Wataka Kuwa Mzima?

“Yesu akamwambia, Wataka kuwa mzima? Yule mgonjwa akamjibu, Bwana, sina mtu wa kunitia birikani. Yesu akamwambia, Simama, uende. Mara yule mtu akawa mzima, akaenda.”—Yohana 5:6–9.

“Petro akasema, Kwa jina la Yesu Kristo wa Nazareti, simama uende…. Imani iliyo kwa yeye imempa huyu uzima huu mkamilifu mbele yenu ninyi nyote.”—Matendo 3:6, 16.

“Petro akamwambia, Ainea, Yesu Kristo akuponya; simama. Mara akasimama.”—Matendo 9:34.

Udhaifu katika kuomba ni alama ya ugonjwa. Kutoweza kutembea, kwa Mkristo kama ilivyo katika maisha ya kawaida, ni ushahidi wa kutisha wa uovu fulani uliomo mwilini unaohitaji tabibu. Kukosa nguvu za kwenda kwa furaha katika njia ile mpya na iliyo hai, iongozayo kwa Baba na kwa kiti cha enzi cha neema, ni jambo la kuhuzunisha hasa. Kristo ndiye Tabibu Mkuu, ajaye kila Bethesda ambapo wagonjwa wamekusanyika, akitoa swali lake la upendo na uchunguzi, Wataka kuwa mzima? Kwa wote ambao bado wanashikilia tumaini lao katika birika, au wanaomtafuta mtu wa kuwatia ndani, wanaotumaini kwamba baada ya muda, kwa namna fulani watasaidiwa kwa kudumu tu katika kutumia njia za kawaida za neema, swali lake laonyesha njia iliyo bora zaidi. Anawapa uponyaji kwa njia ya nguvu ambayo hawajapata kuielewa. Na kwa wote walio tayari kukiri, si udhaifu wao tu, bali pia kushindwa kwao kupata mtu ye yote wa kuwasaidia, swali lake laleta tumaini lililo hakika na thabiti la wokovu ulio karibu. Tumeona ya kuwa udhaifu wetu katika kuomba ni sehemu ya maisha yaliyopigwa kwa udhaifu wa kiroho. Na tumsikilize Bwana wetu ajitoapo kuurudisha uzima wetu wa kiroho, kutuandaa tuweze kutembea kama watu wenye afya na nguvu katika njia zote za Bwana, na hivyo tuwe na uwezo wa kujaza vema mahali petu katika kazi kuu ya maombezi. Tutakapoona uzima huo autoao ni nini, jinsi autoavyo, na atakalo kwetu, tutakuwa tayari kutoa jibu la kupenda kwa swali lake.

Afya Ambayo Yesu Aitoa.

Naweza kutaja alama nyingi za afya ya kiroho. Andiko letu latuongoza kuchagua moja,—kutembea. Yesu alimwambia yule mgonjwa, Simama, uende, na kwa neno hilo akamrudisha mahali pake kati ya watu akiwa na afya kamili na nguvu, awezaye kushiriki katika kazi yote ya maisha. Ni picha ya ajabu ionyeshayo kurudishwa kwa afya ya kiroho. Kwa mwenye afya, kutembea ni furaha; kwa mgonjwa, ni mzigo, kama si jambo lisilowezekana. Ni Wakristo wangapi ambao, kama vile viwete na vilema na waliopooza, kwao kwenda na kusonga mbele katika njia ya Mungu ni jitihada na uchovu kweli kweli. Kristo aja kusema, na pamoja na neno hilo hutoa nguvu, Simama, uende.

Fikiri tu juu ya mwenendo huu ambao yeye atururudisha na kutuwezesha. Ni maisha kama yale ya Henoko na Nuhu, “walioenda pamoja na Mungu.” Maisha kama yale ya Abrahamu, ambaye Mungu alimwambia, “Enenda mbele zangu,” naye mwenyewe akanena, “Bwana ambaye naenenda mbele zake.” Maisha ambayo Daudi ayaimba, “Watakwenda katika nuru ya uso wako,” na Isaya autabiri, “Wale wamngojao Bwana watapata nguvu mpya; watapiga mbio, wala hawatachoka; watakwenda kwa miguu, wala hawatazimia.” Kama vile Mungu Muumba asivyozimia wala kuchoka, ndivyo hao waendao pamoja naye, wakimngoja, hawatachoka wala kudhoofika kamwe. Ni maisha ambayo juu yake yaweza kusemwa juu ya watakatifu wa mwisho wa Agano la Kale, Zakaria na Elisabeti, “Nao wote wawili walikuwa wenye haki mbele za Mungu, wakienda katika amri zote za Bwana na maagizo yake bila lawama.” Huu ndio mwenendo Yesu aliokuja kuufanya uwezekane na kuwa kweli kwa watu wake kwa nguvu iliyo kuu kuliko wakati wo wote uliopita.

Sikia yale Agano Jipya lisemayo juu yake: “Ili kama Kristo alivyofufuliwa katika wafu kwa utukufu wa Baba, vivyo hivyo na sisi tuenende katika upya wa uzima.” Ni yeye Aliyefufuka atuambiaye, Simama, uende: hutoa nguvu za uzima wa ufufuo. Ni mwenendo ndani ya Kristo. “Kama vile mlivyompokea Kristo Yesu Bwana, enendeni vivyo hivyo katika yeye.” Ni mwenendo kama wa Kristo. “Yeye asemaye ya kuwa anakaa ndani yake, imempasa kuendelea mwenendo kama yeye alivyoenenda.” Ni mwenendo kwa Roho na kwa kufuata Roho. “Enendeni kwa Roho, wala hamtazitimiza tamaa za mwili.” “Wasioenenda kwa kufuata mambo ya mwili, bali mambo ya roho.” Ni mwenendo unaomstahili Mungu na kumpendeza sana. “Mpate kuenenda kama ipendezavyo kwa Bwana, mkimpendeza kabisa; mkizaa matunda kwa kila kazi njema.” “Nawasihi, ya kwamba kama mlivyopokea kwetu jinsi iwapasavyo kuenenda na kumpendeza Mungu, kama mnavyoenenda, mzidi sana.” Ni mwenendo katika upendo wa mbinguni. “Enendeni katika upendo, kama Kristo naye alivyowapenda.” Ni “kuenenda nuruni, kama yeye alivyo nuruni.” Ni mwenendo wa imani, nguvu zake zote zikitoka tu kwa Mungu na Kristo na Roho Mtakatifu, kwa nafsi iliyogeuka kuuacha ulimwengu. “Twaenenda kwa imani; si kwa kuona.”

Ni waaminio wangapi wanaouona mwenendo kama huo kuwa jambo lisilowezekana—lisilowezekana kiasi kwamba hawahisi kuwa ni dhambi kwao “kuenenda vinginevyo”; na hivyo hawautamani mwenendo huu katika upya wa uzima. Wamezoea maisha ya udhaifu kiasi kwamba maisha na mwenendo katika nguvu za Mungu hauwavuti sana. Lakini wako wengine ambao si hivyo. Hao hujiuliza kama maneno haya kweli yana maana ile yasemayo, na kama maisha ya ajabu ambayo kila neno huyasema ni ndoto tu isiyoweza kufikiwa, au yalikusudiwa kutimizwa katika mwili na damu. Kadiri wayachunguzavyo zaidi, ndivyo wahisivyo zaidi ya kuwa yamenenwa kwa ajili ya maisha ya kila siku. Na bado yaonekana kuwa ya juu mno. Laiti wangeamini ya kuwa Mungu alimtuma Mwana wake Mwenyezi, na Roho wake Mtakatifu, kweli kutuleta na kutuandaa kwa ajili ya maisha na mwenendo utokao mbinguni, unaopita yote ambayo mtu awezaye kuthubutu kuyawaza au kuyatumaini.

Jinsi Yesu Atufanyavyo Wazima.

Tabibu amponyapo mgonjwa, humtendea kutoka nje, na hufanya jambo ambalo, kama inawezekana, litamfanya tangu sasa asimtegemee tena. Humrudisha katika afya kamili, kisha humwacha. Lakini katika kazi ya Bwana wetu Yesu ni kinyume kabisa katika mambo yote mawili. Yesu hafanyi kazi kutoka nje, bali kutoka ndani, kwa kuingia yeye mwenyewe kwa nguvu za Roho wake katika uhai wetu hasa. Na badala ya, kama katika kuponya mwili, kumfanya mgonjwa asimtegemee tabibu wakati ujao ikiwezekana, kusudi la Kristo mojawapo katika kuponya ni, kama tulivyosema, kinyume kabisa. Sharti lake moja la kufaulu, ni kutuleta katika utegemezi kwake yeye kiasi kwamba hatutaweza hata dakika moja kuwa bila yeye. Kristo Yesu mwenyewe ndiye uzima wetu, kwa maana ambayo Wakristo wengi hawana wazo layo. Maisha yaliyoenea ya udhaifu na maradhi yatokana kabisa na kukosa kuielewa kweli ya Kimungu, ya kwamba maadam tunatazamia Kristo azidi kutufanyia jambo kutoka mbinguni, katika matendo ya pekee ya neema mara kwa mara, na kila mara tukimtumaini atupe kitakachodumu kwa kitambo kidogo, hatuwezi kurudishwa katika afya kamili. Lakini mara tuonapo jinsi hakuna kitu cha kwetu chenyewe hata dakika moja, bali chote ni Kristo dakika kwa dakika, na tukajifunza kukipokea kutoka kwake na kumtumaini kwa ajili yake, uzima wa Kristo huwa afya ya nafsi zetu. Afya si kitu kingine ila uzima katika utendaji wake wa kawaida usiotatizwa. Kristo hutupa afya kwa kutupa nafsi yake kuwa uzima wetu; hivyo huwa nguvu zetu kwa mwenendo wetu. Maneno ya Isaya hupata utimizo wao katika Agano Jipya: Wale wamngojao Bwana watakwenda kwa miguu wala hawatazimia, kwa sababu Kristo sasa ndiye nguvu za maisha yao.

Ni ajabu jinsi waaminio nyakati fulani huyahesabu maisha haya ya kumtegemea kuwa mzigo mzito mno, na hasara ya uhuru wetu binafsi. Hukubali kwamba kuna haja ya kutegemea, ya kutegemea sana, lakini wakiacha nafasi kwa mapenzi na nguvu zetu wenyewe. Hawaoni kwamba hata kutegemea kwa sehemu hutufanya wadeni, na hakutuachii jambo la kujisifu. Husahau ya kuwa uhusiano wetu na Mungu, na kushirikiana kwetu naye, si kwamba yeye afanye sehemu iliyo kubwa nasi sehemu iliyo ndogo, bali kwamba Mungu hufanya yote nasi twafanya yote—Mungu yote ndani yetu, sisi yote kwa njia ya Mungu. Utegemezi huu kwa Mungu huuhakikisha uhuru wetu wa kweli; mapenzi yetu yasipotafuta kitu ila mapenzi ya Kimungu, twafikia utukufu wa Kimungu, uhuru wa kweli juu ya vitu vyote vilivyoumbwa. Yeye asiyeliona hili sharti abaki Mkristo mgonjwa, akiacha nafsi ifanye sehemu na Kristo sehemu. Yeye aupokeaye uzima wa kumtegemea Kristo bila kukoma, kuwa uzima na afya na nguvu, hufanywa mzima. Kama Mungu, Kristo aweza kuingia na kuwa uzima wa kiumbe chake. Kama yule Aliyetukuzwa aliyempokea Roho Mtakatifu kutoka kwa Baba ili amtoe, aweza kuufanya upya moyo wa kiumbe mwenye dhambi na kuufanya makao yake, na kwa uwepo wake kuuhifadhi katika afya na nguvu kamili.

Enyi nyote mngependa kuenenda na kumpendeza Mungu, na katika maisha yenu ya maombi mioyo yenu isiwahukumu, sikieni maneno ya Kristo: “Wataka kuwa mzima?” Aweza kutoa afya ya nafsi. Aweza kutoa maisha yawezayo kuomba, na kujua ya kuwa yampendeza Baba. Kama ungependa kuwa na haya, njoo usikie jinsi uwezavyo kuyapokea.

Atakalo Kristo Kwetu.

Hadithi hii yatualika kuangalia mambo matatu hasa. Swali la Kristo kwanza laomba mapenzi, na kutaka yatoe kibali chake. Kisha husikiliza kukiri kwa mtu udhaifu wake kabisa. Ndipo yaja utii ulio tayari kwa amri ya Kristo, huyo asimamaye na kwenda.

1. Wataka kuwa mzima? Katika jibu la yule mgonjwa halikuwa na shaka. Ni nani asingependa kuondolewa ugonjwa wake? Lakini, ole, katika maisha ya kiroho ni lazima kadiri gani kulikaza swali hili. Wengine hawatakubali ya kuwa ni wagonjwa hivyo. Na wengine hawataamini ya kuwa Kristo aweza kumfanya mtu mzima. Na wengine wataliamini kwa ajili ya wengine, lakini wana hakika si kwa ajili yao. Chanzo cha yote ni hofu ya kujikana na dhabihu itakayohitajiwa. Hawako tayari kuuacha kabisa mwenendo ufuatao mwendo wa ulimwengu huu, kuyaacha mapenzi yao wenyewe yote, na kujiamini, na kujipendeza. Mwenendo katika Kristo na kama wa Kristo ni mwembamba na mgumu mno: hawautaki, hawataki kufanywa wazima. Ndugu yangu, kama u tayari, sema waziwazi: “Bwana! kwa gharama yo yote, nataka!” Kwa upande wa Kristo tendo ni la mapenzi: “Nataka; takasika.” Kwa upande wako vivyo hivyo: “Iwe kwako kama utakavyo.” Kama ungependa kuokolewa katika udhaifu wako—ole, usiogope kusema, “Nataka, nataka!”

Ndipo yaja hatua ya pili. Kristo ataka tumtazame yeye kuwa Msaidizi wetu wa pekee. “Sina mtu wa kunitia birikani,” lazima liwe kilio chetu. Hapa duniani hakuna msaada kwangu. Udhaifu waweza kukua kuwa nguvu katika matumizi ya kawaida ya njia, kama viungo vyote na kazi zake ziko katika hali njema. Ugonjwa wahitaji hatua za pekee. Nafsi yako ni mgonjwa; kutoweza kwako kuenenda kwa furaha mwenendo wa Kikristo katika njia ya Mungu ni ishara ya ugonjwa; usiogope kukiri hilo, na kukubali ya kuwa hakuna tumaini la kurudishwa isipokuwa kwa tendo la rehema ya Kristo ikuponyaye. Acha wazo la kukua kutoka hali yako ya ugonjwa na kuingia hali ya afya, la kukua kutoka chini ya sheria na kuingia maisha chini ya neema. Siku chache zilizopita nilimsikia mwanafunzi akitetea shauri la Ahadi ya Kujitolea. “Ahadi hii yakuita,” akasema, “kufanya uamuzi. Usifikiri kukua polepole kuwa mmisionari: Mungu asipokukataza, chukua hatua; uamuzi utaleta furaha na nguvu, utakuweka huru kukua katika yote yahitajiwayo kwa mmisionari, nao utakuwa msaada kwa wengine.” Ni vivyo hivyo katika maisha ya Kikristo. Kuahirisha na kujitaabisha kutakuzuia sawasawa; kiri ya kuwa huwezi kujileta uombe kama ungependa, kwa sababu huwezi kujipa maisha yenye afya, ya mbinguni, yapendayo kuomba, na yajuayo kumtegemea Roho wa Mungu aombe ndani yetu. Njoo kwa Kristo akuponye. Aweza katika dakika moja kukufanya mzima. Si kwa maana ya kufanya badiliko la ghafula katika hisia zako, au katika ulivyo wewe mwenyewe, bali katika uhalisia wa mbinguni wa kuingia ndani, kwa kuitikia kujisalimisha kwako na imani, na kuutwaa uongozi wa maisha yako ya ndani, na kuyajaza kwa nafsi yake na Roho.

Jambo la tatu Kristo aombalo ni hili, kujisalimisha kwa imani. Alipomwambia yule mgonjwa neno lake la amri ilipasa litiiwe. Yule mtu aliamini ya kuwa kulikuwa na kweli na nguvu katika neno la Kristo; katika imani hiyo alisimama na kwenda. Kwa imani alitii. Na yale Kristo aliyowaambia wengine yalikuwa kwa ajili yake pia—“Enenda zako; imani yako imekuponya.” Kwetu sisi pia, Kristo aomba imani hii, ya kuwa neno lake hulibadili udhaifu wetu kuwa nguvu, na kutuandaa kwa mwenendo ule katika upya wa uzima ambao kwa ajili yake tumehuishwa ndani yake. Kama hatuamini hili, kama hatutakubali kujipa moyo na kusema, pamoja na Paulo, “Nayaweza mambo yote katika yeye anitiaye nguvu,” hatuwezi kutii. Lakini kama tutalisikiliza neno lituambialo juu ya mwenendo usiowezekana tu, bali uliothibitishwa na kuonekana katika watakatifu wa Mungu tangu zamani, kama tutakaza jicho letu juu ya Kristo mwenye nguvu, aliye hai, mwenye upendo, asemaye kwa nguvu, “Simama, uende,” tutajipa moyo na kutii. Tutasimama na kuanza kuenenda ndani yake na katika nguvu zake. Kwa imani, mbali na hisia zote na juu ya hisia zote, tutamkubali na kumtumaini Kristo asiyeonekana kuwa nguvu zetu, na kwenda mbele katika nguvu za Bwana Mungu. Tutamjua Kristo kuwa nguvu za maisha yetu. Tutajua, na kuhubiri, na kuthibitisha ya kuwa Yesu Kristo ametufanya wazima.

Je, laweza kweli kuwa hivyo? Ndiyo, laweza. Amewafanyia wengi: atakufanyia wewe. Jihadhari na kuunda mawazo yasiyo sahihi juu ya yatakayotukia. Yule mgonjwa alipofanywa mzima bado alikuwa na yote ya kujifunza juu ya matumizi ya nguvu zake zilizopatikana upya. Kama alitaka kulima, au kujenga, au kujifunza ufundi, ilimpasa kuanza tangu mwanzo. Usitazamie mara moja kuwa hodari katika kuomba au katika sehemu yo yote ya maisha ya Kikristo. La; bali tazamia na uwe na hakika ya jambo hili moja, ya kuwa, kama ulivyojitia mwenyewe kwa Kristo kuwa afya na nguvu zako, atakuongoza na kukufundisha. Anza kuomba katika hali ya utulivu ukijua ujinga na udhaifu wako, lakini katika uhakika wa furaha ya kuwa atafanya kazi ndani yako yale uyahitajiyo. Simama na uende kila siku katika uhakika mtakatifu ya kuwa yu pamoja nawe na ndani yako. Mkubali tu Yesu Kristo yeye aliye hai, na umtumaini afanye kazi yake.

Je, utalitenda? Je, umekwisha kulitenda? Hata sasa Yesu anena, “Simama, uende.” “Amina, Bwana! kwa neno lako naja. Nasimama nikatembee pamoja nawe, na ndani yako, na kama wewe.”

RAI YA MAOMBI ZAIDI