Simama Imara

Tukiisha kujifunza kuketishwa katika ulimwengu wa roho (2:6) na kuenenda katika upendo na katika nuru (5:2, 8), twaitwa kuwa hodari na kusimama imara (6:10, 11). Bibi arusi wa Sura ya 8 sharti awe mshindi kama atataka kuvaa taji na kutawala pamoja na Yesu. Kwa hiyo, aitwa kuwa askari.

Tuliona katika sehemu ya kwanza ya sura ya 6 ya kuwa Paulo aendeleza somo la maisha yaliyojazwa Roho kama liwahusuvyo uhusiano kati ya watoto na wazazi; wafanyakazi na mabwana wao. Wazo moja kuu hapa lahusu ‘baba’ ‘wawachokozao watoto wao hata wakachukizwa.’ Yaweza kuwa akina mama, lakini mara nyingi ni akina baba. Ni jambo la kupendeza ya kwamba wataalamu wengi wa saikolojia huihesabu ‘hasira’ kuwa tunda la vidonda vya ndani – vidonda vya nafsi vinavyosababishwa na baba (na mama) wasioujaza upendo moyo wa mtoto wao wenye kiu ya upendo (kukumbatia, kubusu, utambulisho, maadili, kujithamini, usalama, malengo, na kadhalika). Ni tafakari yangu ya huzuni ya kwamba vidonda kama hivyo vya nafsi ndivyo silaha zenye nguvu kuliko zote azitumiazo Shetani kuwashinda waaminio wengi.

Ni funzo la kupendeza kutafakari maana ya kuwa ‘mshindi’ na kuona thawabu za kushinda huko. Na tuchukue ‘nafasi’ kutafakari mistari mitatu katika Waraka wa Kwanza wa Yohana inenayo juu ya kushinda. 1 Yohana 2:12-14.

Hapa Yohana huwaweka waaminio wote katika mojawapo ya makundi matatu ayaitayo, watoto wadogo, na baba, na vijana.

Watoto wadogo ni wale ambao dhambi zao zimesamehewa kwa ajili ya jina lake (m12), nao waweza kumwita Mungu ‘Baba’ (13). Jambo hili ni kweli kwa wote waliozaliwa mara ya pili kwa Roho. Yamkini hawajui neno lo lote la theolojia wala historia ya kanisa, lakini waweza kunena mambo mawili: ‘Dhambi zangu zimesamehewa, nami naweza kumwita yeye Baba.’ Angalia ya kuwa jambo hili halihusiani na umri wa miaka. Nawajua waaminio wengi, waliokwisha kuwa wazee, ambao kwa kusikitisha hawakusonga mbele kupita hatua hii – wamebaki kuwa watoto wachanga!

Baba ni wale waliokuja kumjua yeye aliyeko tangu mwanzo. Huku si kujua kwa kichwa peke yake, bali ni urafiki wa karibu kama Mungu alivyojidhihirisha kwao. Hili ndilo lengo la ombi la Paulo katika Waefeso 1:17.

Huku ndiko kukomaa kwa Kikristo – kumjua yeye. Angalia ya kuwa huku nako si umri wa miaka, wala hakutegemei jinsia. Kwa furaha, nawajua vijana wanaume na wanawake wengi waliokuja kumjua Mungu kwa njia ya ndani ya binafsi – wao ni ‘baba’ wa kiroho.

Kuna njia moja tu tuwezayo kusonga kutoka siku zile za awali za kuwa ‘watoto wadogo’ hata mahali ambapo Mungu hujidhihirisha kwetu tusongapo mbele katika kukomaa – ni kwa kuwa ‘vijana’.

Tena, huku si umri wa miaka wala si neno la jinsia.

Vijana ni wale waliomshinda yule mwovu (m13); wana nguvu kwa sababu neno la Mungu lakaa ndani yao (m14). Kwa kila silaha ya Shetani wana jibu katika Neno la Mungu.

Wao huupinga uongo wake kwa kweli ya Biblia. K.m., adui aweza kufurahia anguko lako na kusema, ‘Mungu hakupendi tena kwa kuwa umemsikitisha!’ Uongo huu wapingwa na kweli ya kuwa ‘hakuna kitu kiwezacho kunitenga na upendo wa Mungu ulio katika Kristo Yesu’ (Warumi 8:39).

Kila tunapojaribiwa na hali zetu, na uongo wa Shetani, na majaribu ya dunia, Mungu atazama aone jinsi tunavyoitikia. Yeye yuko kando akitutia moyo. Tunaposhinda, yeye hufurahi na kudhihirisha zaidi ya tabia yake kwetu.

Sasa na tuwatazame washindi wa Ufunuo 2, 3 – ambapo Yohana amwona Kristo aliyetukuzwa na kuagizwa kuandikia yale makanisa saba ya Asia Ndogo. Kuimaliza kila waraka, Yesu hunena juu ya thawabu wapewazo ‘wale washindao’.

Ufunuo 2: mshindi atakula matunda ya mti wa uzima (m7); hatadhuriwa na mauti ya pili (m11); atalishwa ‘mana’ iliyofichwa, naye atapewa jiwe jeupe na jina jipya (m17); atapewa mamlaka juu ya mataifa na ile nyota ya asubuhi (m26-8).

Ufunuo 3: mshindi atavikwa mavazi meupe na jina lake litakiriwa mbele za Baba na malaika (m5); atafanywa nguzo katika hekalu la milele, naye atapokea ile alama ya Mungu ya sehemu tatu (m12); ataketi pamoja na Yesu juu ya kiti chake cha enzi – kutawala pamoja naye (m21).

Ndiyo sababu Bwana huwaacha waaminio wapite katika majaribu magumu pamoja na mateso na upinzani, na sababu mara nyingi huonekana kama akaa nje ya shida hata tumliliapo katika maombi. Yeye ataka tuwe washindi ndani ya shida kuliko yeye kutuokoa kutoka humo. Ametupa Roho Mtakatifu awe msaidizi wetu vitani, na ametupa silaha za kuvaa. Yeye aliye ndani yetu ni mkuu kuliko yeye aliye katika dunia.

Tena, twapaswa kuwa hodari katika “neno” ili tuzitambue hila za adui, Shetani. Paulo alikuwa mwepesi wa kusamehe, ili asimpe Shetani nafasi ‘kwa maana hatukosi kuzijua fikira zake’ (2 Wakorintho 2:11). Hapo mbeleni katika Waefeso, alituhimiza tusiache ‘jua lichwe juu ya hasira zetu, tusije tukampa Ibilisi nafasi’ (4:27).

Tena, Ibilisi atarusha ‘mishale yake yenye moto’ (6:16) – uongo tuuruhusuo kwa urahisi mno kuingia akilini mwetu na kuuamini. Petro amwelezea kuwa ‘simba angurumaye’ akitafuta mtu ammeze (1 Petro 5:8) – ngurumo zile ziathirizo hisia zetu na kututia hofu hata tukawa waoga vitani. Kumbuka ya kuwa ngurumo ndiyo yote awezayo kufanya, kwa maana amekwisha kupoteza meno na makucha yake!! Yesu alimvua silaha zake pale msalabani – Wakolosai 2:15.

Vita kwa kweli ni vya Bwana, lakini twapaswa kuwa na silaha ili tushinde.

Sasa na turudi Waefeso sura ya 6: M11: Vaeni silaha zote za Mungu.

M12-13: Angalia mahali ambapo makini yetu yapaswa kuwa katika vita hivi – si watu wengine, wawe waaminio au sivyo. Hapa ndipo nguvu zetu zapaswa kuelekezwa. Bila shaka twapaswa kuupinga mwili (asili yetu ya kale ya utu), lakini hata huko ni vita vya roho kuliko vita vya vitu vya kimwili. Sharti tumwone adui aliye nyuma ya nafsi ya mtu.

‘Enzi’ ni waangalizi wa kiroho wa serikali, na mataifa, na kadhalika.

‘Mamlaka’ ni ‘maharamia’ wa kishetani wanaoifanya kazi ya Ibilisi katika maeneo madogo zaidi.

‘Wakuu wa giza’ huwashawishi wale wanaowashawishi wengine – wanasiasa, waelimishaji, wanafalsafa, na kadhalika.

‘Uovu wa roho’ wahusu waangalizi wa dini, na kadhalika.

Haya ni migawanyo ya karibu ya ngazi mbalimbali za malaika (walioanguka), nayo yalikuwa ufahamu wa kawaida katika siku za Paulo.

M14: Kweli ndilo vazi kuu ambalo mavazi mengine yote yamefungwa au kuunganishwa nalo. Twahitaji sana kweli au uadilifu katika matendo yetu yote. Dirii ya haki hulinda mioyo yetu; miguu yetu imefungiwa utayari tupatao kwa injili ya amani – sikuzote tu katika utume!

Angalia ya kuwa hamna silaha kwa ajili ya mgongo! Mtu hawezi kugeuka na kukimbia!

M17, 18: Silaha za kushambulia ni upanga (Neno la Mungu) na maombi katika Roho. Kwa hizi tutakuwa washindi, basi yatupasa kujifunza jinsi ya kuzitumia! Nastaajabu jinsi waaminio wengi waingiavyo vitani bila kuwa ‘wamejiimarisha kwa maombi’!

Mwishowe, katika 1 Wathesalonike 5:8, Paulo aongeza kwenye silaha hizi, “Jivikeni dirii ya imani na upendo, na kwa chapeo, tumaini la wokovu.” Tena, twaona vito vitatu vya Paulo – huviweka pamoja mara saba hivi katika nyaraka zake, hasa katika ile sura kuu ya upendo – 1 Wakorintho 13:13 – “Basi sasa yanadumu haya matatu, imani, tumaini, upendo; na katika hayo lililo kuu ni upendo”.

Ni mara chache mno tuutambuapo ukuu wa tumaini (la Kikristo), tukiliunganisha na maana yake dhaifu ya Kiingereza. “Natumaini haitanyesha mvua leo” – lakini yaweza kunyesha!

Kwa Paulo, tumaini lilikuwa jambo kuu zaidi sana. Mbele ya Mfalme Agripa, angetangaza, “Wayahudi hawa wanishtaki kwa uasi, lakini nasimama mbele yako leo kwa ajili ya tumaini la ufufuo!” (Matendo 26:1-8, kwa maneno mengine). Hasemi, “Natumaini kuna ufufuo, na ya kwamba sikuacha kazi yangu kuu bure ili kuifuata njia hii!” Anasema, “Najua ya kuwa najua ya kuwa najua kuna ufufuo kwa ajili yangu!” Ana uhakika ndani yake.

Mimi hulifasili tumaini kuwa “sifa ya akili idhihirikayo katika ujasiri”. Ndiyo sababu ile chapeo huitwa tumaini la wokovu.

Vivyo hivyo, “imani ni sifa ya moyo idhihirikayo katika utii.”

Nategemea ya kuwa sura hizi fupi zimekuwa baraka kwako unapotafuta kumkaribia yeye – ukijifunza kuketishwa ndani yake na kuenenda katika upendo na nuru. Uwe wewe mshindi ambaye Bwana afurahi kumdhihirishia zaidi ya tabia yake.

Na nimalize kwa ombi la Paulo: (1:15-20; 3:16-19) Naomba kwamba Mungu wa Bwana wetu Yesu Kristo, Baba wa utukufu, awape ninyi roho ya hekima na ya ufunuo katika kumjua yeye. Naomba kwamba macho ya mioyo yenu yatiwe nuru, mpate kujua tumaini la wito wake ni nini, na utajiri wa utukufu wa urithi wake katika watakatifu ni nini, na ukuu usiopimika wa uweza wake ndani yetu tuaminio ni nini … naye awajalie ninyi, kwa kadiri ya utajiri wa utukufu wake, mfanywe imara kwa nguvu kwa njia ya Roho wake katika utu wa ndani, ili Kristo akae mioyoni mwenu kwa imani; nanyi, mkiwa na shina na msingi katika upendo, mpate kufahamu pamoja na watakatifu wote jinsi ulivyo upana, na urefu, na kimo, na kina, na kuujua upendo wa Kristo upitao ufahamu, mpate kutimilika kwa utimilifu wote wa Mungu.

Kwake yeye uwe utukufu katika kanisa!!

MWISHO