Mwili kwa ajili ya Bwana

1 Wakorintho 6:13 Mmojawapo wa wanateolojia waliojifunza sana amesema kwamba umbile la mwili ndilo lengo la njia za Mungu. Kama tulivyokwisha kuona, hili ndilo hasa Mungu alilolitimiza katika kumwumba mwanadamu. Ni jambo hili linalowafanya wakaao mbinguni kustaajabu na kuvutiwa wanapoutafakari utukufu wa Mwana. Akiwa amevikwa mwili wa kibinadamu, Yesu ameketi milele juu ya kiti cha enzi cha Mungu, ili ashiriki utukufu wake. Ni hili Mungu alilolikusudia. Litatambulikana katika siku ile ambapo wanadamu waliozaliwa upya, wakiuunda mwili wa Kristo, watakuwa kwa kweli na kwa kuonekana hekalu la Mungu aliye hai (2 Wakorintho 6:16), na wakati viumbe vyote katika mbingu mpya na nchi mpya vitakaposhiriki utukufu wa watoto wa Mungu. Ndipo mwili wa kimwili utakapotakaswa kabisa, ukitukuzwa na Roho; na mwili huu, uliofanywa wa kiroho hivyo, utakuwa utukufu ulio juu kabisa wa Bwana Yesu Kristo na wa waliokombolewa wake.

Ni kwa kutazamia hali hii mpya ya mambo ndipo Bwana anavyotia maanani sana kukaa kwa Roho wake ndani ya miili yetu na utakaso wake, hapa duniani. Ukweli huu unaeleweka kidogo mno na waaminio hata wanavyoutafuta zaidi kidogo uwezo wa Roho Mtakatifu katika miili yao. Tena wengi wao, wakiamini kwamba mwili huu ni mali yao, wauutumia kama wapendavyo. Wasipofahamu jinsi utakaso wa nafsi na roho unavyoutegemea mwili, hawaufahamu maana yote ya maneno haya, “Mwili ni kwa ajili ya Bwana,” hata wayapokee kwa utii.

“Mwili ni kwa ajili ya Bwana.” Maana yake nini? Mtume amekwisha kusema, “Vyakula ni kwa tumbo, na tumbo ni kwa vyakula; lakini Mungu atavyaharibu hivi na hilo.” Kula na kunywa humpa Mkristo nafasi ya kuutekeleza ukweli huu, “Mwili ni kwa ajili ya Bwana.” Kwa kweli yampasa ajifunze kula na kunywa kwa utukufu wa Mungu. Kwa kula, dhambi na Anguko vilitokea. Tena ni kwa njia ya kula ndipo shetani alipotaka kumjaribu Bwana wetu. Hivyo Yesu mwenyewe aliutakasa mwili wake kwa kula kadiri ya mapenzi ya Baba yake tu (Mathayo 4:4). Waaminio wengi hushindwa kuilinda miili yao—hushindwa kushika kiasi kitakatifu ili wasiifanye miili yao isiyofaa kwa utumishi wa Mungu. Kula na kunywa kamwe kusizuie ushirika na Mungu; badala yake, kusudi lake ni kurahisisha ushirika kwa kuudumisha mwili katika hali yake ya kawaida.

Mtume anena pia juu ya uasherati, dhambi hii iuchafuayo mwili, nayo iko kinyume cha moja kwa moja na maneno haya, “Mwili ni kwa ajili ya Bwana.” Si kutokuwa na kiasi nje ya hali ya ndoa tu, bali katika hali hiyo pia, ndiko kunakomaanishwa hapa; kila ufisadi, kila kukosa kiasi cha namna yo yote kunahukumiwa katika maneno haya: “Mwili wenu ni hekalu la Roho Mtakatifu” (1 Wakorintho 6:19). Vivyo hivyo, yote yanayohitajika kuudumisha mwili—kuuvika, kuutia nguvu, kuupumzisha usingizini, au kuufurahisha—yapaswa kuwekwa chini ya uongozi wa Roho Mtakatifu. Kama vile chini ya Agano la Kale, hekalu lilijengwa kwa ajili ya Mungu peke yake, na kwa utumishi wake, kadhalika mwili wetu umeumbwa kwa ajili ya Bwana na kwa ajili yake peke yake.

Basi mojawapo ya faida kuu za uponyaji wa kimungu itakuwa ni kutufundisha kwamba mwili wetu wapaswa kuwekwa huru kutoka nira ya mapenzi yetu wenyewe ili uwe mali ya Bwana. Mungu hauponyi kwa kujibu maombi yetu mpaka afikie lile lengo ambalo kwa ajili yake ameuruhusu ugonjwa. Yeye anataka nidhamu hii ituingize katika ushirika wa ndani zaidi naye; angetaka atufanye tufahamu kwamba tumeuhesabu mwili wetu kuwa mali yetu wenyewe, hali ulikuwa ni wa Bwana; na kwamba Roho Mtakatifu anatafuta kuyatakasa matendo yake yote. Anatuongoza tufahamu kwamba tukiutoa mwili wetu bila kizuizi kwa uvutano wa Roho Mtakatifu, tutauonja uwezo wake ndani yetu, naye atatuponya kwa kuuingiza katika mwili wetu uhai wenyewe wa Yesu; kwa kifupi, anatuongoza tuseme kwa hakika kamili, “Mwili ni kwa ajili ya Bwana.”

Kuna waaminio wanaoutafuta utakatifu, lakini kwa ajili ya nafsi na roho tu. Katika ujinga wao husahau kwamba mwili na mifumo yake yote ya mishipa ya fahamu—kwamba mkono, sikio, macho, kinywa—vinaitwa kushuhudia moja kwa moja kuwako kwa Mungu na neema yake ndani yao. Hawajayapokea vya kutosha maneno haya: “Miili yenu ni viungo vya Kristo.” “Kama mkiyafisha matendo ya mwili kwa Roho, mtaishi” (1 Wakorintho 6:15; Warumi 8:13, R.V., pembezoni). “Mungu wa amani mwenyewe awatakase kabisa; nayo roho yenu, na nafsi yenu, na mwili wenu, vihifadhiwe mkiwa kamili, bila lawama, wakati wa kuja kwake Bwana wetu Yesu Kristo” (1 Wathesalonike 5:23, R.V.). Ee, ni upya ulioje unaotokea ndani yetu wakati, kwa kuugusa kwake mwenyewe, Bwana anaponya miili yetu, anapoimiliki, na anapofanyika kwa Roho wake kuwa uhai na afya kwayo! Ni kwa hisia isiyoelezeka ya utakatifu, ya hofu na ya furaha ndipo mwaminio aweza kuutoa mwili wake dhabihu iliyo hai ili apokee uponyaji, na kuwa na maneno haya kuwa kauli-mbiu yake: “Mwili ni kwa ajili ya Bwana.”