Maombi ya Bidii Yenye Kufaa

“Ombeaneni, mpate kuponywa. Kuomba kwake mwenye haki kwafaa sana, kukiwa kwa bidii. Eliya alikuwa mwanadamu mwenye tabia moja (au asili moja) na sisi, naye akaomba kwa bidii mvua isinyeshe, na mvua haikunyesha juu ya nchi muda wa miaka mitatu na miezi sita. Akaomba tena; mbingu zikatoa mvua, nayo nchi ikazaa matunda yake” (Yakobo 5:16-18).

Yakobo alijua kwamba imani ipatayo uponyaji si tunda la asili ya kibinadamu; kwa hiyo aongeza kwamba maombi hayo yapaswa kuwa “ya bidii.” Ni maombi ya namna hiyo tu yawezayo kufaa. Katika jambo hili anasimama juu ya kielelezo cha Eliya, mtu mwenye asili ile ile (“mwenye tabia moja”) kama sisi, akitoa hivyo hitimisho kwamba maombi yetu yaweza na yapaswa kuwa ya namna moja na yake. Basi Eliya aliombaje? Jambo hili litatoa nuru fulani juu ya yale ambayo maombi ya imani yapaswa kuwa.

Eliya alikuwa amepokea kutoka kwa Mungu ahadi kwamba mvua ilikuwa karibu kunyesha juu ya nchi (1 Wafalme 18:1), naye alikuwa ametangaza jambo hili kwa Ahabu. Akiwa imara katika ahadi ya Mungu wake, apanda Karmeli ili kuomba (1 Wafalme 18:42; Yakobo 5:18). Ajua, aamini kwamba mapenzi ya Mungu ni kupeleka mvua, na pamoja na hayo hana budi kuomba, ama sivyo mvua haitakuja. Maombi yake si namna tupu; ni nguvu halisi, ambayo ufanisi wake u karibu kudhihirika mbinguni. Mungu apenda mvua inyeshe, lakini mvua haitakuja ila kwa ombi la Eliya, ombi lililorudiwarudiwa kwa imani na saburi hata lilipotokea wingu la kwanza angani. Ili mapenzi ya Mungu yatimizwe, mapenzi haya yapasa kwa upande mmoja kutamkwa kwa ahadi, na kwa upande mwingine yapasa kupokewa na kushikwa na mwenye kuamini aombaye. Kwa hiyo yampasa kudumu katika maombi apate kumwonyesha Mungu wake kwamba imani yake yatazamia jibu, wala haitachoka hata litakapopatikana.

Hivi ndivyo maombi yapasavyo kufanywa kwa ajili ya wagonjwa. Ahadi ya Mungu, “Bwana atamwinua,” yapasa kutegemewa, na mapenzi yake ya kuponya yatambuliwe. Yesu mwenyewe atufundisha kuomba kwa imani itegemeayo jibu la Mungu; atwambia: “Yo yote myaombayo mkisali, aminini ya kwamba mnayapokea, nayo yatakuwa yenu” (Marko 11:24, R.V.). Baada ya maombi ya imani yapokeayo kimbele yale ambayo Mungu ameahidi, hufuata maombi ya kudumu, yasiyoyaacha yale yaliyoombwa hata Mungu atakapoitimiza ahadi yake (1 Wafalme 18:43). Yaweza kuwako kizuizi fulani kizuiacho ahadi isitimizwe; kikiwa kwa upande wa Mungu na haki yake (Kumb. 9:18), au kwa upande wa Shetani, na upinzani wake wa daima juu ya makusudi ya Mungu, kitu ambacho chaweza bado kukwamiza jibu la maombi (Dan. 10:12, 13). Yaweza pia kuwa kwamba imani yetu yahitaji kusafishwa (Mathayo 15:22-28). Liwe lolote lile, imani yetu yaitwa kudumu hata jibu litakapokuja. Yeye aombaye mara sita kwa bidii kisha akaishia hapo, hali imempasa kuomba mara saba (2 Wafalme 13:18, 19), ajinyima jibu la maombi yake.

Kudumu katika maombi, kudumu kuitiazo nguvu imani ya mwenye kuamini juu ya yote yaonekanayo kupinga jibu, ni muujiza halisi; ni mojawapo ya siri zisizochunguzika za maisha ya imani. Je, hakutwambii kwamba yeye aliyekombolewa na Mwokozi ni rafiki yake kweli kweli, kiungo cha mwili wake, na kwamba utawala wa ulimwengu na vipawa vya neema ya kimungu vyategemea kwa namna fulani maombi yake? Kwa hiyo, maombi si namna ya bure. Ni kazi ya Roho Mtakatifu, aombaye hapa duniani ndani yetu na kwa kupitia sisi, na kwa jinsi hiyo, ni yenye kufaa, ni ya lazima kama ilivyo kazi ya Mwana atuombeaye mbele ya kiti cha enzi cha Mungu. Yaweza kuonekana ni ajabu kwamba baada ya kuomba kwa hakika ya kusikiwa, na kuona ndani yake mapenzi ya Mungu, bado twahitaji kuendelea katika maombi. Walakini ndivyo ilivyo. Huko Gethsemane, Yesu aliomba mara tatu mfululizo. Juu ya Karmeli Eliya aliomba mara saba; na sisi, tukiiamini ahadi ya Mungu bila shaka, tutaomba hata tupokee jibu. Yule rafiki mwenye kuudhi wa usiku wa manane na yule mjane aliyemsonga hakimu dhalimu, wote ni vielelezo vya kudumu katika kutafuta lile lililokusudiwa.

Na tujifunze kutokana na maombi ya Eliya kujinyenyekesha, kutambua kwa nini nguvu ya Mungu haiwezi kudhihirishwa zaidi katika Kanisa, ikiwa katika kuponya wagonjwa, au katika kuongoka, au katika utakaso. “Hamna kitu, kwa sababu hamwombi” (Yakobo 4:2). Na yatufundishe pia saburi. Katika mambo yale ambapo uponyaji wachelewa, na tukumbuke kwamba vyaweza kuwako vizuizi ambavyo ni kudumu katika maombi tu kuwezako kuvishinda. Imani iachayo kuomba, au iruhusiwayo kulegea katika bidii yake, haiwezi kujitwalia yale ambayo Mungu, walakini, ameyatoa. Imani yetu katika ahadi za Maandiko isitikiswe na mambo yale ambayo bado yapita ufikio wetu. Ahadi ya Mungu yakaa ile ile: “Kule kuomba kwa imani kutamwokoa mgonjwa.” Maombi ya Eliya na yaitie nguvu imani yetu. Na tukumbuke kwamba yatupasa kuwaiga wale ambao kwa imani na saburi hurithi zile ahadi (Ebr. 6:12). Tukijifunza kudumu katika maombi, tunda lake litakuwa siku zote lililo tele zaidi, siku zote lililo dhahiri zaidi, nasi tutapata, kama Yesu alivyopata alipokuwa duniani, uponyaji wa wagonjwa, mara nyingi uponyaji wa papo hapo, utakaoleta utukufu kwa Mungu.