Ndani Yake

Kitu cha pili tutakachokiondoa mezani ni msemo “Ndani Yake,” unaopatikana katika sura zote za 2 na 3. Na kwanza tuzingatie hadithi ya Agano la Kale ya safina ya Nuhu (Mwanzo 7). Mungu anauona uovu ulimwenguni naye amekusudia kuwaangamiza wanadamu wote isipokuwa mtu mmoja aliyeona neema machoni pake. Nuhu anaagizwa kujenga chombo kikubwa ambamo Mungu atawaweka wale wote atakaowaokoa kutokana na maangamizi ya gharika kuu. Nuhu ni mtii kwa amri hii, ijapokuwa hakuwa na fahamu yo yote ya gharika wala hakuwa na msaada, si kutoka kwa jamaa yake wala kutoka kwa jirani zake.

Ni lazima alionekana kama kitu cha ajabu kwao wote! Baada ya miaka mingi ya kazi, siku inafika chombo kilipokwisha kukamilika, na Mungu yu tayari kuitekeleza hukumu yake. Nuhu, mkewe, pamoja na wana wao na wake zao, wanaagizwa kuingia ndani ya safina, wakichukua pamoja nao jozi za kila mnyama wa ulimwengu wao walioujua. Kisha, Mungu anaufunga mlango, na mvua zinaanza kunyesha.

Zingatia hili: wokovu wa Nuhu ulitegemea kuingia kwake ndani ya safina. Hapakuwa na wokovu kama angebaki nje, akiistaajabia kazi yake!

Kwa kuitumia hadithi hii kama fumbo, hali kadhalika hakuna wokovu kwa mwanadamu ye yote ila aingie katika maandalizi ya Mungu ya njia ya kutokea — mtu yule Kristo Yesu. Wakati unafika ambapo ni lazima tuingie ndani yake kwa imani — imani iokoayo — kwa maana hukumu bila shaka itawajilia wote wanaojaribu kutafuta njia nyingine ya kumridhisha Mungu. Yesu alisema, “Mimi ndimi njia… hakuna njia ya kumfikia Baba ila kwa njia yangu.” (Yohana 14:6) Basi, Mungu anapotutazama, hutuona “ndani ya Mwanawe.” Twaweza kufurahi sana kwa kuwa haizingatii tena tabia yetu ya dhambi, kwa maana “Mwana ameingia machoni pake.” Hatia yetu na aibu yetu vimefungwa ndani yake. Mwana wa Adamu aliimwaga damu yake ya thamani ya uhai ili kuzifunika dhambi zetu, ili kutokeza lulu ya thamani kubwa kuliko zote (Mathayo 13:46). Haikutugharimu kitu; ilimgharimu yeye kila kitu.

Naelewa kwamba, katika siku za Biblia, lulu zilikuwa adimu sana, nazo bora kuliko zote zingetumika kama pambo kuu juu ya kaisari wa Kirumi. Ndivyo ilivyo kwamba ile “lulu ya thamani kubwa kuliko zote” sasa inasuguliwa na Roho Mtakatifu ili iwe pambo kwa ajili ya Mfalme wa wafalme atakaporudi kumchukua bibi-arusi wake, milki yake aliyoinunua, kwake mwenyewe.

Ndivyo ilivyo kwamba katika Waefeso 1 na 2 mtume Paulo anatuambia baadhi ya mapendeleo makuu tuliyo nayo kwa sababu tu ya kuwa “Ndani Yake.” Waefeso 1:3 unaonyesha kwamba Mungu ametubariki kwa baraka zote za rohoni katika ulimwengu wa roho ndani yake. Baraka kama hizo zi “katika ulimwengu wa roho,” lakini kwa masikitiko, wengi wetu twaishi nje ya ulimwengu huo! Ni zetu tu kadiri tunavyokaa ndani yake. Yamkini kuwa “ndani ya Kristo” bila kukaa ndani yake. Wengi wetu twahamahama kati ya kuishi maisha ya “ndani ya Kristo” na kuishi “katika ulimwengu.” Mara kadhaa, Yesu aliwaambia wafuasi wake maneno haya, “Mkikaa ndani yangu…” Hii ni kama kuwa na fedha nyingi zilizowekwa benki yetu lakini hatunufaiki nazo kamwe, tukiishi kama masikini!

Na tuzitafakari baadhi ya baraka hizi: Waefeso 1:4: Ndani yake tulichaguliwa ili tuwe watakatifu, wasio na hatia mbele zake.

Hili hutupa uwezo wa kumfikia Mungu. Hatukuchaguliwa kwa sababu ya sifa zo zote zetu wenyewe, bali kuchaguliwa kwetu ni “ndani yake.” Hakuna wokovu nje yake. Kusudi lake katika kuwa na watu “ndani ya Kristo” ni kwamba tupate kuwa watu waliotengwa, tofauti na ulimwengu unaotuzunguka, tena mashahidi kwao.

Waefeso 1:5: Katika upendo, tumekusudiwa tangu asili kuwa “wana” — warithi pamoja na Yesu wa utajiri wa Baba. Ataka kutufanya kama yeye mwenyewe ili tupate kuwa “kwa sifa ya utukufu wake.” Katika utamaduni wa Kiyahudi, kulikuwa na utaratibu mrefu kiasi wa kumtwaa mwana wa kupanga, lakini akiisha kutwaliwa, mwana huyo alikuwa na haki na mapendeleo yote ya mwana wa asili. Naam, hata zaidi! Baba angeweza sikuzote kumkana mwanawe wa asili, hata kumwua, lakini asingeweza kamwe kumkana wala kumwacha mwana aliyemtwaa!

Nalipenda neno hilo! Nafurahi kwamba, ingawa ni mwenye dhambi, nimeokolewa kwa neema; ni pendeleo kuwa mtumishi wake, nafurahi kuwa katika utumishi wake; lakini kuliko baraka zote, nafurahishwa kuwa mwanawe mwenye uwezo wa kumfikia Baba yangu! Yeye anastahili maisha yetu.

Je, kile unachoishi kwa ajili yake chastahili Kristo kukifia? Ubinadamu wa kilimwengu hutangaza kwamba mwanadamu yupo kwa faida ya mwanadamu; ubinadamu wa Kikristo hutangaza kwamba Mungu yupo kwa faida ya mwanadamu; Ukristo wa kweli hutangaza kwamba mwanadamu yupo kwa faida ya Mungu! (1 Wakorintho 8:6) — ili tupate kuwa “kwa sifa ya utukufu wake!”

“Mwana-Kondoo aliyechinjwa na apokee thawabu ya mateso yake” — kauli-mbiu ya Wamoravia.

Waefeso 1:6: Ametujalia neema — “ndani yake,” yeye mpendwa. NEEMA — Utajiri wa Mungu kwa Gharama ya Kristo!

Waefeso 1:7: Ndani yake tunao ukombozi — tumenunuliwa tena kutoka utumwani; msamaha ni kamili tena wa bure. Hii ni kwa sababu ya neema yake aliyotumiminia kwa wingi.

Waefeso 1:9-10: Siri — ijulikanayo kwa ufunuo tu — kwamba mwishoni mwa maongozi yote (vipindi), Mungu atavikusanya pamoja vitu vyote ndani ya Kristo — vilivyo mbinguni na vilivyo duniani. Uumbaji wote, malaika na malaika walioanguka, waliokombolewa na wasiokombolewa, watakuwa chini yake.

Mwanadamu wa tabia ya asili hawezi kupokea ufunuo kama huo — kwake ni upuzi. (1 Wakorintho 2:14) Waefeso 1:11: Tumepokea urithi ndani yake. Si kwa kuustahili wala kama thawabu! Ni wetu kwa sababu tu ya kuwa “ndani yake” na Mungu apendezwa kutubariki. Urithi ni haki itokanayo na uhusiano. Katika jambo hili, haki hiyo ni ya watoto wa Mungu kwa sababu utambulisho wao kuwa watoto wa Mungu kwa imani ndani ya Mwana wa Mungu wa milele umethibitishwa, tena umo katika kumbukumbu za mbinguni! Mtume alisema juu yetu: “Wanaume na wanawake hawawezi kufikiria wala hata kuota mambo yote ambayo Mungu amewaandalia wampendao!” (Tozer). Haya yote hufanywa ili tupate kuitikia “sifa ya utukufu wake.” Waefeso 1:13: Ndani yake tumetiwa “muhuri” kwa Roho Mtakatifu wa Ahadi. Nitalifafanua zaidi hili katika Sura ya 3.

Niseme tena: Utajiri huu wote ni wetu “ndani ya Kristo” — lakini ni lazima tuutwae uwe wetu wenyewe!

Hizi ni kweli za kitheolojia, lakini, kwa masikitiko, kwa waamini wengi, si kweli za uzoefu. Ni kama kuwa na utajiri mkubwa benki lakini tukiishi kama masikini kwa sababu hatuutolei mali yetu.

Yesu alisema kwamba “tukikaa ndani yake…” akionyesha kwamba yamkini sana kutokuwa “tukikaa” — tukiufurahia utajiri unaopatikana kwetu.

Paulo amechukuliwa sana na wazo hili hata analia kwa maombi yake mazuri kwa ajili yetu tupate kujua (kuonja) utajiri huu sasa. Hili laanzisha wimbo mwingine wa sifa ukisifu kwa shangwe fahari zilizotukuka za Yesu (mst. 20-23) na hadhi yetu ndani yake.

Kujitambulisha na Kristo (kuwa “ndani yake”) ni msisitizo mkuu wa Paulo. Twahesabiwa kuwa tumekufa “ndani yake” na tumefufuka “ndani yake” (Warumi 6:11). Hilo lahesabiwa kwetu ili Baba sasa atuone tu kuwa “ndani yake.” Haioni dhambi yetu, kwa maana MWANA ameingia machoni pake!! Tulitambulishwa na Adamu kuwa “kichwa chetu cha uwakilishi” nasi tukawa wenye dhambi kwa dhambi yake ya kutokutii.

Lakini, “Adamu” wa pili alikuja kuwa kichwa cha uwakilishi cha jamii mpya ya watu — wale aliowakomboa kwa damu yake aliyoimwaga na kwa ufufuo wake. (Ona Warumi 5.) Dhana hii ya kujitambulisha ni ya kawaida katika fikira za Kiyahudi, kinyume na uhuru wetu binafsi.

Sura ya 1:20-23: Mungu amemtukuza Yesu juu sana kuliko ufalme wote, na mamlaka, na nguvu, na usultani — haya ni majina ya viumbe vya kimalaika vinavyotambulika, vyema na viovu vile vile. Yeye yu juu yao wote wala hawezi kushindwa nao. Walishindwa msalabani miaka 2000 iliyopita, alipowafanya kuwa mkogo waziwazi.

Wakolosai 2:15.

Sura ya 2:1-6: Nikikaa ndani yake, nami nimeketishwa juu ya falme na mamlaka. Haziwezi kunidhuru ila nikiruhusu ulinzi wangu ulegee, ngao yangu ianguke, nayo mishale ya yule mwovu iupenye ulinzi wangu dhaifu. Tulikuwa wafu tulipoenenda kwa kufuata mambo ya ulimwengu huu. Lakini Mungu, aliye tajiri wa rehema na upendo, ametufufua na kutuketisha katika ulimwengu wa roho ndani yake Kristo Yesu! Sasa hivi!