Uhitaji wa Kudhihirishwa kwa Nguvu za Mungu

Matendo 4:29-31 Je, yaruhusika kuomba namna hii sasa, kumwomba Bwana, “Uwajalie watumishi wako kunena neno lako kwa ujasiri wote, hali unyoosha mkono wako kuponya” (R.V.)? Na tuliangalie swali hili.

Je, Neno la Mungu halikutani na magumu mengi katika siku zetu kama vile wakati ule, nazo mahitaji ya sasa si mazito sawasawa? Na tujiwazie mitume katikati ya Yerusalemu na kutokuamini kwake; upande mmoja wakuu wa watu na vitisho vyao; upande wa pili, umati uliopofushwa ukikataa kumwamini yule Aliyesulubiwa. Sasa ulimwengu hauishambulii tena Kanisa waziwazi hivyo kwa sababu umepoteza hofu yake juu yake, lakini maneno yake ya kujipendekeza yana kutisha zaidi kuliko chuki yake. Unafiki nyakati nyingine ni mbaya zaidi kuliko jeuri. Na je, Ukristo wa namna tu, katika usingizi wa kutojali, si mgumu kufikika sawasawa na Uyahudi unaopinga waziwazi? Watumishi wa Mungu wanahitaji hata siku hizi, ili Neno lipate kuhubiriwa kwa ujasiri wote, kwamba nguvu za Mungu zidhihirishwe wazi katikati yao.

Je, msaada wa Mungu si wa lazima sasa kama vile wakati ule? Mitume walijua vema kwamba haikuwa ufasaha wa kuhubiri kwao ndio uliofanya kweli ishinde, bali walijua ulazima wa Roho Mtakatifu kudhihirisha uwepo wake kwa miujiza. Ilikuwa lazima Mungu aliye hai anyooshe mkono wake, ili pawe na uponyaji, miujiza, na ishara katika jina la Mwana wake mtakatifu Yesu. Ni kwa njia hii tu watumishi wake walifurahi, na, wakiwa wametiwa nguvu na uwepo wake, waliweza kulinena Neno lake kwa ujasiri na kuufundisha ulimwengu kuliogopa jina lake.

Je, ahadi za kimungu hazituhusu sisi pia? Mitume waliyategemea maneno haya ya Bwana kabla hajapaa mbinguni, “Enendeni ulimwenguni mwote, mkaihubiri Injili kwa kila kiumbe.., na ishara hizi zitafuatana na hao waaminio.., wataweka mikono yao juu ya wagonjwa, nao watapata afya” (Marko 16:15, 17, 18). Agizo hili laonyesha wito wa kimungu wa Kanisa; ahadi inayofuata laonyesha silaha yake ni nini, na latuthibitishia kwamba Bwana hutenda kwa shirika pamoja nalo. Ni kwa sababu mitume waliitegemea ahadi hii ndipo walimwomba Bwana awajalie uthibitisho huu wa uwepo wake. Walikuwa wamejazwa Roho Mtakatifu siku ya Pentekoste, lakini bado walihitaji zile ishara za kimiujiza ambazo nguvu zake hutenda. Ahadi ile ile ni yetu vilevile, kwa maana amri ya kuihubiri Injili haiwezi kutenganishwa na ahadi ya uponyaji wa kimungu inayoandamana nayo. Haipatikani popote katika Biblia kwamba ahadi hii haikuwa kwa ajili ya nyakati zijazo. Katika vizazi vyote watu wa Mungu wanahitaji sana kujua kwamba Bwana yu pamoja nao, na kuwa na uthibitisho usioweza kukanushwa wa jambo hilo. Kwa hiyo ahadi hii ni yetu; na tuombe itimizwe.

Je, twapaswa kuitegemea neema ile ile? Twasoma katika Matendo, mitume walipokwisha kuomba, “wote wakajaa Roho Mtakatifu, wakanena neno la Mungu kwa ujasiri.” “Na kwa mikono ya mitume zikafanyika ishara na maajabu mengi katika watu... nao walioamini wakazidi kuongezwa kwa Bwana, wingi wa wanaume na wanawake” (Matendo 4:31; 5:12-15). Ee, furaha kama nini na nguvu mpya kama nini watu wa Mungu wangepata leo kama Bwana angenyoosha mkono wake namna hii tena! Ni watenda kazi wangapi waliochoka na kukata tamaa wanaohuzunika kwamba hawaoni matunda zaidi, baraka zaidi juu ya kazi zao! Uzima kama nini ungeingia katika imani yao kama ishara za namna hii zingetokea kuwathibitishia kwamba Mungu yu pamoja nao! Wengi wasiojali wangeongozwa kutafakari, mwenye shaka zaidi ya mmoja angerudiwa na tumaini, na wasioamini wote wangenyamazishwa. Na yule mpagani maskini! Angeamkaje kama angeona kwa matendo lile ambalo maneno hayakumwezesha kulishika, kama angelazimishwa kukiri kwamba Mungu wa Mkristo ndiye Mungu aliye hai afanyaye maajabu, Mungu wa upendo abarikiye!

Amka, amka, jivike nguvu zako, Ee Kanisa la Kristo! Ijapokuwa umepoteza kwa kutokuwa mwaminifu kwako furaha ya kuona mkono wa Bwana ukinyooshwa kuponya ukiungana na kuhubiriwa kwa Neno, Bwana yu tayari kukujalia neema hii upya. Kiri kwamba ni kutokuamini kwako mwenyewe kulikokunyima jambo hili kwa muda mrefu hivyo, nawe uombe msamaha. Jivike nguvu za maombi.

“Amka, amka, jivike nguvu, Ee mkono wa Bwana; amka kama siku za kale” (Isaya 51:9).