Mwili Wenu Ni Hekalu la Roho Mtakatifu

1 Wakorintho 6:15, 19, 20 Biblia inatufundisha ya kwamba Mwili wa Kristo ni jamii ya waaminio. Maneno haya kwa kawaida huchukuliwa katika maana yake ya kiroho, hali Biblia ikituuliza waziwazi kama hatujui ya kuwa miili yetu ni viungo vya Kristo. Vivyo hivyo, Biblia inapunena juu ya kukaa ndani kwa Roho Mtakatifu au kwa Kristo, sisi hupunguza uwepo Wao kwenye sehemu ya kiroho ya utu wetu—nafsi yetu, au moyo wetu. Walakini Biblia inasema wazi, “Hamjui ya kuwa mwili wenu ni hekalu la Roho Mtakatifu?” Kanisa litakapofahamu ya kuwa mwili nao una sehemu katika ukombozi ulio kwa njia ya Kristo, ambao kwao unapaswa kurudishwa kwenye kusudi lake la asili, kuwa maskani ya Roho Mtakatifu, kutumika kama chombo Chake, kutakaswa kwa uwepo Wake, ndipo litakapotambua pia nafasi yote iliyo nayo uponyaji wa kimungu katika Biblia na katika mashauri ya Mungu.

Habari ya uumbaji inatuambia ya kuwa mwanadamu ameundwa kwa sehemu tatu. Kwanza Mungu aliuumba mwili kutoka mavumbi ya ardhi, kisha akapuliza ndani yake “pumzi ya uhai.” Alifanya uhai Wake mwenyewe, Roho Wake, uingie ndani yake. Kwa muungano huu wa Roho na maada, mwanadamu akawa “nafsi hai.” Nafsi, ambayo kwa hakika ndiyo mwanadamu mwenyewe, hupata mahali pake kati ya mwili na roho; ndiyo kifungo kiwafungacho pamoja. Kwa njia ya mwili, nafsi hujikuta ikiwa katika uhusiano na ulimwengu wa nje; kwa njia ya roho, na ulimwengu usioonekana na Mungu. Kwa njia ya nafsi, roho yaweza kuutiisha mwili chini ya utendaji wa nguvu za mbinguni na hivyo kuufanya wa kiroho; kwa njia ya nafsi, mwili nao waweza kutenda juu ya roho na kuivuta kuelekea nchi. Nafsi, iliyo chini ya misukumo ya roho na mwili pia, yamo katika hali ya kuchagua kati ya sauti ya Mungu, inenayo kwa njia ya Roho, au sauti ya ulimwengu, inenayo kwa njia ya hisia.

Muungano huu wa roho na mwili huunda mseto ambao ni wa pekee katika uumbaji; humfanya mwanadamu kuwa johari ya kazi ya Mungu. Viumbe vingine vilikuwako tayari; vingine, kama malaika, vilikuwa roho tupu, bila mwili wa maada wowote, na vingine, kama wanyama, vilikuwa mwili tu, vikiwa na mwili uliohuishwa kwa nafsi hai, lakini pasipo roho. Mwanadamu aliwekwa kusudi ili aonyeshe ya kuwa mwili wa maada, unaotawaliwa na roho, waweza kugeuzwa kwa nguvu za Roho wa Mungu, na hivyo kuongozwa kushiriki utukufu wa mbinguni.

Twajua dhambi na Shetani wamefanya nini na uwezekano huu wa mageuzi ya taratibu. Kwa njia ya mwili, roho ilijaribiwa, ikashawishiwa, na ikawa mtumwa wa hisia. Twajua pia Mungu amefanya nini ili kuiharibu kazi ya Shetani na kutimiza kusudi la uumbaji. “Mwana wa Mungu alidhihirishwa, ili azivunje kazi za Ibilisi” (1 Yohana 3:8). Mungu alimwandalia Mwanawe mwili (Waebrania 10:5). “Neno alifanyika mwili” (Yohana 1:14). “Ndani yake unakaa utimilifu wote wa Uungu kwa jinsi ya kimwili” (Wakolosai 2:9). “Yeye mwenyewe alizichukua dhambi zetu katika mwili wake juu ya mti” (1 Petro 2:24). Na sasa Yesu, aliyefufuliwa katika wafu akiwa na mwili usio na dhambi kama vile roho Yake na nafsi Yake, huupa mwili wetu nguvu za mwili Wake uliotukuzwa. Meza ya Bwana ni “ushirika wa mwili wa Kristo”; na miili yetu ni “viungo vya Kristo” (1 Wakorintho 10:16; 6:15; 12:27).

Imani hutuweka katika kumiliki yote ambayo mauti ya Kristo na ufufuo Wake vimetupatia, wala si katika roho yetu na nafsi yetu tu ndipo uhai wa Yesu aliyefufuka unadhihirisha uwepo wake hapa duniani; ni katika mwili pia ambamo ungetenda kwa kadiri ya imani yetu.

“Hamjui ya kuwa mwili wenu ni hekalu la Roho Mtakatifu?” Waaminio wengi hujiwazia ya kuwa Roho Mtakatifu huja kukaa ndani ya mwili wetu kama sisi tunavyokaa nyumbani. Sivyo hata kidogo. Naweza kukaa katika nyumba pasipo kuwa sehemu ya utu wangu. Naweza kuiacha bila kuteseka; hakuna muungano wa uhai uliopo kati ya nyumba yangu na mimi. Sivyo ilivyo kwa uwepo wa nafsi na roho yetu ndani ya mwili wetu. Uhai wa mmea hukaa na kuenea katika kila sehemu yake; na nafsi yetu haizuiliwi kukaa katika sehemu fulani ya mwili, kwa mfano moyoni au kichwani, bali huingia mwili mzima, hata mpaka ncha ya viungo vilivyo chini kabisa. Uhai wa nafsi huenea katika mwili wote; uhai ulioenea kila mahali huthibitisha uwepo wa nafsi. Ni kwa jinsi iyo hiyo ambavyo Roho Mtakatifu huja kukaa ndani ya mwili wetu. Huingia utimilifu wake wote. Hutuhuisha na kutumiliki kwa kiasi kikubwa kupita tuwezavyo kuwaza.

Kwa jinsi iyo hiyo ambavyo Roho Mtakatifu huileta nafsini na rohoni mwetu uhai wa Yesu, utakatifu Wake, furaha Yake, nguvu Zake, huja pia kuukirimu mwili wenye ugonjwa uhai wote wenye nguvu wa Kristo mara tu mkono wa imani unaponyoshwa ili kuupokea.

Mwili unapotiishwa kikamilifu kwa Kristo, ukiwa umesulubiwa pamoja Naye, ukikataa nia yote ya kujitakia na kujitegemea, usikitamani cho chote ila kuwa hekalu la Bwana, ndipo Roho Mtakatifu anapoidhihirisha nguvu ya Mwokozi aliyefufuka ndani ya mwili. Ndipo tu tuwezapo kumtukuza Mungu katika mwili wetu, tukimwachia uhuru kamili wa kuidhihirisha ndani yake nguvu Yake, ili kuonyesha ya kuwa ajua jinsi ya kuliweka huru hekalu Lake kutoka katika utawala wa ugonjwa, dhambi, na Shetani.