Bwana kwa Ajili ya Mwili

1 Wakorintho 6:13 Kuna kulipiana katika mahusiano ya Mungu na mwanadamu. Kile ambacho Mungu amekuwa kwangu, nami napaswa kuwa hivyo kwake. Na kile nilicho kwake, yeye ataka tena kuwa hivyo kwangu. Ikiwa, katika upendo wake, anajitoa kwangu kwa ukamilifu, ni ili nami kwa upendo nijitoe kwake kwa ukamilifu. Kwa kadiri nimjisalimishayo kwake kikweli nafsi yangu yote, kwa kadiri iyo hiyo naye hujitoa kwangu kwa uhakika zaidi. Hivyo Mungu humwongoza mwaminio afahamu kwamba kujisalimisha huku kwake kwahusu mwili pia, na kadiri maisha yetu yashuhudiavyo kwamba mwili ni kwa ajili ya Bwana, ndivyo pia tuzidivyo kuonja kwamba Bwana ni kwa ajili ya mwili. Kwa kusema, “Mwili ni kwa ajili ya Bwana,” twaonyesha shauku ya kuuona mwili wetu kuwa umewekwa wakfu kabisa, umetolewa dhabihu kwa Bwana, na umetakaswa naye. Kwa kusema, “Bwana ni kwa ajili ya mwili,” twaonyesha uhakika ule wa thamani kwamba sadaka yetu imekubaliwa, na kwamba, kwa Roho wake, Bwana atauvika mwili wetu nguvu na utakatifu wake mwenyewe, na kwamba tokea sasa atatutia nguvu na kutuhifadhi.

Hili ni jambo la imani. Mwili wetu ni wa mavumbi, dhaifu, hafifu, wenye dhambi, na wa kufa. Kwa hiyo ni vigumu kuufahamu mara moja ukubwa wote wa maneno haya, “Bwana ni kwa ajili ya mwili.” Ni Neno la Mungu ndilo litueleezalo jinsi ya kulipokea jambo hili. Mwili uliumbwa na Bwana na kwa ajili ya Bwana. Yesu alijitwalia mwili wa kidunia. Katika mwili wake alizichukua dhambi zetu msalabani, na kwa njia hiyo akauweka huru mwili wetu kutoka nguvu za dhambi. Katika Kristo mwili umefufuliwa tena, na kuketishwa katika kiti cha enzi cha Mungu. Mwili ni maskani ya Roho Mtakatifu; umeitwa kwa ushirika wa milele katika utukufu wa mbinguni. Kwa hiyo, kwa uhakika, na kwa maana pana na ya jumla, twaweza kusema, “Naam, Bwana Yesu, Mwokozi wetu, ni kwa ajili ya mwili.” Kweli hii ina matumizi mengi. Kwanza, ni msaada mkuu katika utakatifu wa matendo. Zaidi ya dhambi moja hupata nguvu zake kutokana na mwelekeo fulani wa mwili. Mlevi aliyeongoka huchukia sana vileo, lakini, pamoja na hayo, tamaa zake nyakati nyingine humtega, zikishinda maazimio yake mapya. Lakini kama, katika vita hivyo, akiukabidhi mwili wake kwa Bwana kwa kutumaini, kila tamaa ya mwili, kila shauku ya kunywa itashindwa. Tabia yetu pia mara nyingi hutokana na umbile la mwili wetu. Mfumo wenye msisimko na hasira wenye kero huzaa maneno makali, magumu, na yaliyopungukiwa na upendo. Lakini mwili wenye mwelekeo huu wa mwili na upelekwe kwa Bwana, na hima itaonwa kwamba Roho Mtakatifu aweza kuufisha mwinuko wa kutokuvumilia, na kuutakasa mwili, akiufanya usio na lawama.

Maneno haya, “Bwana ni kwa ajili ya mwili,” yahusu pia nguvu za mwili ambazo utumishi wa Bwana watudai. Daudi aliapo, “Ndiye Mungu anifungaye nguvu,” amaanisha nguvu za mwili, kwa maana aongeza: “Huifanya miguu yangu kuwa kama ya kulungu... mikono yangu ikaupinda upinde wa shaba” (Zaburi 18:33, 34). Tena katika maneno haya: “Bwana ndiye nguvu za uzima wangu” (Zaburi 27:1), hayamaanishi mtu wa rohoni tu bali mtu mzima. Waaminio wengi wameonja kwamba ahadi hii, “Wale wamngojao Bwana watapata nguvu mpya” (Isaya 40:31), yaugusa mwili, na kwamba Roho Mtakatifu huziongeza nguvu za mwili.

Lakini ni katika uponyaji wa kimungu hasa ndipo tuionapo kweli ya maneno haya: “Bwana ni kwa ajili ya mwili.” Naam, Yesu, Mponyaji mwenye enzi na rehema, siku zote yu tayari kuokoa na kuponya. Kulikuwa na msichana mmoja huko Uswisi, miaka kadhaa iliyopita, aliyekuwa na kifua kikuu na karibu na kufa. Tabibu alikuwa amemshauri aende mahali penye hali ya hewa nyororo, lakini alikuwa dhaifu mno kuweza kusafiri. Alijifunza kwamba Yesu ndiye Mponyaji wa wagonjwa. Aliziamini habari njema, na usiku mmoja alipokuwa akiwaza juu ya jambo hili ikamwonekana kama mwili wa Bwana wamsogelea, na kwamba imempasa kuyatwaa maneno haya kama yalivyo, “Mwili wake kwa ajili ya mwili wetu.” Tokea wakati huo akaanza kupata nafuu. Baada ya muda akaanza kuongoza masomo ya Biblia, na baadaye akawa mtenda kazi mwenye bidii na aliyebarikiwa sana kwa ajili ya Bwana kati ya wanawake. Alikuwa amejifunza kufahamu kwamba Bwana ni kwa ajili ya mwili.

Ewe mgonjwa mpendwa, Bwana amekuonyesha kwa ugonjwa jinsi dhambi ilivyo na nguvu juu ya mwili. Kwa uponyaji wako angependa pia kukuonyesha nguvu ya ukombozi wa mwili. Anakuita uonyeshe kile ambacho hukukielewa hata sasa, kwamba “mwili ni kwa ajili ya Bwana.” Kwa hiyo mpe yeye mwili wako. Mpe pamoja na ugonjwa wako na pamoja na dhambi, ambayo ndiyo chanzo cha kwanza cha ugonjwa. Amini sikuzote kwamba Bwana ameutwaa mwili huu, naye atadhihirisha kwa nguvu kwamba yeye kweli ndiye Bwana, aliye kwa ajili ya mwili. Bwana, aliyejitwalia mwenyewe mwili hapa duniani na kuufanya upya, kutoka mbingu zilizo juu, aliko sasa, akiwa amevikwa mwili wake uliotukuzwa, atutumia nguvu zake za kimungu, akitaka hivyo kudhihirisha uweza wake katika mwili wetu.