Mapenzi ya Mungu

“Mapenzi yako yatimizwe” (Mathayo 6:10). “Bwana akipenda” (Yakobo 4:15).

Katika siku za ugonjwa, wakati waganga na dawa vinaposhindwa, watu kwa kawaida hukimbilia maneno haya tuliyoyanukuu hapa, nayo yaweza kwa urahisi kuwa kikwazo katika njia ya uponyaji wa kimungu. “Nitajuaje,” huulizwa, “kama si mapenzi ya Mungu kwamba niendelee kuwa mgonjwa? Na maadamu jambo hili halijaamuliwa, nawezaje kuamini ili nipone, nawezaje kuliombea kwa imani?” Hapa kweli na uongo vyaonekana kugusana. Kwa hakika haiwezekani kuomba kwa imani hali hatuna hakika kwamba twaomba kwa kadiri ya mapenzi ya Mungu. “Naweza,” mtu aweza kusema, “kuomba kwa bidii nikimwomba Mungu anitendee lililo jema zaidi kwangu, nikiamini kwamba atanipoza ikiwa yawezekana.” Maadamu mtu aomba hivyo, kwa kweli aomba kwa unyenyekevu, lakini haya si maombi ya imani. Hayo yawezekana tu tunapokuwa na hakika kwamba twaomba kwa kadiri ya mapenzi ya Mungu. Basi swali lajipunguza lenyewe kuwa kuhakikisha ni yapi mapenzi ya Mungu. Ni kosa kubwa kudhani kwamba mtoto wa Mungu hawezi kujua ni nini mapenzi yake katika habari ya uponyaji.

Ili kuyajua mapenzi yake ya kimungu, ni lazima tuongozwe na Neno la Mungu. Ni Neno lake linalotuahidi uponyaji. Ahadi ya Yakobo 5 ni thabiti hata haiwezekani kuikana. Ahadi hii yathibitisha tu mafungu mengine, yaliyo na nguvu sawasawa, yanayotuambia kwamba Yesu Kristo ametupatia uponyaji wa magonjwa yetu, kwa sababu amejitwika maradhi yetu. Kwa kadiri ya ahadi hii, tuna haki ya kuponywa, kwa sababu ni sehemu ya wokovu tulio nao katika Kristo, na kwa hiyo twaweza kuutazamia kwa hakika. Andiko latuambia kwamba ugonjwa, mkononi mwa Mungu, ni njia ya kuwaadhibu watoto wake kwa ajili ya dhambi zao, lakini kwamba adhabu hii hukoma kutumiwa mara tu mtoto wake ateswaye aungamapo na kuiacha dhambi. Je, si sawa na kusema waziwazi kwamba Mungu apenda tu kutumia ugonjwa ili kuwarudisha watoto wake wanapopotea?

Ewe Mkristo mgonjwa, fungua Biblia yako, uichunguze na kuona katika kurasa zake kwamba ugonjwa ni onyo la kuiacha dhambi, lakini kwamba kila aungamaye na kuziacha dhambi zake hupata katika Yesu msamaha na uponyaji. Ndivyo ilivyo ahadi ya Mungu katika Neno lake. Kama Bwana angekuwa amekusudia mpango mwingine kwa watoto wake wale aliokuwa karibu kuwaita kwake nyumbani, angewajulisha mapenzi yake, akiwapa kwa Roho Mtakatifu tamaa ya kuondoka; katika hali nyingine za pekee, angeamsha usadikisho fulani wa pekee; lakini kwa kawaida, Neno la Mungu latuahidi uponyaji kama jibu la maombi ya imani.

“Walakini,” wengine waweza kusema, “je, si afadhali katika mambo yote kumwachia Mungu mapenzi yake?” Nao hutaja mfano wa Wakristo fulani ambao, kwa kusema, wangelilazimisha mkono wa Mungu kwa maombi yao bila kuongeza, “Mapenzi yako yatimizwe,” nao wasingelipata baraka katika jibu la maombi yao. Nao hawa wangesema, “Twajuaje kama ugonjwa usingekuwa afadhali kwetu kuliko afya?” Angalia hapa kwamba hili si jambo la kulazimisha mkono wa Mungu, kwa kuwa ni Neno lake linalotuambia kwamba ni mapenzi yake kutuponya. “Kule kuomba kwa imani kutamwokoa mgonjwa.” Mungu apenda kwamba afya ya nafsi iwe na uvutano wa baraka juu ya afya ya mwili, kwamba kuwapo kwa Yesu ndani ya nafsi kupate uthibitisho wake katika hali njema ya mwili. Nawe ujuapo kwamba ndivyo yalivyo mapenzi yake, huwezi, unaposema namna hiyo, kusema kwa kweli kwamba wamwachia yeye mambo yote. Si kumwachia yeye utumiapo dawa zote ziwezekanazo ili upate uponyaji, badala ya kuishika ahadi yake. Kujisalimisha kwako si kitu kingine ila uvivu wa kiroho mbele ya jambo lile Mungu akuamurulo kulitenda.

Kuhusu kujua kama ugonjwa si afadhali kuliko afya, hatusiti kujibu kwamba kurudi kwa afya, ambako ni tunda la kuiacha dhambi, la kujiweka wakfu kwa Mungu, na la ushirika wa hatimaye pamoja na Mungu, ni bora mno kuliko ugonjwa. “Maana haya ndiyo mapenzi ya Mungu, ndio kutakaswa kwenu” (1 Wathesalonike 4:3), na ni kwa uponyaji Mungu huthibitisha uhakika wa jambo hili. Yesu ajapo kuutwaa mwili wetu, na kuuponya kwa mwujiza, ikitokea kwamba afya iliyopokewa lazima idumishwe siku kwa siku kwa ushirika usiokatika pamoja naye, ule ujuzi tuupatao hivyo wa nguvu za Mwokozi na wa upendo wake ni tokeo lililo bora sana kuliko lolote ambalo ugonjwa waweza kutoa. Bila shaka ugonjwa waweza kutufundisha unyenyekevu, lakini uponyaji upokewao moja kwa moja kutoka kwa Mungu hutufanya kumjua Bwana wetu vizuri zaidi, na kutufundisha kumtumaini yeye vema zaidi. Zaidi ya hayo humwandaa mwaminifu kuutimiza vema zaidi utumishi wa Mungu.

Ewe Mkristo uliye mgonjwa, kama kweli utataka kujua ni yapi mapenzi ya Mungu katika jambo hili, usijiache kuathiriwa na maoni ya wengine, wala na chuki zako za zamani, bali sikiliza na kuchunguza yale Neno la Mungu lisemayo. Chunguza kama halikuambii kwamba uponyaji wa kimungu ni sehemu ya ukombozi wa Yesu, na kwamba Mungu apenda kila mwaminifu awe na haki ya kuudai; ona kama haliahidi kwamba maombi ya kila mtoto wa Mungu kwa ajili ya jambo hili yatasikiwa, na kama afya iliyorudishwa kwa nguvu za Roho Mtakatifu haidhihirishi utukufu wa Mungu machoni pa Kanisa na pa ulimwengu. Uliulize; litakujibu kwamba, kwa kadiri ya mapenzi ya Mungu, ugonjwa ni adhabu isababishwayo na dhambi (au upungufu), na kwamba uponyaji, upewao maombi ya imani, hushuhudia neema yake isamehe, itakase, na kuiondoa dhambi.