Je! Ugonjwa ni Adhabu?

“Kwa sababu hiyo wako wengi kwenu walio hawawezi na wagonjwa, na watu kadha wa kadha wamelala. Maana kama tungejipambanua nafsi zetu, tusingehukumiwa. Lakini tuhukumiwapo, twaadhibiwa na Bwana, ili tusije tukahukumiwa pamoja na dunia” (1 Wakorintho 11:30-32, R.V.).

Katika kuwaandikia Wakorintho, mtume Paulo hakuwa na budi kuwakaripia kwa jinsi walivyoiadhimisha Meza ya Bwana, hata wakajiletea adhabu za Mungu. Basi, hapa twauona ugonjwa kuwa ni hukumu ya Mungu, adhabu kwa ajili ya dhambi. Paulo auona kuwa ni adhabu ya kweli, kwa maana baadaye asema: “twaadhibiwa na Bwana,” tena aongeza ya kwamba wateswa hivyo ili kuwazuia wasizidi kuzama katika dhambi, wasije wakahukumiwa pamoja na dunia. Awaonya ya kuwa kama hawataki kuhukumiwa wala kuadhibiwa na Bwana, na kama kwa kujichunguza namna hiyo wangeligundua chanzo cha ugonjwa na kuzihukumu dhambi zao, Bwana asingehitaji tena kutumia ukali. Je! si dhahiri ya kwamba hapa ugonjwa ni hukumu ya Mungu, adhabu kwa ajili ya dhambi, na kwamba twaweza kuuepuka kwa kujichunguza na kujihukumu nafsi zetu?

Naam, ugonjwa, mara nyingi kuliko tunavyoamini, ni hukumu, ni adhabu kwa ajili ya dhambi. Mungu “hapendi kuwatesa wanadamu, wala kuwahuzunisha wana wa binadamu” (Maombolezo 3:33). Si bila sababu atunyimapo afya. Labda ni ili kutufanya tuwe waangalifu juu ya dhambi fulani tuwezayo kuitambua: “Usitende dhambi tena, lisije likakupata jambo lililo baya zaidi” (Yohana 5:14); labda ni kwa sababu mtoto wa Mungu amenaswa katika kiburi na kupenda dunia; au yamkini ni kwa sababu kujiamini nafsi au ukaidi vimechanganyika na utumishi wake kwa Mungu. Tena yawezekana kabisa ya kwamba adhabu haielekezwi juu ya dhambi yo yote iliyo dhahiri, bali yaweza kuwa ni tokeo la wingi wa dhambi uwaelemeao wanadamu wote. Hapo (Yohana 9:3), katika habari ya yule mtu aliyezaliwa kipofu, wanafunzi walipomwuliza Bwana, “Ni nani aliyetenda dhambi, mtu huyu au wazazi wake, hata azaliwe kipofu?” naye akajibu, “Huyu hakutenda dhambi, wala wazazi wake,” hasemi kamwe ya kwamba hakuna uhusiano baina ya dhambi na ugonjwa, bali atufundisha tusimshitaki kila mgonjwa kwa dhambi.

Vyo vyote iwavyo, ugonjwa sikuzote ni nidhamu impasayo kuiamsha fikira yetu juu ya dhambi, na kutugeuza nayo. Kwa hiyo mgonjwa yampasa aanze kwa kujihukumu, au kujipambanua nafsi yake (1 Wakorintho 11:31), kwa kujiweka mbele za Baba yake wa mbinguni akiwa na shauku ya kweli ya kuona lo lote lililoweza kumhuzunisha, au lililoifanya adhabu kuwa ya lazima. Akifanya hivyo aweza kuutumainia kwa hakika mwanga wa Roho Mtakatifu, atakayemwonyesha waziwazi kosa lake. Na awe tayari mara moja kuliacha lile atakaloligundua, na kujiweka mikononi mwa Bwana ili amtumikie kwa utii mkamilifu, lakini asidhani ya kwamba aweza kuishinda dhambi kwa juhudi zake mwenyewe. La, hilo haliwezekani kwake. Bali na awe, kwa nguvu zote za utashi wake, upande wa Mungu katika kuliacha lililo dhambi machoni pake, tena na aamini ya kuwa amekubaliwa naye. Akifanya hivyo atakuwa akijitoa nafsi yake, akijiweka wakfu upya kwa Mungu, akiwa radhi kuyatenda mapenzi yake matakatifu peke yake katika mambo yote.

Maandiko yatuhakikishia ya kwamba tukijichunguza nafsi zetu namna hii Bwana hatatuhukumu. Baba yetu humwadhibu mwanawe kadiri iliyo ya lazima tu. Mungu atafuta kutuokoa na dhambi na nafsi; mara tumfahamupo na kuachana na mambo hayo, ugonjwa waweza kukoma; umekwisha kutimiza kazi yake. Yatupasa tufike hata kuona maana ya ugonjwa, na kutambua ndani yake nidhamu ya Mungu. Mtu aweza kutambua kwa utepetevu ya kuwa atenda dhambi, bila kujaribu sana kuzieleza dhambi hizo ni nini; au akizieleza, aweza asisadiki ya kwamba yamkini kuziacha; naye akikusudia kuziacha, aweza akakosa kumtumaini Mungu ya kwamba atakomesha adhabu. Walakini, tazama jinsi ilivyo tukufu ile hakika ambayo maneno ya Paulo hapa yatupa!

Ewe mgonjwa mpendwa, je! wafahamu ya kwamba Baba yako wa mbinguni ana neno la kukukemea? Angependa ugonjwa wako ukusaidie kuligundua, na Roho Mtakatifu atakuongoza katika kulitafuta. Basi liache mara moja lile atakalokuonyesha. Usingependa hata kivuli kidogo kibaki kati ya Baba yako na wewe. Ni mapenzi yake kukusamehe dhambi yako na kukuponya ugonjwa wako. Katika Yesu twapata yote mawili, msamaha na uponyaji; ni pande mbili za kazi yake ya ukombozi. Akuita uishi maisha ya kumtegemea yeye kwa kiasi kikubwa zaidi kuliko hata sasa. Basi jitoe kwake kwa utii mkamilifu, na uende tangu sasa kama mtoto mchanga ukifuata nyayo zake. Ni kwa furaha Baba yako wa mbinguni atakavyokuokoa na adhabu, atakavyojidhihirisha kwako kuwa Mponyaji wako, atakavyokuleta karibu naye kwa kifungo hiki kipya cha upendo wake, atakavyokufanya mtii na mwaminifu katika kumtumikia. Ikiwa, kama Baba mwenye hekima na uaminifu, amelazimika kukuadhibu, tena ni kama Baba ndiye ayatakaye uponyaji wako, na atamaniye kukubariki na kukuhifadhi tangu sasa.