Kwa Kadiri ya Imani

“Yesu akamwambia yule akida, Enenda zako; na iwe kwako kama ulivyoamini. Na mtumishi wake akapona saa ile ile” (Mathayo 8:13).

Fungu hili la Maandiko latuwekea mbele yetu mojawapo ya sheria kuu za ufalme wa mbinguni. Ili kuzielewa njia za Mungu kwa watu wake, na uhusiano wetu na Bwana, yatupasa kuielewa sheria hii kwa ukamilifu, wala tusipotoke nayo. Mungu hatoi tu wala kuzuia karama zake kwa kadiri ya imani au kutokuamini kwa kila mmoja, bali hupewa kwa kipimo kikubwa au kidogo, kwa kadiri ile ile ya imani izipokeayo. Mungu huiheshimu haki ya kuamua aliyompa mwanadamu. Kwa hiyo aweza kutubariki tu kwa kadiri ile kila mmoja ajitoapo kwa kazi yake ya kimungu, na kuufungua moyo wake wote kwake. Imani katika Mungu si kitu kingine ila kuufungua moyo kabisa upate kupokea kila kitu kutoka kwa Mungu; kwa hiyo mwanadamu aweza kupokea neema ya kimungu kwa kadiri ya imani yake tu; na jambo hili lahusu uponyaji wa kimungu kama lihusuvyo neema nyingine yoyote ya Mungu.

Kweli hii yathibitishwa na baraka za kiroho ziwezazo kutokana na ugonjwa. Mara nyingi maswali mawili huulizwa: (1) Je! si mapenzi ya Mungu kwamba watoto wake nyakati nyingine wakae katika hali ya ugonjwa wa muda mrefu? (2) Kwa kuwa ni jambo linalokubalika kwamba uponyaji wa kimungu huleta baraka ya kiroho iliyo kuu kuliko ugonjwa wenyewe, kwa nini Mungu huwaacha baadhi ya watoto wake waendelee kuwa wagonjwa kwa miaka mingi, na hali wakiwa katika hali hii huwapa baraka katika utakaso, na katika ushirika naye mwenyewe? Jibu la maswali haya mawili ni kwamba Mungu huwapa watoto wake kwa kadiri ya imani yao. Tumekwisha kuwa na nafasi ya kutaja kwamba kwa kadiri ile ile Kanisa lilivyozidi kuwa la kidunia, imani yake katika uponyaji wa kimungu imepungua hata mwishowe imetoweka. Waaminio hawaonekani kufahamu kwamba waweza kumwomba Mungu awaponye magonjwa yao, na kwamba kwa njia hiyo waweza kutakaswa na kufaa kwa utumishi wake. Wamekuja kutafuta kunyenyekea mapenzi yake tu, na kuuhesabu ugonjwa kuwa njia ya kujitenga na ulimwengu. Katika hali kama hizo Bwana huwapa kile waombacho. Angalikuwa tayari kuwapa hata zaidi, kuwajalia uponyaji kwa jibu la maombi ya imani, lakini walikosa imani ya kuupokea. Mungu sikuzote huwakuta watoto wake mahali walipo, hata wawe dhaifu kiasi gani. Basi wagonjwa, walioutamani kumpokea kwa moyo wao wote, watakuwa wamepokea kutoka kwake tunda la ugonjwa katika shauku yao kwamba mapenzi yao yapatane na mapenzi ya Mungu. Wangaliweza kupokea uponyaji pia, kuwa ushahidi kwamba Mungu aliukubali unyenyekevu wao; kama haikuwa hivyo, ni kwa sababu imani iliwapungukia ya kuuomba.

“Na iwe kwako kama ulivyoamini.” Maneno haya yatoa jibu la swali jingine tena: Wawezaje kusema kwamba uponyaji wa kimungu waleta baraka nyingi za kiroho, hali mtu aonapo kwamba wengi wa wale walioponywa na Bwana Yesu hawakupokea zaidi ya kuokolewa katika mateso yao ya wakati ule, pasipo kutoa ushahidi wowote kwamba walikuwa wamebarikiwa kiroho pia? Hapa tena, kama walivyoamini, ndivyo walivyotendewa.

Wagonjwa wengi kwa kadiri, walipoona uponyaji wa wengine, walipata tumaini katika Yesu kiasi cha kutosha tu wapate kuponywa, naye Yesu akawajalia haja yao, pasipo kuongeza baraka nyingine kwa nafsi zao. Kabla ya kupaa kwake Bwana hakuwa na njia ya kuingia moyoni mwa mwanadamu kwa uhuru kama alivyo nao sasa, kwa sababu “Roho Mtakatifu alikuwa hajatolewa bado” (Yohana 7:39). Wakati ule uponyaji wa wagonjwa haukupita kuwa baraka ya mwili tu. Ni baadaye tu, katika kipindi cha Roho, ambapo kuhukumiwa na kuungama dhambi kumekuwa kwa mwamini neema ya kwanza ya kupokewa, sharti la lazima la kupata uponyaji, kama Mtakatifu Paulo atuambiavyo katika Waraka wake kwa Wakorintho, na Yakobo katika waraka wake kwa yale makabila kumi na mawili yaliyotawanyika (1 Wakorintho 11:31, 32; Yakobo 5:16). Basi kiwango cha neema ya kiroho tuwezacho kupokea chategemea kipimo cha imani yetu, kwamba iwe kwa dhihirisho lake la nje, au hasa kwa uvutano wake juu ya maisha yetu ya ndani.

Twamshauri kila mtu ateswaye anayetafuta uponyaji, na atakaye kumjua Yesu kuwa Mponyaji wake wa kimungu, asikubali kuzuiwa na kutokuamini kwake, asiziangie shaka ahadi za Mungu, na hivyo awe “hodari katika imani, akimtukuza Mungu” kama impasavyo. “Na iwe kwako kama ulivyoamini.” Kama ukimtumaini Mungu aliye hai kwa moyo wako wote utabarikiwa tele; usilitilie shaka.

Sehemu ya imani sikuzote ni kukamata lile lionekanalo kuwa lisilowezekana au geni machoni pa wanadamu. Na tuwe tayari kuhesabiwa kuwa wapumbavu kwa ajili ya Kristo (1 Wakorintho 4:10). Tusiogope kudhaniwa kuwa dhaifu wa akili machoni pa ulimwengu na pa Wakristo wale wasioyajua mambo haya, kwa sababu, kwa mamlaka ya Neno la Mungu, twaamini lile ambalo wengine hawawezi bado kulikubali. Basi usikubali kukata tamaa katika kutarajia kwako hata ijapokuwa Mungu achelewe kukujibu, au ugonjwa wako uzidi kuwa mbaya. Ukiisha kuuweka mguu wako imara juu ya mwamba usiotikisika wa Neno la Mungu mwenyewe, na ukiisha kumwomba Bwana adhihirishe uweza wake wote katika mwili wako kwa kuwa u mmoja wa viungo vya Mwili wake, na hekalu la Roho Mtakatifu, dumu katika kumwamini kwa uhakika thabiti ya kwamba amejitwika kwa ajili yako, ya kwamba amejifanya kuwa na daraka juu ya mwili wako, na ya kwamba nguvu zake za uponyaji zitakuja kumtukuza yeye ndani yako.