Njia ya Imani

“Mara babaye yule mtoto akalia kwa machozi, akisema, Ee Bwana, naamini; nisaidie kutokuamini kwangu!” (Marko 9:24).

Maneno haya yamekuwa msaada na nguvu kwa maelfu ya roho katika kuutafuta kwao wokovu na karama za Mungu. Angalia kwamba yalinenwa kuhusu mtoto aliyeteswa, katika vita vya imani wakati wa kutafuta uponyaji kwa Bwana Yesu. Ndani yake twaona ya kuwa katika roho ile ile moja waweza kutokea mapambano kati ya imani na kutokuamini, na ya kuwa si pasipo mapambano tunapofikia kumwamini Yesu na uweza wake wote wa kuwaponya wagonjwa. Katika hili twapata kitia-moyo kinachohitajiwa cha kuutambua uweza wa Mwokozi.

Hapa nasema hasa na wale wanaoteseka ambao hawana shaka juu ya uweza wala nia ya Bwana Yesu ya kuponya siku hizi pasipo kutumia dawa za dunia, lakini wanaopungukiwa na ujasiri wa kukubali uponyaji kwa nafsi zao. Wanauamini uweza wa kimungu wa Kristo, wanaamini kwa jumla nia yake njema ya kuponya; wamejipatia, ama kwa Maandiko, ama kwa matukio ya uponyaji yaliyofanywa na Bwana peke yake katika siku zetu, hakika ya akilini ya kwamba Bwana aweza kuwasaidia hata wao, lakini hujirudisha nyuma wasikubali uponyaji, wala wasiseme kwa imani, “Bwana amenisikia, najua ya kuwa ananiponya.”

Kwanza angalia ya kuwa pasipo imani hakuna awezaye kuponywa. Babaye yule mtoto aliyeteswa alipomwambia Yesu, “Ukiweza neno lo lote, utuhurumie, ukatusaidie,” Yesu akajibu: “Ukiweza wewe kuamini.” Yesu alikuwa na uweza wa kuponya, naye alikuwa tayari kuufanya, lakini anamtwika mtu huyo daraka. “Ukiweza! Yote yawezekana kwake aaminiye” (R.V.). Ili upate uponyaji wako kwa Yesu, haitoshi kuomba tu. Maombi pasipo imani hayana nguvu. Ni “maombi ya imani” yanayomwokoa mgonjwa (Yakobo 5:15). Ikiwa umekwisha kumwomba Bwana uponyaji, au ikiwa wengine wamekuombea, ni lazima, kabla hujatambua badiliko lo lote, uweze kusema kwa imani, “Kwa mamlaka ya Neno la Mungu nina hakika ya kuwa ananisikia na ya kuwa nitaponywa.” Kuwa na imani, kwako wewe, maana yake ni kuukabidhi mwili wako kabisa mikononi mwa Bwana, na kujiacha mzima kwake. Imani hupokea uponyaji kama neema ya kiroho itokayo kwa Bwana hata wakati hakuna badiliko linaloonekana mwilini. Imani yaweza kumtukuza Mungu na kusema, “Ee nafsi yangu, umhimidi BWANA . . . akuponya magonjwa yako yote” (Zaburi 103:1-3). Bwana ahitaji imani hii ili apate kuponya.

Lakini imani kama hiyo yapatikanaje? Mwambie Mungu wako kutokuamini kule uonako moyoni mwako, umtegemee yeye kwa kuokolewa nako. Imani si fedha ambayo kwayo uponyaji wako waweza kununuliwa kwa Bwana. Ni yeye anayetaka kuiamsha na kuikuza ndani yako imani inayohitajiwa. “Nisaidie kutokuamini kwangu,” alilia babaye yule mtoto.

Ilikuwa shauku yake kuu ya kwamba imani yake isipungue. Mungamie Bwana ugumu wote ulio nao wa kumwamini kwa msingi wa Neno lake; mwambie ya kuwa wataka kuondolewa kutokuamini huku, ya kuwa waileta kwake ukiwa na nia ya kusikiliza Neno lake peke yake. Usipoteze wakati kwa kuomboleza kutokuamini kwako, bali umtazame Yesu. Nuru ya uso wake itakuwezesha kupata nguvu za kumwamini (Zaburi 44:3). Anakuita umtumaini; msikilize, na kwa neema yake imani itashinda ndani yako. Mwambie, “Bwana, bado natambua kutokuamini kulikomo ndani yangu. Naona vigumu kuamini ya kuwa nina hakika ya uponyaji wangu kwa sababu ninaye yeye aufanyaye. Lakini, pamoja na hayo, nataka kukushinda kutokuamini huku. Wewe, Bwana, utanipa ushindi. Nataka kuamini, nitaamini, kwa neema yako nathubutu kusema naweza kuamini. Naam, Bwana, naamini, kwa kuwa waja kunisaidia kutokuamini kwangu.” Ni tunapokuwa katika ushirika wa ndani na Bwana, na moyo wetu unapomwitikia yeye, ndipo kutokuamini kunashindwa na kutiishwa.

Tena ni lazima kuishuhudia imani aliyo nayo mtu. Kusudia kuamini yale Bwana akuambiayo, kuamini, zaidi ya yote, yale alivyo yeye. Utegemee ahadi zake kabisa. “Kule kuomba kwa imani kutamwokoa mgonjwa.” “Mimi ndimi BWANA nikuponyaye” (Kutoka 15:26). Mtazame Yesu, aliye “yachukua magonjwa yetu” (Mathayo 8:17), naye aliwaponya wote waliomjia; mtegemee Roho Mtakatifu adhihirishe moyoni mwako uwepo wa Yesu ambaye sasa yumo pia mbinguni, na kutenda pia mwilini mwako uweza wa neema yake. Msifu Bwana bila kungoja kujisikia afadhali, au kuwa na imani zaidi. Msifu, na useme pamoja na Daudi, “Ee BWANA, Mungu wangu, nalikulilia, ukaniponya” (Zaburi 30:2). Uponyaji wa kimungu ni neema ya kiroho iwezayo kupokewa kwa njia ya kiroho na kwa imani tu, kabla ya kuhisi matokeo yake mwilini. Basi, ukubali, umpe Mungu utukufu. Bwana Yesu alipokwisha kuiamuru ile roho mchafu imtoke yule mtoto, ilimrarua sana, hata akawa kama mtu aliyekufa, kiasi kwamba wengi wakasema, “Amekufa.” Basi, ikiwa ugonjwa wako hautoi mara moja, ikiwa Shetani na kutokuamini kwako kwenyewe vyajaribu kushinda, usivijali, ambatana sana na Yesu Mponyaji wako, naye hakika atakuponya.