Rahabu

“Kwa imani kuta za Yeriko zilianguka, baada ya kuzungukwa kwa siku saba. Kwa imani Rahabu, yule kahaba, hakuangamia pamoja na wale walioasi, kwa sababu alikuwa amewapokea wapelelezi kwa ukarimu” (Waebrania 11:30).

Habari ya Yeriko na Rahabu inapatikana katika Yoshua 2, 3, na 6:22 na kuendelea.

Yeriko ulikuwa mji wa kwanza wenye ngome ambao Waisraeli waliukuta baada ya kuvuka Mto Yordani kuingia Kanaani. Wangeushindaje mji huu ilhali hawakuwa na silaha za vita? Yoshua, kiongozi mpya wa watu wa Mungu, anatuma wapelelezi wawili ili kulitafakari tatizo hili. Wanaingia katika nyumba ya Rahabu ambayo ni dhahiri ilijengwa juu ya ukuta wa mji. Ameandikwa kuwa alikuwa kahaba, ingawa baadhi ya wafafanuzi wanadokeza kwamba hii haimaanishi zaidi ya kuwa aliendesha nyumba ya wageni.

Watu wa Yeriko walikuwa wakijua vyema kuhusu Waisraeli waliokuwa wakikaribia, nao walikuwa wamesikia hadithi za mambo ya ajabu ambayo mungu wao alikuwa amewatendea; hivyo wageni wawili walipofika mjini, ilikuwa jambo la kawaida kudhani kwamba walikuwa wapelelezi.

Rahabu anaamua kuwadanganya watu wake, akiwaficha wale wapelelezi wasipatikane, na kuwaambia wale waliowatafuta kwamba watu hao wawili walikuwa wameondoka mjini muda mfupi baada ya kuwasili kwao. Hatumsifu kwa udanganyifu na uongo wake, lakini historia itaonyesha kwamba Mungu alikuwa na kusudi kwa Rahabu lililokuwa juu sana kuliko chochote alichoweza kustahili.

Wale wapelelezi wanarudi kwa Yoshua wakiwa na habari za kutia moyo kwamba wakazi wa mji wamejaa hofu na kwamba “Bwana ametutia nchi hii yote mikononi mwetu” (Yoshua 2:24).

Yoshua anawapa watu wake yale yanayoonekana kuwa maagizo ya kipuuzi, lakini ameyasikia kutoka kwa Mungu na kwa hiyo ni lazima atii. Wanapaswa kuuzunguka mji mara moja kwa siku kwa muda wa siku sita, kisha mara saba siku ya saba! Watu wangeweza kumhoji, wangeweza kubishana, lakini kufikia sasa walikuwa wanazidi kuzitambua njia za Mungu.

Imani haipingani na akili; imani iko juu ya akili. Siku ya saba, baada ya kuuzunguka mji mara saba, makuhani walipiga tarumbeta, watu wakapiga kelele, na kuta zikaanguka!

Je, ni imani kuu ya Yoshua iliyofanya jambo hili? Ni jambo la kushangaza kwamba jina lake halitajwi hata kidogo katika Waebrania! Kama mwandishi wetu angetaka kuonyesha imani kuu ya Yoshua kwa Mungu, angeweza kutumia mfano wa Yoshua na Kalebu wakirudi kutoka kupeleleza nchi katika Hesabu 14. Wenzao wapelelezi kumi walikuwa wamejaa hofu na hawakuthubutu kwenda mbele, jambo lililowafanya Kalebu na Yoshua wawakasirikie, wakisema, “Bwana yu pamoja nasi; msiwaogope!” (Hesabu 14:9). Waliamini katika Mungu, lakini mwandishi wa Waebrania hajaribu kutuonyesha imani yao kuu, bali matendo ya Mungu kwa imani.

Imani haihitaji mtu aelewe na aamini; inahitaji yeyote atakayetii, hata pale ambapo haelewi wala haamini! “Ee Bwana, naamini; nisaidie kutokuamini kwangu!” (Marko 9:24). Inahitaji mtu awe mtii kwa neno la Mungu. Utii ulidhihirika na kuta zikaanguka, kwa imani. Mungu alikuwa amenena, watu walikuwa wametii, na Mungu akaziangusha kuta. Kama angewaambia waseme na mlima nao wakatii, angeuondoa mlima.

Ni mfano wa ajabu kama nini wa imani Rahabu anavyoonekana kwa mtazamo wa kwanza! Huyu ni mwanamke mwongo, mdanganyifu, na msaliti wa watu wake mwenyewe, lakini mwandishi wa Waebrania na mtume Yakobo, wote wawili wamemwandika kuwa mfano wa imani. Basi, imani yake imefunuliwa wapi? Ilikuwa ni kwa imani kwamba hakuangamia.

Mungu alimwacha hai kwa sababu ya jinsi alivyoitikia ushuhuda wake ndani yake. Aliwaambia wale wapelelezi waliofichwa juu ya dari yake, “Najua ya kuwa BWANA amewapa ninyi nchi hii, na ya kuwa hofu yenu imetuangukia, na ya kuwa wenyeji wote wa nchi wanayeyuka mbele yenu… Nasi mara tuliposikia hayo, mioyo yetu iliyeyuka, wala haukubaki tena roho ndani ya mtu ye yote kwa sababu yenu; kwa maana BWANA, Mungu wenu, ndiye Mungu katika mbingu juu na katika nchi chini” (Yoshua 2:9,11).

Majirani zake wote waliamini kama alivyoamini yeye, lakini bado walishikilia tumaini lao tupu kwamba kwa namna fulani wangeweza kuiepusha hukumu ya Mungu isiwapate. Waliamini kwamba miungu yao bado ilikuwa na nguvu fulani ya kusimama dhidi Yake. Tofauti na yeye, wao hawakukiri walichokijua kuwa ni kweli, kwa maana ujuzi wao ulikuwa ni wa kichwani uliojengwa juu ya hadithi na tetesi walizosikia, ilhali ujuzi wake ulikuwa ni wa moyoni, kama ule wa Petro alipotangaza juu ya Mlima Hermoni, “Wewe ndiwe Kristo!” (Yoshua 2:11). Alikuwa na msadikisho na ungamo.

Jinsi walivyokosea watu wa Yeriko! Kama vile umati wa watu leo wanaoamini kwamba Bwana hataitekeleza nia yake aliyoitangaza ya kuuhukumu ulimwengu huu kwa ajili ya dhambi yake na kukataa kwake kuikubali njia yake ya kutoroka (pekee) - wokovu unaopatikana katika msalaba wa Yesu.

Katika habari ya Rahabu, Mungu anachora picha nyingine ya msalaba ule, kwa kumtaka Rahabu aning’inize uzi mwekundu dirishani mwake ili majeshi yanayoshambulia yautambue kuwa ni dhamana yake ya wokovu. Uzi mwekundu daima umekuwa njia yetu ya wokovu; ule mkondo wa damu ambao bado unatiririka kutoka vidonda vya Kalvari.

Kuta zilipoanguka, Rahabu na jamaa yake waliokolewa kama alivyokuwa ameahidiwa, kwa sababu aliamini kwamba uzi ule dirishani mwake ungeheshimiwa. Vivyo hivyo, Mungu amejifunga kuwaheshimu wote wanaomjia kwa njia ya damu. Hakuna njia nyingine! “Amwaminiye Mwana yuna uzima wa milele; asiyemtii Mwana hataona uzima, bali ghadhabu ya Mungu inamkalia” (Yohana 3:36). “Mkijua kwamba mlikombolewa… si kwa vitu viharibikavyo, kwa fedha wala dhahabu, bali kwa damu ya thamani, kama ya mwana-kondoo asiye na ila, asiye na waa, yaani, ya Kristo” (1 Petro 1:18-19).

Rahabu alikuwa mwabudu-sanamu, aliyelelewa kuabudu miungu mingine. Nuru aliyokuwa nayo huenda haikuwa kubwa sana, faida zake zilikuwa chache, lakini aliufuata mwangaza wa ile nuru ya ndani.

Aliamini kwa vitendo, akaokolewa; hii ndiyo kanuni ya kweli ya imani.

Katika Mathayo 1, tunakuta ukoo wa Yesu, mwana wa Daudi, mwana wa Ibrahimu. Kusudi la mtume ni kuwaonyesha wasomaji wake Wayahudi urithi mkuu na wa kifalme ambao Yesu ametoka. Yeye ni Myahudi kamili, kama mwana wa Ibrahimu; ni mfalme kamili kwa ukoo wa upande wa kiume, kama mwana wa Daudi, lakini angalia jina linaloheshimiwa katika mstari wa tano. Rahabu yule kahaba, aliyeokolewa kwa imani, ndiye bibi wa bibi wa mfalme Daudi! Ameandikwa kuwa mzazi wa moja kwa moja wa Mwokozi!!

Binti yangu Corinne anajishughulisha sana na kufuatilia ukoo wa familia yetu. Jambo hili lilinivutia sana mwanzoni, lakini alipoanza kuchimba kwa kina zaidi, nikaanza kuwa na wasiwasi kidogo.

Nilikuwa nikisoma kitabu cha “Time Life” kuhusu “Maharamia wa Bahari ya Karibi” katika karne ya kumi na nane, nikashtuka kugundua kwamba baadhi ya walio maarufu zaidi walikuwa Wawelisi, kama mimi!

Niliogopa siku ambayo Corinne angetangaza, akiwa na tabasamu la kujigamba usoni pake, kwamba mmoja wa mababu zangu alikuwa maharamia mashuhuri.

Roho Mtakatifu alipowaongoza mitume kuandika Injili, hakuficha machoni petu kwamba Yesu alitokana na makahaba, wadanganyifu, wauaji, na wazinzi. Naam, mama yake Mariamu haikuwa rahisi kwake kuvumilia mitazamo ya mashaka ya majirani zake ilipodhihirika kwamba alikuwa na mimba nje ya ndoa! Hatuambiwi lolote kuhusu wazazi wake, yaani babu na nyanya wa Mwokozi. Je, sababu inaweza kuwa waliona ni vigumu sana kukubali aibu ambayo mimba kama hiyo ingewaletea? Baada ya yote, wangetegemewaje kuamini kwamba binti yao alikuwa bado bikira ilhali ilikuwa dhahiri kwamba ana mimba?!

Kama ningekuwa Mungu, ningelifanya kwa namna tofauti! Ningemzalisha mwanangu katika hospitali bora kabisa jijini Yerusalemu, akihudumiwa na madaktari bora kabisa. Ningemchagua binti wa kifalme, mwanamke mzuri kuliko wote, mwenye vipaji na elimu kuliko wote duniani, awe mama yake, nami ningemzunguka kwa utajiri na fahari aliyoizoea. Ningetangaza kwa ulimwengu wote kwa sauti kama ya radi kutoka mbinguni, kwamba mwanangu amezaliwa.

Badala yake, Mungu alichagua kwamba Yesu azaliwe katika zizi, mahali pachafu penye harufu mbaya palipokaliwa na ng’ombe. Baba yake angeaibika na mama yake angekuwa mpweke, aliyekataliwa na rafiki zake, na huenda hata na jamaa yake pia, huku matusi ya “kahaba” yakiwa masikioni mwake. Tangazo lake lilisikiwa tu na wachungaji wanyenyekevu waliokuwa wakichunga kondoo zao. Kweli, msimamizi wa uhusiano wa umma wa Mungu alishindwa kabisa, sivyo!

Hapa ndipo penye upendo! Hakuna njia yoyote ambayo Yesu angewavuta watu wamfuate kwa sababu ya cheo chake, utajiri wake, au ukoo wake. Hataruhusu vitu hivi vikunyang’anye haki yako ya kuchagua. Kitu pekee anachokitaka kwako ni upendo wako, nao hauwezi kulazimishwa kutoka kwako. Hatakushurutisha umfuate.

Watu wenye nguvu wa ulimwengu huu wana wafuasi wao wanaong’ang’ania kwa sababu ya cheo kinachowapa. Rais mpya anapochaguliwa, tunatazama habari kwa hamu ili kuona wale atakaowakusanya kumzunguka. Yesu hawapi wafuasi wake chochote cha utajiri na nguvu za ulimwengu huu. Badala yake, anajitambulisha na watu walio wa hali ya chini kabisa ili wote wajisikie wanaweza kumkaribia. Je, umeeleweka vibaya, umekataliwa, umepondwa, au umeshtakiwa? Yeye anaweza kuhisi pamoja nawe kwa sababu alitendewa vivyo hivyo. Je, u maskini, wa heshima ndogo, usiye na cha kujivunia? Yeye anaelewa, kwa maana ameipita njia iyo hiyo.

Napoleon Bonaparte inasemekana alisema, “Katika umri wa miaka thelathini na mitatu, Aleksanda Mkuu aliushinda ulimwengu uliojulikana.

Katika umri huohuo, mimi nimeushinda ulimwengu uliojulikana. Sisi wote wawili tulishinda kwa nguvu ya upanga. Katika umri wa miaka thelathini na mitatu Yesu naye aliushinda ulimwengu wote, lakini yeye alishinda kwa nguvu ya upendo - naye amenishinda mimi!”

Mungu alimchagua kahaba, kwa imani, akijua kwamba, kutoka kwake angekuja Mwokozi wa Ulimwengu; Mwanawe mwenyewe wa thamani, Yesu.

Hii ndiyo neema! Upendo usiostahiliwa!

Muhtasari Mwandishi wa Waebrania na Yakobo, wote wawili walimtoa Rahabu kuwa mfano wa imani inayotenda kazi.

Waisraeli walipokaribia Yeriko, Mungu alikuwa akitimiza makusudi yake. Angemchagua mwanamke ambaye angekuwa mzazi wa Yesu, kahaba kutoka kwa watu wa kipagani. Hakujua hata kidogo kusudi lake alipowaficha wale wapelelezi!

Tunapaswa kujifunza kanuni zifuatazo: 1. Yoshua alimwamini Mungu na akatii. Hatajwi hata jina lake katika mstari wetu kwa sababu imani haimletei mwanadamu heshima; kusudi lake ni kumletea Mungu heshima.

2. Msadikisho wa Rahabu ukawa ungamo.

3. Ahadi za Mungu kwetu zinategemea kutumika kwa uzi mwekundu (ile damu).

4. Mungu ana kusudi kuu kwa wote waendao kwa imani.

5. Neema huwafikia walio chini kabisa na kuwainua hadi vilele vya ufalme.