Siri ya Maombi Yenye Nguvu

“Yo yote myaombayo mkisali, aminini ya kwamba mnayapokea, nayo yatakuwa yenu.”—Marko 11:24.

Hapa tunayo muhtasari wa mafundisho ya Bwana wetu Yesu juu ya maombi. Hakuna kitu kitakachotusaidia zaidi kutushawishi juu ya dhambi ya uzembe wetu katika maombi, kutugundulia sababu zake, na kutupa ujasiri wa kutumaini ukombozi kamili, kama kujifunza kwa bidii na kisha kuyakubali kwa imani mafundisho hayo. Kadiri tunavyoingia kwa moyo wote katika nia ya Bwana wetu mbarikiwa, na kujiweka tayari kufikiri juu ya maombi kama Yeye alivyofikiri, ndivyo maneno yake yatakavyokuwa kwa hakika kama mbegu zilizo hai. Yatakua na kuzaa ndani yetu tunda lake,—maisha na matendo yanayolingana kabisa na kweli ya Kimungu iliyomo ndani yake. Na tuamini hili: Kristo, Neno la Mungu lililo hai, hutoa katika maneno yake nguvu ya Kimungu ihuishayo, iletayo yale yasemwayo, itendayo ndani yetu yale ayatakayo, ambayo kwa kweli hutuandaa na kutuwezesha kwa yote ayadaiyo. Jifunze kuyatazama mafundisho yake juu ya maombi kuwa ahadi dhahiri ya yale ambayo Yeye, kwa Roho wake Mtakatifu akaaye ndani yako, atakayoyatenda ndani ya utu wako hasa na tabia yako.

Bwana wetu hutupa alama tano, au vipengele muhimu, vya maombi ya kweli. Lazima kuwe, kwanza, shauku ya moyo; kisha kudhihirishwa kwa shauku hiyo katika maombi; pamoja na hayo, imani ipelekayo ombi kwa Mungu; katika imani hiyo, kukubali jibu la Mungu; kisha huja kuionja baraka iliyotamaniwa. Yaweza kusaidia kuupa fikira zetu uhakika, kama kila mmoja wetu atachukua ombi dhahiri ambalo kwalo tungependa kujifunza kuomba kwa imani. Au, labda afadhali zaidi, twaweza sote kuungana na kuchukua jambo lile moja lililokuwa likishughulisha fikira zetu. Tumekuwa tukinena juu ya kushindwa katika maombi; kwa nini tusichukue kuwa lengo la shauku na dua ile “neema ya dua,” na kusema, Nataka kuomba na kupokea kwa imani nguvu ya kuomba kama vile, na kwa kadiri ile, Mungu wangu anitakiavyo? Na tuyatafakari maneno ya Bwana wetu, katika matumaini ya kwamba atatufundisha jinsi ya kuomba kwa ajili ya baraka hii.

1. “Yo yote mtakayo.”—Shauku ndiyo nguvu ya siri iusongayo ulimwengu wote wa watu walio hai, na kuiongoza njia ya kila mmoja. Basi shauku ndiyo roho ya maombi, na sababu ya maombi yasiyotosha au yasiyofanikiwa mara nyingi hupatikana katika upungufu au udhaifu wa shauku. Wengine waweza kutia shaka juu ya hili: wana hakika ya kwamba wametamani kwa bidii sana kile waombacho. Lakini wakifikiri kama shauku yao ilikuwa kweli ya moyo wote kama Mungu apendavyo, kama thamani ya mbinguni ya baraka hizi idaivyo, waweza kufikia kuona kwamba kwa kweli ni upungufu wa shauku uliokuwa sababu ya kushindwa. Yaliyo kweli juu ya Mungu ni kweli juu ya kila baraka yake, tena ni kweli zaidi kadiri baraka ilivyo ya kiroho zaidi: “Nanyi mtanitafuta na kuniona, mtakaponitafuta kwa moyo wenu wote” (Yeremia 29:13). Katika habari za Yuda siku za Asa imeandikwa, “Walimtafuta kwa nia yao yote” (2 Nyakati 15:15). Mkristo mara nyingi aweza kuwa na shauku za bidii sana za baraka za kiroho. Lakini pamoja na hizo kuna shauku nyingine katika maisha yake ya kila siku zishikazo nafasi kubwa katika mambo yampendezayo na mapenzi yake. Shauku za kiroho haziteki moyo wote. Hushangaa kwamba maombi yake hayasikiwi. Ni kwa sababu tu Mungu autaka moyo wote. “Bwana, Mungu wako, Bwana ndiye mmoja, basi mpende Bwana, Mungu wako, kwa moyo wako wote.” Sheria hii haibadiliki: Mungu hujitoa Mwenyewe, hujitoa kabisa, kwa wale wa moyo wote wanaojitoa wenyewe kabisa kwake. Sikuzote hutupa kwa kadiri ya shauku ya moyo wetu. Lakini si kama tuifikiriavyo, bali kama Yeye aionavyo. Kama zikiwapo shauku nyingine zilizo karibu zaidi nasi, zenye moyo wetu kuliko Yeye Mwenyewe na uwepo wake, huziacha hizo zitimizwe, na shauku zishughulishazo saa ya maombi haziwezi kujaliwa.

Twatamani kipawa cha maombezi, neema na nguvu ya kuomba kwa halali. Mioyo yetu lazima ivutwe mbali na shauku nyingine: lazima tujitoe kabisa kwa hili moja. Lazima tuwe tayari kuishi kabisa katika maombezi kwa ajili ya ufalme. Kwa kukaza jicho letu juu ya heri na uhitaji wa neema hii, kwa kufikiri juu ya hakika ya kwamba Mungu atatupa, kwa kujitoa kwake, kwa ajili ya ulimwengu upoteao, shauku yaweza kutiwa nguvu, na hatua ya kwanza kupigwa kuelekea kumiliki baraka itamaniwayo. Na tuitafute neema ya maombi, kama tumtafutavyo Mungu ambaye kwake itatuunganisha, “kwa shauku yetu yote”; twaweza kuitegemea ahadi, “Atawatimizia haja wamchao.” Tusiogope kumwambia, “Naitamani kwa moyo wangu wote.”

2. “Yo yote myatakayo mkisali.”—Shauku ya moyo lazima iwe kudhihirishwa kwa midomo. Bwana wetu Yesu zaidi ya mara moja aliwauliza wale waliomlilia rehema, “Wataka nikutendee nini?” Alitaka waseme watakalo. Kulinena kwa kinywa kuliuamsha utu wao wote katika tendo, kuliwaleta katika kugusana naye, na kuyaamsha matarajio yao. Kuomba ni kuingia mbele za Mungu, kudai na kupata usikivu wake, kuwa na shughuli dhahiri naye juu ya ombi fulani, kuukabidhi uhitaji wetu kwa uaminifu wake na kuuacha hapo: ni katika kufanya hivyo ndipo tunapotambua kabisa kile tukitafutacho.

Wako wengine ambao mara nyingi huchukua shauku zenye nguvu mioyoni mwao, bila kuzileta kwa Mungu katika kudhihirishwa waziwazi kwa maombi dhahiri na yaliyorudiwarudiwa. Wako wengine waendao kwa Neno na ahadi zake ili kuitia nguvu imani yao, lakini hawaipi nafasi ya kutosha ile kumwomba Mungu waziwazi kunakoisaidia nafsi kufikia uhakika ya kwamba jambo lile limewekwa mikononi mwa Mungu. Tena wako wengine waendao katika maombi wakiwa na maombi na shauku nyingi mno, hata ni vigumu wao wenyewe kusema ni nini hasa wanachotarajia Mungu awatendee. Kama ungependa kupata kwa Mungu kipawa hiki kikuu cha uaminifu katika maombi na nguvu ya kuomba kwa halali, anza kwa kujizoeza mwenyewe katika maombi juu ya jambo hilo. Sema juu yake nafsini mwako na kwa Mungu: “Hapa kuna kitu nilichokiomba, nami naendelea kukiomba hata nikipokee. Kwa uwazi na udhahiri kadiri maneno yawezavyo, nasema, ‘Baba yangu! Naitamani kweli, nakuomba kweli, na kutarajia kwako, neema ya maombi na maombezi.’”

3. “Yo yote myatakayo, mkisali, aminini.”—Kama vile ni kwa imani tu tuwezavyo kumjua Mungu, au kumpokea Yesu Kristo, au kuishi maisha ya Kikristo, vivyo hivyo imani ndiyo uzima na nguvu ya maombi. Kama tutaingia katika maisha ya maombezi, ambamo mtakuwamo furaha na nguvu na baraka, kama tutayapata majibu ya maombi yetu ya neema ya kuomba, lazima tujifunze upya imani ni nini, na kuanza kuishi na kuomba katika imani kama ambavyo hatujapata kufanya.

Imani ni kinyume cha kuona, na hivyo viwili hupingana kimoja na kingine. “Twaenenda kwa imani, si kwa kuona.” Kama yasiyoonekana yatatumiliki kabisa, na moyo na maisha na maombi yajae imani, lazima kuwe na kujitenga na, kuvikana, vinavyoonekana. Roho itafutayo kufurahia kwa kadiri iwezekanavyo yale yasiyo na hatia au yaliyo halali, iyapayo nafasi ya kwanza wito na wajibu wa maisha ya kila siku, hailingani na imani yenye nguvu na kushirikiana kwa karibu na ulimwengu wa kiroho. “Tusiviangalie vinavyoonekana”—upande wa kukataa wahitaji kukazwa kama ule wa kukubali, “bali visivyoonekana,” utakuwa wa kawaida kwetu. Katika kuomba, imani hutegemea kuishi kwetu katika ulimwengu usioonekana.

Imani hii yahusika hasa na Mungu. Sababu kubwa ya upungufu wetu wa imani ni upungufu wetu wa kumjua Mungu na kushirikiana naye. “Mwaminini Mungu,” Yesu alisema alipozungumza juu ya kuiondoa milima. Ni kadiri nafsi imjuavyo Mungu, ishughulikavyo na nguvu zake, upendo wake, na uaminifu wake, ijitoavyo nje ya nafsi yake na ulimwengu, na kuiacha nuru ya Mungu iiangazie, ndipo kutoamini kutakapokuwa jambo lisilowezekana. Siri zote na magumu yote yahusuyo majibu ya maombi, ijapokuwa kwa akili twaweza kuyafumbua kidogo tu, yatamezwa katika uhakika wa kuabudu: “Mungu huyu ndiye Mungu wetu. Atatubariki. Kwa kweli hujibu maombi. Na neema ya kuomba niiombayo atafurahi kunipa.” (Kidokezo C.)

4. “Yo yote myatakayo, mkisali, aminini ya kwamba mmekwisha pokea,” sasa hivi mnapoomba.—Imani yapasa kulikubali jibu, kama lilivyotolewa na Mungu mbinguni, kabla halijaonekana au kuhisiwa duniani. Jambo hili huleta ugumu, walakini ndilo asili yenyewe ya maombi ya imani, siri yake halisi. Jaribu kulielewa. Mambo ya kiroho hayawezi kufahamika au kupokewa ila kwa jinsi ya kiroho. Baraka ya kiroho ya mbinguni ya jibu la Mungu kwa ombi lako lazima itambuliwe na kupokewa kwa jinsi ya kiroho kabla hujahisi lo lote juu yake. Ni imani ifanyayo hivi. Nafsi isiyotafuta jibu tu, bali imtafutayo kwanza Mungu atoaye jibu, hupokea nguvu ya kujua ya kuwa inacho kile ilichokiomba kwake. Ikijua ya kuwa imeomba sawasawa na mapenzi yake na ahadi zake, na ya kuwa imekuja na kumwona Yeye Mwenyewe alitoe, huamini ya kuwa imekwisha pokea. “Twajua ya kuwa atusikia.”

Hakuna kitu kichunguzacho moyo kama imani hii, “Aminini ya kwamba mmekwisha pokea.” Tunapojitahidi kuamini, na kuona kwamba hatuwezi, hutuongoza kugundua kilichopo kizuiacho. Heri mtu asiyezuia kitu, wala kuacha kitu kimzuie, bali, kwa jicho lake na moyo wake kwa Mungu peke yake, akataaye kupumzika hata awe amekwisha amini yale Bwana wetu amwamuruyo, “ya kuwa amekwisha pokea.” Hapa ndipo mahali Yakobo ageukapo kuwa Israeli, na nguvu ya maombi yenye kushinda izaliwapo katika udhaifu na kukata tamaa kwa mwanadamu. Hapa ndipo unapoingia uhitaji halisi wa maombi ya kudumu na ya kusihi daima, yasiyotaka kupumzika, wala kwenda zake, wala kuacha, hata yajue ya kuwa yamesikiwa, na kuamini ya kuwa yamekwisha pokea.

Waomba “Roho ya neema na ya dua”? Uombapo kwa shauku yenye nguvu, na kumwamini Mungu asikiaye maombi, usiogope kusonga mbele na kuamini ya kuwa maisha yako yaweza kweli kubadilishwa, ya kuwa ulimwengu na msongamano wake wa wajibu, ukiwa wa kidini au sivyo, uzuiao maombi, waweza kushindwa, na ya kuwa Mungu akupa shauku ya moyo wako, neema ya kuomba kwa kipimo na kwa roho pia, kama vile Baba apendavyo mwanawe afanye. “Aminini ya kwamba mmekwisha pokea.”

5. “Yo yote myatakayo, mkisali, aminini ya kwamba mmekwisha pokea, nayo yatakuwa yenu.”—Kupokea kutoka kwa Mungu kwa imani, kule kulikubali jibu kwa imani pamoja na uhakika mkamilifu wenye sifa ya kuwa limekwisha tolewa, si lazima kuwe ni kuionja au kumiliki nafsini kipawa tulichokiomba. Nyakati nyingine paweza kuwa na muda mrefu kiasi, au hata mrefu sana, wa kungoja. Katika nyakati nyingine mwombaji mwenye kuamini aweza mara moja kuingia katika kufurahia hasa yale aliyoyapokea. Ni hasa katika hali ile ya kwanza tunapouhitaji imani na saburi: imani ya kuufurahia uhakika wa jibu lililotolewa na kupokewa, na kuanza na kutenda kwa jibu hilo ijapokuwa hakuna kihisiwacho; saburi ya kungoja kama kwa sasa hakuna uthibitisho uhisiwao wa kuwapo kwake. Twaweza kulitegemea: Yatakuwa yenu, katika kufurahia hasa.

Kama tukilitumia hili kwa maombi ya nguvu ya maombezi ya uaminifu, neema ya kuomba kwa bidii na kwa kudumu kwa ajili ya nafsi zilizo karibu nasi, na tujifunze kuushika sana uhakika wa Kimungu ya kwamba, kwa hakika kama tuaminivyo twapokea, na ya kwamba imani basi, mbali na kushindwa kwo kote, yaweza kuufurahia uthabiti wa maombi yaliyojibiwa. Kadiri tumsifuvyo Mungu kwa ajili yake, ndivyo kule kuionja kutakavyokuja upesi zaidi. Twaweza kuanza mara moja kuwaombea wengine, katika matumaini ya kwamba tutapewa neema ya kuomba kwa kudumu zaidi na kwa imani zaidi kuliko tulivyofanya kabla. Kama tusipoona kupanuka au nguvu yo yote ya pekee katika maombi, hili halina budi lisituzuie wala kutukatisha tamaa. Tumekwisha kukubali, mbali na kuhisi, kipawa cha kiroho cha Kimungu kwa imani; katika imani hiyo yatupasa kuomba, bila kutia shaka lo lote. Roho Mtakatifu aweza kwa kitambo kidogo kujificha ndani yetu; twaweza kumtegemea, ijapokuwa kwa kuugua kusikoweza kutamkwa, aombe ndani yetu; kwa wakati wake tutatambua uwepo wake na nguvu zake. Kwa hakika kama zilivyopo shauku na maombi na imani, na kule kukubali kwa imani kipawa, ndivyo utakavyokuwapo pia udhihirisho na kule kuionja baraka tuliyoitafuta.

Ndugu mpendwa! je! watamani kweli ya kwamba Mungu akuwezeshe kuomba hata maisha yako yawe huru na kujilaumu kusikokoma, na ya kwamba nguvu za Roho wake zishuke katika kujibu dua yako? Njoo uiombe kwa Mungu. Piga magoti uiombe kwa sentensi moja dhahiri. Ukiisha fanya hivyo, endelea kupiga magoti katika imani, ukimwamini Mungu ajibuye. Amini ya kuwa sasa wapokea ulichokiomba: amini ya kuwa umekwisha pokea. Kama ukiona ni vigumu kufanya hivi, endelea kupiga magoti, na useme ya kwamba wafanya hivyo kwa nguvu ya neno lake mwenyewe. Kama likikugharimu wakati, na kushindana, na shaka—usiogope; miguuni pake, ukiutazama uso wake, imani itakuja. “Amini ya kuwa umekwisha pokea”: kwa amri yake wathubutu kulidai jibu. Anza katika imani hiyo, ijapokuwa dhaifu, maisha mapya ya maombi, kwa wazo hili moja kuwa nguvu yake: “Umeomba na kupokea neema katika Kristo ikuandae, hatua kwa hatua, uwe mwaminifu katika maombi na maombezi. Kadiri uishikavyo hili kwa unyofu zaidi, na kumtazamia Roho Mtakatifu alitende ndani yako, ndivyo neno litakavyothibitishwa kwako kwa hakika na kwa ukamilifu zaidi: Yatakuwa yenu. Mungu Mwenyewe aliyetoa jibu atalitenda ndani yako.”

RAI YA MAOMBI ZAIDI