Ushirika na Kristo

Nafsi Iliyoridhika katika Kristo

Yeye afurahiaye kummiliki Bwana Yesu ana yote ambayo moyo waweza kutamani. Kwa habari ya vitu vilivyoumbwa, ni kama vijito vifupi na vyenye udanganyifu; hushindwa kutimiza mahitaji yetu, sembuse matamanio yetu. "Kitanda" cha furaha ya kidunia "ni kifupi mno hata mtu hawezi kujinyosha juu yake, na mfarishi ni mwembamba mno hata mtu hawezi kujifunika;" lakini katika Yesu mna nafasi kwa mawazo kujinyosha kwa upeo wake na kuenea kwake kote. Yesu afurahiwapo, hutia ukamilifu katika rehema nyingine zote; nyumba yake imejaa yeye akiwapo; kiti chake cha enzi cha neema kimejaa aketipo juu yake; na chumba chake cha wageni kimejaa yeye akiwa bwana wa karamu. "Kiumbe pasipo Kristo ni kitu kitupu, taa isiyo na mafuta, mfupa usio na uboho;" lakini Kristo awapo kikombe chetu kinafurika, nasi twala mkate hata kushiba. Chakula cha mboga, tunapokuwa na ushirika naye, ni karamu tajiri kama ng'ombe aliyenona; na kitanda chetu chembamba ni jumba tukufu kama nyumba kubwa ya tajiri. Msiende mbali, enyi matamanio yenye njaa ya nafsi yangu—kaeni nyumbani, mkafanye karamu juu ya Yesu; kwa maana huko mbali sharti mfe njaa, kwa kuwa wapendwa wengine wote ni watupu wasiotamanika. Kaeni na Kristo, mkale kilicho chema, na kujifurahisha nafsi zenu kwa unono.

Makumbusho ya Yesu

Upendo wa Kanisa waenea kupita nafsi ya Bwana-arusi, na kufikia kila kitu kilichoungamana naye. "Mavazi yako yote yananukia manemane, na uudi, na mdalasini, kutoka katika majumba ya pembe za ndovu, ambayo yamekufurahisha." Mavazi yake yenyewe ni ya thamani machoni pake. Hufurahi kumwimba katika mavazi yake ya kikuhani.

"Taji ya kilemba, vazi lililotariziwa, Kwa fahari ya neema huyavaa; Na kwa uzuri kamili kifuani pake Neno takatifu la unabii huonekana."

Akiwa amevikwa mavazi yake ya kifalme, si mtukufu kidogo machoni pake: hupenda kuiona taji yake, na kumkiri Mfalme wake. Hakuna neno ambalo mdomo wake amelinena, wala mahali ambapo mguu wake umepakanyaga, wala chombo ambacho mikono yake imekishika, kisichowekwa wakfu kabisa machoni pake. Sisi si waabudu wa masalia yaliyochakaa yanayohifadhiwa kwa upendo mwingi na Rumi; bali tuna makumbusho mengine yaliyo bora zaidi—vitu vitakatifu vyenye thamani isiyokadirika. Neno lake lililoandikwa, ambalo juu yake, hata sasa twauona ule mkono wa upendo ukisogea kama ulivyofanya, miaka mingi iliyopita, ulipoandika kila herufi; mwangwi wa sauti yake iliyoondoka bado haujazikwa katika ukimya; kikombe chake cha divai bado hakijawa tupu; damu yake ingali inatiririka, na baraka yake ingali inatupuliza amani juu yetu: vyote hivi vingalipo, na vinathaminiwa kupita bei yote. Twaziheshimu amri zake, na twashangilia mafundisho yake, hata iwapo wenye hekima ya ulimwengu wayadharau. Utumishi wake ni furaha yetu; kusimama malangoni pake ni heshima, na kukimbia mbele ya gari lake ni raha. Kwa habari ya watu wake, twawasalimu kama watakatifu, twawaita ndugu zetu, nao ni wa karibu sana na wapendwa kwetu kwa ajili yake. Mwombaji duni kupita wote katika Kanisa lake ni wa maana zaidi kwetu kuliko mfalme mwenye kiburi kupita wote aliye nje yake. "Kwa sababu yeye ni wa Kristo," siku zote ni sababu itoshayo ya kububujika kwa upendo wetu; kwa maana vyote vilivyo vyake ni vipenzi kwetu.

Ukamilifu wa Kristo

Katika hali yetu iliyo bora kabisa sisi ni wageni kwa utamu mwingi usiolinganishwa wa Kristo. Kamwe hatutamaliza wema wake kwa sifa zetu, kwa maana yeye ni mpya daima, naye ana wingi wa umande wa ujana wake, hata kila siku ana wimbo mpya wa kuimba. Tutamwona kuwa Kristo mpya kila siku ya maisha yetu, na hata hivyo yeye ni yeye yule daima; ubora wake upitao na ukamilifu wake usiokwisha hivyo huufanya upya upendo wetu daima. Ee Yesu! hakuna awezaye kukisia jinsi lilivyo kuu lililo dogo kabisa la sifa zako, wala jinsi kilivyo tajiri kilicho maskini kabisa cha vipawa vyako.

Mawazo juu ya Kristo

Yesu! utamu usio na mwisho ulioje katika jina lake! Hisia zetu tunapomtazama zaweza kufananishwa na baadhi ya vile vioo vya kukuza ulivyoviona, ambavyo waweza kuvichukua na kuvishika upande mmoja, ukaona nuru moja, na upande mwingine, ukaona nuru nyingine, na kwa vyovyote uvigeuzavyo utaona daima mng'ao fulani wa thamani wa nuru, na rangi mpya fulani zikizuka mbele ya macho yako. Ah! mtwae Yesu kuwa kichwa cha maneno yako; mtafakari; fikiri uhusiano wake na nafsi yako mwenyewe, nawe hutamaliza kamwe somo hilo moja. Fikiri uhusiano wake wa milele nawe; na pia uhusiano wako unaojulikana na kudhihirika naye tangu ulipoitwa kwa neema yake. Fikiri jinsi alivyokuwa ndugu yako; jinsi moyo wake ulivyopiga kwa huruma pamoja na wako; jinsi alivyokubusu kwa busu za pendo lake, na pendo lake limekuwa tamu kwako kuliko divai. Tazama nyuma juu ya mahali fulani penye furaha na jua katika historia yako, ambapo Yesu amenong'ona, "Mimi ni wako," nawe umesema "Mpenzi wangu ni wangu." Fikiri nyakati fulani teule, ambapo malaika ameinama toka mbinguni, akakuchukua juu ya mbawa zake, akakupandisha juu, ukae mahali pa mbinguni aketipo Yesu, upate kuwa na ushirika naye. Au fikiri nyakati fulani, ulipopata kile ambacho Paulo hukithamini sana—ushirika na Kristo katika mateso yake—ulipohisi kwamba ungeweza kufa kwa ajili ya Kristo, kama vile katika uzoefu tajiri wa ubatizo wako, ulivyokufa pamoja naye, na kufufuka pamoja naye. Fikiri uhusiano wako na Kristo utakaokuzwa mbinguni. Wazia saa imefika utakapo"usalimu mkono uliyonyunyiziwa damu ufuoni pa milele," na Bwana Yesu atakapokusalimu kuwa "zaidi ya mshindi," na kuweka taji juu ya kichwa chako ing'aayo kuliko nyota. Ah! mtwae Yesu kuwa kichwa chako cha maneno cha daima, nawe kila siku utaona fikira mpya zikizuka kutoka neema yake, uzuri wake, utukufu wake. Katika yeye una somo lisilokoma la furaha, kitu cha kuvuta, na kitovu cha upendo.

Ushirika na Kristo

Saa moja pamoja na Kristo yathamani umilele wote wa furaha za dunia; na ushirika naye ni onjo bora, la hakika zaidi, na lenye shangwe kupita yote la raha ya mbinguni.