Dhambi na Ugonjwa

“Na kule kuomba kwa imani kutamwokoa mgonjwa, na Bwana atamwinua; hata ikiwa amefanya dhambi, atasamehewa. Ungameni dhambi zenu ninyi kwa ninyi, na kuombeana, mpate kuponywa” (Yakobo 5:15, 16).

Hapa, kama ilivyo katika Maandiko mengine, msamaha wa dhambi na uponyaji wa ugonjwa vimeunganishwa kwa ukaribu. Yakobo anatangaza kwamba msamaha wa dhambi utatolewa pamoja na uponyaji; na kwa sababu hii anatamani kuona ungamo la dhambi likiandamana na maombi yale yanayodai uponyaji. Twajua kwamba ungamo la dhambi ni lazima kabisa ili kupata kutoka kwa Mungu msamaha wa dhambi; wala si jambo dogo katika kupata uponyaji. Dhambi isiyoungamwa huweka kizuizi mbele ya maombi ya imani; na kwa vyovyote vile, ugonjwa waweza kurudi upesi, na hii ndiyo sababu.

Jambo la kwanza analoliangalia tabibu, aitwapo kumtibu mgonjwa, ni kutambua chanzo cha ugonjwa. Akifanikiwa, ana nafasi bora zaidi ya kuupiga vita. Mungu wetu naye hurudi hata kwenye chanzo cha kwanza cha ugonjwa wote—yaani, dhambi. Fungu letu ni kuungama, na fungu la Mungu ni kutoa msamaha uondoao chanzo hiki cha kwanza, ili uponyaji upate kutokea. Katika kutafuta uponyaji kwa njia ya dawa za kidunia, jambo la kwanza kufanya ni kumpata tabibu mwenye ustadi, kisha kufuata maagizo yake barabara; lakini katika kukimbilia maombi ya imani, ni lazima tukaze macho yetu, zaidi ya yote, kwa Bwana, na kujua hali yetu ilivyo mbele zake. Kwa hiyo Yakobo anatuonyesha sharti lililo la lazima kwa kupona kwa afya yetu; yaani, kwamba tuungame na kuiacha dhambi.

Ugonjwa ni tokeo la dhambi. Ni kwa sababu ya dhambi Mungu huuacha uwe; ni ili kutuonyesha makosa yetu, kutuadhibu, na kututakasa nayo. Kwa hiyo ugonjwa ni ishara inayoonekana ya hukumu ya Mungu juu ya dhambi. Si kwamba yeye aliye mgonjwa ni lazima awe mwenye dhambi kupita mwingine aliye na afya. Kinyume chake, mara nyingi ni wale walio watakatifu zaidi miongoni mwa watoto wa Mungu ndio awaadhibuo, kama tuonavyo katika mfano wa Ayubu. Wala si sikuzote ni kwa kukemea kosa fulani tuwezalo kulitambua kwa urahisi; hasa ni kwa kuvuta fikira za mgonjwa kwa kile kibakiacho ndani yake cha ubinafsi wa “mtu wa kale” na cha yote yamzuiayo asiwe na maisha yaliyowekwa wakfu kabisa kwa Mungu wake. Kwa hiyo hatua ya kwanza ampasayo mgonjwa kuichukua katika njia ya uponyaji wa kimungu itakuwa ni kumwacha Roho Mtakatifu wa Mungu auchunguze moyo wake na kumtia hatiani kwa dhambi. Baada ya hayo yatafuata, pia, kunyenyekea, azimio la kuachana na dhambi, na ungamo. Kuungama dhambi zetu ni kuziweka chini mbele za Mungu kama katika habari ya Akani (Yoshua 7:23), kuzitia chini ya hukumu yake, kwa kusudi thabiti la kutozianguka tena. Ungamo la kweli litafuatwa na hakika mpya ya msamaha.

“Hata ikiwa amefanya dhambi, atasamehewa.” Tukiisha kuungama dhambi zetu, imetupasa kupokea pia msamaha ulioahidiwa, tukiamini kwamba Mungu autoa kweli kweli. Imani katika msamaha wa Mungu mara nyingi haieleweki wazi ndani ya mtoto wa Mungu. Ama hana hakika, ama hurudi kwenye hisia za zamani, kwa wakati ule alipopokea msamaha kwa mara ya kwanza; lakini msamaha aupokeao sasa kwa ujasiri, kuwa jibu la maombi ya imani, utamletea uzima mpya na nguvu. Ndipo nafsi hupumzika chini ya nguvu ya damu ya Kristo, hupokea kutoka kwa Roho Mtakatifu hakika ya msamaha wa dhambi, na kwamba kwa hiyo hakuna kilichobaki cha kumzuia Mwokozi asimjaze upendo wake na neema yake. Msamaha wa Mungu huleta pamoja nao uzima wa kimungu utendao kwa nguvu ndani ya yeye auapokeaye.

Nafsi ikiisha kukubali kufanya ungamo la kweli na kupata msamaha, iko tayari kuishika ahadi ya Mungu; si vigumu tena kuamini kwamba Bwana atamwinua mgonjwa wake. Ni tunapokaa mbali na Mungu ndipo iwapo vigumu kuamini; ungamo na msamaha hutuleta karibu sana naye. Mara chanzo cha ugonjwa kikiondolewa, ugonjwa wenyewe waweza kuzuiwa. Sasa ni rahisi kwa mgonjwa kuamini kwamba ikiwa Bwana kwa lazima aliutia mwili chini ya adhabu ya dhambi zilizotendwa, vilevile atapenda kwamba, dhambi ikiisha kusamehewa, mwili huohuo upokee neema idhihirishayo upendo wake. Uwepo wake hufunuliwa, mwali wa uzima, wa uzima wake wa kimungu, huja kuuhuisha mwili, na mgonjwa huthibitisha kwamba mara asipotengwa tena na Bwana, maombi ya imani kweli humwokoa mgonjwa.