Vita vya Kikristo

Furaha ya Ushindi

Uwanja wa vita wa Mkristo uko hapa, bali msafara wa ushindi uko juu. Hii ni nchi ya upanga na mkuki: ile ni nchi ya taji na shada. Hii ni nchi ya vazi lililovingirishwa katika damu na ya vumbi la mapigano: ile ni nchi ya sauti ya furaha ya tarumbeta, mahali pa vazi jeupe na pa kelele ya ushindi. Ee, ni tetemeko la furaha kiasi gani litakalohisiwa na wote waliobarikiwa, ushindi wao utakapokamilika mbinguni; wakati mauti yenyewe, adui wa mwisho, itakapouawa; wakati Shetani atakapoburutwa mateka kwenye magurudumu ya gari la Kristo; wakati kelele kuu ya ushindi wa ulimwengu wote itakapopaa kutoka mioyoni mwa wote waliokombolewa! Ni dakika ya furaha kiasi gani ile itakayokuwa!

Kitu fulani cha furaha ya ushindi twakijua hata hapa. Je uliwahi kushindana na moyo mwovu, na mwishowe kuushinda? Je uliwahi kushikana kwa nguvu na jaribu lililo hodari, na kujua ilivyokuwa kuimba kwa shukrani, "Niliposema, Mguu wangu umeteleza, fadhili zako, Ee Bwana, zikanitegemeza?" Je, kama Mkristo wa Bunyani, ulipigana na Apolioni, na baada ya mashindano makali, ukamfukuza? Basi umekwisha kuonja kitangulizi cha ushindi wa mbinguni—wazo tu la jinsi ushindi wa mwisho utakavyokuwa. Mungu akupa ushindi huu wa sehemu, ili uwe rehani ya wakati ujao. Endelea na kushinda, na kila ushindi, ijapokuwa ulio mgumu zaidi, na uliopiganiwa kwa bidii zaidi, uwe kwako kama ahadi ya ushindi wa mbinguni.

Usalama katika Mapambano

Njia Mungu awahifadhiyo watu wake katika usalama si kwa kuwazuia adui zao wasiwashambulie, bali kwa kuwategemeza wangali wamejishughulisha katika mapambano. Si jambo kubwa kujihifadhi nyuma ya ukuta usioweza kupandwa, bali kusimama pale mishale irukapo minene kama mvua ya mawe, pale mikuki isukumwapo kwa ghadhabu, pale mapigo ya upanga yaangukapo juu ya kila sehemu, na katikati ya haya yote kuonekana huwezi kujeruhiwa, huwezi kushindwa, husiwezi kufa—hii ndiyo kuvaa uhai wa kimungu usioweza kushindwa na nguvu za kibinadamu. Ndivyo ilivyo wito wa Mkristo. Mungu atatuweka mahali ambapo sharti tujaribiwe na kushawishiwa. Kama hatujaribiwi, hakuna heshima kwake yeye atuhifadhiye; na kama hatushawishiwi, hakuna shukrani kwa neema yake atuokoaye katika majaribu. Bwana hawaweki mimea yake katika chumba cha joto, kama wafanyavyo baadhi ya watunza-bustani; la, huiweka nje hewani, na baridi ikija, husema, "Aa! lakini hakuna baridi iwezayo kuiua, nayo itakuwa imara zaidi wakati wa kiangazi kwa sababu ya baridi ya wakati wa masika." Haiikingi wala na joto la jua, wala na baridi ya usiku. Katika ulimwengu huu sharti tuwe na dhiki, na sharti tuwe na dhiki nyingi pia, kwa maana ni kwa dhiki nyingi twaurithi ufalme. Mungu awatendealo watu wake ni hili: huwahifadhi ndani ya dhiki, huwakinga katika jaribu, na kuwatoa kwa furaha katika majaribu yao yote. Basi, ewe Mkristo, waweza kushangilia katika usalama wako; lakini usidhani ya kwamba hutashambuliwa; wewe u kama kijito kitokacho Lebanoni, cha kuporomoshwa chini ya maporomoko mengi, cha kuvunjwavunjwa juu ya miamba mingi mikali, cha kuzuiwa na mawe mengi makuu, cha kupingwa na miti mingi iliyoanguka; lakini wapaswa kwenda mbele kwa nguvu isiyozuilika ya Mungu, ukifagia kila kitu kando, hata mwishowe upate mahali pa raha yako kamilifu.

Vita dhidi ya Dhambi

Ewe Mkristo, usiishike kamwe dhambi, ila ukiwa na kinga ya chuma mkononi mwako; usiiendee kamwe kwa glavu ya urafiki; usinene kamwe kwa upole juu yake; bali daima ichukie katika kila umbo. Ikikujia kama mbweha mdogo, jihadhari nayo, kwa maana itaharibu mizabibu. Iwe yakurukia kama simba angurumaye, akitafuta mtu ammeze, au yasogea katika umbo la kuvutia, kwa mwenendo mzuri, ikitaka kwa upendo wa kujifanya kukushawishi uingie dhambini—jihadhari; kwa maana kukumbatia kwake ni mauti, na kufumbatia kwake ni maangamizi. Dhambi ya kila namna wapaswa kupigana nayo—ya mdomo, ya mkono, ya moyo. Ijapopambwa kwa faida kiasi gani; ijapofunikwa kwa mwonekano wa maadili; ijaposifiwa na wakuu, au ijapopendwa na umati, wapaswa kuichukia dhambi kila mahali, katika maficho yake yote, kila wakati, na katika kila mahali. Hakuna dhambi hata moja ya kuachwa, bali juu ya yote ipasa kutangazwa vita kamili na timilifu ya kuiangamiza kabisa.

Stahimili Ugumu

Ewe askari wa Kristo, itakupasa kupigana vita vigumu. Hakuna kitanda cha manyoya kwako; hakuna kupanda mbinguni katika gari: njia ngumu sharti ikanyagwe; milima sharti ipandwe; mito sharti ivukwe; majoka sharti wapiganwe; majitu sharti wauawe; magumu sharti yashindwe; na majaribu makubwa sharti yachukuliwe. Si njia laini kuelekea mbinguni; wale walioenda hatua chache sana ndani yake, wameiona kuwa ngumu na yenye mawe. Hata hivyo ni ya kupendeza; ni safari iliyo ya kufurahisha kuliko zote ulimwenguni; si kwa sababu ni rahisi yenyewe, ni ya kupendeza tu kwa sababu ya wasindikizani; kwa sababu ya ahadi tamu tuzitegemeazo; kwa sababu ya Mpendwa wetu aendaye pamoja nasi kupitia vichaka vyote vigumu na vyenye miiba vya jangwa hili kubwa. Enyi askari Wakristo, tazamieni mapambano: "Msione kuwa ni ajabu ule msiba ulio kama moto uliotokea kwenu ili kuwajaribu, kana kwamba ni kitu kigeni kikiwapata." Kwa hakika kama vile ulivyo mtoto wa Mungu, Mwokozi wako amekuachia urithi wake—"Ulimwenguni mnayo dhiki." Lakini kumbuka ya kwamba "dhiki" hii ndiyo njia ya "kuingia ufalme;" kwa hiyo "stahimili taabu kama askari mwema wa Yesu Kristo."

Vita vya Imani

Kama Waspata, kila Mkristo amezaliwa akiwa shujaa wa vita. Ni hatima yake kushambuliwa; ni wajibu wake kushambulia. Sehemu ya maisha yake itashughulikiwa na vita vya kujikinga. Itampasa kuitetea kwa bidii imani ile iliyowasilishwa kwa watakatifu mara moja; itampasa kumpinga Ibilisi; itampasa kusimama dhidi ya hila zake zote; na akiisha kutenda yote, bado kusimama. Lakini atakuwa Mkristo wa kusikitisha kama akitenda kwa kujikinga tu; sharti awe yule aendeaye adui zake. Sharti aweze kusema pamoja na Daudi, "Nakujia kwa jina la Bwana wa majeshi, Mungu wa majeshi ya Israeli uliyoyatukana." Sharti asishindane na nyama na damu, bali dhidi ya falme na mamlaka. Sharti awe na silaha za vita vyake—si za mwili—bali "zenye uwezo katika Mungu hata kuangusha ngome." Sharti asiridhike kuishi katika ngome iliyolindwa vema, bali sharti aende nje kuzishambulia ngome za adui, na kumfukuza Mkanaani atoke nchini. Lakini kuna njia nyingi ambazo kwazo Mkristo aweza, kwa kiasi kikubwa, kuisahau tabia yake ya kivita. Na, ole! hawapo wachache ambao, kama ni Wakristo kabisa, kwa hakika hujua kidogo sana juu ya vita vile vya kila siku ambavyo Nahodha wa wokovu wetu huwaita wanafunzi wake. Wana dini laini; dini iepukayo upinzani; dini kama mwanzi, iinamayo mbele ya kila pepo, isiyofanana na ule mwerezi wa utauwa usimamao juu katikati ya dhoruba, na kupiga makofi kwa matawi yake katika kimbunga kwa furaha tupu ya ushindi, ijapokuwa nchi yote imejaa silaha kila upande. Watu kama hao hukosa imani ile ishirikiyo utukufu. Ijapokuwa wameokolewa, hata hivyo majina yao hayatapatikana yameandikwa miongoni mwa mashujaa ambao, kwa ajili ya Amiri wetu Mkuu, wako radhi kupata hasara ya vitu vyote, na kwenda nje ya kambi wakiichukua laumu yake. Ee, na tusiridhike kamwe na raha kama hiyo isiyo na utukufu, bali kwa bidii na kwa uume tupigane vita vya Bwana. Je ni jambo dogo kwa mfuasi wa Kristo kupoteza heshima isiyoharibika ya kumtumikia Bwana? Watu hawatafanya nini ili kupata sifa? na je sisi, isipapo mlangoni petu, tugeuke kando kwa uvivu na kutupa utukufu wetu chini? Na tuinuke na kutenda, kwa maana si jambo dogo kupoteza heshima ya mtumishi mwaminifu wa Kristo.

Uthabiti

Kama ungekuwa na imani zaidi, ungekuwa na furaha katika tanuru kama vile juu ya mlima wa mafurahisho; ungekuwa na shangwe katika njaa kama vile katika shibe; ungeshangilia katika Bwana wakati mzeituni usipotoa mafuta, kama vile pipa lipasukapo na kufurika ukingoni. Kama ungekuwa na uhakika zaidi kwa Mungu, ungekuwa na kutupwa huku na huku kidogo sana; na kama ungekuwa na ukaribu mkuu zaidi na Kristo, ungekuwa na kuyumbayumba kidogo. Nyakati nyingine waweza kupinga ghadhabu ya Shetani, kukabili kwa ujasiri kila shambulio, na kupinga kila jaribu; lakini mara nyingi mno u mwenye hofu na usiye na uamuzi, na tayari kukimbia vita badala ya kupinga kwa uume. Lakini kama ungemkumbuka daima yeye aliyestahimili upinzani kama huo wa wenye dhambi juu yake mwenyewe, ungeweza kuwa imara na thabiti sikuzote. Ishi karibu na Bwana wako, nawe hutakuwa hivyo mwenye kugeukageuka na kutokuwa na hakika. Jihadhari usiwe kama upepeo wa upepo. Mtafute Mungu, ili sheria yake iandikwe moyoni mwako kana kwamba imeandikwa juu ya jiwe, wala si kana kwamba imeandikwa juu ya mchanga. Tafuta ili neema yake ije kwako kama mto, wala si kama kijito kikaukacho. Tafuta upate kuufanya mwenendo wako uwe mtakatifu sikuzote; ili mwendo wako uwe kama nuru iangazayo isiyokawia, bali iwakayo zaidi na zaidi hata utimilifu wa mchana. Tafuta ili "Mungu wa neema yote awakamilishe, awafanye imara, awatie nguvu."

Ukombozi wa Ushindi

Waisraeli walipotoka katika nchi ya Misri, walichukua pamoja nao milki zao zote, sawasawa na neno la Bwana—"Hakuna ukwato utakaosalia nyuma." Je hili latufundisha nini? Basi, si tu ya kwamba watu wote wa Mungu wataokolewa, bali ya kwamba yote ambayo watu wa Mungu waliyowahi kuwa nayo yatarudishwa. Yote aliyowahi Yakobo kuyashusha hadi Misri yataletwa nje tena. Je nimepoteza haki kamilifu katika Adamu? Nitakuwa na haki kamilifu katika Kristo. Je nimepoteza furaha duniani katika Adamu? Mungu atanipa furaha nyingi hapa chini katika Kristo. Je nimepoteza mbingu katika Adamu? Nitakuwa na mbingu katika Kristo; kwa maana Kristo hakuja tu kuwatafuta na kuwaokoa watu waliopotea, bali kile kilichokuwa kimepotea; yaani, urithi wote, pamoja na watu; mali zao zote. Si kondoo tu, bali malisho mema ambayo kondoo yalikuwa yamepoteza; si tu yule mwana mpotevu, bali milki zote za yule mwana mpotevu. Kila kitu kililetwa nje ya Misri; hata mifupa ya Yusufu haikuachwa nyuma. Wamisri hawakuweza kusema ya kwamba walikuwa na kipande cha mali za Waisraeli—hata kimoja cha vyombo vyao vya kukandia, wala kimoja cha mavazi yao ya kale. Na Kristo atakapokuwa amevishinda vitu vyote kwake mwenyewe, Mkristo hatakuwa amepoteza hata chembe kwa taabu za Misri, bali ataweza kusema, "Ee mauti, u wapi uchungu wako? Ee kaburi, ku wapi kushinda kwako?" Ee jehanamu, u wapi ushindi wako? Huna bendera wala tanga la kuonyesha la ushindi wako; hakuna kofia ya chuma wala chapeo iliyosalia juu ya uwanja wa vita; hakuna nishani hata moja uwezayo kuiinua jehanamu kwa dharau ya Kristo. Yeye hakuwaokoa tu watu wake, bali wametoka kwa bendera zipepeazo. Simama ustaajabu na kumpenda Bwana, aokoaye hivyo watu wake wote. "Ee Bwana, matendo yako ni makuu, na kazi zako ni za ajabu; na nafsi yangu yajua sana."

Zaidi ya Washindi

Mkristo atakuwa mshindi mwishoni. Je wadhani ya kwamba twapaswa kuwa milele watumwa na vibarua vya dhambi, tukitamani uhuru, na hata hivyo bila kuweza kamwe kuponyoka utumwa wake? La! Punde minyororo inifungayo itavunjwa, milango ya gereza langu itafunguliwa, nami nitapaa hadi mji ule mtukufu, makao ya utakatifu, ambako nitawekwa huru kabisa na dhambi. Sisi tumpendao Bwana hatuna budi kukaa Mesheki milele. Vumbi laweza kuchafua mavazi yetu sasa, lakini siku inakuja tutakapoinuka na kujikung'utia vumbi, na kuvaa mavazi yetu mazuri. Ni kweli sasa tu kama Israeli katika Kanaani. Kanaani imejaa adui; lakini Wakanaani watafukuzwa na sharti wafukuzwe, na nchi yote tangu Dani hata Beer-sheba itakuwa ya Bwana. Enyi Wakristo, shangilieni! Punde mtakuwa wakamilifu, punde mtakuwa huru na dhambi, bila mwelekeo hata mmoja mbaya, tamaa hata moja mbovu. Punde mtakuwa safi kama malaika walio katika nuru; naam, zaidi, mkiwa na mavazi ya Bwana wenu, mtakuwa "watakatifu kama yule Mtakatifu." Je waweza kuwaza hilo? Je si jumla yenyewe ya mbingu, mfurahisho wa raha, wimbo wa vilele vya utukufu—ya kwamba mtakuwa wakamilifu? Hakuna jaribu liwezalo kukufikia, wala kama jaribu lingeweza kukufikia usingedhurika nalo; kwa maana hakutakuwa na kitu ndani yako kiwezacho kwa njia yo yote kulea dhambi. Naam, mliooshwa katika damu ya Yesu, punde mtatembea njia za dhahabu, mkiwa na mavazi meupe na mioyo myeupe pia. Ee, shangilieni katika taraja lililo karibu, na liwatie nguvu kwa mapambano ya sasa.

Vita vya Kikristo

Ni vita vigumu ambavyo Mkristo anaitwa kupigana; si vile ambavyo mashujaa wa zulia wangeweza kushinda; si mapigano mepesi ambayo angeyashinda, yeye aliyekwenda vitani siku fulani ya jua, akatazama jeshi, kisha akageuza hatamu za farasi wake, na kuteremka kwa madaha mlangoni mwa hema yake ya hariri. Si vita ambavyo atavishinda, yeye ambaye, akiwa askari mbichi tu leo, kwa upumbavu hudhani ya kwamba juma moja la utumishi litamhakikishia taji ya utukufu. Ni vita vya maisha yote; mashindano yatakayohitaji nguvu zetu zote, kama tutapata ushindi; vita ambavyo moyo ulio hodari kuliko yote ungeweza kuhofu; pigano ambalo shujaa aliye jasiri kuliko wote angerudi nyuma, kama asingalikumbuka ya kwamba Bwana yu upande wake; kwa hiyo atamwogopa nani? Mungu ndiye nguvu za uhai wake: atamhofu nani? Vita hivi si vya nguvu kuu, wala uwezo wa mwili; kama vingekuwa hivyo, tungeweza kuvishinda upesi zaidi; lakini ni vya hatari zaidi kwa jambo la kwamba ni pambano la akili, mashindano ya moyo, mieleka ya roho—mara nyingi maumivu ya nafsi.

Je washangaa kwamba Mkristo anaitwa kwenye mapambano? Mungu hatoi kamwe imani hodari pasipo jaribu la moto; hataijenga meli imara, pasipo kuipitisha katika dhoruba zenye nguvu sana; hatakufanya shujaa hodari, kama hakusudii kuijaribu ustadi wako vitani. Upanga wa Bwana sharti utumike; bapa za mbinguni sharti zipigwe dhidi ya silaha za yule mwovu, na hata hivyo hazitavunjika, kwa maana ni za chuma cha kweli cha Yerusalemu, kisichokatika kamwe. Tutashinda, kama tukianza vita kwa njia iliyo sawa. Kama tumeinoa panga zetu juu ya msalaba, hatuna la kuogopa hata kidogo; kwa maana ijapokuwa nyakati nyingine twaweza kuangushwa chini na kufadhaishwa, kwa hakika mwishowe tutawafukuza adui zetu wote, kwa maana sisi ni wana wa Mungu hata sasa. Mbona, basi, tuogope? Ni nani atakayetuamuru "tusimame," kama Mungu akituamuru tusonge mbele?