Yesu Awaponya Wagonjwa

“Akawaponya wote waliokuwa hawawezi, ili litimie neno lililonenwa na nabii Isaya, akisema: Mwenyewe aliutwaa udhaifu wetu, akayachukua magonjwa yetu” (Mathayo 8:16, 17).

Katika sura iliyotangulia tumeyachunguza maneno ya nabii Isaya. Ikiwa msomaji bado ana shaka lo lote juu ya tafsiri yake iliyokwisha tolewa, twamkumbusha lile ambalo Roho Mtakatifu alimwongoza mwinjilisti Mtakatifu Mathayo kuliandika juu yake. Imenenwa waziwazi juu ya wagonjwa wote ambao Yesu aliwaponya, “Ili litimie neno lililonenwa na nabii Isaya.” Ilikuwa ni kwa sababu Yesu alikuwa amejitwika magonjwa yetu ndipo aliweza, naam, ilimpasa, kuwaponya. Kama asingalifanya hivyo, sehemu moja ya kazi yake ya ukombozi ingalibaki bila nguvu na bila matunda.

Andiko hili la Neno la Mungu kwa kawaida haleweki hivi. Ni maoni yaliyoenea kwamba uponyaji wa miujiza uliofanywa na Bwana Yesu wapasa kutazamwa kuwa ni ushuhuda wa rehema zake tu, au kuwa ni ishara ya neema za kiroho. Hauonwi kuwa ni tokeo la lazima la ukombozi, ingawa ndivyo Biblia isemavyo. Mwili na roho viliumbwa ili vitumike pamoja kama makao ya Mungu; hali ya ugonjwa ya mwili, vile vile na ile ya roho, ni tokeo la dhambi, na ndilo Yesu alilokuja kulichukua, kulipatanisha, na kulishinda.

Bwana Yesu alipokuwa duniani, hakuwaponya wagonjwa katika hali ya Mwana wa Mungu, bali kama Mpatanishi aliyekuwa amejitwika na kuuchukua ugonjwa; na jambo hili latuwezesha kuelewa ni kwa nini Yesu alitoa wakati mwingi hivyo kwa kazi yake ya uponyaji, na kwa nini pia wainjilisti wanaisema kwa jinsi ya kina namna hii. Soma kwa mfano yale Mathayo asemayo juu yake: “Naye Yesu alikuwa akizunguka katika Galilaya yote, akifundisha katika masinagogi yao, na kuihubiri Habari Njema ya ufalme, na kuponya ugonjwa na udhaifu wa kila namna katika watu. Na sifa zake zikaenea katika Shamu yote; wakamletea wote waliokuwa hawawezi, washikwao na maradhi mbalimbali na mateso, na wenye pepo, na wenye kifafa, na wenye kupooza; naye akawaponya” (Mathayo 4:23, 24). “Naye Yesu alikuwa akizunguka katika miji yote na vijiji, akifundisha katika masinagogi yao, na kuihubiri Habari Njema ya ufalme, na kuponya magonjwa na udhaifu wa kila namna katika watu” (Mathayo 9:35). “Akiisha kuwaita wanafunzi wake kumi na wawili, akawapa amri juu ya pepo wachafu, wawatoe, na kuponya magonjwa na udhaifu wa kila namna” (10:1). Wanafunzi wa Yohana Mbatizaji walipokuja kumwuliza Yesu kama yeye ndiye Masihi, ili awathibitishie, aliwajibu: “Vipofu wanapata kuona, na viwete wanakwenda; wenye ukoma wanatakaswa, na viziwi wanasikia; wafu wanafufuliwa, na maskini wanahubiriwa Habari Njema” (11:5). Baada ya kuponywa kwa mkono uliopooza, na upinzani wa Mafarisayo waliotaka kumwangamiza, twasoma kwamba “makutano mengi wakamfuata, naye akawaponya wote” (12:15). Baadaye, mkutano ulipokwisha kumfuata mpaka mahali pasipokuwa na watu, imenenwa, “Naye Yesu akatoka, akaona mkutano mkuu, akawahurumia, akawaponya wagonjwa wao” (14:14). Tena mbele zaidi: “Wakatuma watu kwenda nchi ile yote iliyo kandokando, wakamletea wote waliokuwa hawawezi; wakamsihi wapate kuugusa tu upindo wa vazi lake; na wote walioupata kuugusa wakaponywa kabisa” (14:35, 36). Imenenwa pia juu ya wagonjwa waliokuwako katika makutano kwamba “wakawaweka miguuni pa Yesu, naye akawaponya,” na Mathayo aongeza: “Hata makutano wakastaajabu, walipoona bubu wakinena, na vilema wakiwa wazima, na viwete wakienda, na vipofu wakiona; wakamtukuza Mungu wa Israeli” (15:30, 31). Na mwishowe alipofika mipakani mwa Uyahudi ng’ambo ya Yordani, “makutano mengi wakamfuata, naye akawaponya huko” (19:2).

Na tuzidishe juu ya maandiko haya mengi yale yatuletayo kwa kina habari za uponyaji uliofanywa na Yesu, na tujiulize kama uponyaji huu watupatia ushuhuda wa nguvu zake wakati wa maisha yake hapa duniani tu, au kama si zaidi sana tokeo lisiloshukiwa na la kudumu la kazi yake ya rehema na ya upendo, udhihirisho wa nguvu zake za ukombozi ziwaokoazo roho na mwili kutoka utawala wa dhambi? Naam; huo ndio hasa uliokuwa kusudi la Mungu. Basi ikiwa Yesu aliyachukua magonjwa yetu kama sehemu isiyotengeka ya ukombozi, ikiwa amewaponya wagonjwa “ili litimie neno lililonenwa na nabii Isaya,” na ikiwa moyo wake wa Mwokozi sikuzote umejaa rehema na upendo, twaweza kuamini kwa hakika kwamba hata leo hii ni mapenzi ya Yesu kuwaponya wagonjwa kwa kuyajibu maombi ya imani.