Sara

“Kwa imani hata Sara mwenyewe alipata uwezo wa kuwa na mimba alipokuwa amepita wakati wake, kwa kuwa alimhesabu yeye aliyeahidi kuwa mwaminifu. Kwa hiyo hata kwa mtu mmoja, naye amekwisha kuwa mfu, walizaliwa wana wengi kama nyota za mbinguni na kama mchanga usiohesabika ulioko ufuoni mwa bahari” (Waebrania 11:11-12).

Habari ya Sara yapatikana katika Mwanzo 18:9-15, na Mwanzo 21:1-7.

Tunaposoma habari ya Mwanzo, tunashangazwa na ukosefu wa kuamini unaoonekana ndani ya Sara, na kwa hakika hatungemhesabu kuwa mtu anayefaa kuwa shujaa mkuu wa imani ikiwa hilo linapaswa kulinganishwa na kuamini. Kwa kweli, Sara anaendelea kudhihirisha tabia yake ya kibinadamu anapopanga na kufanya hila pamoja na mumewe.

Mungu alikuwa amemwambia Ibrahimu kwamba angekuwa na mrithi na angekuwa baba wa taifa kuu, lakini Sara ni tasa, na akili ingetangaza kwamba ahadi ya Mungu ni ubatili. Yeye, hata hivyo, atakuwa na mtoto, hata kama itamaanisha kumtoa mjakazi wake, Hagari, awe mwenzi wa kimwili kwa Ibrahimu. Mtoto anapaswa kuwa wa Sara, lakini, anapomwona Hagari na yule mvulana, wivu wa kibinadamu unainuka kifuani mwake, naye Hagari anafukuzwa kutoka nyumbani.

Kutoka kwa mwana huyu, Ishmaeli, mataifa makuu ya Kiarabu yatatokea, na ulimwengu unaendelea kuvuna kimbunga chao. Angalia kwamba ni Mungu Mwenyewe aliyeyainua mataifa haya, lakini agano lake linabaki na watoto wa ahadi (Mwanzo 18:19). Usishangae juu ya uadui unaoendelea kati ya mataifa ya Kiarabu na wana wa Israeli; siku zote kutakuwa na uhasama kati ya tunda la ubinadamu wa mwili na tunda la ahadi ya Mungu. Kwa mfano, Yesu aliwaambia wanafunzi wake wangoje Yerusalemu kwa ajili ya ahadi (nyingine) ya Baba yake – ubatizo wa Roho Mtakatifu (Matendo 1:4,5).

Si ajabu kwamba matokeo ya kimwili ya ahadi hii mara nyingi ni mafarakano na uhasama miongoni mwa watu wa Mungu badala ya nguvu ile kuu ambayo ingepasa kutuwezesha kuwa mashahidi ambao Kristo ametuita tuwe!? Ishmaeli alizaliwa kutokana na mipango na hila za kibinadamu ilhali Isaka alizaliwa ‘kwa imani.’ Dini zote za ulimwengu zimejengwa juu ya mafundisho na kanuni za ujanja wa kimwili, lakini kanisa la Yesu Kristo linaundwa na watu waliohesabiwa haki kwa imani.

Kisha tunawaona Sara na Ibrahimu wakifanya hila ili kumdanganya Abimeleki, mfalme wa Gerari, kwa kujifanya kwamba walikuwa ndugu. Ibrahimu aliogopa kwamba watu wa Gerari wangeweza kumwua akiwa mume wa Sara, ili Abimeleki apate kumtwaa kuwa mke wake. Ikiwa mfalme angedhani walikuwa ndugu, angeweza bado kumtwaa Sara lakini, angalau, uhai wa Ibrahimu ungeokolewa! Je, hili linakusomeka kama watu wenye imani kuu katika Mungu?

Yaani, ikiwa hilo linapaswa kulinganishwa na kutumaini. Ni jambo la kushtua jinsi gani kwamba mfalme mpagani, Abimeleki, alikuwa na unyoofu wa moyo na hofu ya Mungu zaidi ya yule mtu wa imani! Alimrudisha Sara kwa mumewe, bila kuunajisi utakatifu wa ndoa yao, na akiwapa zawadi nyingi kama uthibitisho mbele ya watu wote.

Mungu alimheshimu Abimeleki na nyumba yake, lakini mkono wake ulikuwa bado juu ya Ibrahimu na Sara ili kuwaongoza katika matendo ya imani.

Kwa imani (tendo au kipawa cha Mungu), Sara aliweza kuchukua mimba.

Ingawa alikuwa na umri wa zaidi ya miaka 90, mtoto wa ahadi, Isaka, alizaliwa. Wanandoa hao waliungana kimwili, naye Mungu akayahuisha manii na yai vyote ili mimba itungwe. Sara alipokubali kwamba kichefuchefu cha asubuhi kilikuwa ushahidi wa uaminifu wa Mungu, huo ulikuwa ushahidi wa imani yake. Hakupambana dhidi ya kile kilichokuwa kikitendeka ndani yake ijapokuwa kilikuwa kinyume cha kila kitu ambacho yeye, au yeyote aliyemjua, alikuwa amewahi kupitia katika umri huo. Mwili wake usingekataa, wala yeye asingekiharibu kile Mungu alichokuwa akikizaa ndani yake.

Mara nyingi tunakataa kazi za Roho Mtakatifu katika maisha yetu kwa sababu hatuelewi! Ni mara ngapi tunakiharibu kile kipawa au huduma ambayo Mungu angeizaa ndani yetu kwa sababu tunaogopa kulipa gharama!? Si hivyo kwa Sara.

Mafunzo ya Kujifunza kutoka Imani ya Sara Kwanza, Mungu ni mwaminifu kwa ahadi zake hata inapoonekana kuwa jambo lisilowezekana. Kwa kweli, kwake Yeye, hakuna lisilowezekana!

Pili, Mungu anatafuta watu wa imani wanaoweza kuongozwa Naye badala ya siasa au hila. Kanisa leo limejaa sana mipango na mipangilio ya mwanadamu kiasi kwamba hakuna nafasi kwa Roho Mtakatifu kutenda.

Sara alizaa mwana mmoja kwa hila. Matokeo yake yamekuwa huzuni kuu kwa watu wa Mungu katika karne zote tangu wakati huo. Mwanawe yule mwingine alikuwa ‘kwa imani,’ mwana wa ahadi. Kutoka kwake Mungu ameimarisha watu wake wa agano, ambao kupitia kwao mataifa yote ya dunia yatabarikiwa. Wao ndio watakaokuwa taifa lililotuletea Biblia na Masihi, Mwokozi wetu, Yesu.

Kazi ya Mungu kwa Njia ya Mungu Nakumbushwa juu ya wakati ambao Mfalme Daudi angelirudisha sanduku la agano Yerusalemu. Habari hii yasimuliwa kwetu katika 1 Mambo ya Nyakati 13 na 15. Kwa Waebrania, sanduku liliwakilisha uwepo wa Mungu miongoni mwa watu wake, lakini lilikuwa nje ya nchi kwa miaka 20 baada ya kutekwa vitani na Wafilisti wakati wa ukuhani wa kimwili wa Eli. Kwa muda wa miezi saba Wafilisti walikuwa wameteseka sana wakati sanduku lilipokuwa katika nchi yao, hivyo walikuwa wamelipakia juu ya gari jipya lililokokotwa na ng'ombe wa maziwa ambao hawakuwa wamepata kufungwa nira pamoja hapo awali.

Mungu aliwaruhusu kulirudisha sanduku salama kuvuka mipaka ya Israeli bila ugonjwa wala jeraha; lakini, Daudi alipojaribu kutumia njia iyo hiyo kurudisha ‘uwepo wa Mungu’ Yerusalemu, ng'ombe wake waliofunzwa waliteleza, na mauti yakatokea.

Daudi alimkasirikia Mungu sana, lakini punde ilimbidi atubu alipoisoma njia ya Mungu ya kulibeba sanduku, iliyoandikwa katika Hesabu 4. Mungu alikuwa ameleta hukumu juu ya watu wake ‘kwa sababu hawakumtafuta kama ilivyoamriwa’ (1 Mambo ya Nyakati 15:13).

Ni maoni yangu kwamba upako wa uwepo na nguvu za Mungu, kwa masikitiko, haupo katika mengi ya yale tunayoyaita kanisa.

Je, hii yaweza kuwa kwa sababu tunajaribu kujenga kanisa lake kwa njia yetu na si njia aliyoiamuru? Kwa kweli, yaweza kuwa kwamba hatujengi kanisa lake hata kidogo, bali kanisa letu? Hajaahidi kamwe kuweka upako wake juu ya kitu chochote kifanyikacho kwa nguvu au hekima ya mwanadamu, bali amesema, ‘Nitalijenga kanisa langu, wala milango ya Kuzimu haitalishinda’ (Mathayo 16:18). Zaidi ya hayo, atalijenga kanisa lake juu ya mwamba, kama ulivyodhihirishwa katika Petro! Ni sifa gani ya Petro ambayo Bwana anaielekea? Hakika si tabia yake ya haraka-haraka, ya kimwili! Napendekeza kwamba mwamba ni imani kama ile mtume aliyoidhihirisha kwa kukiri kwake Yesu kuwa ndiye Kristo. ‘Umebarikiwa, Petro. Baba yangu amekufunulia jambo hili’ akasema Yesu (Mathayo 16:17). Imani hapa yaonekana katika ufunuo unaofuatwa na ukiri; hatua ya Mungu inayofuatwa na jibu la mwanadamu.

Je, si wakati muafaka kwamba turudi kufanya kazi ya Mungu kwa njia ya Mungu?

Ni wakati wa kurudi kuwa watu wa kitabu, tukiegemeza kazi na mwenendo wetu juu ya kanuni na maagizo yake. Nina hakika kwamba tunapoifanya kazi ya Mungu kwa njia ya Mungu, tutapokea upako wa uhai wake juu ya jitihada zetu. Kwa mfano, tuna mipango na hila nyingi za kuwahubiria Injili watu walio karibu nasi. Tunatumia ‘Sheria Nne za Kiroho’ au ‘Njia ya Kirumi.’ Tunajifunza mbinu za A-B-C kama wachuuzi na kupanga ‘ibada zinazomvutia mtafutaji.’ Tunaandika vijitabu vingi na kuandaa programu za uinjilisti. Yote haya ni mema, lakini je, ni njia ya Mungu?

Nakupa changamoto ung'oe ukurasa mmoja tu kutoka Biblia yako uupe watu kama kijitabu cha injili. Je, waweza kupata mbinu moja ambayo kanisa la mwanzo lilibuni ambayo tungeweza kuiga leo?

Hakika Roho Mtakatifu angeliweza kumsukuma mmoja mwingine wa wanafunzi, tuseme Andrea au Filipo, ambaye angeliweza kutunga kitabu kilichoundwa na ‘Vijitabu Vyenye Uhakika wa Kufanikiwa,’ au ‘Njia Hamsini za Kuwavuta Rafiki Zako kwa Yesu’ kama huo ndio ungekuwa mpango wa Roho wa Wokovu! Tungeliweza kukichapisha kama kitabu cha mwisho katika Biblia chenye kurasa za ‘kung'oa’ kwa urahisi.

Nina hakika kwamba Biblia ina mpango wa Mungu wa wokovu; lakini, ingawa hatuwezi kung'oa ukurasa mmoja kuutoa kama kijitabu cha injili, twaweza kung'oa vitabu vizima vinavyokazia njia yake. Nayo ni umoja wa watu wake!

“Baba, naomba kwamba wawe na umoja, ili ulimwengu upate kuamini kwamba wewe umenituma; ili ulimwengu upate kujua kwamba umewapenda kama unavyonipenda mimi” (Yohana 17).

Mipango na hila zetu zote zitazaa tunda fulani, kwa maana Yeye ni Mungu wa neema, lakini mavuno kamili hayatakuja kamwe mpaka tuifanye kwa njia ya Mungu. Anataka kulijenga kanisa lake, na kutupa mataifa, lakini atalifanya kwa njia yake tu.

Njia yake ni njia ya imani na, njia moja ambayo hii yadhihirishwa ni kwa umoja wetu katika Roho.

Muhtasari Mfano wa Sara, mwenye hila aliyemcheka Mungu, umetolewa kwetu ili kutufundisha kanuni zifuatazo: 1. Kwa Mungu mambo yote yawezekana.

2. Akili ya kibinadamu na imani vinapingana.

3. Kusudi la Mungu kwa ajili yetu litafikiwa kwa imani tu.

4. Ni lazima tuifanye kazi ya Mungu kwa njia ya Mungu!