Yesu na Waganga

Marko 5:25-34 Twaweza kumshukuru Mungu kwa kutupa waganga. Wito wao ni miongoni mwa wito ulio bora sana, kwa maana wengi wao hutafuta kwa kweli kufanya, kwa upendo na huruma, yote wawezayo ili kupunguza mabaya na mateso yanayolemea wanadamu kwa sababu ya dhambi. Hata wako baadhi walio watumishi wenye bidii wa Yesu Kristo, watafutao pia mema ya nafsi za wagonjwa wao. Walakini ni Yesu mwenyewe aliye siku zote wa kwanza, aliye bora, aliye Tabibu mkuu kupita wote.

Yesu huponya maradhi ambayo waganga wa duniani hawawezi kufanya lolote juu yake, kwa maana Baba alimpa uwezo huu alipomkabidhi kazi ya ukombozi wetu. Yesu, kwa kuutwaa mwili wetu wa kibinadamu, aliuokoa kutoka utawala wa dhambi na Shetani; ameifanya miili yetu kuwa hekalu la Roho Mtakatifu na viungo vya mwili wake mwenyewe (1 Kor. 6:15, 19), na hata katika siku zetu hizi ni wangapi walioachwa na waganga kuwa hawaponyeki, ni visa vingapi vya kifua kikuu, vya donda-ndugu, vya kupooza, vya kuvimba mwili, vya upofu na vya uziwi, vimeponywa naye! Basi si jambo la kushangaza kwamba ni wachache mno wa wagonjwa wamwendeao?

Njia ya Yesu ni tofauti kabisa na ile ya waganga wa duniani. Wao hutafuta kumtumikia Mungu kwa kutumia dawa zipatikanazo katika ulimwengu wa asili, naye Mungu huzitumia dawa hizo kwa kadiri ya sheria ya asili, kwa kadiri ya tabia za asili za kila moja, bali uponyaji utokao kwa Yesu ni wa namna tofauti kabisa; ni kwa nguvu za kimungu, nguvu za Roho Mtakatifu, ndipo Yesu aponyavyo. Hivyo tofauti kati ya njia hizi mbili za uponyaji ni kubwa mno. Ili tupate kuielewa vizuri zaidi, na tutwae mfano; yupo tabibu asiyeamini, lakini mwerevu sana katika kazi yake; wagonjwa wengi wamepata uponyaji wao kwake. Mungu hutoa matokeo haya kwa njia ya dawa zilizoagizwa, na kwa maarifa ya tabibu juu yake. Yupo tabibu mwingine aaminiye, aombaye baraka ya Mungu juu ya dawa azitumiazo. Katika hali hii pia wengi huponywa, lakini wala katika hali hii wala katika ile nyingine uponyaji hauleti pamoja nao baraka yo yote ya kiroho. Watakuwa na shughuli, hata wale waaminio miongoni mwao, na dawa wazitumiazo, zaidi sana kuliko na yale ambayo Bwana aweza kuwatendea, na katika hali kama hiyo uponyaji wao utakuwa wenye madhara zaidi kuliko wenye faida. Kinyume chake, hapo Yesu peke yake ndiye ambaye mgonjwa humwendea kwa uponyaji, hujifunza kutotegemea tena dawa, bali kujiweka katika uhusiano wa moja kwa moja na upendo wake na uweza wake wote. Ili apate uponyaji wa namna hiyo, sharti aanze kwa kuungama na kuziacha dhambi zake, na kuwa na imani iliyo hai. Ndipo uponyaji utakapokuja moja kwa moja kutoka kwa Bwana, aumilikiye mwili wenye ugonjwa, nao hivyo huwa baraka kwa nafsi na kwa mwili pia.

“Lakini je, si Mungu aliyempa mwanadamu dawa?” waulizwa. “Je, nguvu zake hazitoki kwake?” Bila shaka; lakini kwa upande mwingine, je, si Mungu aliyetupa Mwanawe mwenye uwezo wote wa kuponya? Je, tutaifuata njia ya sheria ya asili pamoja na wote wasiomjua Kristo bado, na pia pamoja na wale watoto wake ambao imani yao ingali dhaifu mno hata washindwe kujitia mikononi mwa uweza wake wote; au afadhali twaichagua njia ya imani, tukipokea uponyaji kutoka kwa Bwana na kutoka kwa Roho Mtakatifu, tukiona humo tokeo na uthibitisho wa ukombozi wetu?

Uponyaji utendwao na Bwana wetu Yesu huleta pamoja nao na kuacha nyuma yake baraka iliyo halisi zaidi kuliko uponyaji upatikanao kwa njia ya waganga. Uponyaji umekuwa msiba kwa watu wasio wachache. Kitandani cha ugonjwa mawazo mazito yalikuwa yamemshika mtu, lakini tangu wakati wa kuponywa kwake, ni mara ngapi mgonjwa amekutwa tena yu mbali na Bwana! Sivyo ilivyo hapo Yesu ndiye aponyaye. Uponyaji hutolewa baada ya kuungama dhambi; kwa hiyo humleta mtu ateswaye karibu zaidi na Yesu, na kuweka kifungo kipya kati yake na Bwana, humfanya aone upendo wake na uweza wake, huanzisha ndani yake maisha mapya ya imani na utakatifu. Yule mwanamke aliyekuwa amegusa pindo la vazi la Kristo alipohisi ya kuwa ameponywa, alijifunza kitu fulani cha maana ya upendo wa kimungu. Akaenda zake kwa maneno haya: “Binti, imani yako imekuponya; enenda zako kwa amani.”

Ewe wewe uteswaye na ugonjwa fulani, ujue ya kuwa Yesu, Mponyaji aliye na enzi, angali katikati yetu. Yu karibu nasi, naye anaipa Kanisa lake tena hakika zilizo dhahiri za kuwapo kwake. Je, u tayari kuachana na ulimwengu, kujitia mikononi mwake kwa imani na tumaini? Basi usiogope, kumbuka ya kuwa uponyaji wa kimungu ni sehemu ya maisha ya imani. Kama hakuna mtu ye yote aliye karibu nawe awezaye kukusaidia katika maombi, kama hakuna “mzee” aliye karibu kuomba maombi ya imani, usiogope kwenda mwenyewe kwa Bwana katika kimya cha upweke, kama yule mwanamke aliyegusa pindo la vazi lake. Mkabidhi utunzaji wa mwili wako. Tulia mbele zake, na kama yule mwanamke maskini sema, “Nitaponywa.” Yamkini yaweza kuchukua muda kidogo kuvunja minyororo ya kutokuamini kwako, lakini kwa hakika hakuna wamngojeao atakayeaibika (Zaburi 25:3)