Afya na Wokovu kwa Jina la Yesu

Matendo 3:16; 4:10, 12 Baada ya Pentekoste, yule mtu aliyepooza alipoponywa kwa mkono wa Petro na Yohana pale langoni pa hekalu, ilikuwa ni “kwa jina la Yesu Kristo wa Nazareti” walipomwambia, “Simama, uende,” na mara watu, katika mshangao wao, walipowakimbilia pamoja, Petro akatangaza kuwa ni jina la Yesu lililokuwa limemponya mtu yule kabisa.

Kutokana na muujiza huu na hotuba ya Petro, watu wengi waliolisikia Neno waliamini (Matendo 4:4). Kesho yake Petro akayarudia maneno haya mbele ya Sanhedrini, “Kwa jina la Yesu Kristo wa Nazareti... mtu huyu anasimama hapa mbele yenu, hali yu mzima”; kisha akaongeza, “Wala hapana jina jingine chini ya mbingu... litupasalo sisi kuokolewa kwalo.” Kauli hii ya Petro inatuambia kuwa jina la Yesu huponya na huokoa vilevile. Hapa tunalo fundisho la maana kuu kabisa kwa uponyaji wa kimungu.

Twaona kwamba uponyaji na afya ni sehemu ya wokovu wa Kristo. Je, Petro hasemi hivi waziwazi katika hotuba yake kwa Sanhedrini, ambapo, baada ya kunena habari za uponyaji, mara akaendelea kunena habari za wokovu kwa Kristo? (Matendo 4:10, 12). Mbinguni hata miili yetu itakuwa na sehemu yake katika wokovu; wokovu hautakamilika kwetu hata miili yetu itakapoufurahia ukombozi kamili wa Kristo. Kwa nini basi tusiuamini utendaji huu wa ukombozi hapa duniani? Hata sasa hapa duniani, afya ya miili yetu ni tunda la wokovu ambao Yesu ametupatia.

Twaona pia kwamba afya, kama ulivyo wokovu, hupatikana kwa imani. Tabia ya mwanadamu kwa asili ni kuutimiza wokovu wake kwa matendo yake, na ni kwa shida tu ndipo hufikia kuupokea kwa imani; lakini linapokuwa suala la uponyaji wa mwili, ana shida zaidi ya kuushika. Kuhusu wokovu, humalizia kwa kuukubali kwa sababu hakuna njia nyingine awezayo kuufungua mlango wa mbinguni; ila kwa habari ya mwili, hutumia dawa zinazojulikana. Kwa nini basi atafute uponyaji wa kimungu? Heri yeye afikaye kuelewa kuwa ni mapenzi ya Mungu; kwamba Mungu apenda kuidhihirisha nguvu ya Yesu, na tena kutufunulia upendo wake wa Kibaba; kuizoeza na kuithibitisha imani yetu, na kutufanya tuithibitishe nguvu ya ukombozi katika mwili kama ilivyo katika nafsi. Mwili ni sehemu ya nafsi yetu; hata mwili umeokolewa na Kristo; kwa hiyo ni katika mwili wetu ndimo Baba yetu apendako kuidhihirisha nguvu ya ukombozi, na kuwafanya watu waone kwamba Yesu yu hai. Ee, na tuliamini jina la Yesu! Je, haikuwa kwa jina la Yesu ndipo afya kamili ilipotolewa kwa yule mtu asiyejiweza? Na je, maneno haya: “Imani yako imekuokoa,” hayakunenwa hapo mwili ulipoponywa? Basi na tutafute kuupata uponyaji wa kimungu.

Kila mahali Roho atendako kwa nguvu, hapo hufanya uponyaji wa kimungu. Je, isingeonekana kwamba kama miujiza iliwahi kuwa isiyohitajika, ni pale Pentekoste, kwa maana wakati huo neno la mitume lilitenda kwa uweza mwingi, na kumwagwa kwa Roho Mtakatifu kulikuwa kwa wingi? Basi, ni kwa sababu hasa Roho alitenda kwa nguvu ndipo utendaji wake ulipopasa kuonekana katika mwili. Kama uponyaji wa kimungu waonekana kwa nadra tu siku hizi, hatuwezi kuuhusisha na sababu nyingine ila kwamba Roho hatendi kwa nguvu. Kutokuamini kwa watu wa dunia na upungufu wa bidii miongoni mwa waaminio huuzuia utendaji wake. Uponyaji ambao Mungu autoao huku na huku ni ishara za tangulizi za neema zote za kiroho tulizoahidiwa, na ni Roho Mtakatifu peke yake afunuaye uweza wote wa jina la Yesu wa kufanya uponyaji kama huo. Na tumwombe Roho Mtakatifu kwa bidii, na tujiweke chini ya uongozi wake bila kujizuia, na tutafute kuwa imara katika imani yetu katika jina la Yesu, kwa kuhubiri wokovu au kwa kazi ya uponyaji.

Mungu hutoa uponyaji ili kulitukuza jina la Yesu. Na tutafute kuponywa na Yesu ili jina lake litukuzwe. Ni jambo la kusikitisha kuona jinsi uweza wa jina lake unavyotambulikana kidogo, jinsi ulivyo kidogo kuwa lengo la kuhubiri na la kuomba. Hazina za neema ya kimungu, ambazo Wakristo hujinyima wenyewe kwa upungufu wa imani na bidii, zimefichwa katika jina la Yesu. Ni mapenzi ya Mungu kumtukuza Mwana wake katika Kanisa; naye atalifanya hilo kila mahali apatapo imani. Iwe miongoni mwa waaminio, au iwe miongoni mwa wapagani, yu tayari kwa uwezo utokao juu kuziamsha dhamiri, na kuileta mioyo katika utii. Mungu yu tayari kuudhihirisha uweza wote wa Mwana wake, na kuufanya kwa njia ya kushangaza katika mwili kama ilivyo katika nafsi. Na tuliamini kwa ajili yetu wenyewe, na tuliamini kwa ajili ya wengine, kwa ajili ya kundi la waaminio walio karibu nasi, na tena kwa ajili ya Kanisa katika ulimwengu wote. Na tujitoe kuamini kwa imani imara katika uweza wa jina la Yesu, na tuombe mambo makuu kwa jina lake, tukiitegemea ahadi yake, nasi tutamwona Mungu akifanya bado maajabu kwa jina la Mwana wake mtakatifu.