Utii na Afya

“Huko akawawekea amri na hukumu, akawajaribu huko, akasema, Kama utaisikiliza sauti ya Bwana, Mungu wako, kwa bidii, na kutenda yaliyo adili machoni pake, na kutega sikio kwa amri zake, na kuzishika sheria zake zote, sitatia juu yako maradhi yo yote niliyowatia Wamisri; kwa kuwa mimi ndimi Bwana nikuponyaye” (Kut. 15:25, 26).

Ilikuwa huko Mara ambapo Bwana aliwapa watu wake amri hii. Israeli walikuwa ndio kwanza wamewekwa huru kutoka katika nira ya Misri wakati imani yao ilipojaribiwa jangwani kwa maji ya Mara. Ilikuwa baada ya kuyatamisha yale maji machungu ndipo Bwana alipoahidi kwamba hatatia juu ya wana wa Israeli maradhi yo yote aliyowatia Wamisri, maadamu wangalimtii. Wangaliweza kupatwa na majaribu mengine, wakati mwingine wangaliweza kuteseka kwa kukosa mkate na maji, na kukutana na hatari kubwa; mambo haya yote yangaliweza kuwajia hata pamoja na utii wao, lakini ugonjwa usingaliwagusa. Katika ulimwengu ambao bado uko chini ya nguvu za Shetani, wangaliweza kuwa shabaha ya mashambulizi yatokayo nje, lakini miili yao isingalionewa na ugonjwa, kwa maana Mungu alikuwa amewaokoa nao. Je, hakusema, “Kama utaisikiliza sauti ya Bwana, Mungu wako, kwa bidii... sitatia juu yako maradhi yo yote niliyowatia Wamisri; kwa kuwa mimi ndimi Bwana nikuponyaye”? Na tena mahali pengine, “Nanyi mtamtumikia Bwana, Mungu wenu, ... nami nitauondoa ugonjwa kati yako” (Kut. 23:25; soma pia Law. 26:14,16; Kumb. 7:15, 23; 28:15—61).

Jambo hili lavuta fikira zetu kwenye kweli ya maana kupita zote: uhusiano wa ndani uliopo kati ya utii na afya, kati ya utakaso ulio afya ya nafsi, na uponyaji wa kimungu uhakikishao afya ya mwili— vyote viwili vimo katika wokovu utokao kwa Mungu. Ni jambo la kuangaliwa kwamba katika lugha kadha wa kadha maneno haya matatu, wokovu, uponyaji, na utakaso, yametokana na shina moja nayo yaonyesha wazo lilo hilo la msingi. (Kwa mfano, katika Kijerumani Heil, wokovu; Heilung, uponyaji; Heilichung, utakaso.) Wokovu ni ukombozi ambao Mwokozi ametupatia, afya ni wokovu wa mwili ambao nao watujia kutoka kwa Mponyaji wa kimungu, na hatimaye, utakaso watukumbusha kwamba wokovu wa kweli na afya ya kweli hujumuisha kuwa watakatifu kama Mungu alivyo mtakatifu. Basi ni katika kuupa mwili afya na kuipa nafsi utakaso ndipo Yesu alivyo kweli Mwokozi wa watu wake. Andiko letu latangaza waziwazi uhusiano uliopo kati ya utakatifu wa maisha na uponyaji wa mwili. Maneno yanayothibitisha jambo hili yaonekana kuongezwa kwa makusudi: “Kama utaisikiliza kwa bidii.., kama utatenda yaliyo adili.., kama utatega sikio... kama utazishika sheria zake zote, sitakuletea ugonjwa wo wote.”

Hapa tunao ufunguo wa utii wote wa kweli na utakatifu. Mara nyingi twadhani kwamba twayajua vyema mapenzi ya Mungu yaliyofunuliwa katika Neno lake; lakini kwa nini ujuzi huu hauzai utii? Ni kwa sababu ili tutii ni lazima tuanze kwa kusikiliza. “Kama utaisikiliza sauti ya Bwana, Mungu wako, kwa bidii.., na kutega sikio... .” Maadamu mapenzi ya Mungu yanifikia kwa njia ya sauti ya mwanadamu, au kwa njia ya kusoma kitabu, huenda yasiwe na nguvu nyingi kwangu, bali nikiingia katika ushirika wa moja kwa moja na Mungu, na kuisikiliza sauti yake, amri yake huhuishwa kwa nguvu iliyo hai ili kurahisisha utimizo wake. Kristo ni Neno lililo hai na Roho Mtakatifu ni sauti yake. Kuisikiliza sauti yake maana yake ni kuyakataa mapenzi na hekima yetu yote wenyewe, kulifumba sikio kwa kila sauti nyingine ili tusitazamie mwongozo mwingine ila ule wa Roho Mtakatifu. Aliyekombolewa ni kama mtumishi au mtoto, ahitajiye kuongozwa; ajua kwamba ni mali ya Mungu kabisa, na kwamba nafsi yake yote, roho na nafsi na mwili, yapasa kumtukuza Mungu.

Lakini vilevile ana ufahamu kwamba jambo hili lazidi nguvu zake, na kwamba yampasa kupokea, saa kwa saa, mwongozo aihitajiao. Ajua pia kwamba amri ya Mungu, maadamu ni herufi iliyokufa kwake, haiwezi kumpa nguvu wala hekima, na kwamba ni pale tu atakapotega sikio kwa bidii ndipo atakapopata ile nguvu aitakayo; kwa hiyo, husikiliza na hujifunza hivyo kuzishika sheria za Mungu. Maisha haya ya kutega sikio na kutenda, ya kujikana na ya kusulubiwa, ndiyo yaifanyayo maisha matakatifu. Bwana hutuleta kwayo kwanza kwa njia ya ugonjwa, na kutufanya tuelewe kile tunachokipungukiwa, kisha tena kwa njia ya uponyaji uiitao nafsi kwenye maisha haya ya kutega sikio daima kwa sauti ya Mungu.

Wakristo wengi hawaoni katika uponyaji wa kimungu zaidi ya baraka ya kitambo kwa ajili ya mwili, ijapokuwa katika ahadi ya Mungu wetu mtakatifu shabaha yake ni kutufanya watakatifu. Mwito wa utakatifu waendelea kupata sauti kubwa na iliyo wazi zaidi kila siku ndani ya Kanisa. Waaminio zaidi na zaidi wanafikia kuelewa kwamba Mungu ataka wawe kama Kristo; na Bwana anaanza tena kutumia uwezo wake wa kuponya, akitafuta kwa njia hiyo kutuonyesha kwamba hata katika siku zetu wenyewe Mtakatifu wa Israeli ni “Bwana akuponyaye,” na kwamba ni mapenzi yake kuwahifadhi watu wake katika afya ya mwili na katika utii pia.

Yeye atafutaye uponyaji kutoka kwa Bwana na aupokee kwa furaha. Si utii wa kisheria unaotakiwa kwake, utii utegemeao nguvu zake mwenyewe. La; badala yake, Mungu ataka kwake kujisalimisha kwa mtoto mchanga, kutega sikio kunakosikiliza na kukubali kuongozwa. Hiki ndicho Mungu anachokitazamia kwake; na uponyaji wa mwili utakuwa tokeo la imani hii ya kitoto, kwa maana Bwana atajidhihirisha kwake kama Mwokozi mwenye nguvu aponyaye mwili na kuitakasa nafsi.