Peke Yako na Mungu

“Bali wewe usalipo, ingia katika chumba chako cha ndani, na ukiisha kufunga mlango wako, usali mbele za Baba yako aliye sirini; na Baba yako aonaye sirini atakujazi.” Mathayo 6:6.

Baada ya Yesu kuwaita wanafunzi wake wa kwanza, aliwapa fundisho lao la kwanza la hadharani mlimani. Humo aliwafafanulia Ufalme wa Mungu, sheria zake, na uzima wake. Katika Ufalme huo, Mungu si Mfalme tu bali pia Baba; hatoi vyote tu bali yeye mwenyewe ni vyote. Ni katika kumjua yeye na kuwa na ushirika naye peke yake ndipo iko heri yake. Kwa hiyo ilikuwa jambo la kawaida kwamba ufunuo wa maombi na maisha ya maombi ulikuwa sehemu ya fundisho lake juu ya Ufalme Mpya aliokuja kuusimamisha. Musa hakutoa amri wala kanuni yoyote juu ya maombi: hata manabii wanena machache moja kwa moja juu ya wajibu wa maombi; ni Kristo afundishaye juu ya maombi.

Jambo la kwanza Bwana anawafundisha wanafunzi wake ni kwamba lazima wawe na mahali pa siri pa kuombea; kila mmoja lazima awe na kipenge fulani cha faragha ambapo aweza kuwa peke yake na Mungu wake. Kila mwalimu lazima awe na darasa lake. Tumejifunza kumjua na kumkubali Yesu kama mwalimu wetu pekee katika shule ya maombi. Ametufundisha tayari kule Samaria kwamba ibada haifungwi tena nyakati na mahali; kwamba ibada, ibada ya kweli ya kiroho, ni jambo la roho na la uzima; mtu mzima katika maisha yake yote lazima aabudu katika roho na kweli. Yeye ataka kila mmoja ajichagulie mwenyewe mahali pale palipowekwa ambapo aweza kukutana naye kila siku. Chumba kile cha ndani, mahali pale pa faragha, ndilo darasa la Yesu.

Mahali pale paweza kuwa popote; mahali pale paweza kubadilika siku hata siku ikiwa yatupasa kubadili makao yetu; lakini mahali pale pa siri lazima pawepo, pamoja na kile kipindi cha utulivu ambamo mwanafunzi hujiweka mbele za uwepo wa Bwana, ili aandaliwe naye kumwabudu Baba. Huko peke yako, lakini huko kwa hakika zaidi, Yesu hutujia ili kutufundisha kusali.

Mwalimu daima ana hamu kwamba darasa lake liwe angavu na lenye kuvutia, lililojaa nuru na hewa ya mbinguni, mahali ambapo wanafunzi hutamani kuja na hupenda kukaa. Katika maneno yake ya kwanza juu ya maombi katika Mahubiri ya Mlimani, Yesu atafuta kukiweka chumba cha ndani mbele yetu katika nuru yake yenye kuvutia zaidi. Tukisikiliza kwa makini, mara twaona jambo kuu ni lipi: yeye ana la kutuambia juu ya kukaa kwetu humo. Mara tatu alitumia jina la Baba: “Usali mbele za Baba yako aliye sirini; na Baba yako aonaye sirini atakujazi.” Mathayo 6:6. “Baba yenu anajua mnayohitaji kabla ninyi hamjamwomba.” Mathayo 6:8.

Jambo la kwanza katika maombi ya chumbani ni: Lazima nikutane na Baba yangu. Nuru inayong'aa chumbani lazima iwe nuru ya uso wa Baba. Hewa safi ya mbinguni ambayo Yesu angependa kuijaza katika anga nitakayovuta pumzi na kuomba humo ni upendo wa Baba wa Mungu, Ubaba usio na mwisho wa Mungu. Hivyo kila wazo au ombi tutakalolivuta litakuwa la unyofu, la moyoni, tumaini la kitoto kwa Baba. Hivi ndivyo Bwana atufundishavyo kuomba: Hutuleta ndani ya uwepo hai wa Baba. Tuombalo hapo lazima lifae. Na tusikilize kwa makini ili tusikie Bwana ana la kutuambia. Kwanza, ‘Usali mbele za Baba yako aliye sirini.’ Mathayo 6:6.

Mungu ni Mungu ajifichaye machoni pa mwili. Maadamu katika kumwabudu Mungu tumeshughulika hasa na mawazo yetu wenyewe na mazoezi yetu, hatutakutana naye aliye Roho, yule Asiyeonekana. Lakini kwa mtu ajitengaye na yote ya ulimwengu na ya mwanadamu, na kujiandaa kumngoja Mungu peke yake, Baba atajifunua kwake.

Anapoacha na kujitoa na kuufungia nje ulimwengu, na uzima wa ulimwengu, na kujisalimisha aongozwe na Kristo mpaka katika siri ya uwepo wa Mungu, nuru ya upendo wa Baba itamchomozea.

Usiri wa chumba cha ndani na mlango uliofungwa, kujitenga kabisa na yote yatuzungukayo, ni mfano wa patakatifu pale pa ndani pa kiroho, siri ya hema la Mungu, ndani ya pazia, ambapo roho yetu hukutana kweli kweli na yule Asiyeonekana. Na hivyo twafundishwa, mwanzoni kabisa mwa kutafuta kwetu siri ya maombi yenye matokeo, kukumbuka kwamba ni katika chumba cha ndani, ambapo tuko peke yetu na Baba, ndipo tutakapojifunza kuomba ipasavyo.

Baba yu sirini. Katika maneno haya, Yesu atufundisha mahali anapotungojea, mahali ambapo daima aweza kupatikana. Wakristo mara nyingi hulalamika kwamba maombi ya faraghani si kama yanavyopaswa kuwa. Huhisi udhaifu na dhambi, mioyo yao ni baridi na yenye giza; ni kama kwamba hawana kitu kingi cha kuombea na katika hicho kidogo hawana imani wala furaha. Hukata tamaa na kuzuiliwa na maombi kwa wazo kwamba hawawezi kumjia Baba kama ipasavyo au kama wapendavyo. Mtoto wa Mungu! Msikilize Mwalimu wako. Anakuambia kwamba uendapo katika maombi ya faraghani, wazo lako la kwanza lazima liwe: Baba yu sirini, Baba ananingoja huko. Hata kwa sababu moyo wako ni baridi na usio na maombi, ingia katika uwepo wa Baba mpenzi. Kama vile baba awahurumiavyo watoto wake, ndivyo Bwana anavyokuhurumia. Usifikiri jinsi ulivyo na kidogo cha kumletea Mungu, bali jinsi anavyotaka kukupa mengi. Jiweke tu mbele zake, na uinue macho yako ukiutazama uso wake; fikiri upendo wake, upendo wake wa ajabu, wa wororo, na wenye huruma.

Mwambie tu jinsi kila kitu kilivyo cha dhambi, baridi na giza: ni moyo wa upendo wa Baba utakaotia nuru na joto katika moyo wako.

Ee, fanya Yesu asemalo: Funga tu mlango, na umwombe Baba yako aliye sirini. Je, si jambo la ajabu kuweza kwenda peke yako na Mungu, Mungu asiye na mwisho, na kisha kuinua macho na kusema: Baba yangu! “Na Baba yako aonaye sirini atakujazi.” Mathayo 6:6. Hapa, Yesu atuhakikishia kwamba maombi ya sirini hayawezi kuwa bila mavuno: baraka yake itajidhihirisha katika maisha yetu. Tukiwa peke yetu na Mungu sirini, twahitaji kumkabidhi yeye maisha yetu mbele ya wanadamu; atatujazi kwa dhahiri; atahakikisha kwamba jibu la maombi ladhihirishwa katika baraka yake juu yetu. Bwana wetu hivyo angependa kutufundisha kwamba kama vile Ubaba usio na mwisho na Uaminifu ndivyo Mungu akutananavyo nasi sirini, ndivyo kwa upande wetu iwepo unyofu wa kitoto wa imani, uhakika kwamba maombi yetu kweli yashusha baraka.

‘Kwa maana amwendeaye Mungu lazima aamini kwamba yeye yuko, na kwamba huwapa thawabu wale wamtafutao.’ Waebrania 11:6. Baraka ya chumbani haitegemei nguvu au hisia yenye moto niombayo nayo bali upendo na uweza wa Baba nikabidhiye mahitaji yangu. Na kwa hiyo Mwalimu ana shauku moja tu: Kumbuka Baba yako aona na kusikia sirini; nenda huko na ukae huko na uende tena kutoka huko kwa ujasiri: Yeye atakujazi. Mtumaini kwa hilo; mtegemee: maombi kwa Baba hayawezi kuwa ya bure; atakujazi kwa dhahiri.

Ili kulithibitisha hili zaidi, imani hii katika upendo wa Baba wa Mungu, Kristo anena neno la tatu: ‘Baba yenu anajua mnayohitaji kabla ninyi hamjamwomba.’ Mathayo 6:8. Kwa mtazamo wa kwanza, laweza kuonekana kama kwamba wazo hili lafanya maombi kuwa yasiyohitajika sana: Mungu ajua vema zaidi tunachohitaji. Lakini kadiri tupatavyo ufahamu wa kina zaidi wa maombi ni nini hasa, kweli hii itasaidia kuimarisha imani yetu. Itatufundisha kwamba hatuhitaji, kama wapagani, kwa wingi na uzito wa maneno yetu, kumlazimisha Mungu asiyependa atusikilize. Itatuleta kwenye mawazo matakatifu na ukimya katika maombi kwani huamsha swali: Je, Baba yangu ajua kweli kwamba nahitaji hiki? Itatupa, mara tuishapo kuongozwa na Roho kwenye uhakika kwamba ombi letu kwa kweli ni kitu ambacho, kwa kadiri ya Neno, twakihitaji kwa utukufu wa Mungu, ujasiri wa ajabu wa kusema, Baba yangu ajua nakihitaji na sharti nikipate. Na kukiwa na kuchelewa kwoko katika jibu, itatufundisha katika uvumilivu wa utulivu kushikilia: Baba! Wajua nakihitaji.

Ee, uhuru na unyofu wenye baraka wa mtoto ambao Kristo Mwalimu wetu angependa kuukuza ndani yetu, tunapomkaribia Mungu: na tumtazame Baba mpaka Roho wake aufanye ndani yetu. Nyakati nyingine katika maombi yetu, tukiwa katika hatari ya kushughulika mno na maombi yetu yenye moto na yenye uzito, hata kusahau kwamba Baba ajua na kusikia, na tunyamaze na kwa utulivu tuseme tu: Baba yangu aona, Baba yangu asikia, Baba yangu ajua; itasaidia imani yetu kulipokea jibu na kusema: Twajua kwamba tunayo yale maombi tuliyomwomba.

Na sasa, ninyi nyote mliokwisha kuingia katika shule ya Kristo mfundishwe kuomba, chukueni masomo haya, yatendeni, na mtumainini yeye awakamilishe ndani yake. Kaeni sana katika chumba cha ndani, mlango ukiwa umefungwa—mmefungiwa nje mbali na wanadamu, mmefungiwa ndani pamoja na Mungu; ni hapo ambapo Baba anawangojea, na ni hapo ambapo Yesu atawafundisha kuomba. Kuwa peke yako sirini pamoja na Baba: hii ndiyo furaha yako iliyo juu zaidi. Kuwa na uhakika kwamba Baba atayajazi kwa dhahiri maombi ya sirini hata kwamba hayawezi kubaki bila baraka: hii ndiyo nguvu yako siku kwa siku. Na kujua kwamba Baba ajua kwamba wahitaji uombalo, huu ndio uhuru wako wa kuleta kila haja, katika uhakika kwamba Mungu wako atakupatia kwa kadiri ya utajiri wake katika utukufu ndani ya Kristo Yesu.

Mwokozi Mbarikiwa, kwa moyo wangu wote nakuhimidi kwa kukiweka chumba cha ndani, kama shule ambamo hukutana na kila mmoja wa wanafunzi wako peke yake, na kumfunulia Baba. Ee, Bwana wangu! Iimarishe imani yangu katika upendo wa wororo na fadhili za Baba, hata kwamba kila nihisipo dhambi au fadhaa, wazo langu la kwanza la silika liwe kwenda mahali ninapojua Baba ananingojea, na ambapo maombi hayawezi kamwe kwenda bila baraka. Wazo kwamba yeye ajua haja yangu kabla sijaomba na liniletee, katika raha kubwa ya imani, kutumaini kwamba atampa mtoto wake ahitajiyo. Ee, mahali pa maombi ya sirini na pawe kwangu mahali papendwapo zaidi duniani.

Bwana! Nisikie niombapo kwamba ubariki vyumba vya ndani vya watu wako waaminio kila mahali. Ufunuo wako wa ajabu wa wororo wa Baba na uwaweke huru vijana wote wa Kikristo mbali na kila wazo la maombi ya sirini kuwa wajibu au mzigo, na uwaongoze kuyaona kuwa fahari iliyo juu zaidi ya maisha yao, furaha, na baraka. Warudishe wote waliokata tamaa, kwa sababu hawapati cha kukuletea katika maombi. Na waelewe kwamba yawapasa tu kuja na utupu wao kwake yeye aliye na yote ya kutoa, naye afurahiaye kufanya hivyo. Si walicho nacho cha kumletea Baba, bali kile Baba angojeacho kuwapa, kiwe wazo lao pekee.

Na ubariki hasa chumba cha ndani cha watumishi wako wote wanaokufanyia kazi, kama mahali ambapo kweli ya Mungu na neema ya Mungu hufunuliwa kwao, ambapo hupakwa kila siku mafuta mapya, ambapo nguvu zao hufanywa upya, na baraka hupokewa kwa imani, ambazo kwazo watawabariki wenzao. Bwana, tuvute sisi sote chumbani karibu zaidi nawe mwenyewe na Baba. Amina.