Bwana Nikuponyaye

“Sitatia juu yako maradhi yo yote katika hayo niliyowatia Wamisri, kwa maana Mimi ndimi Bwana nikuponyaye” (Kut. 15:26).

Ni mara ngapi tumeyasoma maneno haya, bila kuthubutu kuyatwaa yawe yetu, na bila kutumaini ya kuwa Bwana angeyatimiza kwetu! Tumeona ndani yake ya kuwa watu wa Mungu wapasa kuepushwa na maradhi yaliyowapata Wamisri, nasi tumesadiki ya kuwa ahadi hii yahusu Agano la Kale peke yake, na ya kuwa sisi tunaoishi chini ya utaratibu wa Agano Jipya hatuwezi kutazamia kulindwa wala kuponywa ugonjwa kwa kuingilia kati kwa Bwana kwa kwenyewe! Lakini, kwa kuwa tulilazimika kuutambua ubora wa Agano Jipya, tumefikia, katika ujinga wetu, kudai ya kuwa ugonjwa mara nyingi huleta baraka kubwa, na ya kuwa kwa sababu hiyo Mungu alitenda vema kuyaondoa yale aliyoyaahidi zamani, na kutokuwa tena kwetu kile alichokuwa kwa Israeli, “Bwana nikuponyaye.”

Lakini siku hizi twaliona Kanisa likiamka na kulikiri kosa lake. Laona ya kuwa ni chini ya Agano Jipya ambapo Bwana Yesu aliwakabidhi wanafunzi wake uwezo wake wa kuponya. Laanza kuona ya kuwa, alipoliagiza Kanisa lake kuihubiri Injili kwa kila kiumbe, aliahidi kuwa pamoja nalo “sikuzote, hata ukamilifu wa dahari” (Mathayo 28:20), na ya kuwa uthibitisho wa kuwapo kwake, wanafunzi wake wangekuwa na uwezo wa kuweka mikono juu ya wagonjwa, nao wangepona (Marko 16:15-18). Zaidi ya hayo, laona ya kuwa katika siku zilizofuata Pentekoste, kule kumwagwa kwa Roho Mtakatifu kwa miujiza kuliandamana na uponyaji wa miujiza, uliokuwa uthibitisho dhahiri wa baraka zilizoletwa na nguvu kutoka juu (Matendo 3:16; 5:12; 9:40). Hakuna kitu cho chote katika Biblia cha kulifanya lisadiki ya kuwa ahadi iliyotolewa kwa Israeli imefutwa tangu wakati huo, nalo lasikia kutoka kinywani mwa mtume Yakobo ahadi hii mpya: “Kule kuomba kwa imani kutamwokoa [au kutamponya] mgonjwa” (Yakobo 5:15). Lajua ya kuwa nyakati zote ni kutokuamini kulikomwekea mipaka Mtakatifu wa Israeli (Zaburi 78:41), nalo lajiuliza kama si kutokuamini kunakozuia siku hizi udhihirisho huu wa nguvu za Mungu. Ni nani awezaye kutia shaka? Si Mungu wala Neno lake vilaumiwavyo hapa; ni kutokuamini kwetu kunakozuia nguvu za miujiza za Bwana, na kunakomzuia asiponye kama nyakati zilizopita. Imani yetu na iamke, na itambue na kuabudu katika Kristo uwezo wote wa yeye asemaye, “Mimi ndimi Bwana nikuponyaye.” Ni kwa matendo ya Mungu ndipo twaweza kuelewa vema zaidi yale Neno lake latuambiayo; uponyaji ambao tena unaitikia kule kuomba kwa imani wathibitisha, kwa kuutolea mfano kwa utukufu, ukweli wa ahadi yake.

Na tujifunze kuona katika Yesu aliyefufuka Mponyaji wa kimungu, nasi na tumpokee kama alivyo. Ili nipate kutambua katika Yesu kuhesabiwa haki kwangu, nguvu zangu, na hekima yangu, yanipasa kushika kwa imani ya kuwa yeye ni hivi vyote kwangu kweli; na vivyo hivyo, Biblia inaponiambia ya kuwa Yesu ndiye Mponyaji aliye na mamlaka yote, yanipasa mimi mwenyewe kuutwaa ukweli huu, na kusema, “Naam, Bwana, ni wewe uliye Mponyaji wangu.” Nami kwa nini naweza kumshika kama alivyo? Ni kwa sababu anajitoa mwenyewe kwangu, hata mimi ni “mmea mmoja pamoja naye” (Warumi 6:5, tafsiri ya Kifaransa), na kwa kuwa nimeungwa naye pasipo kutengeka, kwa hiyo naumiliki uwezo wake wa kuponya; ni kwa sababu upendo wake wapendezwa kuwatwika wapenzi wake fadhili zake, kujitoa mwenyewe kwa moyo wake wote kwa wote watakao kumpokea. Na tusadiki ya kuwa yu tayari kuieneza hazina ya baraka, iliyomo katika lile jina, “Bwana nikuponyaye,” kwa wote wanaolijua na wawezao kulitumainia jina hili la kimungu. Haya ndiyo matibabu ya wagonjwa yaliyoonyeshwa na sheria ya ufalme wake. Ninapomletea Bwana ugonjwa wangu, sitegemei yale niyaonayo, wala niyahisiyo au niyawazayo, bali yale ayasemayo. Hata kila kitu kionekanapo kupingana na uponyaji unaotazamiwa, hata usipotukia kwa wakati au kwa jinsi niliyodhani ningeupokea, hata dalili zionekanapo kuzidi kuwa mbaya tu, imani yangu, ikiimarishwa na kule kungoja kwenyewe, yapasa kushikamana bila kuondoka na neno hili lililotoka kinywani mwa Mungu, “Mimi ndimi Bwana nikuponyaye.” Mungu siku zote hutafuta kutufanya kuwa waaminio wa kweli. Uponyaji na afya vina thamani ndogo kama havimtukuzi Mungu, na kutumika kutuunganisha naye kwa ukaribu zaidi; hivyo katika jambo la uponyaji imani yetu sharti ijaribiwe daima. Yeye ategemeaye jina la Mungu wake, awezaye kumsikia Yesu akimwambia, “Sikukuambia ya kwamba, ukiamini, utaona utukufu wa Mungu?” (Yohana 11:40), atakuwa na furaha ya kupokea kutoka kwa Mungu mwenyewe uponyaji wa mwili, na ya kuuona ukitukia kwa jinsi impasayo Mungu, na sawasawa na ahadi zake. Tusomapo maneno haya, “Mimi ndimi Bwana nikuponyaye,” tusiogope kujibu kwa shauku, “Naam, Bwana, wewe ndiwe Bwana unayeniponya.”