Mahusiano ya Kimungu

Baada ya kutuhimiza tujazwe Roho na kutupa ushuhuda ule wa mambo matatu wa kujazwa hivyo, sasa Paulo aendelea kutuonyesha jinsi jambo hili linavyoyaathiri mahusiano yetu na wengine.

(i) Waume na wake; (ii) watoto na wazazi; (iii) waajiri na waajiriwa.

Sura ya 5:22-33

yatuonyesha kinachotarajiwa kwa mume na mke wote wawili katika ndoa iliyo njema.

Katika m22, mara nyingi mno twatia mkazo juu ya neno ‘nyenyekeeni’ (au ‘tiini’), na hali neno hilo halionekani katika maandiko ya asili! Ni jambo lililoletwa kutoka mstari uliotangulia, ambapo latuhusu sisi sote – wanaume kwa wanawake. Pande zote mbili zaitwa kunyenyekeana katika m21, kama vyote viwili vinavyoitwa ‘kupendana’ katika ile amri kuu ya Yesu usiku ule alipokufa. Kwa njia, neno hili tulitafsirilo ‘nyenyekeeni’ lina maana ya kuheshimu kuliko kutii. (Tazama pia m33). Sharti nikiri ya kuwa kifua changu huvimba kidogo tu wanaume wengine waniambiapo jinsi wake zao wanenavyo juu ya jinsi nilivyo mume wa ajabu – kwa kadiri ya mke wangu! Yeye hajiungi katika masengenyo yao mabaya juu ya waume zao wenyewe.

Naamini mkazo hapa wapaswa kuwa juu ya fungu lile “kwa mume wenu wenyewe”. Katika siku za Biblia, wanawake walikuwa na haki chache au hawakuwa nazo kabisa – walitendwa kama mali – milki ya waume zao ambao waliweza kufanya waliyoyataka. Ingekuwa rahisi kwa wanawake, waisikiapo habari njema ya injili kwa mara ya kwanza, wakisikia ya kuwa walikuwa wa thamani kwa Mungu apendaye, kumheshimu yule kijana aihubiriye habari hii njema sokoni. Paulo awakumbusha ya kuwa ‘heshima’ yao ya kwanza ni kwa waume zao wenyewe – wala si kwa mhubiri.

Katika m23, mwanaume ni ‘kichwa’ juu ya mwanamke kwa maana ya kuwa ‘kifuniko’ chake au ulinzi wake. Jambo hili lachukua pamoja nalo wajibu mkubwa kabla halijaweza kutumia mamlaka yo yote. Yeye awajibika kwa malezi ya kiroho na ushuhuda wa jamaa yake. Wengi watasimama mbele za Bwana siku moja, wakitumaini ya kwamba atawasifu kwa kazi zote walizozifanya kwa ajili ya ufalme; badala yake atawauliza kwa nini walipuuza ukuaji na malezi ya kiroho ya watu wa jamaa yao wenyewe, kilicho kipaumbele chao cha kwanza!

Vivyo hivyo Yesu ni ‘kifuniko’ chetu, na kwa hiyo, ‘Mwokozi wa mwili’.

Katika m25, wanaume wapaswa kuwapenda wake zao wenyewe kama Kristo alivyolipenda kanisa … upendo usio na masharti.

Historia imethibitisha tena na tena ya kuwa ndoa zilizo na furaha kuliko zote ni zile ambazo mna upendo na kunyenyekeana (heshima) baina yao. Naamini ya kwamba mwanaume ampendapo mkewe (kama Kristo aipendavyo bibi arusi wake, kanisa) na wanawake wawaheshimupo waume zao kuliko wanaume wengine wote, ndoa yao itakua katika utamu na mfano wa Kristo – “mzunguko mtamu” kinyume cha ule mzunguko mbaya ulio wa kawaida sana katika ndoa za kidunia leo.

Sura ya 5:32: Siri kuu.

Na tuliendeleze somo hili zaidi: Katika sura ya 1:9, twasoma juu ya siri hii, iliyofunuliwa katika m10, ya kuwa mwisho wa nyakati, vitu vyote vitakusanywa pamoja ndani ya Kristo. Yaani, atakuwa juu ya vitu VYOTE. Serikali, asili, mashirika, na kadhalika, vitakuwa chini ya mamlaka yake. Wakati huu, mwanadamu yu huru kufanya ‘apendalo mwenyewe’, lakini jambo hilo litakoma vitu VYOTE vitakapowekwa chini ya miguu yake.

Katika sura ya 3:9, Paulo afurahi ya kuwa ameitwa kuifunua siri hii kwa kusudi kwamba ‘wote walio katika ulimwengu wa roho’ (ulimwengu wa nje wa roho) wapate kujua makusudi ya Mungu yaliyofunuliwa kupitia kanisa lake.

Tunapoutafakari ‘mwisho wa nyakati’ katika kitabu cha Ufunuo, twamwona Yesu aliyetukuzwa juu ya kiti cha enzi, akifuatana na BIBI ARUSI, aliyekuwa kanisa zamani. Ni kusudi jema la Mungu ya kwamba yeye atukuzwe pamoja naye kuwa mrithi mwenzi wa utajiri wote wa Mungu! Hili ndilo alilolikusudia kufanya na litakalofunuliwa kwa ‘wote walio katika ulimwengu wa roho’. Hii ndiyo siri! (Siri ya Mungu ambayo sasa imefunuliwa).

Ndiyo sababu Paulo aandika hapa juu ya siri kwa kuhusiana na mafundisho yake juu ya bibi arusi na uhusiano wa ndoa.

Katika sura ya 6, Paulo aendelea na vielelezo vyake vya maisha ‘yaliyojazwa Roho’ – jinsi watoto na wazazi wapasavyo kutendeana, jinsi waajiri na waajiriwa wao wapasavyo kuhusiana. Nyumba ya Kikristo yapaswa kuwa kielelezo kwa nyumba nyingine zote zilizo jirani. Wazazi wana wajibu wa kuwamiminia watoto wao upendo. Jambo hili halimaanishi kukumbatia, na kubembeleza, na kubusu peke yake, bali pia kuthamini, na thamani, na usalama, na malengo, na tabia ya kimungu.

Mwajiri wa Kikristo yapaswa kuiendesha biashara yake kwa neema na kutia moyo – waajiriwa wake wapaswa kuwa wafanyakazi wenye furaha kuliko wote walio jirani. Nao, kwa upande wao, wapaswa kuifanya kazi yao kwa bidii na kujulikana kuwa waaminifu, wenye nia ya kufanya zaidi ya kile awatakacho mwajiri wao. Wote wawili wanaitwa kuonyesha uadilifu katika matendo yao yote.

Na turudi kwenye sura ya 4:25-32, ambapo Paulo atupa kanuni nne zipasazo kutuongoza katika mahusiano yetu yote: (Nimekuwa na nafasi nyingi za kuzitumia hizi katika ushauri wa ndoa).

i) Msiseme uongo – hata kweli za nusu ni uongo. Tafakari mafichoyo tuyafanyayo takriban kila siku.

“Kuna nini?” “Ee, hakuna neno!” na hali twaumia ndani. Sikuzote dumisha mawasiliano ya wazi kati yako na mke/mume/watoto/wenzako wa kazi.

ii) Kuwa wa siku hii – jua lisichwe juu ya ugomvi wenu. Lishughulikie leo. La sivyo litazaa ‘shina la uchungu’ (Waebrania 12:15).

iii) Shambulia tatizo, wala si mtu mwenzako. Nena tu lile lijengalo. Kumbuka, vita ni na adui, wala si na wana wenzetu wa Mwili.

iv) TENDA KWANZA, wala si KUITIKIA tu! Tafuta njia za kugeuza uadui kuwa umoja.

Tafakari: i) Uongo ni nini? – Kusema, kunyamaza, matendo, na kadhalika.

ii) Ni ‘hasira’ ya namna gani iliyo sahihi? Hasira ya haki igeuzayo hali – k.m., Wilberforce na utumwa.

iii) Twampaje Ibilisi “nafasi”? Yeye atapanda kutokuaminiana na machafuko.

iv) Kwa nini Paulo aandika hapa juu ya kuiba? Ni dai la uaminifu/uadilifu katika tendo kama ilivyo katika maneno.

v) Ni maneno gani mabovu tuwezayo kuyasema?

Paulo aimaliza sura hii kwa orodha ya mambo yapasayo kuondoka maishani: a) uchungu – chuki ya muda mrefu.

b) ghadhabu na hasira – hasira ya muda mfupi (kujaa hamaki) na ya muda mrefu.

c) makelele na masingizio – kunena kwa sauti kuu (sauti zilizopandishwa) na lugha ya matukano.

d) uovu – uchungu wa roho kwa mwenzake.

Badala yake, twapaswa kuwa wafadhili, kama inavyoelezwa kwa kuwa wenye huruma, wenye kusamehe. Maisha kama hayo yasingewezekana kama isingekuwa kwa ajili ya Roho Mtakatifu, atufanyaye kuwa “zaidi ya washindi” kwa ujazo wake (Warumi 8:37).

Yeye aliye ndani yenu ni mkuu kuliko yeye aliye katika dunia – 1 Yohana 4:4.