba kwa maneno haya, “Mungu wangu atanisikia!”

2. “Mungu wangu atanisikia.” Ni neema ya ajabu kama nini!—Mfikirie Mungu katika enzi yake isiyo na mwisho, utukufu wake usioweza kamwe kufahamika, utakatifu wake usioweza kukaribiwa, ameketi katika kiti cha enzi cha neema, akingojea kufadhili, akikualika, akikutia moyo kuomba kwa ahadi yake: “Niite, nami nitakuitikia.” Jifikirie mwenyewe, katika ubatili wako na hali yako ya kutoweza kama kiumbe; katika ubaya wako na makosa yako kama mwenye dhambi; katika udhaifu wako na kutostahili kwako kama mtakatifu; na uusifu utukufu wa neema ile ikuruhusuyo kusema kwa ujasiri juu ya maombi yako kwa ajili yako mwenyewe na wengine, “Mungu wangu atanisikia.” Fikiri jinsi usivyoachwa peke yako, na yale uwezayo kutimiza, katika mawasiliano haya ya ajabu na Mungu. Mungu amekuunganisha na Kristo; ndani yake na katika Jina lake unao uthabiti wako; juu ya kiti cha enzi yeye anaomba pamoja nawe na kwa ajili yako; juu ya kiti cha miguu cha kiti cha enzi wewe unaomba pamoja naye na ndani yake. Thamani yake, na furaha ya Baba katika kumsikia yeye, ndio kipimo cha uthabiti wako, uhakika wako wa kusikiwa. Kuna zaidi. Mfikirie Roho Mtakatifu, Roho wa Mwana wa Mungu mwenyewe, aliyetumwa moyoni mwako kulia, Aba, Baba, na kuwa ndani yako Roho wa Dua, hapo usipojua utakaloomba kama ipasavyo. Fikiri, katika udogo wako wote na kutostahili kwako, jinsi ulivyokubalika kama Kristo mwenyewe. Fikiri katika ujinga wako wote na udhaifu wako, jinsi Roho afanyavyo maombezi sawasawa na Mungu ndani yako, ukapaze sauti, “Ni neema ya ajabu kama nini! Kwa njia ya Kristo ninao uwezo wa kumfikia Baba, kwa Roho. Naweza, naamini kwa kweli: ‘Mungu wangu atanisikia.’”

3. “Mungu wangu atanisikia.”—Ni siri iliyo na kina kama nini!—Kuna magumu ambayo hayana budi nyakati fulani kutokea na kuutatanisha hata moyo ulio mnyofu. Kuna swali juu ya mapenzi ya Mungu yaliyo makuu, yenye hekima yote, yenye kutawala yote. Yawezaje matakwa yetu, ambayo mara nyingi ni ya kipumbavu, na mapenzi yetu, ambayo mara nyingi ni ya ubinafsi, kuyabatilisha au kuyabadili mapenzi yale makamilifu? Je, si afadhali kumwachia yeye yote, ajuaye lililo bora, apendaye kutupa lililo bora kabisa? Au yawezaje maombi yetu kubadili lile aliloliagiza tangu zamani? Kisha kuna swali juu ya uhitaji wa kudumu katika maombi, na kungoja kwa muda mrefu jibu. Kama Mungu ni Upendo usio na Mwisho, apendaye zaidi kutoa kuliko sisi kupokea, uko wapi uhitaji wa kusihi na kushindana, ile dharura, na kule kuchelewa kwa muda mrefu ambako Maandiko na uzoefu husema? Kutokana na hili kuna bado swali jingine—lile la wingi wa maombi yanayoonekana kuwa bure na yasiyojibiwa. Wangapi wamesihi kwa ajili ya wapendwa wao, nao wakafa bila kuokoka. Wangapi wanalia miaka kwa miaka kwa ajili ya baraka ya kiroho, wala hakuna jibu lijalo. Kufikiri juu ya haya yote hujaribu imani yetu, na kutufanya tusite tusemapo, “Mungu wangu atanisikia.”

Mpendwa! maombi, katika nguvu yake mbele za Mungu, na uaminifu wake kwa ahadi yake ya kuyasikia, ni siri ya kiroho iliyo na kina. Kwa maswali yaliyowekwa hapo juu yaweza kutolewa majibu yanayoondoa baadhi ya ugumu. Lakini, baada ya yote, la kwanza na la mwisho lipasalo kunenwa ni hili: Kama vile tusivyoweza kumfahamu Mungu ndivyo tusivyoweza kufahamu hili, mojawapo ya sifa zake zilizobarikiwa zaidi, ya kwamba yeye husikia maombi. Ni siri ya kiroho—si dogo kuliko siri ya Utatu Mtakatifu. Mungu husikia kwa sababu tunaomba katika Mwanawe, kwa sababu Roho Mtakatifu huomba ndani yetu. Kama tumeamini na kudai uzima wa Kristo kuwa afya yetu, na utimilifu wa Roho kuwa nguvu yetu, tusisite kuiamini nguvu ya maombi yetu pia. Roho Mtakatifu aweza kutuwezesha kuamini na kuifurahia, hata pale ambapo kila swali halijajibiwa bado. Atafanya hivi, tunapoyaweka maswali yetu kifuani mwa Mungu, tukauamini uaminifu wake, na kujitoa kwa unyenyekevu kutii amri yake ya kuomba bila kukoma. Kila ustadi hufunua siri zake na uzuri wake kwa yule tu auzoeaye. Kwa nafsi ya unyenyekevu iombayo katika utii wa imani, izoeayo maombi na maombezi kwa bidii, kwa sababu Mungu ataka hivyo, siri ya Bwana itafunuliwa, na wazo la siri iliyo na kina ya maombi, badala ya kuwa tatizo la kuchosha, litakuwa chanzo cha furaha, na ibada, na imani, ambamo kiitikio kisichokoma husikika daima: “Mungu wangu atanisikia!”

4. “Mungu wangu atanisikia.” Ni jukumu zito kama nini!—Mara ngapi tunalalamika juu ya giza, juu ya udhaifu, juu ya kushindwa, kana kwamba hakuna msaada kwa hilo. Naye Mungu ameahidi kwa kuitikia maombi yetu kutimiza kila haja yetu, na kutupa nuru yake na nguvu yake na amani yake. Laiti tungelitambua jukumu la kuwa na Mungu wa namna hiyo, na ahadi za namna hiyo, pamoja na dhambi na haya ya kutozitumia kwa kadiri iliyo kuu. Jinsi tunavyopaswa kujihisi na uhakika ya kwamba neema, ambayo tumeikubali na kuitumainia ili ituwezeshe kuomba ipasavyo, itatolewa.

Kuna zaidi. Uwezo huu wa kumfikia Mungu asikiaye maombi umekusudiwa hasa kutufanya sisi kuwa waombezi kwa ajili ya wenzetu. Kama vile Kristo alivyopata haki yake ya maombezi yenye kushinda kwa kujitoa mwenyewe kuwa dhabihu kwa Mungu kwa ajili ya wanadamu, na kwa hiyo hupokea baraka azigawanyazo, vivyo hivyo, kama sisi kwa kweli pamoja na Kristo tumejitoa kwa Mungu kwa ajili ya wanadamu, twashiriki haki yake ya maombezi, na twaweza kuzipata nguvu za ulimwengu wa mbinguni kwa ajili yao pia. Uwezo wa uzima na wa mauti u mikononi mwetu (1 Yohana 5:16). Kwa kuitikia maombi Roho aweza kumwagwa, nafsi zaweza kuongoka, waaminio waweza kuthibitishwa. Katika maombi ufalme wa giza waweza kushindwa, nafsi kutolewa gerezani na kuingizwa katika uhuru wa Kristo, na utukufu wa Mungu kudhihirishwa. Kwa njia ya maombi, upanga wa Roho, ambao ni Neno la Mungu, waweza kutumiwa kwa nguvu, na, katika kuhubiri hadharani kama katika kunena faraghani, wenye kuasi zaidi kufanywa kuinama miguuni pa Yesu.

Ni jukumu kama nini juu ya Kanisa kujitoa katika kazi ya maombezi! Ni jukumu kama nini juu ya kila mtumishi, mmisionari, mtenda kazi, aliyetengwa kwa ajili ya kuokoa nafsi, kujitoa kabisa ili kuitenda na kuithibitisha imani yake: “Mungu wangu atanisikia!” Na ni wito kama nini juu ya kila mwamini, badala ya kuizika na kuipoteza talanta hii, kutafuta kwa kadiri iliyo kuu kuitumia katika maombi na dua kwa ajili ya watakatifu wote na kwa ajili ya watu wote. Mungu wangu atanisikia: Kadiri tuingiavyo ndani zaidi ya kweli ya nguvu hii ya ajabu Mungu aliyowapa wanadamu, ndivyo kujisalimisha kwetu kwa kazi ya maombezi kutakavyokuwa kwa moyo wote zaidi.

5. “Mungu wangu atanisikia.” Ni matarajio yaliyobarikiwa kama nini!—Naiona—kushindwa kwote kwa maisha yangu yaliyopita kumetokana na kukosa imani hii. Kushindwa kwangu, hasa katika kazi ya maombezi, kumekuwa na chanzo chake cha ndani zaidi katika hili—sikuishi katika imani kamili ya ule uhakika uliobarikiwa, “Mungu wangu atanisikia!” Ashukuriwe Mungu! Naanza kuiona—naiamini. Yote yaweza kuwa tofauti. Au, afadhali, namwona yeye, namwamini yeye. “Mungu wangu atanisikia!” Naam, mimi, hata mimi! Ijapokuwa mimi ni wa kawaida na duni, nikijaza nafasi ndogo tu, hata sitakosekana sana niendapo zangu—hata mimi ninao uwezo wa kumfikia Mungu huyu asiye na Mwisho, nikiwa na uthabiti ya kwamba ananisikia. Nikiwa mmoja na Kristo, nikiongozwa na Roho Mtakatifu, nathubutu kusema: “Nitawaombea wengine, kwa maana nina hakika Mungu wangu atanisikiliza: ‘Mungu wangu atanisikia.’” Ni matarajio yaliyobarikiwa kama nini mbele yangu—kila wasiwasi wa kidunia na wa kiroho ukibadilishwa kwa amani ya Mungu, atunzaye vyote naye asikiaye maombi. Ni matarajio yaliyobarikiwa kama nini katika kazi yangu—kujua ya kuwa hata jibu likicheleweshwa kwa muda mrefu, na kukiwa na wito wa maombi mengi ya saburi na ya kudumu, kweli hubaki thabiti pasipo kukosa—“Mungu wangu atanisikia!”

Na ni matarajio yaliyobarikiwa kama nini kwa Kanisa la Kristo kama sisi sote tungeliyapa maombi mahali pake, kuipa imani katika Mungu mahali pake, au, afadhali, kumpa Mungu asikiaye maombi mahali pake! Je, hili si lile jambo moja kuu, ambalo wale, waanzao kwa kiasi kidogo kuona uhitaji wa dharura wa maombi, wanapaswa kwanza kabisa kuliombea. Mungu alipomwaga Roho mara kwa mara juu ya watu wake waombao, hapo mwanzo, aliweka sheria kwa nyakati zote: kadiri ya maombi, ndivyo kadiri ya Roho. Kila awezaye kusema, “Mungu wangu atanisikia,” na aungane katika dua ya bidii, ili katika Kanisa lote kweli hiyo irudishwe mahali pake pa kweli, na yale matarajio yaliyobarikiwa yatimizwe: Kanisa liombalo lililovikwa nguvu za Roho Mtakatifu.

6. “Mungu wangu atanisikia.” Ni uhitaji kama nini wa mafundisho ya Mungu!—Tunahitaji hili, ili kutuwezesha kulishika neno hili katika imani iliyo hai, na kulitumia kwa ukamilifu katika maombezi. Imekwisha nenwa, wala haiwezi kunenwa mara nyingi mno wala kwa bidii mno, ya kuwa jambo moja lililo la lazima kwa Kanisa la siku zetu ni, nguvu ya Roho Mtakatifu. Ni kwa sababu ni hivyo, upande wa Mungu, ndipo twaweza pia kusema kwa kweli ya kuwa, upande wa mwanadamu, jambo moja lililo la lazima ni, maombi zaidi, maombi zaidi ya kuamini na ya kudumu. Katika kunena juu ya upungufu wa nguvu ya Roho, na sharti la kuipokea, mtu mmoja alitumia usemi huu—kizuizi si katika mstari ulio wima, bali katika mstari ulio mlalo. Yaogopwa ya kuwa kiko katika yote mawili. Kuna mengi ya kuungamwa na kuondolewa ndani yetu kama Roho atafanya kazi kwa uhuru. Lakini ni hasa katika mstari ulio wima ambapo kizuizi kipo—kutazama juu, na kutegemea kwa kina, na kumlilia Mungu kwa nguvu, na maombi yenye nguvu ya imani yafuayo—haya yote yapungua kwa kusikitisha. Na ni hili hasa lililo jambo moja la lazima.

Je, sisi sote tusijiweke tayari kujifunza somo litakalofanya maombi yenye kushinda yawezekane—somo la imani iimbayo daima, “Mungu wangu atanisikia”? Ijapokuwa ni rahisi na ni la msingi, lahitaji mazoezi na saburi, lahitaji wakati na mafundisho ya mbinguni, ili kulijifunza sawasawa. Chini ya athari ya wazo angavu, au uzoefu uliobarikiwa, laweza kuonekana kana kwamba tunalijua somo kwa ukamilifu. Lakini tena na tena uhitaji utarudi wa kufanya haya kuwa maombi yetu ya kwanza—kwamba Mungu asikiaye maombi atufundishe kuyaamini, na hivyo kuomba sawasawa. Kama twatamani hivyo twaweza kumtumainia Yeye afurahiaye kusikia maombi na kuyajibu, Yeye aliyemtoa Mwanawe ili apate kutuombea sikuzote na kuomba pamoja nasi, na Roho wake Mtakatifu ili aombe ndani yetu, twaweza kuwa na hakika ya kuwa hakuna ombi atakalolisikia kwa hakika zaidi kuliko hili: kwamba ajidhihirishe kuwa Mungu asikiaye maombi, hata utu wetu wote upate kuitika, “Mungu wangu atanisikia.”

WITO WA KUOMBA ZAIDI