Pendeleo la Huduma

Waefeso Sura ya 3:1-13

Mtazamo tofauti: Paulo yumo gerezani huko Rumi lakini anajitambua kwanza kabisa, kuwa mfungwa wa Yesu Kristo. Hapa twaona tena hali ya pande mbili ya muumini — yumo katika ulimwengu huu lakini si wa ulimwengu huu. Mtazamo wa mtu waweza kuleta tofauti yote!

Angalia kwamba mistari 2-13 ni fungu jingine la ndani ya mabano katika fundisho la Paulo. “Kwa sababu hii…” yarudiwa anaporudi ‘kwenye mkondo’ wa sala yake katika mstari 14. Fungu hili la mabano lachochewa na kuutafakari kwake ukweli kwamba yeye ni ‘mfungwa wa Kristo Yesu’. Analifurahia jambo hilo!

Anataja tena ile ‘siri’ kuu aliyoipokea kwa ufunuo kutoka kwa Mungu. Watu wa Mataifa nao watapokea baraka kutoka kwa Mungu! Hilo ni tofauti kabisa na fikira zilizokuwapo miongoni mwa Wayahudi walioyahesabu Mataifa yote kuwa “mbwa” wasiostahili kuangaliwa na Mungu. Kama vile Petro alivyokuwa mtume kwa Wayahudi, Paulo amekuwa mtume kwa watu wa Mataifa.

Paulo amepokea uwakili wa neema ya Mungu kwa watu wa Mataifa. Hili lahusisha ufunuo mpya: (mstari 3). Si jambo alilolivumbua yeye — bali jambo ambalo Mungu amelifunua. Halikufikiriwa, kusitawishwa, kubishaniwa — bali lilifunuliwa. Mungu ndiye aliyechukua hatua ya kwanza katika kumchagua Paulo kwa ajili ya kazi hii kuu.

Paulo amepokea ‘kipawa cha neema’: (mstari 7), hiki kilikuwa kipawa cha kuhubiri. Paulo hufundisha mahali pengine kwamba kuna ‘vipawa vya neema’ vingi (charismata) ambavyo kwavyo sisi sote twaweza kuwa wahudumu wa Kristo Yesu. Naam, sisi sote tumepewa ‘vipawa vya neema’ kwa ajili ya kulijenga kanisa (tazama tena 1 Wakorintho 12:11).

Paulo amepokea huduma: (mstari 7), aliihesabu kuwa pendeleo la kustaajabisha, kama ilivyo huduma yote ya Kikristo. Ina heshima iliyo kuu kuliko zote wala kamwe haipaswi kudharauliwa. Kwa kazi hii amepokea nguvu (dunamis) — nguvu zilezile zilizowajilia wanafunzi siku ya Pentekoste — ubatizo wenye uweza wa Roho Mtakatifu. Alijua jinsi kazi hii ingekuwa isiyowezekana bila nguvu hizo. Ni jambo la kusikitisha kiasi gani kuuona udhaifu wa kanisa wakati watu (wema) wanapojaribu kuifanya kazi ya Mungu bila kuwezeshwa na Roho wake mwenye nguvu! Ikiwa Yesu alihitaji utimilifu wa Roho umjilie wakati wa ubatizo wake, kabla ya kuanza huduma yake, si zaidi sana sisi.

Paulo atajivunia mateso yake kwa ajili ya lengo hili kuu: (mstari 13), hakutazamia huduma yake kuwa rahisi. Kuteseka kwa ajili ya Kristo si adhabu; ni utukufu wetu kwa maana ni kushiriki katika mateso ya Kristo mwenyewe na fursa ya kuonyesha uaminifu wetu kwake.

Pendeleo la huduma: Malaika waliomo mbinguni hawakulielewa hili — (mstari 10). Ile siri imefunuliwa na hekima ya Mungu sasa inajulishwa kwa viumbe vyote kupitia kanisa.

Basi, Paulo ana pendeleo maradufu — a) amepokea ufunuo huu, b) aweza kuutangaza ujumbe huu, yaani amepokea ili apate kutangaza. Pendeleo la namna hiyo la kustaajabisha halimfanyi awe na kiburi — bali, lamfanya awe mnyenyekevu (mstari 8). Anatambua kwamba ukuu wake haumo ndani yake mwenyewe bali umo katika ujumbe wake. Huduma ya kweli (kwa mfano kuhubiri) kamwe haitamfanya mtu ajivunie mhubiri bali amjivunie Kristo anayehubiriwa.

Mpango na hekima ya Mungu: Watu wa Mataifa na Wayahudi ni warithi wenzao wa utajiri wa Mungu. Ni washiriki wenzao wa ahadi yake katika Kristo (mstari 6). Hili si wazo la baadaye la Mungu — lilikuwa kusudi lake tangu mwanzo — siri iliyofunuliwa sasa kwa Paulo na kwa viumbe vyote vya kimalaika (wenye enzi na wenye mamlaka katika ulimwengu wa roho). Ni ipi ‘ahadi’ ya Baba? — tazama tena Sura ya 3.

Sisi pamoja na Paulo, twaweza kuwa na ujasiri na njia ya kumfikia Mungu kwa njia ya imani. Lakini kama utajiri wote ulio wetu katika Kristo, ni lazima uchukuliwe — upokewe ndani. Ni ‘utajiri’ upi ambao umejichukulia mwenyewe?

Sisi sote tumepewa vipawa vya neema (charismata) ili kulijenga kanisa lakini ni vya kuchaguliwa na Roho, si vya kuchaguliwa na sisi. Mtu apaswa kuwa mwangalifu sana asiingie katika huduma ambayo Mungu hakukuita, wala hakukuandaa kwa ajili yake.

Hadithi ya binafsi

Nilikuwa mwalimu wa shule mwenye mshahara mkubwa mwaka wa 1979 nilipoalikwa kuwa mchungaji na Msimamizi wa Wilaya wa dhehebu langu. Nikasema kwamba hilo lingekuwa pendeleo kubwa lakini ningetaka kujua kwa hakika kwamba Mungu ananiita. “Unatafuta nini — mmweko wa nuru kutoka Mbinguni?” akauliza. “Ndiyo!” nikajibu. “Nitakachotafuta ni ushuhuda wa ndugu tu,” akasema. Kisha nikaongeza kwamba singeweza kumudu kwenda seminari, kwa kuwa tulikuwa tumehangaika kifedha kwa miaka mingi kabla ya kuchukua kazi yangu ya sasa ya ualimu, miaka miwili tu iliyopita. Kwa mshangao wangu, kisha akasema kwamba hangetaka niende seminari bali angenikaribisha kama nilivyokuwa! Aliona kitu ndani yangu ambacho mimi sikuwa nikijua! Majuma machache baadaye, mchungaji wangu alikuwa akiacha mimbari ili kuingia katika huduma ya kuimba ya kuzunguka. Nikiwa mzee pekee mwenye uzoefu fulani wa kuhubiri, nilizungumza katika kuagana kwake, baada ya hapo watu wawili walinijia, wote wachungaji wastaafu ambao hawakujua lolote kuhusu mazungumzo yangu na Msimamizi wa Wilaya, wakisema, “Ndugu, hupaswi kuwa unafundisha!

Wapaswa kuwa katika huduma!” — ule “ushuhuda wa ndugu”. Miezi kadhaa iliyofuata, nilishindana na Mungu, nikihofu kumwambia mke wangu juu ya ushuhuda uliokuwa ukikua ndani yangu. Miezi sita baadaye, nilimwambia Anne.

Kwa mshangao wake na kinyume na hisia zake zote kuhusu maisha ya kuwa mke wa mchungaji, mke wangu amchaye Mungu aliniachilia kwa maneno haya, “Kama Mungu anakuita, basi yakupasa kutii!” Soma kitabu changu Stepping Stones ili uone kitu fulani cha safari ya ajabu ambayo Bwana ameniongoza tangu siku ile.

Naamini seminari zetu zimelifanyia kanisa jambo baya zinapowatoa wanaume/wanawake katika huduma ya uchungaji kwa sababu tu wamehitimu wa kwanza katika darasa lao. Kwenda seminari, kufaulu mitihani kwa alama nzuri, hakumfanyi mtu kuwa mchungaji. Watu wa namna hiyo hupewa kanisa na Bwana mwenyewe. Waefeso 4:11 yatangaza, “Naye alitoa wengine kuwa mitume, na wengine kuwa manabii; na wengine kuwa wainjilisti; na wengine kuwa wachungaji na waalimu”. Ni kipawa cha Kristo kwa bibi arusi wake mpendwa, kanisa. Mtu apaswa kuwa mwangalifu sana kabla ya kuchukua nafasi ambayo Bwana yamkini hakukuita.

Mstari 14: “Kwa sababu hii…” — Paulo anaendeleza sala yake ya sura ya 1:15-20 na kama alivyokusudia katika 3:1. Anataka wapokee kilicho chao kwa ‘haki’ kupitia kazi ya upatanisho ya msalaba — na kwa kadiri ya utajiri wa Mungu katika utukufu (mstari 16).

✔ ‘nguvu kwa njia ya Roho wake katika utu wa ndani’.

✔ Kristo akae mioyoni mwetu kwa njia ya imani.

✔ Kuwa na mizizi na msingi katika upendo.

✔ Kufahamu upendo mkuu wa Mungu kwetu.

✔ Utimilifu wa Mungu.

Lo! Sasa isome tena sala ya Paulo katika 1:15-20 na kuendelea hadi 3:14-19. Jibu lako ni lipi?

Si ajabu Paulo analazimika tena kuabudu!

Angalia pia kwamba Paulo ‘anapiga magoti’ ilhali mkao wa kawaida wa maombi kwa Myahudi ni kusimama — hili lasisitiza bidii ya Paulo katika maombi.