Nguvu Katika Udhaifu

Nguvu Kupitia Udhaifu

Njia ya kuwa na nguvu katika Kristo ni kuwa dhaifu ndani yako mwenyewe. Mungu hamimini nguvu yoyote katika moyo wa mwanadamu hata nguvu ya mwanadamu iwe imekwisha kumwagwa yote. Maisha ya Mkristo ni ya kumtegemea Mungu kila siku, neema yake na nguvu yake.

Siri ya Nguvu

Je, wewe una kiburi, ewe mwaminifu, kwa sababu umekuwa na faida kwa Kanisa, na umetenda huduma ndogo kwa nyakati zako? Ni nani akutofautishaye, nawe una nini usichokipokea? Je, umemulika nuru kidogo juu ya giza? Ah! ni nani aliyewasha taa yako—na ni nani akudumishaye ung'ae bado, na kukuzuia usizimwe? Je, umeshinda majaribu? Usitundike bendera yako; usijipambe kifua chako mwenyewe kwa utukufu; kwa maana ni nani aliyekufanya uwe na nguvu vitani? Ni nani aliyeunoa upanga wako, na kuutia nguvu mkono wako upige adui? Kumbuka, hukutenda lolote kabisa kwa nafsi yako mwenyewe. Kama leo wewe u chombo cha heshima, kilichopambwa na kupakwa dhahabu—kama sasa wewe u chombo cha thamani, kilichojazwa manukato matamu kupita yote, hata hivyo hukujifanya kuwa hivyo. Wewe u udongo, lakini ni nani mfinyanzi? Kama wewe u chombo cha heshima, lakini si chombo cha heshima yako mwenyewe, bali chombo cha heshima yake yeye aliyekuumba. Kama unasimama kati ya wenzako wanadamu kama malaika wasimamavyo juu ya roho zilizoanguka—mteule, uliyetofautishwa nao—hata hivyo kumbuka, si wema wowote ndani yako uliokufanya uchaguliwe; wala si juhudi zako mwenyewe, wala nguvu yako mwenyewe, iliyokutoa katika udongo wa matope, ikaweka miguu yako mwambani, ikaimarisha mwenendo wako. Iondoe taji kichwani pako chenye kiburi, na uziweke heshima zako miguuni pake yeye aliyekupa. Pamoja na makerubi na maserafi ufunike uso wako, na upaze sauti, "Si kwetu sisi, si kwetu sisi, bali kwa jina lake uwe utukufu wote milele na milele."

Nawe utakapoinama hivi kwa unyenyekevu, uwe tayari kujifunza somo hili lingine—usijitegemee mwenyewe kamwe tena. Kama una jambo lolote la kutenda, usitoke kulitenda ukiegemea mkono wa mwili. Kwanza piga goti lako, uombe nguvu kwake yeye akufanyaye uwe na nguvu, ndipo utakaporudi kutoka kazini kwako ukishangilia. Lakini ukienda kwa nguvu yako mwenyewe, utavunja jembe lako mwambani; utapanda mbegu yako kando ya bahari ya chumvi juu ya mchanga tasa, nawe utayaangalia mashamba matupu katika miaka ijayo, wala hayatakuzalia hata unyasi mmoja wa kuufurahisha moyo wako. "Mtumainini Bwana milele; kwa maana katika Bwana YEHOVA mna nguvu za milele." Nguvu hiyo haipatikani kwako maadamu unategemea nguvu yoyote yako mwenyewe. Atakusaidia ukiungama udhaifu wako; lakini ukiwa na nguvu ndani yako mwenyewe, ataiondoa nguvu yake mwenyewe kwako, nawe utajikwaa na kuanguka. Basi jifunze neema ya kumtegemea Mungu kila siku, ndivyo utakavyovikwa unyenyekevu unaokupasa.

Kuongezeka kwa Nguvu

Taabu ambazo mimea ya upandaji wa mkono wa kuume wa Mungu hushambuliwa nazo ikiwa michanga ni ndogo sana kulinganisha na zile zivumazo kuizunguka inapokuwa, kama mierezi, yenye mizizi imara. Tunapokuwa na nguvu, kwa hakika kama vile nguvu zetu zizidivyo, mateso yetu, majaribu yetu, kazi zetu, au vishawishi vyetu, vitaongezwa. Nguvu ya Mungu haitolewi kamwe kwa mtu yeyote ili ihifadhiwe akiba. Chakula kitolewacho kutuimarisha, kama ile mana iliyokusanywa na Waisraeli jangwani, kimekusudiwa kutumika mara moja. Bwana awekapo miguuni petu viatu vya chuma alivyotuahidi katika agano, ni ili tuvitembelee—si ili tuviweke katika jumba letu la makumbusho, na kuvikodolea macho kama vitu vya ajabu. Akitupa mkono wenye nguvu, ni kwa sababu tunaye adui mwenye nguvu wa kupigana naye. Akitupa chakula kikuu, kama alivyompa Eliya zamani, ni ili twende safari ya siku arobaini kwa nguvu ya chakula hicho.