Kudumu Katika Kuomba

Luka 18:1-8 Ulazima wa kuomba kwa kudumu ndio siri ya maisha yote ya kiroho. Ni baraka iliyoje kuweza kumwomba Bwana neema fulani hata atakapoitoa, tukijua kwa hakika ya kuwa ni mapenzi yake kuyajibu maombi; lakini ni fumbo lililoje kwetu katika wito wa kudumu katika kuomba, kubisha hodi mlangoni pake kwa imani, kumkumbusha ahadi zake, na kufanya hivyo bila kuchoka hata atakapoinuka na kutupatia haja yetu! Je! uhakika kwamba maombi yetu yaweza kupata kwa Bwana kile ambacho asingekitoa vinginevyo, si uthibitisho ulio dhahiri ya kuwa mwanadamu ameumbwa kwa mfano wa Mungu, ya kuwa yeye ni rafiki yake, ya kuwa yeye ni mtenda kazi mwenzake, na ya kuwa waaminio ambao kwa pamoja huufanya Mwili wa Kristo hushiriki namna hii katika kazi yake ya maombezi? Ni maombezi ya Kristo ambayo Baba huyajibu, na ambayo huyapa fadhili zake za kimungu.

Zaidi ya mara moja Biblia hutueleza uhitaji wa kuomba kwa kudumu. Kuna sababu nyingi, na iliyo kuu kuliko zote ni haki ya Mungu. Mungu ametangaza ya kuwa dhambi lazima ichukue matokeo yake; basi dhambi ina haki juu ya ulimwengu unaoikaribisha na kubaki utumwani kwake. Mtoto wa Mungu ajaribupo kuuacha mpango huu wa mambo, ni lazima haki ya Mungu ikubali jambo hili; basi wakati wahitajiwa ili zile fursa ambazo Kristo amewapatia waaminio zilemee mbele ya kiti cha hukumu cha Mungu. Zaidi ya hayo, upinzani wa Shetani, ambaye sikuzote hutafuta kuzuia jibu la maombi, ni sababu ya jambo hili (Danieli 10:12, 13). Njia pekee ambayo kwayo adui huyu asiyeonekana aweza kushindwa ni imani. Ikisimama imara juu ya ahadi za Mungu, imani hukataa kushindwa, nayo huendelea kuomba na kungoja jibu, hata jibu likikawia, ikijua ya kuwa ushindi ni hakika (Waefeso 6:12-18).

Mwisho, kudumu katika kuomba ni jambo la lazima kwa ajili yetu sisi wenyewe. Kukawia kwa jibu kumekusudiwa kuijaribu na kuitia nguvu imani yetu; kwapasa kusitawishe ndani yetu nia thabiti isiyoziacha tena ahadi za Mungu, bali inayoyakana mambo yake yenyewe ili imtegemee Mungu peke yake. Ndipo hapo Mungu, akiiona imani yetu, hutukuta tu tayari kuipokea fadhili yake, naye hutupa. Atatupatia haki upesi, ajapokawia. Naam, pamoja na kukawia kote kunakohitajiwa, hatatuacha tungoje dakika moja iliyo nyingi kupita kiasi. Tukimlilia mchana na usiku, atatupatia haki upesi.

Kudumu huku katika kuomba kutakuwa rahisi kwetu mara tu tutakapofahamu kikamilifu imani ni nini. Yesu hutufundisha kwa maneno haya, “Na yo yote mtakayoyaomba katika sala mkiamini, mtapata” (Mathayo 21:22). Neno la Mungu linapotupa ruhusa kuomba neno lo lote, imetupasa mara moja kuamini ya kuwa twalipokea. Mungu hutupa; jambo hili twalijua kwa imani, nasi twaweza kusema kati ya Mungu na sisi ya kuwa tumekwisha lipokea, ijapokuwa yamkini ni baadaye tu ndipo tutakaporuhusiwa kuyaona matokeo yake hapa duniani. Ni kabla ya kuona au kuonja jambo lo lote ndipo imani hufurahi kwa kuwa imekwisha pokea, hudumu katika kuomba, na kungoja hata jibu lidhihirike. Lakini hata baada ya kuamini ya kuwa tumesikiwa, ni vema kudumu hata jambo hilo litakapotimia kabisa.

Jambo hili ni la maana sana katika kupata uponyaji wa kimungu. Nyakati nyingine, ni kweli, uponyaji huwa wa mara moja na kamili; lakini yaweza kutokea kwamba imetupasa kungoja, hata mgonjwa awapo ameweza kuuomba kwa imani. Nyakati nyingine pia dalili za kwanza za uponyaji hudhihirika mara moja; lakini baadaye maendeleo huwa ya taratibu, na kukatizwa na nyakati ambazo huzuiwa au ambazo maovu hurudi. Katika hali kama hizo ni jambo la maana kwa mgonjwa na kwa wale waombao pamoja naye kuamini nguvu ya kuomba kwa kudumu, ijapokuwa hawawezi kulifahamu fumbo lake. Kile ambacho Mungu huonekana mwanzoni kukikataa, hukitoa baadaye kwa maombi ya yule mwanamke Mkanaani, kwa maombi ya yule “mjane,” na kwa yale ya yule rafiki abishaye hodi usiku wa manane (Mathayo 15:22; Luka 18:3; 11:5). Bila kuangalia badiliko wala jibu, imani ile iliyo na msingi juu ya Neno la Mungu, nayo iendeleayo kuomba kwa kung’ang’ania, mwishowe hupata ushindi. “Na Mungu, je! hatawapatia haki wateule wake wamliliao mchana na usiku, naye ni mvumilivu kwao? Nawaambia, atawapatia haki upesi.” Mungu ajua jinsi ya kukawiza muda wote uhitajiwao, na pamoja na hayo kutenda upesi bila kungoja zaidi ya ipasavyo. Mambo hayo mawili yale yale yapasa kuwa ya imani yetu. Na tuishike kwa upesi mtakatifu ile neema tuliyoahidiwa, kama kwamba tumekwisha ipokea; na tulingoje kwa saburi isiyochoka jibu lililo la taratibu kuja. Imani ya namna hiyo ni ya kuishi ndani yake. Ni kwa kusudi la kuzaa ndani yetu imani hii ndipo ugonjwa hutuletewa, na uponyaji hutupewa, kwa maana imani ya namna hiyo zaidi ya yote humtukuza Mungu.