Kutiwa Muhuri na Kuketishwa

Ni lazima tuyatafakari tena masisitizo makuu ya mafundisho ya Paulo katika masomo yaliyotangulia. Kutoka sura ya 1 hadi 2:9, tunayo mafuriko matatu marefu, ya kishairi, yanayoonyesha shauku ya mtume kwa somo lake. Mbali na yale maombi yaliyoingizwa katikati, msisitizo wake ni juu ya utajiri wa baraka zetu “ndani ya Kristo.” Baraka mbili kuu ni kutiwa kwetu “muhuri ndani yake” (1:13) na kuketishwa kwetu “ndani yake” (2:6). Sasa tutazitafakari kwa kina zaidi. Zapasa “kuhesabiwa kwetu” na kutwaliwa nasi, yaani, ni lazima tuzifuatilie kwa bidii.

Kutiwa Muhuri Ndani Yake kwa Roho Mtakatifu wa Ahadi.

(1:13) “… ambaye ndani yake ninyi nanyi, mkiisha kuamini, mlitiwa muhuri kwa Roho yule wa ahadi aliye Mtakatifu.”

Hiki ndicho wanafunzi walichokionja siku ile ya Pentekoste wakiisha kuagizwa na Yesu “kungojea Yerusalemu kwa ile ahadi ya Baba” (Matendo 1:4). Ahadi hii yaweza kupatikana katika Isaya 44:3 (“Nitamwaga maji juu yake yeye mwenye kiu, na vijito vya maji juu ya nchi kavu; nitamimina Roho yangu juu ya wazao wako, na baraka yangu juu ya vizazi vyako”); Ezekieli 36:26,27 (“Nami nitawapa moyo mpya, nami nitatia roho mpya ndani yenu…”); Yoeli 2:28 (“Nitamimina roho yangu juu ya wote wenye mwili; na wana wenu, waume kwa wake, watatabiri…”), nayo iliongezewa na Yesu katika Yohana 7:39.

Petro anaielewa ahadi hii kwa maana ananukuu kutoka kwa Yoeli katika hotuba yake kuu siku ile ya Pentekoste, akiongeza kwamba “yeye, akiisha kupokea kwa Baba ile ahadi ya Roho Mtakatifu, amekimwaga kitu hiki mnachokiona sasa na kukisikia.” (Matendo 2:33) Wanafunzi walikuwa “wamezaliwa mara ya pili” (walipokea uzima mpya) Yesu alipowavuvia siku ya Jumapili iliyofuata ufufuo wake (Yohana 20:22 — enthusao — navuvia ndani). Hapo walipewa nguvu (exousia) ya kufanyika wana wa Mungu (Yohana 1:12). Siku ya Pentekoste wangepokea nguvu (dunamis) ya kuwa mashahidi wake (Matendo 1:8). Waamini wengi mno leo wanatenda kwa nguvu ya exousia na si nguvu ya dunamis ambayo peke yake yaweza kutuwezesha kuwa washindi tulioitiwa kuwa. Dunamis ni neno la Kigiriki ambalo kutoka kwake twapata neno dynamite!

Paulo alipofika Efeso katika safari yake ya mwisho ya umishonari, aliwauliza wanafunzi wa huko kama walikuwa wamempokea Roho Mtakatifu walipoamini. Walikuwa wametubu, wamekuwa waamini, lakini hawakuwa “wametiwa muhuri.” Baada ya Paulo kuweka mikono yake juu yao, walipokea uzoefu ule ule kama wanafunzi walivyopokea Yerusalemu siku ile ya Pentekoste. (Matendo 19:1-7.)

Kwa kanisa la kwanza, kutiwa muhuri kwa Roho (“ubatizo wa Roho Mtakatifu” — Matendo 1:5) kulikuwa tarajio na uzoefu wa kawaida wa waamini. Kwa wale waliokuwa wamejitenga na fundisho hili, Paulo angeandika barua kama vile hoja yake kwa Warumi — ona sura ya 7 kwa ule mgogoro utokeao mtu anapotenda kwa nguvu ya exousia tu, kisha uilinganishe na sura ya 8 na kuendelea, ambapo huzungumza mfululizo juu ya huduma ya Roho Mtakatifu ndani yetu.

Basi, mtu hufikaje utambuzi huu au kuuonja “muhuri” huu? Ni lazima mtu aamini kwamba kutiwa muhuri kama huku ni kwa ajili yetu — sharti kuwe na hamu na shauku ya kujazwa Roho. Wanafunzi wa kwanza waliambiwa “wangoje” Yerusalemu. Huku si kungoja kwa saburi tu, bali ulikuwa wakati uliotumika katika kutazamia kwa hamu, maombi, na ibada. Ona Luka 11:9-13 — vitenzi vyote vitatu vi katika wakati uliopo unaoendelea — endeleeni kutafuta; endeleeni kuomba… naye atawapa Roho Mtakatifu.

Twaitwa kuja “tukiwa na mikono safi na moyo mweupe” kama twataka kuingia mbele za uso wake. Musa alitaka kuujua utukufu wa Mungu, kwa hiyo aliagizwa ajiandae kabla ya kujihudhurisha mbele za Bwana. (Ona Kutoka 34:2.)

Waefeso 5:15-21 unatuambia kwamba maisha yaliyojaa Roho hushuhudiwa kwa (a) moyo wa kuabudu (mst. 19); (b) moyo wa shukrani (mst. 20); (c) moyo wa utumishi (mst. 21). Labda twapasa kuzizoea tabia hizi kama utangulizi wa kupokea utimilifu ule.

Ee Mfariji, mpole na mwenye huruma; Ee hua mtakatifu wa mbinguni, nautoa moyo wangu kwa kujisalimisha, nangoja kuudhihirisha utimilifu wako. Nitie mafuta ya furaha na uponyaji, unibatize kwa nguvu kutoka juu; Ee njoo na utimilifu wako na muhuri wako, nikiwa nimeinama chini penye kiti cha miguu yako. — A B Simpson. “Mtu ajazwapo Roho, hulijua!” — A W Tozer. Ametuketisha pamoja naye (Baba) katika ulimwengu wa roho ndani yake Kristo Yesu. (2:6) Kuwa “umeketishwa” pamoja na Baba humaanisha kuwa umekoma juhudi zetu za kumpendeza. Ametukubali ndani ya Kristo, nasi sasa twaitwa kuingia katika “raha yake” (Waebrania 4:9). Twaweza kuikosa raha hii kwa kutokutii ule mwito wa imani — misukumo yake ndani yetu (Waebrania 4:11). “Kwa maana yeye aliyeingia katika raha yake, amestarehe mwenyewe katika kazi zake, kama vile Mungu alivyostarehe katika kazi zake” (Waebrania 4:10).

Mfano mzuri twapewa na matangatanga ya wana wa Israeli jangwani. Walikuwa wamekombolewa kutoka Misri pamoja na utumwa wake wote na wasimamizi wake wa kazi, nao wakaitwa kuingia Kanaani, nchi ya ahadi (za Mungu). Kwa sababu ya kutokuamini kwao, iliwapasa kutangatanga miaka 40 jangwani kabla ya hatimaye kuingia nchi ile chini ya Yoshua.

Misri huwakilisha maisha yetu bila Kristo — “mtu wa asili.” Jangwa huwakilisha “mtu wa mwilini” — anayeamini lakini hastarehi katika “ulimwengu wa roho” ndani ya Kristo. Amevuka Bahari ya Shamu ambapo wasimamizi wa kazi wa zamani walitengwa naye — mimi naliona hili kama kazi ya ubatizo wa maji (ona Wakolosai 2:11,12), lakini bado hajaingia katika makusudi ya Mungu kwake. Kanaani huwakilisha ahadi za Mungu, kutiwa muhuri kwa Roho Mtakatifu, na kuketishwa katika ulimwengu wa roho. Ni mahali pa majitu na pa kushinda (kwa Roho wake, si kwa juhudi zetu!), pa “maziwa na asali” na pa kula karamu pamoja naye. HAKUWAKILISHI mbingu wala uzima baada ya kufa — bali yapasa kuwa uzoefu wa waamini wote SASA.

Nabadilisha mapambano yangu kwa ushindi wake; udhaifu wangu kwa nguvu zake; matakwa yangu kwa mapenzi yake; ufahamu wangu kwa imani yake; mzigo wangu kwa nira yake.

“Nimesulubiwa pamoja na Kristo; wala si mimi tena ninayeishi, bali Kristo yu hai ndani yangu; na uhai nilio nao sasa katika mwili, ninao katika imani ya Mwana wa Mungu, aliyenipenda, akajitoa nafsi yake kwa ajili yangu.” (Wagalatia 2:20) Twapaswa kuelewa kwamba haya ni mapenzi ya Mungu kwako na kwangu. Twapaswa “kujihesabu” kuwa wafu kwa dhambi (Warumi 6:11) na walio hai kwa Mungu. Twapaswa kusitawisha “kukaa ndani ya Kristo” katika ulimwengu wa roho kwa ibada na kuabudu kwa ukawaida. Ni tukiisha kukaa ndani yake huko tu ndipo tuwezapo kushinda (kwa nguvu yake) nguvu zote za giza zilizo “chini ya miguu yake” (Waefeso 1:21,22). Dai nafasi yako katika ulimwengu wa roho sasa.

Ingawa kuwa “umeketishwa ndani ya Kristo” ni kweli ya kitheolojia, waamini wengi mno hawakai humo.

Yesu alisema, “Mkikaa ndani yangu…” akidokeza kwamba yamkini sana kutokufanya hivyo. Ukija nyumbani kwangu, waweza kusema kwa kweli, “Nimeketi nyumbani kwa Gareth,” lakini usipopokea mwaliko wangu wa kukaa pamoja nami, husingeweza kusema, “Nakaa nyumbani kwa Gareth”! Wale “wakaao” hushiriki meza yangu na faraja na ushirika iutoao.

Kwa wale wakaao ndani ya Kristo, Yesu ameahidi tunda la Roho linalokomaa: nguvu katika maombi na ukaribu wa ushirika. (Yohana 15:7-11) Ningependekeza kwamba hii pia ndiyo maana ya Isaya 40:31, ambapo neno la Kiebrania qavah (lililotafsiriwa “ngoja” katika KJV) lina maana ya msingi ya kuwa “umefungamana pamoja.” Je, umefungamana kwa uthabiti pamoja na Bwana; yaani, wakaa ndani yake? Ni wale walio hivyo peke yao wawezao “kupata nguvu mpya. Watapanda juu kwa mbawa kama tai. Watapiga mbio, wala hawatachoka; watakwenda kwa miguu, wala hawatazimia.”