Katika Jina la Kristo

“Lo lote mtakaloomba kwa Jina langu, hilo nitalifanya. Mkiomba neno lo lote kwa Jina langu, nitalifanya. Mimi naliwateua ninyi, ili kwamba lo lote mtakalomwomba Baba kwa Jina langu awapeni. Amin, amin, nawaambieni, Lo lote mtakalomwomba Baba kwa Jina langu, atawapa. Hata sasa hamkuomba neno lo lote kwa Jina langu; ombeni, nanyi mtapata, furaha yenu iwe timilifu. Siku ile mtaomba kwa Jina langu.”—Yohana 14:13, 14; 15:16; 16:23, 24, 26.

Kwa Jina langu — imekaririwa mara sita. Bwana wetu alijua jinsi mioyo yetu ilivyo mizito kulipokea, naye alitamani sana kwamba tuamini kweli kweli ya kuwa Jina lake ndilo nguvu ambayo kwalo kila goti lapasa kupigwa, na ambayo kwalo kila ombi laweza kusikiwa, hata hakuchoka kulisema tena na tena: Kwa Jina langu! Kati ya lile la ajabu lo lote mtakaloomba, na lile la Kimungu nitalifanya, Baba atawapa, neno hili moja ndilo kiungo chepesi: Kwa Jina langu. Kuomba kwetu na kutoa kwake Baba yapasa vyote kuwa katika Jina la Kristo. Kila kitu katika maombi hutegemea kulifahamu hili — Kwa Jina langu.

Twajua jina ni nini: neno ambalo kwalo twaita akilini mwetu hali nzima na asili ya kitu. Ninaponena juu ya mwana-kondoo au simba, jina hilo mara humaanisha asili tofauti iliyo ya kila kimoja. Jina la Mungu lakusudiwa kuonyesha asili yake yote ya Kimungu na utukufu wake. Vivyo hivyo Jina la Kristo lamaanisha asili yake yote, nafsi yake na kazi yake, tabia yake na Roho yake. Kuomba katika Jina la Kristo ni kuomba katika muungano naye. Mtenda-dhambi amwaminipo Kristo kwanza, hujua na kufikiri juu ya ustahili wake na maombezi yake tu. Na hata mwisho kabisa huo ndio msingi mmoja wa uthabiti wetu. Lakini, kama vile mwaminio akuavyo katika neema na kuingia kwa ndani zaidi na kwa kweli zaidi katika muungano na Kristo — yaani, akaapo ndani yake — hujifunza ya kuwa kuomba katika Jina la Kristo humaanisha pia katika Roho yake, na katika kuimiliki asili yake, kama Roho Mtakatifu atupavyo. Tunapofahamu maana ya maneno haya, “Siku ile mtaomba kwa Jina langu” — siku ambayo katika Roho Mtakatifu Kristo alikuja kukaa ndani ya wanafunzi wake — hatutashangaa tena ukuu wa ahadi ile: “Lo lote mtakaloomba kwa Jina langu, nitalifanya.” Tutapata ufahamu fulani wa ulazima na uhakika usiobadilika wa sheria hii: kile kiombwacho katika Jina la Kristo, katika muungano naye, kutoka katika asili yake na Roho yake, sharti kitolewe. Kama vile asili ya maombi ya Kristo ikaavyo ndani yetu, nguvu yake ya maombi huwa yetu pia. Si kwamba kipimo cha kufikia kwetu au uzoefu wetu ndio msingi wa uthabiti wetu, bali unyofu na ukamilifu wa moyo wa kujisalimisha kwetu kwa yote tunayoyaona ya kuwa Kristo atafuta kuwa ndani yetu, ndio utakaokuwa kipimo cha ufaafu wetu wa kiroho na nguvu ya kuomba katika Jina lake. “Mkikaa ndani yangu,” asema, “ombeni mtakalo lo lote.” Tukiishi ndani yake, twapata nguvu ya kiroho ya kujitwalia Jina lake. Kama vile tawi lililojitoa kabisa kwa uhai na utumishi wa Mzabibu liwezavyo kutegemea ute wake wote na nguvu yake kwa matunda yake, vivyo hivyo mwaminio, ambaye kwa imani ameupokea utimilifu wa Roho ili umiliki uhai wake wote, aweza kweli kujitwalia nguvu yote ya Jina la Kristo.

Hapa duniani Kristo kama mwanadamu alikuja kufunua maana ya maombi. Ili kuomba katika Jina la Kristo yatupasa kuomba kama alivyoomba yeye duniani; kama alivyotufundisha kuomba; katika muungano naye, kama aombavyo sasa mbinguni. Yatupasa kwa upendo kumtafakari, na kwa imani kumpokea, kuwa Kielelezo chetu, Mwalimu wetu, Mwombezi wetu.

Kristo Kielelezo Chetu.

Maombi katika Kristo duniani na ndani yetu hayawezi kuwa mambo mawili tofauti. Kama vile alivyoko Mungu mmoja tu, aliye Roho, asikiaye maombi, ndivyo iko roho moja tu ya maombi yakubalikayo. Tunapotambua muda ambao Kristo aliutumia katika maombi, na jinsi matukio makuu ya maisha yake yote yalivyoshikamana na maombi ya pekee, twajifunza ulazima wa kutegemea kabisa na kuwasiliana moja kwa moja bila kukoma na ulimwengu wa mbinguni, kama twataka kuishi maisha ya mbinguni, au kutumia nguvu ya mbinguni kutuzunguka. Twaona jinsi jaribio la kufanya kazi kwa ajili ya Mungu na mbingu lilivyo la kipumbavu na lisilozaa matunda, bila kwanza katika maombi kupata uhai na nguvu ya mbinguni itumiliki. Kweli hii isipokaa ndani yetu, hatuwezi kujitwalia ipasavyo nguvu iliyo kuu ya Jina la Kristo. Kielelezo chake yatupasa kutufundisha maana ya Jina lake.

Juu ya ubatizo wake twasoma, “Yesu alipokwisha kubatizwa, naye akiomba, mbingu zikafunguliwa.” Ilikuwa katika maombi mbingu zilifunguliwa kwake, kwamba mbingu zikamshukia pamoja na Roho na sauti ya Baba. Katika nguvu ya haya aliongozwa nyikani, katika kufunga na kuomba ili yajaribiwe na kutwaliwa kikamilifu. Mapema katika huduma yake Marko aandika (1:35), “Na asubuhi na mapema sana kungali giza, akaondoka, akatoka akaenda mahali pasipokuwa na watu, akaomba huko.” Na baadaye kidogo Luka aeleza (5:16), “Makutano wakakusanyika ili kumsikiliza na kuponywa magonjwa yao. Lakini yeye akajitenga akaenda nyikani, akaomba.” Alijua jinsi utumishi mtakatifu kuliko yote, kuhubiri na kuponya, uwezavyo kuichosha roho; jinsi kuchangamana kupita kiasi na wanadamu kuwezavyo kulitia wingu ushirika na Mungu; jinsi wakati, wakati, wakati wa kutosha, uhitajiwavyo kama roho itapumzika na kushika mizizi ndani yake; jinsi hakuna mkazo wa wajibu miongoni mwa wanadamu uwezao kuiondoa haja kamili ya maombi mengi. Kama kuna mtu ye yote angeweza kuridhika na kuishi na kutenda sikuzote katika roho ya maombi, angekuwa ni Bwana wetu. Lakini hakuweza; alihitaji ziletewe tena akiba zake kwa nyakati za maombi zilizoendelea daima na kwa muda mrefu. Kulitumia Jina la Kristo katika maombi bila shaka kwatia ndani hili, kufuata kielelezo chake na kuomba kama alivyoomba yeye.

Juu ya usiku kabla ya kuwachagua mitume wake twasoma (Luka 6:12), “Aliondoka akaenda mlimani ili kuomba, akakesha usiku kucha katika kumwomba Mungu.” Hatua ya kwanza kuelekea kuundwa kwa Kanisa, na kutengwa kwa watu wawe mashahidi wake na warithi wake, ilimwita katika maombi ya pekee ya muda mrefu. Yote yalipaswa kufanywa sawasawa na kile kielelezo cha mlimani. “Mwana hawezi kutenda neno mwenyewe; Baba humwonyesha yote ayatendayo mwenyewe.” Ilikuwa katika usiku wa maombi alionyeshwa hayo.

Katika usiku uliokuwa kati ya kuwalisha wale elfu tano, Yesu alipojua ya kuwa walitaka kumtwaa kwa nguvu na kumfanya Mfalme, na kuenenda juu ya bahari, “akajitenga tena akaenda mlimani, yeye peke yake, ili kuomba” (Mathayo 14:23; Marko 6:46; Yohana 6:15). Ilikuwa mapenzi ya Mungu aliyokuja kuyatenda, na nguvu ya Mungu aliyopaswa kuidhihirisha. Hakuwa nayo kama milki yake mwenyewe; ilipaswa kuombewa na kupokewa kutoka juu. Tangazo la kwanza la kifo chake kilichokaribia, baada ya kumtoa Petro ukiri ya kuwa yeye ni Kristo, latanguliwa na maneno haya (Luka 9:18), “Ikawa alipokuwa akiomba peke yake.” Utangulizi wa kisa cha Kugeuka Sura ni (Luka 9:28), “Alipanda mlimani ili kuomba.” Ombi la wanafunzi, “Bwana, tufundishe kuomba” (Luka 11:1), lafuata baada ya, “Ikawa alipokuwa akiomba mahali fulani.” Katika maisha yake mwenyewe, katika kuchangamana kwake na Baba, katika yote alivyo na ayatendayo kwa ajili ya wanadamu, Kristo ambaye Jina lake twapaswa kulitumia ni Mtu wa maombi. Ni maombi yampayo nguvu yake ya kubariki, na hugeuza sura hata mwili wake kwa utukufu wa mbinguni. Ni maisha yake mwenyewe ya maombi yamfanyayo kuwa mwalimu wa wengine jinsi ya kuomba. Si zaidi sana ndipo yapasa yawe maombi, maombi peke yake, maombi mengi, yawezayo kutuwezesha kushiriki utukufu wake wa maisha yaliyogeuzwa sura, au kutufanya kuwa mfereji wa baraka na mafundisho ya mbinguni kwa wengine. Kuomba katika Jina la Kristo ni kuomba kama aombavyo yeye.

Kadiri mwisho ukaribiavyo, ni maombi zaidi tena. Wale Wayunani walipoomba kumwona, naye akanena juu ya kifo chake kilichokaribia, aliomba. Kaburini pa Lazaro aliomba. Katika usiku wa mwisho aliomba maombi yake kama Kuhani wetu Mkuu, ili tupate kujua ni nini ambacho dhabihu yake ingekishinda, na ni nini ambacho maombezi yake ya milele katika kiti cha enzi yangekuwa. Gethsemane aliomba maombi yake kama Mwathiriwa, Mwana-Kondoo akijitoa machinjoni. Msalabani bado yote ni maombi — maombi ya huruma kwa ajili ya wauaji wake; maombi ya mateso ya upatanisho katika giza nene; maombi katika kufa ya kuikabidhi roho yake kwa Baba kwa kumtumaini. (Kidokezo E.)

Maisha ya Kristo na kazi yake, mateso yake na kifo chake — yote yalikuwa maombi, yote kutegemea Mungu, kumtumaini Mungu, kupokea kutoka kwa Mungu, kujisalimisha kwa Mungu. Ukombozi wako, Ee mwaminio, ni ukombozi uliofanywa kwa maombi na maombezi: Kristo wako ni Kristo aombaye: maisha aliyokuishi kwa ajili yako, maisha aishiyo ndani yako, ni maisha ya kuomba, yenye kufurahia kumngoja Mungu na kupokea vyote kutoka kwake. Kuomba katika Jina lake ni kuomba kama alivyoomba yeye. Kristo ni Kielelezo chetu kwa sababu tu yeye ni Kichwa chetu, Mwokozi wetu, na Uhai wetu. Kwa uweza wa Uungu wake na wa Roho yake aweza kuishi ndani yetu: twaweza kuomba katika Jina lake, kwa sababu twakaa ndani yake naye ndani yetu.

Kristo Mwalimu Wetu.

Kristo alikuwa kile alichokifundisha. Mafundisho yake yote yalikuwa tu ufunuo wa jinsi alivyoishi, na — ashukuriwe Mungu — wa maisha aliyokuwa ayaishi ndani yetu. Kuwafundisha kwake wanafunzi kulikuwa kwanza kuamsha shauku, na hivyo kuwaandaa kwa kile ambacho kwa Roho Mtakatifu angekuwa na kukitenda ndani yao. Na tuamini kwa uthabiti mkubwa: yote aliyokuwa katika maombi, na yote aliyoyafundisha, yeye mwenyewe atayatoa. Alikuja kuitimiza sheria; zaidi sana ataitimiza injili katika yote aliyotufundisha, kuhusu la kuomba, na jinsi ya kuomba.

La kuomba. — Imekwisha kunenwa mara nyingine ya kuwa maombi ya moja kwa moja, yakilinganishwa na kutenda kwa ushirika na Mungu, ni sehemu ndogo tu ya maombi, na ya kuwa “katika maombi ya wale waombao vizuri zaidi na kwa wingi zaidi, huchukua nafasi isiyo na maana.” Kama tukiyachunguza kwa bidii yote Bwana wetu aliyoyanena juu ya maombi, tutaona ya kuwa haya si mafundisho yake. Katika Sala ya Bwana, katika mifano juu ya maombi, katika kielelezo cha mtoto aombaye mkate, cha kutafuta kwetu na kupiga hodi, katika wazo kuu la maombi ya imani, “Lo lote myaombayo, aminini ya kwamba mmeyapokea,” katika lile lo lote lililokaririwa mara nyingi la jioni ile ya mwisho — kila mahali Bwana wetu hutuhimiza na kututia moyo kutoa maombi dhahiri, na kutazamia majibu dhahiri. Ni kwa sababu tu tumeyafunga maombi mno kwa mahitaji yetu wenyewe, ndipo imedhaniwa kuwa lazima kuyaweka huru na sura ya ubinafsi, kwa kuyapa maombi hayo nafasi ndogo. Kama waaminio wangeamka mara moja kwa utukufu wa kazi ya maombezi, na kuona ya kuwa ndani yake, na katika kusihi dhahiri kwa ajili ya karama dhahiri juu ya nyanja na watu dhahiri, umo ushirika wetu ulio mkuu zaidi na Bwana wetu aliyetukuzwa, na nguvu yetu pekee ya kweli ya kuwabariki wanadamu, ingeonekana ya kuwa hakuwezi kuwa na ushirika ulio wa kweli zaidi na Mungu kuliko maombi haya dhahiri na majibu yake, ambayo kwayo twakuwa mfereji wa neema yake na uhai wake kwa wanadamu. Ndipo ushirika wetu na Baba ni kama ule ambao Mwana anao katika maombezi yake.

Jinsi ya kuomba. — Bwana wetu alitufundisha kuomba kwa siri, kwa unyofu, tukiwa na jicho kwa Mungu peke yake, kwa unyenyekevu, katika roho ya upendo usamehezao. Lakini kweli kuu aliyoirudia sikuzote ilikuwa hii: kuomba kwa imani. Naye aliifafanua imani hiyo, si kama kutumaini tu wema wa Mungu au nguvu yake, bali kama uhakika dhahiri ya kuwa tumekwisha kupokea kile hasa tukiombacho. Kisha, kwa kuuangalia ucheleweshaji wa jibu, alisisitiza juu ya kudumu na bidii. Yatupasa kuwa wafuasi wa wale “ambao kwa imani na uvumilivu wanazirithi ahadi” — ile imani ipokeayo ahadi, na kujua ya kuwa inacho kile ilichokiomba — ule uvumilivu upatao ahadi na kuirithi baraka. Ndipo tutajifunza kufahamu ni kwa nini Mungu, aahidiye kuwapatia haki wateule wake upesi, huvumiliana nao katika ucheleweshaji unaoonekana. Ni ili imani yao itakaswe na yote yaliyo ya mwili, na kujaribiwa na kutiwa nguvu iwe ile nguvu ya kiroho iwezayo kutenda yote — yenye kuweza hata kuitupa milima moyoni mwa bahari.

Kristo Kama Mwombezi Wetu.

Tumemtazama Kristo katika maombi yake; tumeyasikiliza mafundisho yake juu ya jinsi itupasavyo kuomba; ili kujua kikamilifu maana ya kuomba katika Jina lake, yatupasa kumjua yeye pia katika maombezi yake ya mbinguni.

Fikiri tu maana yake: ya kuwa kazi yake yote ya wokovu itendwayo kutoka mbinguni bado inaendelezwa, kama vile duniani, katika kuwasiliana bila kukoma na, na maombezi ya moja kwa moja kwa, Baba, atendaye yote katika yote, aliye Yote katika yote. Kila tendo la neema katika Kristo limetanguliwa na, na hudaiwa nguvu yake kwa, maombezi. Mungu ameheshimiwa na kutambuliwa kuwa Mtendaji wake. Katika kiti cha enzi cha Mungu, ushirika wa Kristo ulio mkuu zaidi na Baba, na ushiriki wake katika kuutawala kwake ulimwengu, umo katika maombezi. Kila baraka itushukiayo kutoka juu huchukua juu yake muhuri kutoka kwa Mungu: kwa njia ya maombezi ya Kristo. Maombezi yake si kitu ila tunda na utukufu wa upatanisho wake. Alipojitoa mwenyewe kuwa dhabihu kwa Mungu kwa ajili ya wanadamu, alidhihirisha ya kuwa moyo wake wote ulikuwa na kusudi moja: utukufu wa Mungu, katika wokovu wa wanadamu. Katika maombezi yake kusudi hili kuu latimizwa: hutukuza Baba kwa kuomba na kupokea vyote kutoka kwake; huwaokoa wanadamu kwa kuwakirimia kile alichokipata kutoka kwa Baba. Maombezi ya Kristo ni utukufu wa Baba, utukufu wake mwenyewe, utukufu wetu.

Na sasa, huyu Kristo, Mwombezi, ndiye uhai wetu; ndiye Kichwa chetu, nasi tu mwili wake; Roho yake na uhai wake hupumua ndani yetu. Kama ilivyo mbinguni ndivyo iwapo duniani, maombezi ni njia iliyochaguliwa na Mungu, njia ya Mungu pekee ya baraka. Na tujifunze kutoka kwa Kristo ni utukufu gani ulio ndani yake; ni ipi njia ya kutumia nguvu hii ya ajabu; ni sehemu gani inayopaswa kuichukua katika kazi kwa ajili ya Mungu.

Utukufu wake. — Kwa maombezi, kuliko kwa kitu kingine cho chote, twamtukuza Mungu. Kwayo twamtukuza Kristo. Kwayo twaleta baraka kwa Kanisa na kwa ulimwengu. Kwayo twapata utukufu wetu ulio mkuu zaidi — ile nguvu kama ya Mungu ya kuwaokoa wanadamu.

Njia ya kuufikia. — Paulo aandika, “Enendeni katika upendo, kama Kristo naye alivyotupenda sisi, akajitoa nafsi yake kwa ajili yetu, sadaka kwa Mungu.” Tukiishi kama Kristo alivyoishi, sisi nasi, kama alivyofanya yeye, tutajitoa wenyewe, kwa maisha yetu yote, kwa Mungu, ili atutumie kwa ajili ya wanadamu. Tukiisha kufanya hivi mara moja, kujitoa wenyewe, tusijitafutie tena kitu cho chote kwa nafsi zetu, bali kwa wanadamu, na hilo kwa Mungu, ili yeye atutumie, na kutukirimia kile tuwezacho kuwapa wengine, maombezi yatakuwa kwetu, kama yalivyo katika Kristo mbinguni, kazi kuu ya maisha yetu. Na kama wakati wo wote wazo laja ya kuwa wito huo ni wa juu mno, au kazi hiyo ni kubwa mno, imani katika Kristo, Kristo Aombezaye, aishiye ndani yetu, itatupa ushindi. Tutamsikiliza yeye aliyesema, “Kazi nizifanyazo mimi, ninyi nanyi mtazifanya; naam, na kazi kubwa kuliko hizo mtazifanya.” Tutakumbuka ya kuwa hatuko chini ya sheria, pamoja na udhaifu wake, bali chini ya neema pamoja na uweza wake wote, itendayo yote ndani yetu. Tutamwamini tena yeye aliyetuambia, Simama, uende, naye akatupa — nasi tukaipokea — uhai wake kuwa nguvu yetu. Tutadai upya utimilifu wa Roho ya Mungu kuwa akiba yake ya kututosha kwa haja yetu, na kumhesabu kuwa ndani yetu Roho wa Maombezi, atufanyaye kuwa kitu kimoja na Kristo katika maombezi yake. Ee! na tuishike tu nafasi yetu — tukijitoa wenyewe, kama yeye, ndani yake, kwa Mungu kwa ajili ya wanadamu.

Ndipo tutafahamu sehemu ambayo maombezi yanapaswa kuichukua katika kazi ya Mungu kupitia sisi. Hatutajaribu tena kufanya kazi kwa ajili ya Mungu, na kumwomba aifuatishe baraka yake. Tutafanya kama alivyofanya yule rafiki wa usiku wa manane, kama alivyofanya Kristo duniani, na afanyavyo sikuzote mbinguni — kwanza tutapokea kutoka kwa Mungu, kisha tutawageukia wanadamu kuwapa kile alichotupa. Kama ilivyokuwa kwa Kristo, tutaifanya kazi yetu kuu, hatutahesabu wakati wo wote au taabu yo yote kuwa kubwa mno, ili kupokea kutoka kwa Baba; ndipo kuwapa wanadamu kutakuwa katika nguvu.

Enyi watumishi wa Kristo! enyi watoto wa Mungu! iweni na moyo wa ushujaa. Msiache hofu yo yote ya udhaifu au umaskini iwafanye kuogopa — ombeni katika Jina la Kristo. Jina lake ni yeye mwenyewe, katika ukamilifu wake wote na nguvu yake yote. Yeye ni Kristo aliye hai, naye mwenyewe atalifanya Jina lake kuwa nguvu ndani yenu. Msiogope kulisihi Jina hilo; ahadi yake ni kamba ya nyuzi tatu isiyoweza kukatika: Lo lote mtakaloomba — kwa Jina langu — LITAFANYIKA KWENU.

RAI YA MAOMBI ZAIDI