Mwenendo wa Mkristo

Nategemea ya kwamba tumejifunza “kuketi” ndani ya Kristo kama katika sura ya tatu. (Waefeso 2:6) – tukijua ni nini kilichomfurahisha Paulo, kikimfanya aombe ombi hilo la ajabu kwa ajili yetu. Sasa anatuhimiza tuenende.

Twapaswa “kuenenda kwa kustahili wito wetu”. (4:1) Twapaswa “tusienende tena kama Mataifa katika ubatili wa nia zetu.” (4:17) Twapaswa “kuenenda katika upendo, kama Kristo naye alivyowapenda ninyi.” (5:2) Twapaswa “kuenenda kama watoto wa nuru.” (5:8) Twapaswa “kuenenda kama watu wenye hekima, wala si kama wapumbavu.” (5:15) “Sipendezwi na maneno yako – nionyeshe mwenendo wako!” Mwenendo wako waamuliwa na ardhi uisimamiayo; katika ulimwengu huu (mfumo) au katika ‘ulimwengu wa roho’?

Inuka pamoja na Bwana wako aliyefufuka, paa pamoja na Kristo huko juu, na katika ulimwengu wa roho enenda pamoja naye, Yeye usiyemwona, lakini wampenda.

Enenda kama taifa la mbinguni, Wana wa damu ya kifalme; enenda kama watoto wa nuru, wana na warithi wa Mungu. A B Simpson 4:1: ENENDA kwa kustahili wito wako: kwa unyenyekevu wote, na upole, na uvumilivu, na kuchukuliana – katika upendo. Mahali pengine sifa hizi zaweza kuonekana miongoni mwa tunda la Roho (Wagalatia 5:22, 23). Zahitaji muda ili kukua! Mti wa matunda hauzai tunda lake kwa kujitahidi; unapopokea jua na mvua, na kujilisha kwa lishe ya ardhi, huzaa tunda lake. Vivyo hivyo, hatuwezi kuzaa tunda la Roho kwa juhudi zetu wenyewe. Twapaswa kuwa “kama mti uliopandwa kandokando ya vijito vya maji, uzaao matunda yake kwa majira yake.” Zaburi 1:3).

Tulipofika Kanada, tulinunua nyumba ya zamani ambayo bustanini mwake mlikuwa na miti minne ya matunda.

Ilikuwa imeachwa bila kutunzwa, wala haikuzaa matunda, basi niliamua kuipogoa. Rafiki zangu walidhani nimekata kupita kiasi, na ya kwamba sasa hiyo miti ingekufa. Wazia furaha yetu majira ya kuchipua yaliyofuata, ilipozaa matunda mengi mno matamu, matofaa, maplamu, na macheri!

Jioni moja, mimi na Anne tulikuwa tumeketi juu ya viti vyetu bustanini, niliposikia sauti ya ajabu sana – kuugua kukifuatiwa na ‘ahhh’ ya kutulia. Sikuweza kutambua chanzo cha sauti hiyo hata nilipoona tawi mojawapo la mti wa tofaa likivimba kwa sauti ya maumivu kabla halijapasuka ghafula, na tofaa zuri likatokea! Kisha tawi lingine likaanza kuvimba, na tokeo lilo hilo.

Mimi na Anne tulistaajabu tulipotazama macheri, na maplamu, na matofaa yakitokea ghafula baada ya kujikaza na kuugua.

Basi natumaini mnatambua ya kuwa ninabuni hadithi hii! Matunda hayakui hivyo. Hadithi hii ni ya kipumbavu mno – kama vile waaminio wadhaniao ya kwamba waweza kuzaa Tunda la Roho kwa juhudi zao!

Kiasi cho chote cha kujitahidi hakitazaa furaha wala amani wala upole, na kadhalika, katika maisha yako – kukaa ndani yake peke yake ndiko kuwezako kuzaa tunda kama hilo.

Kwa kupita: tunapozitafakari sifa hizo, twaona ya kuwa zinazidi kuwa ‘adimu’ (nadra) kadiri tusomavyo mbele.

Tena, sifa tatu za kwanza (upendo, furaha, amani) ni za ‘ndani’; sifa tatu za pili (uvumilivu, upole, wema) zahusu zaidi jinsi ninavyowajibu wengine, na sifa tatu za mwisho (imani, unyenyekevu, na kiasi) zanena juu ya jinsi ninavyomjibu Mungu. (Maneno kama yalivyo katika KJV) Unyenyekevu ni kujijua nafsi yangu kama nilivyo. Si zaidi wala si pungufu! ‘Mimi ni kiongozi katika kanisa la Kristo’ laweza kusemwa kwa kiburi, kwa majivuno, au kwa unyenyekevu kama afanyavyo Paulo hapa. Unyenyekevu wa uongo (‘Ee, mimi si kitu ila mdudu tu!’) ni ugonjwa ulio jamaa wa kiburi.

Upole mahali pengine hutafsiriwa ‘unyenyekevu’ – hali ya kufundishika au kunyumbulika. Umeelezwa kuwa ‘nguvu iliyozuiliwa’ – kama farasi dume mwenye lijamu kinywani mwake.

Uvumilivu (saburi) – hustahimili hata mwisho, subira na watu.

Kuchukuliana kwa upendo – kuvumiliana sisi kwa sisi. Upendo huu ni ‘agape’ – utafutao lililo jema kuliko yote tu.

4:17-24: Enenda, wala si tena kama Mataifa waenendavyo.

Ni tofauti kati ya asili ya kale na asili mpya (‘Mtu wa Mataifa’ na Mtu Mpya). Mtu wa kale alienenda gizani, akipungukiwa na ufahamu, mjinga, na aliyetengwa na uzima wa Mungu kwa sababu ya ugumu wa moyo wake, aliyejitia katika ufisadi na uchafu pamoja na tamaa. Haya yote ni kinyume cha kile kitakiwacho na ile kweli uliyoiona ndani ya Kristo.

Paulo hutumia maneno matatu yenye nguvu sana kuionyesha nia ya wapagani.

‘ugumu wa moyo’ – porosis – mwamba uliogeuka jiwe – uliosugua hata kupoteza hisia zote.

‘aliyejitoa kwa ufisadi’ – aselgeia – asiyejali jinsi aonekanavyo mbele ya wengine katika ufisadi wake.

‘uchafu pamoja na tamaa’ – pleonexia – upendo uliolaaniwa wa kumiliki – shauku kwa kile ambacho mtu hana haki nacho.

Twapaswa ‘kuuvua’ utu wa kale; twapaswa kufanywa upya katika roho ya nia zetu; twapaswa ‘kuuvaa’ utu mpya.

Haya ni matendo tuwajibikayo kwayo – ni mwelekeo wa daima. Tafakari hapa, Warumi 12:1, 2.

5:1-6: Enenda katika upendo kama Kristo naye alivyowapenda ninyi…

Mistari hii yatuonyesha mwenendo wa mpenzi.

Ni agano la ‘uchumba’ kati ya wawili. Hamna nafasi ya uchafu katika fikira wala katika maisha.

Tumeposwa kwa bwana arusi wetu, Kristo, wala hatupaswi kufanya uzinzi na dunia, kama Israeli alivyofanya, ijapokuwa aliposwa kwa Mungu. Kielelezo chetu kilicho bora ni Yesu. Maisha yake ya kujitoa dhabihu yalikuwa kama harufu nzuri ipandayo kwa Mungu – yenye kukubalika. Wake ulikuwa utii mkamilifu na upendo mkamilifu.

Imesemwa ya kuwa usafi wa mwili ni ile fadhila moja mpya ambayo Ukristo uliuletea ulimwengu. Ulimwengu wa kale uliuhesabu uasherati kuwa jambo dogo hata usiwe dhambi kamwe.

Paulo hutupa maonyo mawili: i) Hata kunena juu ya mambo kama hayo kwa mzaha hakuruhusiwi kwetu.

ii) Tusidanganywe kwa maneno matupu – sauti zinenazo juu ya mambo kama hayo kwa mzaha kama Wagnostiki walivyofanya.

5:8-14: Enenda kama watoto wa nuru.

Zamani mlikuwa watoto wa giza, lakini sasa nuru imekuja kuwaongoza na kuangaza katika ulimwengu huu uliotiwa giza. Hatupaswi kushirikiana na giza, bali kuenenda katika nuru (ya bwana arusi wetu). Twapaswa kuenenda kwa uangalifu, kwa busara, tukijua ya kuwa sisi ni mali ya mwingine, wala si ya dunia.

Mstari wa 14 waonekana kuwa sehemu ya wimbo wa kale – yamkini ulitumika katika ubatizo?

5:15-21: Enenda kama watu wenye hekima, wala si kama wapumbavu.

Yajue mapenzi ya Mungu ni nini; jifunze Neno, tumia wakati faragha pamoja naye ili Roho wake akufundishe. Tena, msilewe kwa mvinyo bali mjazwe Roho.

Mstari wa 17-21: yatuonyesha tunavyopaswa kuwa tunapoenenda njia hizi. Ni lazima tuwe watu ‘waliojazwa Roho’.

Ushuhuda huu wa mambo matatu wa maisha yaliyojazwa Roho: i) roho ya kusifu (m19) ii) roho ya shukrani (m20) iii) roho ya kunyenyekea (m21).

Usiniambie umejazwa Roho kama wewe si mwabudu, wala kama unanung’unika juu ya kanisa au wengine katika ushirika. Umeitwa kuwa mtumishi wa wote – uliyenyenyekea ili kutumika.

Wako wengi leo wadaio kuwa ‘wamejazwa Roho’. Naamini twaweza kutilia shaka uhalisi wa yule adaiye kuwa ‘amejazwa Roho’ kama ‘ushuhuda’ huu wa mambo matatu haupo – yaliyo dhahiri zaidi ni manung’uniko, na siasa, na kiburi. Ndiyo sababu Paulo huweka sura ya 13 kati ya sura ya 12 na ya 14 katika 1 Wakorintho. Hiyo ya mwisho hufundisha mengi juu ya karama, vipawa vya Roho, na utendaji wake katika kanisa la mahali, lakini maonyesho kama hayo ni kama ‘shaba iliayo au upatu uvumao’ – hayana thamani yo yote. Sura ya 12 hunena juu ya ubora wa upendo, upasao kudhihirika kila zitendekapo karama.

‘Sipendezwi na maneno yako – ninajishughulisha zaidi na mwenendo wako.’