Unyenyekevu Katika Maisha ya Yesu

“Lakini mimi kati yenu ni kama atumikaye.” Luka 22 27.

Katika Injili ya Yohana, maisha ya ndani ya Bwana wetu yamefunuliwa kwetu. Yesu hunena mara nyingi juu ya uhusiano wake na Baba, juu ya vichocheo vimwongozavyo, juu ya utambuzi wake wa nguvu na roho atendayo kwayo. Ijapokuwa neno mnyenyekevu halitokei, hakuna mahali pengine katika Maandiko tutakapoona waziwazi hivyo unyenyekevu wake ulikuwa katika nini. Tumekwisha sema kwamba neema hii kwa kweli si kitu ila kukubali kwa unyofu kwa kiumbe kumwacha Mungu awe yote, na kwa hiyo hujitoa kwa utendaji wake peke yake.

Katika Yesu, tutaona jinsi, akiwa Mwana wa Mungu mbinguni na akiwa mwanadamu duniani, alivyochukua nafasi ya kujitiisha kabisa, na kumpa Mungu heshima na utukufu umstahilio. Na kile alichokifundisha mara nyingi kilitimizwa kwake mwenyewe: “Ajinyenyekeshaye atakwezwa.”

(Mathayo 23:12). Kama ilivyoandikwa, “Kwa hiyo tena Mungu alimwadhimisha mno” (Wafilipi 2:9).

Sikiliza maneno ambayo Bwana wetu hunena juu ya uhusiano wake na Baba, na jinsi asivyokoma kutumia maneno si na hakuna juu yake mwenyewe. Lile si mimi, ambalo Paulo hueleza nalo uhusiano wake na Kristo, ndiyo roho yenyewe ya asemacho Kristo juu ya uhusiano wake na Baba.

“Mwana hawezi kutenda neno mwenyewe” (Yohana 5:19).

“Mimi siwezi kutenda neno mwenyewe; kama nisikiavyo ndivyo nihukumuvyo, na hukumu yangu ni ya haki, kwa sababu siyatafuti mapenzi yangu mimi.”

(Yohana 5:30).

“Mimi sipokei utukufu kwa wanadamu” (Yohana 5:41).

“Nimeshuka kutoka mbinguni, si ili niyafanye mapenzi yangu” (Yohana 6:38).

“Mafunzo yangu si yangu mimi” (Yohana 7:16) “Sikuja kwa nafsi yangu” (Yohana 7:28) “Sifanyi neno kwa nafsi yangu” (Yohana 8:28) “Sikuja kwa nafsi yangu, bali yeye ndiye aliyenituma” (Yohana 8:42).

“Mimi siutafuti utukufu wangu” (Yohana 8:50) “Hayo maneno niwaambiayo mimi siyasemi kwa shauri langu” (Yohana 14:10).

“Neno mnalolisikia si langu” (Yohana 14:24).

Maneno haya yatufunulia mizizi ya ndani kabisa ya maisha na kazi ya Kristo. Yatuambia jinsi Mungu Mwenyezi alivyoweza kuifanya kazi yake kuu ya ukombozi kwa njia yake. Yaonyesha alichokihesabu Kristo kuwa hali ya moyo iliyomstahili akiwa Mwana wa Baba. Yatufundisha asili na uzima wa msingi wa ukombozi ule Kristo aliokamilisha na sasa autoao. Ni huu: alikuwa si kitu, ili Mungu awe yote. Alijikabidhi na mapenzi yake na nguvu zake kabisa ili Baba atende kazi ndani yake. Juu ya nguvu zake, mapenzi yake, na utukufu wake mwenyewe, juu ya utume wake wote pamoja na kazi zake zote na mafundisho yake, juu ya haya yote alisema: Si mimi; mimi si kitu; nimejitoa kwa Baba atende kazi; mimi si kitu, Baba ni yote.

Maisha haya ya kujikana nafsi kabisa, ya kujitiisha na kuyategemea kikamilifu mapenzi ya Baba, Kristo aliyaona kuwa maisha ya amani na furaha kamili. Hakupoteza kitu kwa kumpa Mungu yote. Mungu aliiheshimu imani yake, akamfanyia yote, kisha akamtukuza kwa mkono wake wa kuume katika utukufu (Matendo 5:31).

Na kwa sababu Kristo alikuwa amejinyenyekeza hivyo mbele za Mungu, na Mungu alikuwa mbele yake daima, aliona yawezekana kujinyenyekeza mbele za wanadamu pia, na kuwa Mtumishi wa wote. Unyenyekevu wake ulikuwa tu kujitoa kwake kwa Mungu, ili amfanyie ndani yake apendavyo, bila kujali watu waliomzunguka wangesema nini juu yake au wangemtenda nini.

Ni katika hali hii ya nia, katika roho na hulka hii, ndipo ukombozi wa Kristo una uwezo na nguvu yake. Ni ili kutuleta kwenye hulka hii ndipo tumefanywa washiriki wa Kristo. Huku ndiko kujikana nafsi kwa kweli ambako Mwokozi wetu hutuita: kukiri kwamba nafsi haina jema, ila kama chombo kitupu ambacho Mungu apaswa kukijaza, na kwamba dai lake la kuwa au kutenda lolote lisiruhusiwe hata kwa dakika moja. Ni katika hili, juu ya na kabla ya kila kitu, ndimo kufanana na Yesu kulipo: kutokuwa kitu na kutotenda kitu wenyewe, ili Mungu awe yote. Hapa tuna mzizi na asili ya unyenyekevu wa kweli. Ni kwa sababu hili halieleweki wala halitafutwi ndipo unyenyekevu wetu ulivyo wa juujuu na dhaifu hivyo.

Ni lazima tujifunze kwa Yesu, jinsi alivyo mpole na mnyenyekevu wa moyo. Hutufundisha kwamba unyenyekevu wa kweli huanza na kupata nguvu zake katika kujua kwamba ni Mungu atendaye yote katika yote, kwamba nafasi yetu ni kujitoa kwake kwa kujisalimisha na kutegemea kikamilifu, tukikubali kabisa kutokuwa kitu na kutotenda kitu wenyewe. Haya ndiyo maisha Kristo aliyokuja kuyafunua na kuyatoa, maisha kwa Mungu yaliyokuja kwa kufa kwa dhambi na kwa nafsi. Kama twahisi maisha haya ni ya juu mno na yapitayo uwezo wetu, basi lazima tuyatafute ndani yake. Ni Kristo akaaye ndani yetu atakayeyaishi maisha haya ndani yetu, mpole na mnyenyekevu.

Kama tunatamani hili, na tutafute, kwa sasa, zaidi ya kila kitu, ile siri takatifu ya kujua asili ya Mungu, jinsi kila dakika atendavyo yote katika yote. Ni siri ambayo asili yote, kila kiumbe, na zaidi ya yote, kila mtoto wa Mungu, apaswa kuwa shahidi wake: kwamba si kitu ila chombo, mfereji, ambao kwao Mungu aliye hai aweza kudhihirisha utajiri wa hekima, nguvu na wema wake. Mzizi wa wema na neema yote, wa imani yote na ibada ikubalikayo, ni kujua ya kuwa hatuna kitu ila tulichopokea, na kusujudu kwa unyenyekevu wa ndani kabisa tukimngoja Mungu atupe.

Ni kwa sababu unyenyekevu huu haukuwa hisia ya muda tu, iliyoamshwa alipomfikiri Mungu, bali roho yenyewe ya maisha yake yote, ndipo Yesu alikuwa mnyenyekevu katika kushirikiana na wanadamu kama alivyokuwa kwa Mungu. Alijiona Mtumishi wa Mungu kwa ajili ya wanadamu Mungu aliowafanya na kuwapenda. Kwa matokeo ya asili, alijihesabu kuwa Mtumishi wa wanadamu ili kwa njia yake Mungu atende kazi yake ya upendo. Hakufikiri kamwe, hata kwa dakika, kutafuta heshima yake, wala kudai nguvu zake ili kujitetea. Roho yake yote ilikuwa ya maisha yaliyotolewa kwa Mungu atende kazi ndani yake.

Si mpaka Wakristo watakapojifunza unyenyekevu wa Yesu kuwa kiini chenyewe cha ukombozi wake, heri yenyewe ya maisha ya Mwana wa Mungu, uhusiano wa kweli peke yake na Baba, na kwa hiyo kile Yesu ni lazima atupe kama tutakuwa na sehemu yoyote pamoja naye. Ule upungufu wa kutisha wa unyenyekevu halisi, wa mbinguni, unaoonekana, utakuwa mzigo na huzuni, na dini yetu ya kawaida itawekwa kando ili kupata hii, alama ya kwanza na kuu ya Kristo ndani yetu.

Ndugu, je, umevikwa unyenyekevu? Uulize uzima wako wa kila siku. Mwulize Yesu. Waulize rafiki zako.

Uulize ulimwengu. Na uanze kumsifu Mungu kwa kuwa amekufunulia katika Yesu unyenyekevu wa mbinguni ambao hukuujua kabisa, na ambao kwao heri ya mbinguni ambayo huenda hujaionja yaweza kuingia ndani yako.