Amani na Pumziko

Moyo Tulivu

Usipohifadhiwa moyo kuwa na amani, maisha hayatakuwa na furaha. Kama utulivu hautawali juu ya ziwa lile la ndani ndani ya nafsi, ambalo hulisha mito ya maisha yetu, mito yenyewe itakuwa sikuzote katika dhoruba. Matendo yetu ya nje sikuzote yataonyesha kwamba yalizaliwa katika dhoruba, kwa kuwa yenyewe yenye dhoruba. Sote twatamani kuishi maisha ya furaha; jicho lililo angavu na mguu ulio mwepesi ni vitu ambavyo kila mmoja wetu huvitamani; kuchukua nia iliyoridhika ni jambo ambalo watu wengi hulitamani daima. Na tukumbuke, kwamba njia pekee ya kuyaweka maisha yetu yenye amani na furaha, ni kuuweka moyo katika pumziko; kwa maana ije umaskini, uje utajiri, ije heshima, ije aibu, uje wingi, au uje uchache, kama moyo uko kimya, kutakuwa na furaha po pote. Lakini uwe mwangaza na uangavu wa namna gani, kama moyo umefadhaika, maisha yote lazima yafadhaike pia.

Amani

Mwaminifu hufurahia, katika nyakati za upendeleo, uhusiano wa karibu na Bwana Yesu, ujazao moyo wake amani ifurikayo. Ee! kuna maneno matamu ambayo Yesu huyanong'ona masikioni mwa watu wake, na kuna ziara za upendo azifanyazo kwao, ambazo mtu asingeamini, hata kama angeambiwa. Yeye atakaye kuzielewa, lazima aone moyoni mwake mwenyewe ni nini kuwa na ushirika na Baba, na na Mwana wake Yesu Kristo. Kuna jambo kama Kristo kujidhihirisha kwetu jinsi asivyojidhihirisha kwa ulimwengu. Mawazo yote ya shaka huondolewa hapo, nasi twaweza kusema, "Mimi ni wa mpendwa wangu, na mpendwa wangu ni wangu." Hii ndiyo hisia moja izameayo yote. Na ni ajabu gani kwamba mwaminifu ana amani ndani hivyo, Kristo akaapo hivyo moyoni, na kutawala humo pasipo mshindani? Ingekuwa muujiza wa miujiza, kama tusingekuwa na amani. Lakini imekuwaje kwamba amani yetu si ya kudumu zaidi? Maelezo pekee ya kupoteza kwetu amani mara kwa mara ni haya, kwamba ushirika wetu umevunjika, na uhusiano wetu umeharibika; kama sivyo amani yetu ingekuwa kama mto, na haki yetu kama mawimbi ya bahari. Ishi karibu na msalaba, na amani yako itakuwa ya daima.

Mahali pa Kuweka Tumaini

Jihadhari kwamba waweka wapendwa wako wote mkononi mwa Mungu. Umeiweka nafsi yako mwenyewe humo, weka nafsi zao na miili yao vivyo hivyo katika ulinzi wake. Waweza kumtumaini kwa mambo ya kimwili kwa ajili yako mwenyewe, mtumaini vito vyako. Hisi kwamba si vyako mwenyewe, bali ni mikopo ya Mungu kwako—mikopo iwezayo kurudishwa wakati wo wote—wakaao wa thamani wa mbinguni, wasiorithishwa kwako, bali ambao wewe u mpangaji tu kwa hiari. Milki zako hazipo salama kamwe kama uwapo tayari kuziacha, wala huwi tajiri kamwe kama uwekapo vyote ulivyo navyo mkononi mwa Bwana. Utaona kwamba hupunguza sana huzuni ya kufiwa, kama kabla ya kufiwa utakuwa umejifunza kukabidhi kila siku vitu vyote vilivyo vipenzi kwako, katika ulinzi wa Mungu wako mwenye neema.

Urithi wa Mwokozi

"Amani nawaachieni." Mwokozi wetu hapa amaanisha amani na Mungu, na amani na dhamiri yetu wenyewe. Amani na Mungu—kwa maana yeye "alitupatanisha na nafsi yake kwa Yesu Kristo," na sasa kuna "amani duniani," na "nia njema kwa wanadamu." Kristo ameziondoa dhambi zetu, na kwa hiyo kuna amani ya kweli na thabiti iliyowekwa kati ya Mungu na nafsi zetu. Hii, hata hivyo, yaweza kuwapo pasipo sisi kuielewa waziwazi na kuifurahia. Kwa hiyo Kristo ametoa ushahidi huu zaidi—amani katika dhamiri. Amani na Mungu ni mkataba: amani na dhamiri ni tangazo lake. Amani na Mungu ni chemchemi, na amani na dhamiri ni kijito cha bilauri kitokacho ndani yake. Kuna amani iliyoamriwa katika baraza la haki ya Mungu mbinguni; na kisha hufuata kama tokeo la lazima, mara habari zijulikanapo, amani katika baraza dogo la hukumu ya mwanadamu, ambamo dhamiri huketi juu ya kiti cha enzi kutuhukumu sawasawa na matendo yetu. Basi, urithi wa Kristo ni amani ya namna mbili; amani ya urafiki, ya makubaliano, ya upendo, ya muungano wa milele kati ya wateule na Mungu; na amani ya raha tamu, ya pumziko tulivu kwa akili na dhamiri. Pasipokuwapo pepo juu, hakutakuwa na dhoruba chini: mbingu iwapo tulivu, dunia ni kimya. Dhamiri huakisi kupendezwa kwa Mungu. "Basi tukiisha kuhesabiwa haki itokayo katika imani, tuna amani kwa Mungu, kwa njia ya Bwana wetu Yesu Kristo."