Waebrania 11

Ikiwa Waebrania 11 haikuandikwa kwa ajili yetu kama orodha ya mashujaa wa imani, kusudi lake ni nini? Kwa nini Roho Mtakatifu, mwandishi wa Maandiko yote, ameiweka sura hii hapa?

Kama ilivyo katika mambo yote ya tafsiri ya Kibiblia, tunapaswa kuzingatia muktadha wa maandishi. Hadi Waebrania 10:18, mwandishi amekuwa akiandika kuhusu desturi na makusudi ya agano la Agano la Kale, sheria, hekalu na dhabihu. Haya yanalinganishwa na mambo yaliyo bora zaidi yanayopatikana katika Kristo.

Tunao wokovu ulio bora zaidi (Waebrania 2), mtoa Sheria aliye bora zaidi (Waebrania 3), raha iliyo bora zaidi (Waebrania 4), Kuhani Mkuu aliye bora zaidi (Waebrania 5), agano lililo bora zaidi (Waebrania 8), ahadi iliyo bora zaidi (Waebrania 8), na dhabihu iliyo bora zaidi (Waebrania 9).

Kuanzia Waebrania 10:19, mwandishi anaanzisha dhamira mpya.

“Basi, ndugu, kwa kuwa tuna ujasiri wa kupaingia patakatifu kwa damu ya Yesu… na tukaribie wenye moyo wa kweli, kwa utimilifu wa imani… na tuushike sana ungamo la tumaini letu, lisigeuke… tena tukaangaliane na kuhimizana katika upendo na kutenda mema” (Waebrania 10:19, 22-24).

Sasa anaandika ili kusisitiza mtindo wa maisha unaopaswa kuwa alama ya wale walioyapata ‘mambo yaliyo bora zaidi’ yanayopatikana katika Kristo.

“Bali zikumbukeni siku za kwanza, ambazo, mlipokwisha kutiwa nuru, mlistahimili mashindano makuu ya maumivu… kwa hiyo msiutupe ujasiri wenu, ambao una thawabu kubwa. Maana mnahitaji saburi, ili kwamba mkiisha kuyafanya mapenzi ya Mungu mpate ile ahadi.

Kwa maana, “Bado kitambo kidogo sana, Yeye ajaye atakuja, wala hatakawia; lakini mwenye haki wangu ataishi kwa imani; naye akisita-sita, roho yangu haina furaha naye.” Lakini sisi si watu wa kusita-sita na kupotea, bali watu wa kuamini hata roho zetu zikaokoka” (Waebrania 10:32, 35-39).

Sura inayofuata imeandikwa ili kutupatia mifano ya ‘kuishi kwa imani.’ Ni jambo la kushangaza kwamba Kalebu, Elisha na Danieli hawapo huku Musa (muuaji), Sara (aliyeicheka ahadi ya Mungu), na Rahabu (mwongo) wakiwepo. Haihitaji jitu la kiroho kuenenda katika kuenenda kwa imani. Yeyote, hata iwe ukomavu wake wa kiroho ukoje, aweza kuanza safari hii yenye kusisimua ya kuenenda katika imani leo, ambayo pasipo hiyo haiwezekani kumpendeza Mungu. Mfano mwingine wa neema ya ajabu ya Mungu!

“Basi imani ni kuwa na hakika ya mambo yatarajiwayo, ni bayana ya mambo yasiyoonekana” (Waebrania 11:1). Tayari tumeutafakari mstari wa kwanza kama fasili ya imani, kipawa na tunda.

“Kwa maana kwa hiyo wazee walishuhudiwa” (Waebrania 11:2). Wanaume na wanawake wa zamani, walioenenda katika imani, walikuwa na ushuhuda mwema, taarifa njema. Wengine waliwatazama na kujua kwamba watu kama hao walienenda pamoja na Mungu. Kulikuwa na mafunzo ya kujifunza kwa kutazama jinsi Mungu alivyotenda kazi katika maisha yao. Vivyo hivyo, maisha yetu nayo yapaswa kuwa ushuhuda wa imani - yakidhihirisha uongozi wa Mungu na utii wetu kwa uongozi huo. Ulimwengu hautaki kusikia maneno yetu ya kuamini kwa sababu kwao ni jambo lisilo na akili. Wanataka kuona ushahidi wa maisha yetu.

Hatukuitwa kusimama katika ulimwengu tukishuhudia juu ya Kristo; tumeitwa kusimama katika Kristo tukiushuhudia ulimwengu.

“Kwa imani twafahamu ya kuwa ulimwengu uliumbwa kwa neno la Mungu, hata vitu vinavyoonekana havikufanywa kwa vitu vilivyokuwa vikionekana” (Waebrania 11:3). Dini zote zina hadithi zao kuhusu uumbaji.

Msingi wa imani yetu unapatikana katika Mungu asiyeumbwa Aliyeuita uumbaji wote uwepo kwa Neno lake. Hili liko juu ya ufahamu wa binadamu na maelezo ya kisayansi. Sayansi yote inachoweza kufanya ni kuchunguza kile ambacho tayari kipo na kusimama nyuma kwa mshangao inapothibitisha uhalisia wa kile kilichoandikwa! Inawezekana tu kufahamu pale ambapo Mungu ametoa ufunuo wa ndani, ile imani ya kutuwezesha kuamini. Hii haibadilishi akili, iko juu ya akili yote, “kwa maana mtu amwendeaye Mungu lazima aamini kwamba yeye yuko, na kwamba huwapa thawabu wale wamtafutao” (Waebrania 11:6).

Sasa tutaanza kumtafakari kila mmoja wa wahusika waliotajwa katika Waebrania 11 ili kuona jinsi Bwana alivyowaongoza katika kuenenda kwa imani. Nikianzia katika msimamo kwamba Roho Mtakatifu alimwongoza kwa makusudi mwandishi wake wa kibinadamu katika kuwachagua watu waliotajwa, ninajiuliza nisome zaidi ya maneno ili kuona ni kanuni zipi za kuenenda pamoja na Mungu alizozidhihirisha katika mifano hii. Ninafurahi ninapoona kweli kuu za Imani zikifunuliwa.

Naomba kwamba sura zifuatazo zitakusisimua tunapozitafakari pamoja. Mwandishi Mtakatifu na aiseme na nafsi yako kuhusu kile alichokiandika hapa.