Kumtazama Yesu

Tazama Juu

Mkristo! katika taabu zako zote, mtazame Mungu, nawe utaokoka. Katika majaribu yako yote na dhiki zako zote, mtazame Kristo, nawe utapata wokovu. Katika uchungu wako wote, katika toba yako yote kwa ajili ya hatia yako, mtazame Kristo, nawe utapata msamaha. Kumbuka kuinua macho yako kuelekea mbinguni, na moyo wako pia kuelekea mbinguni. Jifunge mnyororo wa dhahabu, na uweke kishikizo kimoja chake katika pete iliyo mbinguni. Mtazame Kristo; usiogope. Hakuna kujikwaa mtu aendapo huku macho yake yakimwelekea Yesu. Yeye amtazamaye Kristo huenenda salama.

Bwana Wetu Yesu

Matokeo yote ya heri yatiririkayo kutokana na utii mkamilifu, upatanisho uliokamilika, ufufuo, kupaa, au uombezi wa Bwana Yesu, yote ni yetu kwa kipawa chake mwenyewe. Juu ya kifua chake sasa amevaa majina yetu; na katika maombezi yake yenye mamlaka mbele ya kiti cha enzi hutukumbuka na kulitetea shauri letu. Faida za cheo chake cha juu, mamlaka yake juu ya enzi na nguvu, na ukuu wake usio na kikomo mbinguni, huvitumia kwa faida ya wale wamtumainio. Hali yake ya juu iko tayari kutuhudumia kama vile ilivyokuwa hali yake ya kudhiliwa. Yeye aliyejitoa mwenyewe kwa ajili yetu katika vilindi vya huzuni na mauti, hakuiondoa karama hiyo sasa aliketishwapo katika mbingu zilizo juu. Kristo hana adhama yoyote asiyoitumia kwa ajili ya kuinuliwa kwetu, wala haki yoyote asiyoitumia kwa ajili ya ulinzi wetu. Kristo kila mahali na kwa kila njia ni fungu letu, milele na milele la kufurahiwa kwa wingi.

Uombezi wa Kristo

Bwana Yesu ameteka mateka, na sasa ameketi mkono wa kuume wa Mungu, akiendelea kutuombea daima. Je, imani yako yaweza kumwona? Kama kuhani mkuu wa Kilawi wa zamani asimama akiwa amenyoosha mikono yake: kuna ukuu katika sura yake, na kwa mamlaka hutetea. Kichwani mwake mna kilemba king'aracho cha ukuhani wake, na kifuani mwake mng'aa vito vya thamani ambavyo juu yake majina ya watu wake yameandikwa milele. Msikilizeni anapotetea—je, husikii ni nini? Je, ni ombi lako alilotaja mbele ya kiti cha enzi? Ombi ulilotoa asubuhi hii, Kristo sasa analitoa mbele ya kiti cha enzi cha Baba yake. Nadhiri uliyoiweka sasa hivi, yeye sasa anaitoa huko. Yeye ndiye Madhabahu na Kuhani, na kwa dhabihu yake mwenyewe huyafukiza maombi yetu manukato. Na bado, huenda, umekuwa ukiomba kwa muda mrefu, wala hukupata jibu. Ewe mwombaji maskini uliaye! umemtafuta Bwana wala hakuonekana kukusikia, au angalau hakukujibu kwa furaha ya nafsi yako, nawe umejaa giza na uzito kwa sababu hiyo. "Mtazame yeye, nawe utatiwa nuru." Kama wewe hufaulu, yeye atafaulu; kama uombezi wako haujaliwi, wa yeye hauwezi kupuuzwa; kama maombi yako yaweza kuwa kama maji yaliyomwagika juu ya nchi, yasiyoweza kuzolewa tena, lakini maombi yake si hivyo; yeye ni Mwana wa Mungu—hutetea na sharti afaulu. Mungu hawezi kumnyima Mwanawe mwenyewe kile anachokiomba sasa—yeye aliyewahi kununua rehema kwa damu yake. Ee, uwe na moyo mkunjufu, endelea bado na maombi yako, kwa maana Yesu "sikuzote yu hai ili akuombee" wewe.

Mtazamo wa Kristo

Mtazamo wa Kristo daima ni faida kwa Mkristo—hatuwezi kupata Kristo kupita kiasi—hakuwezi kuwa na urudufu pale jina lake litajwapo. Tupe Kristo daima, Kristo sikuzote. Ukiritimba wa Kristo ni utamu wa aina mbalimbali; na hata umoja wa Kristo unao ndani yake vipengele vyote vya upatano. Kristo juu ya msalaba wake na juu ya kiti chake cha enzi, katika hori na katika kaburi—Kristo kila mahali ni mtamu kwetu. Twalipenda jina lake, twaiabudu nafsi yake, twafurahi kusikia habari za kazi zake—somo ni jipya sikuzote.

Kuna wengine wanaolalamika kwamba upendo wao kwa Mwokozi ni hafifu na baridi. Lakini hili lisingekuwa hivyo kama wangekuwa zaidi pamoja na Yesu. Kadiri unavyoishi karibu zaidi na Kristo, na kadiri unavyomjua zaidi, ndivyo utakavyompenda zaidi. Usijaribu kujizalishia mwenyewe kiwango fulani cha upendo kwa Kristo kwa njia fulani za ajabu; bali ingia mbele zake, umtafakari daima, jichoree mwenyewe mateso yake kwa ajili yako, ndipo utakapompenda—itakuwa rahisi kwako, kwa maana yeye atauvuta moyo wako maskini karibu zaidi naye, unapomfikiri hivyo; na upendo wako kwake utakua sawasawa na jinsi unavyoutambua upendo wake kwako.

Kumtafuta Kristo

Fikiri, ewe nafsi ungojeayo, ya kuwa rehema hiyo yastahili kusubiriwa. Je, si wokovu—ukombozi wa nafsi yako kutoka kuzimu? Kungoja kwa muda mrefu langoni pa rehema kutalipwa vema, ikiwa Mfalme, mwishoni, atakupa kito hiki chenye thamani kuu.

Fikiri pia, jinsi usivyostahili kabisa rehema hiyo; kwa hiyo usisite kujinyenyekesha, wala kungoja kwa saburi mapenzi enzi ya Yehova. Wenye kiburi sharti waangaliwe mara moja, ama sivyo watakwenda zao; lakini wewe huna cha kujisifia, na yakupasa kuhisi ya kwamba kama akikupuuza kwa muda mrefu, kutostahili kwako hakungeweza kudai udhuru wowote kwa kukawia kwake. Zaidi ya hayo, kumbuka kwamba yeye sharti asikie mwishoni. Ahadi yake ingevunjwa, kama nafsi moja iombayo ingeweza kupotea; kwa maana amesema, "Tafuteni, nanyi mtaona"—"Kila mtu atakayeliitia jina la Bwana ataokoka." Kukawia huenda kukawa kwa faida yako, ili kukushusha chini zaidi katika mavumbi ya kujidhili, au kukufanya uwe na bidii zaidi kwa ajili ya baraka. Yamkini Bwana anakusudia kuijaribu imani yako, ili kwamba, kama yule mwanamke wa Siro-Foinike, uweze kumletea heshima kwa kumtumaini kwako. Endelea kuomba, kwa maana "Bwana ni mwema kwao wamngojao, kwa yule mtu amtafutaye."

Mfikirie Yeye

Ee mwamini, uliyechoka na kuvunjika moyo kwa sababu ya ugumu wa njia, itazame nyayo za Bwana, uone jinsi yeye alivyoteseka. Umejaribiwa na kutaabika, nawe waomba faraja. Ni faraja gani iliyo bora zaidi iwezayo kupewa kuliko ile inayowekwa mbele yako katika ukweli kwamba Yesu Kristo ni mmoja nawe katika asili yako—kwamba ameteseka yote unayoyateseka sasa—kwamba njia yako imekwisha kanyagwa zamani na mguu wake mtakatifu—kwamba kikombe unachokinywa ni kikombe ambacho yeye amekimaliza hata chini kabisa—kwamba mto uupitao ni ule ambao yeye aliuogelea, na kila wimbi na msukosuko unaobingirika juu ya kichwa chako ulibingirika zamani juu yake. Njoo! je, unaona aibu na hutaki kuteseka yale aliyoteseka Bwana wako? Je, mwanafunzi atakuwa juu ya mwalimu wake, na mtumishi juu ya bwana wake? Je, yeye afe msalabani, nawe usiubebe msalaba? Je, ni lazima yeye avikwe taji ya miiba, nawe uvikwe taji ya mafunjo? Je, yeye achomwe mikono na miguu, na wafuasi wake wasisikie maumivu yoyote? Ee, itupe mbali ndoto hiyo ipendezayo. Mtazame yeye "aliyestahimili msalaba na kuidharau aibu," nawe uwe tayari kustahimili na kuteseka kama vile yeye alivyofanya. Una mfano wake wa kukuongoza, na huruma yake ya kukutia moyo.

Mwokozi Mtakatifu

Kuna usemi aliotumia mtume Paulo kuhusu Bwana Yesu, ulio mzuri sana na wenye maana kubwa—"yeye asiyeijua dhambi." Hausemi tu kwamba hakuitenda, bali kwamba hakuijua. Dhambi haikuwa mjuana wake; alijuana na huzuni, lakini hakujuana na dhambi. Ilimbidi kutembea katikati ya makao yake yaliyotembelewa zaidi, lakini hakuijua. Si kwamba hakuijua asili yake, wala hakuijua adhabu yake, bali hakuijua; alikuwa mgeni kwayo; kamwe hakuipa hata utambuzi hafifu kwa neno, kwa ishara, wala kwa tabasamu. Bila shaka aliijua dhambi ilivyo, kwa maana alikuwa Mungu kamili, lakini na dhambi hakuwa na ushirika, wala mshirikiano, wala udugu. Alikuwa mgeni kabisa mbele ya dhambi; alikuwa mgeni wa nchi; hakuwa mkaaji wa nchi ile ambako dhambi hukiriwa. Alipita katika jangwa la mateso, lakini katika jangwa la dhambi kamwe hakuweza kuingia. "Yeye hakuijua dhambi:" litambue neno hilo na ulitunze; na unapomfikiri Mbadala wako, ukimwona akivuja damu juu ya msalaba, fikiri ya kwamba unaona imeandikwa katika mistari hiyo ya damu, "Yeye hakuijua dhambi." Iliyochanganyika na wekundu wa damu yake—Waridi la Sharoni—ione usafi wa asili yake—Yungiyungi la Bondeni—"Yeye hakuijua dhambi."

Kristo Kielelezo Chetu

Kumbuka kielelezo cha heri cha Bwana na Mwokozi wetu Yesu Kristo. Hakika hili litakufundisha usiishi kwa ajili ya nafsi yako! "Maana mmejua neema ya Bwana wetu Yesu Kristo, jinsi alivyokuwa tajiri, akawa maskini kwa ajili yenu, ili kwamba ninyi mpate kuwa matajiri kwa umaskini wake." Moyo wake umefanywa kwa wororo, matumbo yake huyeyuka kwa upendo. Katika dhiki zetu zote yeye huteswa. Tangu siku aliyofanyika mwili wa mwili wetu, kamwe hakujificha nafsi yake mbali na mateso yetu. Kichwa chetu kitukufu husukumwa na huzuni zote zinazowahangaisha viungo. Ijapokuwa sasa amevikwa taji, hazisahau miiba aliyowahi kuivaa; katika fahari za hali yake ya kifalme Peponi, hawasahau watoto wake hapa duniani. Bado anateswa Sauli awateswapo watakatifu; bado ndugu zake ni kama mboni ya jicho lake, na karibu sana na moyo wake. Kama mwaweza kuona ndani ya Kristo chembe ya ubinafsi, jiwekeni wakfu kwa tamaa zenu, na Mamoni na awe Mungu wenu. Kama mwaweza kuona ndani ya Kristo chembe moja ya ugumu wa moyo na ukavu wa roho, basi jihesabuni haki ninyi wenye mioyo iliyo kama jiwe kwa maombolezo ya wafiwa. Lakini kama mwadai kuwa wafuasi wa Mtu wa Nazareti, basi jaeni huruma; yeye huwalisha wenye njaa wasije wakazimia njiani; huwaganga waliovunjika moyo na kuponya vidonda vyao vyote; husikia kilio cha mhitaji na kuinuka ili kumsaidia. Kama ninyi ni wanafunzi wake, nendeni mkafanye vivyo hivyo.

Mtazame Kristo

Je, ungependa kuwa huru na mashaka? Je, ungependa kufurahi katika Bwana kwa imani isiyotikisika, na uhakika usiotetereka? Basi mtazame Yesu! Nina hakika ya kwamba kama tungeishi zaidi pamoja na Yesu, tukawa zaidi kama Yesu, na tukamtumaini zaidi yeye Yesu, mashaka na hofu vingekuwa vitu vichache mno na nadra.

Mwokozi Kamili

Ingekuwa kinyume na tabia yake yeye "ambaye kwa yeye vitu vyote vipo," kama angelituma Mwokozi asiyekamilika; yaani, kama angetuachia sisi kufanya sehemu wenyewe, na Kristo afanye sehemu iliyobaki. Litazame jua. Mungu hutaka jua liiangazie dunia: je, huuuliza giza la dunia lichangie nuru? Je, huuuliza usiku, na kuuliza kama hauna katika vivuli vyake vya giza kitu chochote kiwezacho kuchangia mng'ao wa adhuhuri? La; jua huchomoza asubuhi, kama shujaa aendaye mbio zake, na dunia hufanywa angavu. Je, Mungu atamgeukia mwenye dhambi aliye gizani, na kumwuliza kama kuna kitu chochote ndani yake kiwezacho kuchangia nuru ya milele? La; Yesu huchomoza kama Jua la haki, lenye kuponya katika mbawa zake, na giza, wakati wa kuja kwake, huwa nuru. Yeye peke yake ndiye "nuru ya ulimwengu;" mkono wake mwenyewe ulileta wokovu; haombi msaada wa mwanadamu, bali hutoa vyote na kufanya vyote kwa neema yake mwenyewe iliyo tele, na ni Mwokozi aliye kamili na mkamilifu.