Katika Huzuni na Mateso

Nidhamu ya Huzuni

Bwana huwapata askari wake walio bora kutoka nyanda za juu za mateso.

Fadhila za Jaribu

Imesemwa ya kuwa, wakati nyota zisipoweza kuonekana mchana kutoka usawa wa kawaida wa nchi, mtu akishuka ndani ya kisima chenye giza, zingeonekana mara moja. Na kwa hakika ni jambo la kweli, ya kwamba ahadi zilizo bora za Mungu huonekana mara nyingi na Kanisa lake likiwa katika majaribu yake yaliyo meusi kuliko yote. Kwa hakika kama vile Mungu awawekavyo watoto wake katika tanuru, atakuwa katika tanuru pamoja nao. Sisomi ya kuwa Yakobo alimwona malaika, hata alipofika mahali ambapo ilimbidi kushindana mweleka, ndipo Yakobo aliyekuwa akishindana alipomwona malaika aliyekuwa akishindana. Sijui ya kuwa Yoshua aliwahi kumwona malaika wa Mungu, hata alipokuwa karibu na Yeriko; ndipo Yoshua alipomwona yule shujaa wa kimalaika. Sijui ya kuwa Ibrahimu aliwahi kumwona Bwana, hata alipokuwa mgeni na mtangatanga katika nyanda za Mamre, ndipo Bwana alipomtokea kama msafiri. Ni katika huzuni zetu zilizo za kukata tamaa kuliko zote ndipo tunapopata mang'amuzi yetu yaliyo ya furaha kuliko yote. Yakupasa uende Patmo ili kuuona ufunuo. Ni juu ya mwamba tu ulio ukiwa, uliozungukwa na dhoruba, uliofungiwa nje ya nuru yote ya ulimwengu, ndipo tunapoweza kupata giza lifaalo, ambamo twaweza kuitazama nuru ya mbinguni bila kukengeushwa na vivuli vya nchi.

Nuru katika Wingu

"Bwana akaugeuza uteka wa Ayubu." Basi, huzuni zetu zilizo ndefu kuliko zote zina mwisho, na kuna sakafu chini ya vilindi vilivyo virefu kuliko vyote vya taabu yetu. Baridi zetu hazitakunja uso milele: kiangazi kitatabasamu punde. Maji hayatapwa milele: gharika lazima zirudi nyuma. Usiku hautatundika giza lake milele juu ya nafsi zetu: jua bado litazuka lenye uponyaji chini ya mbawa zake. "Bwana akaugeuza uteka wa Ayubu." Vivyo hivyo, huzuni zetu zitakuwa na mwisho Mungu atakapokuwa amepata lengo lake ndani yazo. Malengo katika habari ya Ayubu yalikuwa haya, ya kwamba Shetani ashindwe, atwezwe kwa silaha zake mwenyewe, avunjike matumaini yake alipokuwa na kila kitu kama alivyotaka. Mungu, kwa changamoto ya Shetani, alikuwa amenyosha mkono wake na kumgusa Ayubu katika mfupa wake na katika nyama yake; na hata hivyo mjaribu hakuweza kumshinda, bali alipokea kemeo lake katika maneno yale yenye kushinda, "Ajaponiua, hata hivyo nitamtumaini." Shetani ashindwapo, ndipo vita vitakoma. Bwana pia alilenga kujaribu imani ya Ayubu. Mizigo mingi ilining'inizwa juu ya mtende huu, lakini bado ulikua wima. Moto ulikuwa mkali, hata hivyo dhahabu haikupungua; takataka tu ndizo zilizoteketea. Kusudi lingine Bwana alilokuwa nalo lilikuwa utukufu wake mwenyewe. Na kweli alitukuzwa kwa wingi. Mungu amelipatia jina lake kuu na mashauri yake ya hekima, sifa ya milele, kwa njia ya neema ile aliyomtegemeza kwayo mtumishi wake maskini aliyeteseka chini ya taabu nzito kuliko zote zilizowahi kumpata mwanadamu. Mungu alikuwa na lengo lingine, na nalo pia lilipatikana. Ayubu alikuwa ametakaswa kwa mateso yake. Roho yake ililainishwa, na kila kujihesabia haki kulikojificha ndani kulifukuzwa waziwazi. Na sasa kwa kuwa makusudi ya neema ya Mungu yamejibiwa, aiondoa fimbo; auondoa ule fedha uliyeyuka kutoka katikati ya makaa yawakayo. Mungu hawatesi kwa hiari, wala hawahuzunishi wanadamu bure, naye alionyesha hili kwa jambo la kwamba hawatesi muda mrefu kuliko unaohitajika. Hawaachi kamwe kuwa dakika moja zaidi katika tanuru kuliko inavyohitajika kabisa kutimiza makusudi ya hekima yake na ya pendo lake. "Bwana akaugeuza uteka wa Ayubu." Basi usikate tamaa, ewe mwaminifu uliyeteseka; yeye aliyeugeuza uteka wa Ayubu aweza kuugeuza uteka wako kama vijito vya kusini. Atalifanya shamba lako la mizabibu kuchanua tena, na shamba lako litoe tunda lake. Utatoka tena pamoja na wale wafanyao shangwe, na tena wimbo wa furaha utakuwa mdomoni mwako. Kukata-Tamaa kusizifunge kamwe pingu zake kali juu ya nafsi yako. Bado tumaini, kwa maana kuna tumaini katika jambo hili. Bado tumaini wewe, kwa maana kuna msingi wa uhakika. Atakupandisha tena, ukishangilia, kutoka utekani, nawe bado utaimba kwa sifa yake, "Umenigeuzia matanga yangu kuwa kucheza; umenivua nguo zangu za magunia, ukanivika furaha."

Kung'aa Baada ya Mvua

Utawala wa Kristo kama Mfalme, kulingana na maelezo ya Daudi, ni kama "Kung'aa baada ya mvua," ambako majani mororo hufanywa kuchipuka katika nchi. Ndivyo tulivyoona mara nyingi. Baada ya mvua nzito, au baada ya majira marefu ya mvua, jua lichapo, kuna uwazi na uchangamfu wa kupendeza hewani ambao mara chache tunauona nyakati nyingine. Labda hali ya hewa iliyo angavu kuliko zote ni pale tu mvua imekoma, upepo umeyafukuza mawingu, na jua huchungulia kutoka vyumba vyake ili kuifurahisha nchi kwa tabasamu zake. Na ndivyo ilivyo kwa moyo wa Mkristo uliojaribiwa. Huzuni haidumu milele. Baada ya mvua ipigayo ya taabu huja tena na tena kung'aa. Ewe mwaminifu uliyejaribiwa, litafakari hili. Baada ya mateso yako yote pamebaki raha kwa watu wa Mungu. Kuna kung'aa kunakoijia nafsi yako mvua hii yote itakapopita. Wakati wako wa kukemewa utakapokwisha na kupita, itakuwa kwako kama nchi tufani ilipojituliza ikalala, mawingu yalipojirarua vipande vipande, na jua kuchungulia tena kama bwana harusi katika mavazi yake matukufu. Kwa lengo hili, huzuni hushirikiana na furaha ifuatayo, kama mvua na jua, ili kutoa mche mwororo. Dhiki na faraja hutenda kazi pamoja kwa mema yetu. "Kwa kuwa kama vile mateso ya Kristo yanavyozidi kwetu, vivyo hivyo na faraja yetu yazidi kwa Kristo." Kung'aa baada ya mvua hutokeza hewa iburudishayo mimea na nafaka: na furaha ya Bwana, baada ya majira ya huzuni, huifanya nafsi kuzaa matunda. Hivyo twakua katika neema na katika kumjua Bwana na Mwokozi wetu Yesu Kristo.

Faida ya Jaribu

Majaribu hutufundisha sisi ni nini; huchimbua udongo, na kutuonyesha tumeumbwa kwa nini; hugeuza tu baadhi ya magugu mabaya kuyaleta juu.

Wabeba-Msalaba

Ni cheo cha heshima kiasi gani kile cha Simoni Mkirene, kuwa mbeba-msalaba wa Yesu Kristo! Twaweza karibu kulia kwamba hatukuwa pale, ili tungepata heshima ya kumchukulia Kristo msalaba wake. Lakini hatuna haja ya kulia, kwa maana tutakuwa na msalaba wake wa kuubeba kama tu watu wake. Hakuna wavaao taji mbinguni ambao hawakuwa wabeba-msalaba hapa chini. Hatakuwepo hata mmoja katika kundi la waliotukuzwa ambaye hakuwa na msalaba wake hapa duniani. Je una msalaba, ewe mwaminifu? Uubebe kwa uume! Juu nao! Enenda safari yako kwa hatua zisizosita na moyo wenye kushangilia, ukijua ya kuwa kwa kuwa ni msalaba wa Kristo lazima uwe heshima kuubeba; na ya kwamba wakati uubebapo u katika msafara wenye baraka, kwa maana wewe wamfuata Yeye.

Msalaba wa Kila Siku wa Mkristo

Ewe mwaminifu, Kristo Yesu akukabidhi misalaba yako, nayo si zawadi duni.

Faraja

Faraja ni kudondoka kwa umande mwororo kutoka mbinguni juu ya mioyo ya jangwa iliyo chini; ni mojawapo ya zawadi zilizo teule kuliko zote za rehema ya kimungu.

Huruma

Huruma ni hasa wajibu wa Mkristo. Fikiria Mkristo ni nani, nawe utasema ya kwamba kama kila mtu mwingine angekuwa mbinafsi, yeye ampasa kuwa asiye na ubinafsi; kama pasingekuwa mahali penginepo moyo uliokuwa na huruma kwa mhitaji, ungepaswa kupatikana mmoja katika kila kifua cha Kikristo. Mkristo ni "mfalme:" haimpasi mfalme kujitunza nafsi yake kwa unyonge. Je Aleksanda aliwahi kuwa wa kifalme zaidi kuliko alipoweka kando bakuli lililojaa kimiminika cha thamani, ambalo askari mmoja alimtolea, huku majeshi yake yakiteseka kwa kiu, akasema ya kuwa haimfai mfalme kunywa wakati raia zake wana kiu; angependelea zaidi kushiriki huzuni yao pamoja nao? Enyi, ambao Mungu amewafanya wafalme na wakuu, tawaleni kwa ufalme juu ya ubinafsi wenu wenyewe, na kutenda kwa ukarimu wa heshima uwapasao wazao wa kifalme wa ulimwengu. Mmetumwa ulimwenguni kuwa waokozi wa wengine; lakini mtakuwaje hivyo kama mnajijali nafsi zenu tu? Ni juu yenu kuwa taa; je taa haijiteketezi yenyewe wakati ikitawanya miale yake katika giza nene? Je si kazi yenu na fadhila yenu isemwe juu yenu, kama juu ya Bwana wenu—"Aliokoa wengine, hawezi kujiokoa mwenyewe?"

Farijini Watu Wangu

Mungu hawapi kamwe watoto wake wajibu wa kuutenda pasipo kuwapa njia ya kuutenda; naye atuambiapo tu-"farijini" watu wake, twaweza kuwa na hakika ya kwamba kuna njia ambazo kwazo waweza kufarijiwa. Mwana wa Mungu! Je umepungukiwa na jambo la kufariji moyo uumao? Simulia mambo ya kale ya siku zilizopita; nong'ona sikioni mwa mwenye kuomboleza habari za neema iteuayo, na rehema ikombolezayo, na pendo la Kimungu. Umkutapo aliyetaabika, mwambie habari za agano, lililopangwa vema katika mambo yote; mwambie yale Bwana aliyotenda katika siku zilizopita, jinsi alivyomkatakata Rahabu, na kumjeruhi yule joka; mwambie hadithi ya ajabu ya kutendeana kwa Mungu na watu wake; mwambie ya kwamba Mungu, aliyeigawa Bahari ya Shamu, aweza kuwafanyia watu wake njia kuu kupitia maji makuu ya mateso—ya kwamba yeye aliyetokea katika kile kichaka kilichowaka moto, kisichoteketea, atamtegemeza katika tanuru ya dhiki; mwambie mambo ya ajabu ambayo Mungu ameyatenda kwa ajili ya watu wake wateule: hakika kuna ya kutosha hapo kumfariji; mwambie ya kuwa Mungu huitazama tanuru kama mfua-dhahabu aitazamavyo chungu ya kusafishia. Kama hilo halitoshi, mwambie habari za rehema zake za sasa; mwambie ya kwamba amebakiwa na mengi, ijapokuwa mengi yamekwenda; mwambie ya kuwa "sasa hakuna hukumu ya adhabu juu yao walio katika Kristo Yesu;" mwambie ya kwamba sasa amekubaliwa katika Mpendwa; mwambie ya kuwa sasa amefanywa mwana wa kupanga, na ya kwamba msimamo wake u salama; mwambie ya kuwa Yesu yu juu, akiitetea shauri lake; mwambie ya kwamba ijapokuwa nguzo za nchi zatetemeka, Mungu ni kimbilio kwetu; mwambie mwenye kuomboleza ya kwamba Mungu wa milele hazimii, wala hachoki. Lakini kama hili halitoshi, mwambie habari za wakati ujao; mnong'onezee ya kuwa kuna mbingu yenye malango ya lulu, na njia za dhahabu; mwambie ya kuwa

"Machweo machache zaidi tu ya jua yenye kuzunguka, Yatamfikisha katika pwani nzuri ya Kanaani,"

na kwa hiyo aweza vema kuchukua huzuni zake; mwambie ya kwamba Kristo anakuja, na ya kuwa ishara yake i mbinguni, kuja kwake ni karibu, hivi karibu atatokea kuihukumu nchi kwa haki, na watu wake kwa uadilifu. Na kama hilo halitoshi, mwambie yote kumhusu Mwokozi yule aliyeishi na kufa; mpeleke Kalvari; mchoree mikono, na ubavu, na miguu itokayo damu; mwambie habari za Mfalme wa huzuni aliyevikwa taji ya miiba; mwambie habari za Mtawala mkuu wa maombolezo na damu, aliyevaa nyekundu ya dhihaka iliyokuwa bado zambarau ya ufalme wa huzuni; mwambie ya kwamba Yeye mwenyewe alizichukua dhambi zetu katika mwili wake mwenyewe juu ya mti. Hivyo, kwa baraka ya Mungu, utaitimiza kazi yako, na kumfariji mmoja wa watu wake. "Farijini, farijini, watu wangu, asema Mungu wenu."

Moto wa Msafishaji

Hakuna kipande cha fedha katika hazina ya mbinguni, ambacho hakikuwa katika tanuru hapa duniani, na kusafishwa mara saba; hakuna kito ambacho Sonara wa Kimungu hakukiweka katika kila namna ya jaribio; hakuna chembe ya dhahabu katika taji ya Mkombozi ambayo haikuyeyushwa katikati ya makaa yaliyo moto kuliko yote, ili kuiondolea uchafu wake. Ni jambo la wote kwa kila mtoto wa Mungu. Kama wewe u mtumishi wa Bwana, sharti ujaribiwe "kama dhahabu ijaribiwavyo."

Taabu Iliyopunguzwa

Nasadiki ya kwamba kama tungemtazama Yesu zaidi, taabu zetu zisingeonekana kuwa kubwa hivyo wala nzito hivyo. Katika usiku ulio mweusi kuliko yote wa jaribu, kumtazama Kristo kutalisafisha anga jeusi. Giza lionekanapo nene, kama lile la Misri, "giza liwezalo kupapaswa," hata ndipo, kama mweko wa radi ung'aao, wa nuru vilevile, lakini si wa kupita upesi hivyo, kutamweleza kumtazama Yesu. Mtazamo mmoja wake waweza vema kutosha kwa taabu zetu zote tungali njiani. Kumtazama yeye kutaiangaza njia iliyo na huzuni kuliko zote. Tukitiwa moyo na sauti yake, tukitiwa nguvu kwa nguvu zake, twa tayari kutenda na kuteseka, kama vile alivyofanya yeye, hata mwisho. Enyi Wakristo waliochoka na kutaabika, "mtazameni yeye, mkatiwe nuru!"

Pendo katika Kurudi

Watu wa Mungu mara nyingi hurudiwa, na mkono wa Bwana hukaa mzito juu yao; hata hivyo kuna wema wa kibaba katika kurudiwa kwao, na fadhili isiyo na kikomo katika dhiki zao. Je uliwahi kusikia mfano huu? Kulikuwa na mchungaji fulani aliyekuwa na kondoo aliyetaka kumwongoza katika shamba jingine lililo bora zaidi; alimwita, wala hakuja; alimwongoza, wala hakufuata; alimwendesha, lakini angefuata tu maono yake mwenyewe. Mwishowe akawaza moyoni mwake, "Nitafanya hivi." Kondoo alikuwa na mwana-kondoo mdogo kando yake, na mchungaji akamchukua yule mwana-kondoo mikononi mwake, akamchukua mbali, ndipo na yule kondoo akaja pia. Ndivyo na kwako; Mungu amekuwa akikuita wewe, wala hukuja; Kristo akasema, "Njoo," nawe hukutaka; alituma mateso, nawe hukuja; mwishowe akamchukua mwanao mbali, nawe ukaja mara moja; ukamfuata Mwokozi ndipo. Waona ya kwamba ilikuwa kazi ya upendo kwa upande wa mchungaji. Alimchukua tu mwana-kondoo ili amwokoe kondoo, na Mwokozi alimchukua tu mwanao mbinguni ili apate kukuleta wewe huko pia. Ee, mateso yenye baraka, hasara zenye baraka, mauti zenye baraka, ziishiazo katika uzima wa rohoni! Wajua ya kuwa kama mtu apendapo kuvuna mavuno kutoka shamba lake, kwanza hulilima. Shamba laweza kulalamika, na kusema, "Mbona makovu haya usoni mwangu? Mbona kupinduliwa huku kwa nguvu?" Kwa sababu hakuwezi kuwa na kupanda hata kumekuwa na kulima; majembe makali hufanya matuta kwa mbegu njema. Au chukua picha nyingine tena kutoka asili: mtu ataka kufanya kutoka kipande cha chuma chenye kutu, upanga ung'aao utakaomfaa shujaa mkuu. Afanya nini? Aukitia motoni, na kuukiyeyusha; auondolea takataka zake zote, na kuutoa bati wake wote; kisha auifua kwa nyundo yake; auupiga sana juu ya fuawe; auuchoma katika moto mmoja baada ya mwingine, hata mwishowe watoka ubapa mzuri usiokatika siku ya vita. Hivi ndivyo Mungu afanyavyo nawe—nakusihi usikisome vibaya kitabu cha maongozi ya Mungu; kwa maana ukikisoma sawasawa chasomeka hivi—"Nitamwonea mtu huyu rehema, na kwa hiyo nimempiga na kumjeruhi. Wote niwapendao mimi nawakemea na kuwarudi." Njoni, basi, na tumrudie Bwana, kwa maana yeye amerarua, naye atatuponya; amepiga, naye atatufunga jeraha zetu.

Kuustahimili Msalaba

"Kwa ajili ya furaha iliyowekwa mbele yake aliustahimili msalaba." Furaha ilikuwa nini? Ee, ni wazo linalopasa kuyeyusha mwamba, na kuufanya moyo wa chuma kusogea, ya kwamba furaha iliyowekwa mbele ya Yesu, ilikuwa hasa furaha ya kutuokoa sisi. Najua ilikuwa furaha ya kuyatimiza mapenzi ya Baba yake—ya kuketi juu ya kiti cha enzi cha Baba yake—ya kufanywa mkamilifu kwa njia ya mateso; lakini bado najua ya kuwa hii ndiyo ari kuu, iliyo tukufu, ya Mwokozi kuustahimili msalaba—furaha ya kutuokoa sisi. Je wajua furaha ni nini ya kuwatendea wengine mema? Kama hujui, nakuhurumia, kwa maana katika furaha zote ambazo Mungu ameziacha katika jangwa hili maskini, hii ni mojawapo iliyo tamu kuliko zote. Je waijua? Je hukuwahi kuhisi furaha ile ya kimungu, wakati dhahabu yako imetolewa kwa maskini, na fedha yako imewekwa wakfu kwa Bwana, ulipomkirimu mwenye njaa—nawe umekwenda kando, na kusema, "Nahisi ni furaha inayostahili kuishiwa kumlisha mwenye njaa, na kumvika aliye uchi, na kuwatendea mema wenzangu maskini wanaoteseka?" Basi, hii ndiyo furaha aliyoihisi Kristo; ilikuwa furaha ya kutulisha kwa mkate wa mbinguni; furaha ya kuwavika wenye dhambi maskini, walio uchi, kwa haki yake mwenyewe; furaha ya kuzipatia makao nafsi zisizo na makao, ya kutuokoa kutoka gereza la jehanamu, na kutupa mafurahisho ya milele ya mbinguni. Uone ukuu wa pendo lake lililomwongoza hivyo kuustahimili msalaba na kuidharau aibu, ili apate kuwaokoa wenye dhambi. Kweli pendo la Kristo "lapita ufahamu!" Enyi Wakristo! Kama Kristo aliustahimili haya yote kwa ajili ya furaha ya kuwaokoa ninyi, je ninyi mtaona haya kubeba au kuteseka lo lote kwa ajili ya Kristo? Hakika pendo kwake yeye aliyetupenda hivyo lapaswa kutufanya tuwe tayari kustahimili mambo yote kwa ajili yake. Je wahisi ya kwamba katika kumfuata Kristo lazima upate hasara—kupoteza heshima, cheo, mali? Je wahisi ya kwamba kwa kuwa Mkristo unapata dhihaka na laumu? na je utakengeuka kwa sababu ya mambo haya madogo, wakati yeye hakukengeuka, bali aliustahimili msalaba na kuidharau aibu? La, kwa neema ya Mungu na kila Mkristo aseme,—

"Sasa kwa pendo nilichonalo kwa jina lake, Kile kilichokuwa faida yangu nakihesabu hasara; Kiburi changu cha kale nakiita aibu yangu, Na kutundika utukufu wangu msalabani pake."

"Kwangu mimi kuishi ni Kristo, na kufa ni faida." Nikiishi, nitakuwa wake; nikifa, nitakuwa wake. Nitaishi kwa heshima yake, na kumtumikia kwa ukamilifu. Nitajitwika msalaba wangu, na kumfuata, nikishangilia kama nimehesabiwa kustahili kuteseka kwa ajili ya jina lake.

Utamu katika Huzuni

Je huhisi, ukitazama nyuma nyakati za mateso, ya kwamba zimekuwa nyakati ambazo, licha ya majaribu, umekuwa na amani na furaha isiyo ya kawaida moyoni mwako? Kuna furaha tamu itujiayo kupitia huzuni. Divai chungu ya huzuni hutenda kwa nguvu ya kurudisha afya juu ya mwili mzima. Kikombe kitamu cha kufanikiwa mara nyingi huacha uchungu katika onjo; lakini kikombe chungu cha mateso, kikitakaswa, daima huacha utamu kinywani. Kuna furaha katika huzuni. Kuna muziki katika kinubi hiki chenye nyuzi zake zote zilizolegezwa na kukatika. Kuna nota chache tuzisikiazo kutoka kwa zumari hii ya huzuni ambazo hatuzipati kamwe kutoka kwa tarumbeta ilialo kwa sauti kubwa. Twapata ulaini na wimbo kutoka kilio cha huzuni, ambao hatupati kamwe kutoka kwa wimbo wa furaha. Je hatuna budi kulieleza hili kwa jambo la kwamba, katika taabu zetu twaishi karibu zaidi na Mungu? Furaha yetu ni kama wimbi lipigalo ufuoni—hutuangusha nchini. Bali huzuni zetu ni kama lile wimbi lirudilo nyuma litufyonzalo tena hata katika kilindi kikuu cha Uungu. Tungalikwama na kuachwa juu na kavu ufuoni, kama isingalikuwa wimbi lile lirudilo nyuma, ule uponyaji wa kufanikiwa kwetu, uliyoturudisha tena kwa Baba yetu na kwa Mungu wetu. Mateso yenye baraka! yametuleta kwenye kiti cha rehema; yameyapa uzima maombi; yamewasha pendo; yameitia nguvu imani; yamemleta Kristo ndani ya tanuru pamoja nasi, kisha yametutoa katika tanuru ili kuishi pamoja na Kristo kwa furaha zaidi kuliko kabla.