Ugonjwa wa Ayubu na Uponyaji Wake

“Basi Shetani akatoka mbele za uso wa Bwana, akampiga Ayubu majipu mabaya, tangu wayo wa mguu wake hata utosi wa kichwa chake” (Ayubu 2:7).

Pazia lile linalotusitiri ulimwengu usioonekana huinuliwa kwa kitambo katika historia ya ajabu ya Ayubu; latufunulia mbingu na kuzimu vikijishughulisha sana na watumishi wa Mungu hapa duniani. Ndani yake twaona majaribu yaliyo mahsusi kwa ugonjwa, na jinsi Shetani anavyoyatumia ili kushindana na Mungu, na kutafuta upotevu wa nafsi ya mwanadamu, na Mungu, kinyume chake, kutafuta kuitakasa kwa jaribu lilo hilo. Katika habari ya Ayubu, twaona katika nuru ya Mungu chanzo ambacho ugonjwa hutokea, ni nini tokeo lipasalo kuwa nalo, na jinsi iwezekanavyo kuokolewa kutoka kwao.

Ugonjwa watoka wapi; kwa Mungu au kwa Shetani? Maoni juu ya jambo hili yatofautiana mno. Wengine hushikilia ya kuwa umetumwa na Mungu, wengine huona ndani yake kazi ya yule mwovu. Wote wawili wamekosea maadamu washikilia maoni yao kwa kuyakataa yale ya upande mwingine, na wote wawili wako sawa wakikiri ya kuwa jambo hili lina pande mbili. Basi na tuseme ya kuwa ugonjwa watoka kwa Shetani, lakini kwamba hauwezi kuwapo pasipo ruhusa ya Mungu. Kwa upande mmoja nguvu za Shetani ni za mdhalimu asiye na haki yeye mwenyewe ya kumrukia mwanadamu na kumshambulia, na kwa upande mwingine madai ya Shetani juu ya mwanadamu ni halali kwa kuwa haki ya Mungu yaamuru ya kwamba yeye ajitiaye chini ya Shetani hujiweka mwenyewe chini ya mamlaka yake.

Shetani ni mkuu wa ufalme wa giza na wa dhambi; ugonjwa ni tokeo la dhambi. Humo ndimo imo haki ya Shetani juu ya mwili wa mwanadamu mwenye dhambi. Yeye ni mkuu wa ulimwengu huu, atambulikanaye hivyo na Mungu, hata wakati ule atakaposhindwa kihalali na kuvuliwa kiti chake cha enzi. Kwa hiyo ana nguvu fulani juu ya wale wote wabakiao hapa chini ya utawala wake. Basi ndiye yeye awateswaye watu kwa ugonjwa, na kutafuta kwa njia hiyo kuwageuza kutoka kwa Mungu, na kuwaletea uharibifu wao.

Lakini, twapenda kuharakisha kusema, nguvu za Shetani ni mbali sana na kuwa za kuweza yote; hawezi kufanya lo lote pasipo idhini ya Mungu. Mungu humruhusu kufanya yote ayafanyayo katika kuwajaribu watu, hata waaminio, lakini ni ili jaribu lipate kuzaa ndani yao tunda la utakatifu. Yasemekana pia ya kuwa Shetani ana nguvu za mauti (Ebr. 2:14), ya kwamba yu kazini kila mahali ambako mauti hutawala, na pamoja na hayo hana nguvu za kuamua juu ya mauti ya watumishi wa Mungu pasipo mapenzi dhahiri ya Mungu. Ni vivyo hivyo katika habari ya ugonjwa. Kwa sababu ya dhambi, ugonjwa ni kazi ya Shetani, lakini kwa kuwa uongozi mkuu wa ulimwengu huu ni wa Mungu, waweza pia kuhesabiwa kuwa kazi ya Mungu. Wote waijuao Kitabu cha Ayubu hujua jinsi jambo hili lilivyofunuliwa waziwazi humo.

Tokeo la ugonjwa lapasa kuwa nini? Tokeo litakuwa jema au baya kwa kadiri Mungu au Shetani atakavyoshinda ndani yetu. Chini ya uvutano wa Shetani, mtu mgonjwa huzama sikuzote zaidi katika dhambi. Hatambui ya kuwa dhambi ndiyo chanzo cha adhabu, naye hujishughulisha peke yake na nafsi yake mwenyewe na mateso yake. Hatamani kitu ila kuponywa, pasipo hata kuota tamaa ya kuokolewa na dhambi. Kinyume chake, kila mahali Mungu ashindapo, ugonjwa humwongoza mteswa kujikana nafsi yake, na kujitoa mwenyewe kwa Mungu. Historia ya Ayubu yaonyesha jambo hili. Rafiki zake walimshtaki, pasipo haki, ya kuwa alikuwa amefanya dhambi zenye uzito wa pekee, na kwa hizo kujiletea mateso yake ya kutisha. Lakini haikuwa hivyo, kwa kuwa Mungu mwenyewe alikuwa amemshuhudia ya kuwa alikuwa “mkamilifu na mwenye adili, mwenye kumcha Mungu na kuepukana na uovu” (Ayubu 2:3). Lakini katika kujitetea Ayubu alipita kiasi. Badala ya kujinyenyekeza katika unyonge mbele za Bwana, na kutambua dhambi zake zilizofichwa, alitafuta kwa haki yake yote ya nafsi kujihesabia haki mwenyewe. Haikuwa hata Bwana alipomtokea ndipo alipofikia kusema, “Najichukia nafsi yangu, na kutubu katika mavumbi na majivu” (Ayubu 42:6). Kwake ugonjwa ukawa baraka ya pekee kwa kumleta amjue Mungu kwa jinsi mpya kabisa, na kujinyenyekeza kuliko wakati wo wote mbele zake. Hii ndiyo baraka ambayo Mungu hutaka sisi nasi tuipate kila aruhusupo Shetani atupige kwa ugonjwa, na mwisho huu hufikiwa na wateswa wote wanaojitoa kwake pasipo masharti.

Twawezaje kuokolewa na ugonjwa? Baba hapana wakati aendeleaye kumwadhibu mwanawe kupita muda uliolazimu. Mungu naye, aliye na kusudi lake katika kuuruhusu ugonjwa, hataiendeleza adhabu zaidi ya kadiri iliyo lazima ili kutimiza kusudi lake. Mara Ayubu alipomwelewa, tangu wakati aliojihukumu mwenyewe na kutubu katika mavumbi na majivu, kwa kusikiliza yale Mungu aliyokuwa amemfunulia juu yake mwenyewe, adhabu ikafikia mwisho. Mungu mwenyewe akamwokoa kutoka mkononi mwa Shetani, akamponya ugonjwa wake.

Laiti wagonjwa katika siku zetu wangelifahamu ya kuwa Mungu ana kusudi dhahiri katika kuiruhusu adhabu, na ya kuwa mara itimizwapo, mara Roho Mtakatifu atakapokuwa amewaongoza kuziungama na kuziacha dhambi zao na kujiweka wakfu kabisa kwa utumishi wa Bwana, adhabu haitahitajiwa tena—ya kuwa Bwana angeweza na angependa kuwaokoa! Mungu humtumia Shetani kama vile serikali yenye hekima imtumiavyo mlinzi wa gereza. Huwaacha tu watoto wake katika nguvu zake kwa muda uliowekwa; na baada ya hapo mapenzi yake mema ni kutushirikisha katika ukombozi wa yeye aliyemshinda Shetani, aliyetuondoa kutoka mamlaka yake kwa kuchukua badala yetu dhambi zetu na magonjwa yetu.