Roho ya Kuomba

“Nami nitawamwagia nyumba ya Daudi roho ya neema na kuomba.”—Zek. 12:10.

“Kadhalika Roho naye hutusaidia udhaifu wetu, kwa maana hatujui kuomba jinsi itupasavyo, lakini Roho mwenyewe hutuombea kwa kuugua kusikoweza kutamkwa. Naye aichunguzaye mioyo aijua nia ya Roho ilivyo, kwa kuwa huwaombea watakatifu kama apendavyo Mungu.”—Rum. 8:26, 27.

“Kwa sala zote na maombi, mkiomba kila wakati katika Roho, mkikesha kwa jambo hilo na kudumu katika kuwaombea watakatifu wote.”—Efe. 6:18.

“Mkisali katika Roho Mtakatifu.”—Yuda 20.

Roho Mtakatifu amepewa kila mtoto wa Mungu awe uzima wake. Anakaa ndani yake, si kama Kiumbe kilicho peke yake katika sehemu moja ya asili yake, bali kama uzima wake wenyewe. Yeye ndiye uweza au nguvu ya Kimungu ambayo kwayo uzima wake unadumishwa na kutiwa nguvu. Yote ambayo mwamini ameitwa kuwa au kuyatenda, Roho Mtakatifu aweza na atayatenda ndani yake. Kama hamjui au hajitii kwa Mgeni Mtakatifu, Roho Mbarikiwa hawezi kutenda kazi, na uzima wake ni wa kigonjwa, umejaa kushindwa na dhambi. Kadiri anavyojitoa, na kungoja, na kuutii uongozi wa Roho, Mungu hutenda ndani yake yote yampendezayo machoni pake.

Roho huyu Mtakatifu ni, kwanza kabisa, Roho ya kuomba. Aliahidiwa kuwa “roho ya neema na kuomba,” neema kwa ajili ya kuomba. Alipelekwa mioyoni mwetu kuwa “Roho wa kufanywa wana, ambaye kwa huyo twalia, Aba, Baba.” Yeye hutuwezesha kusema, kwa imani ya kweli na kwa ufahamu uzidio wa maana yake, Baba yetu uliye mbinguni. “Huwaombea watakatifu kama apendavyo Mungu.” Nasi tuombapo katika Roho, ibada yetu huwa kama Mungu aitakavyo iwe, “katika roho na kweli.” Kuomba ni kupumua tu kwa Roho ndani yetu; nguvu katika kuomba hutoka katika nguvu ya Roho ndani yetu, atakayemngojewa na kutumainiwa. Kushindwa katika kuomba hutoka katika udhaifu wa kazi ya Roho ndani yetu. Maombi yetu ni kipimo cha kadiri ya kazi ya Roho ndani yetu. Ili kuomba vema, uzima wa Roho lazima uwe sawa ndani yetu. Kwa maana kuomba ile sala yenye nguvu, ifanyayo mengi, ya mtu mwenye haki, kila kitu hutegemea kujaa Roho.

Kuna mafunzo matatu rahisi sana ambayo mwamini, atakaye kufurahia baraka ya kufundishwa kuomba na Roho ya kuomba, hana budi kuyajua. La kwanza ni: Amini ya kuwa Roho anakaa ndani yako (Efe. 1:13). Ndani kabisa ya vilindi vya ndani vya nafsi yake, vilivyofichwa na visivyohisiwa, kila mtoto wa Mungu anaye Roho Mtakatifu, Mwenye nguvu, wa Mungu akikaa ndani yake. Analijua hilo kwa imani, imani ambayo, ikilikubali neno la Mungu, huyaona yale ambayo bado haoni dalili yake. “Twapokea ahadi ya Roho kwa njia ya imani.” Maadamu tunapima nguvu yetu, ya kuomba vema na kwa kudumu, kwa yale tuyahisiyo, au tudhaniyo tunaweza kuyatimiza, tutakata tamaa tusikiapo jinsi tunavyopaswa kuomba sana. Lakini tuaminipo kwa utulivu ya kuwa, katikati ya udhaifu wetu wote tunaoutambua, Roho Mtakatifu akiwa Roho ya kuomba anakaa ndani yetu, kwa kusudi hilo hasa la kutuwezesha kuomba kwa namna na kwa kipimo kama Mungu angetaka, mioyo yetu itajaa tumaini. Tutatiwa nguvu katika uhakika ule ulio katika shina lenyewe la maisha ya Kikristo yenye furaha na yenye matunda, ya kwamba Mungu ametuandalia tele ili tuwe vile atakavyo tuwe. Tutaanza kuupoteza mzigo wetu na hofu na kukata tamaa juu ya kuomba kwetu kwa kutosha, kwa sababu twaona ya kuwa Roho Mtakatifu mwenyewe ataomba, anaomba, ndani yetu.

Funzo la pili ni: Jihadhari zaidi ya kila kitu usije ukamhuzunisha Roho Mtakatifu (Efe. 4:30). Ukifanya hivyo, awezaje kutenda ndani yako ile hisia ya utulivu, na ya kumtumaini, na iliyobarikiwa ya muungano na Kristo, ambao huzifanya sala zako zimpendeze Baba? Jihadhari usije ukamhuzunisha kwa dhambi, kwa kutokuamini, kwa ubinafsi, kwa kutokuwa mwaminifu kwa sauti yake katika dhamiri yako. Usidhani ya kwamba kumhuzunisha ni jambo lisiloepukika: hilo hukata mishipa yenyewe ya nguvu zako. Usidhani ya kuwa haiwezekani kuitii amri isemayo, “Msimhuzunishe Roho Mtakatifu wa Mungu.” Yeye mwenyewe ndiye uweza wenyewe wa Mungu wa kukufanya utii. Dhambi ambayo huinuka ndani yako kinyume cha mapenzi yako, ukileleo wa uvivu, au kiburi, au kujitakia, au tamaa iinukayo katika mwili, mapenzi yako yaweza, katika nguvu ya Roho, kuukataa mara moja, na kuutupa juu ya Kristo na damu yake, na ushirika wako na Mungu hurejeshwa papo hapo. Mpokee kila siku Roho Mtakatifu awe Kiongozi wako na Uzima wako na Nguvu zako; waweza kumtumainia kufanya moyoni mwako yote yapasayo kufanywa humo. Yeye, Yule asiyeonekana na asiyehisiwa, lakini ajulikanaye kwa imani, hutoa humo, bila kuonekana na bila kuhisiwa, upendo na imani na nguvu ya utii uihitajiyo, kwa sababu humdhihirisha Kristo asiyeonekana ndani yako, kama kwa hakika Uzima wako na Nguvu zako. Usimhuzunishe Roho Mtakatifu kwa kutokumtumaini, kwa sababu huhisi kuwako kwake ndani yako.

Hasa katika jambo la kuomba usimhuzunishe. Usitegemee, umtumainipo Kristo akuingize katika maisha mapya, yenye afya, ya kuomba, ya kwamba utaweza mara moja kuomba kwa wepesi na kwa nguvu na kwa furaha kama utakavyo. La; huenda isije mara moja. Bali inama tu kimya mbele za Mungu katika ujinga wako na udhaifu wako. Hiyo ndiyo sala iliyo bora na ya kweli kuliko zote, kujiweka mbele za Mungu kama ulivyo hasa, na kumtegemea Roho aliyefichwa akiomba ndani yako. “Hatujui kuomba jinsi itupasavyo”; ujinga, ugumu, kushindana, hutia alama juu ya maombi yetu njia yote. Lakini, “Roho naye hutusaidia udhaifu wetu.” Jinsi gani? “Roho mwenyewe,” ndani zaidi kuliko mawazo yetu au hisia zetu, “hutuombea kwa kuugua kusikoweza kutamkwa.” Ukishindwa kupata maneno, maneno yako yaonekanapo ya baridi na dhaifu, amini tu: Roho Mtakatifu anaomba ndani yangu. Kaa kimya mbele za Mungu, umpe wakati na nafasi; kwa majira yake utajifunza kuomba. Jihadhari usije ukamhuzunisha Roho ya kuomba, kwa kutokumheshimu kwa kujisalimisha kwa uvumilivu na kwa kumtumaini kwa maombezi yake ndani yako.

Funzo la tatu: “mjazwe Roho” (Efe. 5:18). Nadhani tumekwisha kuiona maana ya ile kweli kuu: Ni maisha ya kiroho yenye afya peke yake yawezayo kuomba vema. Amri huja kwa kila mmoja wetu: “mjazwe Roho.” Hilo ladokeza ya kwamba, ijapokuwa wengine huridhika na mwanzo tu, na kipimo kidogo cha kutenda kazi kwa Roho, ni mapenzi ya Mungu ya kwamba tujazwe Roho. Hilo lamaanisha, kwa upande wetu, ya kwamba nafsi yetu yote yapasa ijisalimishe kabisa kwa Roho Mtakatifu, imilikiwe na kuongozwa naye peke yake. Na, kwa upande wa Mungu, ya kwamba twaweza kumtumainia na kumtazamia Roho Mtakatifu ili aumiliki na kutujaza. Je! kushindwa kwetu katika kuomba si dhahiri kumetokana na sisi kutokumpokea Roho ya kuomba awe uzima wetu; na sisi kutokujisalimisha kabisa kwake, ambaye Baba alimtoa awe Roho wa Mwanawe, kutenda uzima wa Mwana ndani yetu? Na tuwe, walau kusema jambo dogo kabisa, tayari kumpokea, kujisalimisha kwa Mungu na kumtumaini kwa ajili ya jambo hilo. Tusije tena kwa kusudi tukamhuzunisha Roho Mtakatifu kwa kukataa, kwa kupuuza, kwa kusita kutafuta kumpata kwa ukamilifu kama alivyo tayari kujitoa kwetu. Kama tumekwisha kuona hata kidogo ya kuwa kuomba ndilo hitaji kuu la kazi yetu na la Kanisa, kama tumekwisha kutamani au kuazimia hata kidogo kuomba zaidi, na tugeukie chanzo chenyewe cha uweza wote na baraka—na tuamini ya kuwa Roho ya kuomba, hata katika utimilifu wake, ni yetu.

Sote twakiri nafasi ambayo Baba na Mwana wanayo katika sala yetu. Ni kwa Baba tuombayo, na ambaye kwake twatazamia jibu. Ni katika ustahili, na jina, na uzima wa Mwana, tukikaa ndani yake na yeye ndani yetu, ndipo tunapotumaini kusikiwa. Lakini je! tumefahamu ya kuwa katika Utatu Mtakatifu Nafsi zote Tatu zina nafasi sawa katika sala, na ya kuwa imani katika Roho Mtakatifu wa maombezi akiomba ndani yetu ni ya lazima kama ilivyo imani katika Baba na Mwana? Jinsi tulivyo na jambo hili wazi katika maneno haya, “Kwa yeye Kristo twaweza sote kumkaribia Baba katika Roho mmoja.” Kama vile sala lazima iwe kwa Baba, na kwa njia ya Mwana, vivyo hivyo lazima iwe katika Roho. Naye Roho hawezi kuomba ndani yetu kwa njia nyingine, ila kama akaavyo ndani yetu. Ni hapo tu tunapojitoa kwa Roho aishiye na kuomba ndani yetu, ndipo utukufu wa Mungu asikiaye sala, na upatanishi wa Mwana uliobarikiwa daima na wenye matokeo kuliko yote, unapoweza kujulikana kwetu katika nguvu zake. (Kidokezo D.)

Funzo letu la mwisho: Ombeni katika Roho kwa ajili ya watakatifu wote (Efe. 6:18). Roho, aitwaye “roho ya kuomba,” yeye pia na kwa namna ya pekee ni Roho wa maombezi. Yasemwa juu yake, “Roho mwenyewe hutuombea kwa kuugua kusikoweza kutamkwa.” “Huwaombea watakatifu.” Ni neno lilo lile litumiwalo juu ya Kristo, “ambaye naye atuombea.” Wazo lenyewe hasa ni la upatanisho—mtu mmoja akimsihi kwa ajili ya mwingine. Roho wa maombezi aumilikipo moyo wetu kabisa, ubinafsi wote, kana kwamba tungemtaka awe mbali na maombezi yake kwa ajili ya wengine, na kumpata kwa ajili yetu peke yetu, huondolewa, nasi twaanza kujinufaisha kwa pendeleo letu la ajabu la kuwasihi wanadamu. Twatamani kuishi maisha ya Kikristo ya kujitoa dhabihu ya kujiteketeza kwa ajili ya wengine, kadiri moyo wetu ujisalimishavyo bila kukoma kwa Mungu ili kupata baraka yake kwa ajili ya wale walio karibu nasi. Ndipo maombezi huwa, si tukio au sehemu ya mara kwa mara ya sala zetu, bali shabaha yao kuu ile moja. Ndipo kuomba kwa ajili yetu wenyewe huchukua nafasi yake ya kweli, kuwa tu njia ya kutuandaa vizuri zaidi ili tuitende huduma yetu ya maombezi kwa matokeo zaidi.

Je! naruhusiwa kusema neno la faragha sana kwa kila mmoja wa wasomaji wangu? Nimemsihi Mungu kwa unyenyekevu anipe kile niwezacho kuwapa—nuru ya Kimungu na msaada wa kweli wa kuyaacha maisha ya kushindwa katika kuomba, na kuingia, hata sasa, na mara moja, katika maisha ya maombezi ambayo Roho Mtakatifu aweza kuwawezesha kuyaishi. Yaweza kutendeka kwa tendo rahisi la imani, kwa kudai utimilifu wa Roho, yaani, kipimo kamili cha Roho ambacho, machoni pa Mungu, waweza kukipokea, na kwa hiyo yeye yu tayari kukitoa. Je! hutakubali, hata sasa, jambo hili kwa imani?

Niwakumbushe yale yatendekayo wakati wa kuongoka. Wengi wetu, labda wewe pia, kwa kitambo tulitafuta amani katika juhudi na mashindano ya kuiacha dhambi na kumpendeza Mungu. Lakini hukuipata hivyo. Amani ya msamaha wa Mungu ilikuja kwa imani, kwa kuliamini neno la Mungu juu ya Kristo na wokovu wake. Ulikuwa umesikia habari za Kristo kuwa ni kipawa cha upendo wake, ulijua ya kuwa yeye alikuwa kwa ajili yako pia, ulikuwa umehisi misukumo na mvuto wa neema yake; lakini hata ulipompokea kwa imani katika neno la Mungu kuwa kipawa cha Mungu kwako, ndipo ulipoijua ile amani na furaha awezayo kuitoa. Kumwamini yeye na upendo wake wa kuokoa kulileta tofauti yote, na kukageuza uhusiano wako kutoka wa mmoja aliyekuwa akimhuzunisha sikuzote, hata kuwa wa mmoja ampendaye na kumtumikia. Na bado, baada ya kitambo, umestaajabu mara elfu ya kuwa wampenda na kumtumikia vibaya hivyo.

Wakati wa kuongoka kwako ulijua machache juu ya Roho Mtakatifu. Baadaye ulisikia habari za kukaa kwake ndani yako, na kuwa kwake uweza wa Mungu ndani yako kwa yote Baba akusudiayo uwe, na bado kukaa kwake na kutenda kazi kwake ndani yako kumekuwa jambo lisilo dhahiri na lisilo bayana, wala si chanzo cha furaha au nguvu kwa vigumu. Wakati wa kuongoka ulikuwa bado hujajua hitaji lako kwake, na kidogo zaidi ni yale uwezayo kuyatazamia kwake. Lakini kushindwa kwako kumekufundisha hilo. Na sasa waanza kuona jinsi ulivyokuwa ukimhuzunisha, kwa kutokumtumaini na kutokumfuata, kwa kutokumruhusu atende ndani yako mapenzi yote ya Mungu.

Haya yote yaweza kubadilika. Kama vile wewe, baada ya kumtafuta Kristo, na kumwomba, na kujaribu bila kufanikiwa kumtumikia, ulivyopata raha kwa kumpokea kwa imani, vivyo hivyo waweza hata sasa kujisalimisha kwa uongozi kamili wa Roho Mtakatifu, na kumdai na kumpokea ili atende ndani yako yale Mungu ayatakayo. Je! hutafanya hivyo? Mpokee tu kwa imani kuwa kipawa cha Kristo, awe Roho wa maisha yako yote, wa maisha yako ya kuomba pia, nawe waweza kumtumainia achukue uongozi. Ndipo waweza kuanza, ujaposikia dhaifu kiasi gani, na kutoweza kuomba vema, kuinama mbele za Mungu kwa kimya, ukiwa na uhakika ya kuwa atakufundisha kuomba.

Ndugu yangu mpendwa, kama vile ulivyompokea Kristo kwa imani kwa kujua, ili upate msamaha, waweza sasa kwa kujua, kwa imani iyo hiyo, kumpokea Kristo atoaye Roho Mtakatifu ili afanye kazi yake ndani yako. “Kristo alitukomboa, ili tupate kuipokea ahadi ya Roho kwa njia ya imani.” Piga magoti, na uamini tu ya kuwa Bwana Kristo, abatizaye kwa Roho Mtakatifu, sasa, kwa kuitikia imani yako, aanza ndani yako maisha yaliyobarikiwa ya kuionja kwa ukamilifu nguvu ya Roho akaaye ndani. Mtegemee kwa uhakika mkuu kuliko yote, mbali na hisia zote au uzoefu wote, kuwa Roho ya kuomba na ya maombezi ili afanye kazi yake. Fanya upya tendo hilo la imani kila asubuhi, kila mara uombapo; mtumaini, kinyume cha kila dalili, atende ndani yako,—uwe na hakika ya kuwa anatenda kazi,—naye atakupa kuijua furaha ya Roho Mtakatifu ilivyo, kuwa nguvu ya maisha yako.

“Nitaimwaga roho ya kuomba.” Je! huanzi kuona ya kuwa siri ya kuomba ni siri ya kukaa kwa Mungu ndani. Mungu mbinguni hutoa Roho wake mioyoni mwetu awe humo uweza wa Kimungu aombaye ndani yetu, na kutuvuta juu kwa Mungu wetu. Mungu ni Roho, wala hakuna kitu ila uzima na Roho ulio kama huo ndani yetu uwezao kushirikiana naye. Ni kwa ajili ya hili mwanadamu aliumbwa, ili Mungu akae na kutenda kazi ndani yake, na kuwa uzima wa uzima wake. Ni kukaa huku kwa Mungu ndani ambako dhambi ilikupoteza. Ni huku Kristo alikuja kukudhihirisha katika maisha yake, kutushindia tena kwa mauti yake, na tena kutupa kwa kurudi tena kutoka mbinguni katika Roho ili aishi ndani ya wanafunzi wake. Ni huku, kukaa kwa Mungu ndani kwa njia ya Roho, ndiko peke yake kuwezako kufafanua na kutuwezesha kuzitwaa ahadi zile za ajabu zilizotolewa kwa kuomba. Mungu hutoa Roho kuwa Roho ya Kuomba pia, ili audumishe uzima wake wa Kimungu ndani yetu kuwa uzima ambao katika huo maombi hupanda juu daima.

Pasipo Roho Mtakatifu hakuna mtu awezaye kumwita Yesu Bwana, wala kulia, Aba, Baba; hakuna mtu awezaye kuabudu katika roho na kweli, wala kuomba bila kukoma. Roho Mtakatifu amepewa mwamini ili awe na kutenda ndani yake yote Mungu amtakayo awe au atende. Amepewa yeye hasa kuwa Roho ya kuomba na ya dua. Je! si dhahiri ya kuwa kila kitu katika kuomba hutegemea sisi kumtumaini Roho Mtakatifu ili afanye kazi yake ndani yetu; tukijisalimisha kwa uongozi wake, tukitegemea kwake peke yake na kwa ukamilifu?

Twasoma, “Stefano, mtu aliyejaa imani na Roho Mtakatifu.” Haya mawili huenda pamoja sikuzote, kwa kadiri iliyo sawasawa kila moja na mwenzake. Kadiri imani yetu ionavyo na kumtumaini Roho aliye ndani yetu ili aombe, na kumngojea, ndivyo atakavyoifanya kazi yake; nayo ni ile shauku ya kutamani, na ile dua ya bidii, na ile imani iliyo dhahiri ambayo Baba huitafuta. Basi na tumjue yeye, na katika imani ya Kristo ampanaye bila kukoma, na tusitawishe uthabiti uliohakikishwa, ya kuwa twaweza kujifunza kuomba kama Baba atakavyo tuombe.

RAI YA MAOMBI ZAIDI