Roho Mtakatifu, Roho wa Uponyaji

1 Wakorintho 12:4, 9, 11 Ni nini kinachowatofautisha watoto wa Mungu? Utukufu wao ni upi? Ni kwamba Mungu hukaa katikati yao na kujidhihirisha kwao kwa nguvu (Kut. 33:16; 34:9, 10). Chini ya Agano Jipya kukaa huku kwa Mungu ndani ya mwamini kunadhihirika zaidi kuliko nyakati zilizopita. Mungu humtuma Roho Mtakatifu kwa Kanisa lake, ambalo ni Mwili wa Kristo, ili atende ndani yake kwa nguvu, na uhai wake na kufanikiwa kwake hutegemea yeye. Ni lazima Roho apate ndani yake uhuru kamili, usiozuiliwa, ili litambulike kuwa Kanisa la Kristo, Mwili wa Bwana. Katika kila zama Kanisa laweza kutazamia madhihirisho ya Roho, kwa maana ndiyo yanayounda umoja wetu usiovunjika; “mwili mmoja na Roho mmoja” (Efe. 4:4).

Roho hutenda kwa namna mbalimbali katika mshiriki huyu au yule wa Kanisa. Yamkini kujazwa Roho kwa ajili ya kazi moja maalum na siyo kwa ajili ya nyingine. Tena kuna nyakati katika historia ya Kanisa ambapo karama fulani za Roho hutolewa kwa nguvu, na wakati huohuo ujinga au kutokuamini kwaweza kuzuia karama nyingine. Popote pale unapopatikana uhai ulio tele zaidi wa Roho, twaweza kutazamia adhihirishe karama zake zote.

Karama ya uponyaji ni miongoni mwa madhihirisho mazuri sana ya Roho. Imeandikwa juu ya Yesu, “jinsi Mungu alivyomtia Yesu wa Nazareti mafuta... aliyekuwa akazunguka huku akitenda kazi njema, na kuponya wote walioonewa na Ibilisi” (Matendo 10:38). Roho Mtakatifu aliyekuwa ndani yake alikuwa Roho wa uponyaji, naye alikuwa vivyo hivyo katika wanafunzi baada ya Pentekoste. Hivyo maneno ya andiko letu yanaonyesha yale yaliyokuwa hali ya daima ya Kanisa la kwanza (linganisha kwa makini Matendo 3:7; 4:30; 5:12, 15, 16; 6:8; 8:7; 9:41; 14:9, 10; 16:18, 19; 19:12; 28:8, 9). Kumwagwa kwa wingi kwa Roho kulizaa uponyaji mwingi. Ni fundisho kubwa kama nini kwa Kanisa katika siku zetu!

Uponyaji wa kimungu ni kazi ya Roho Mtakatifu. Ukombozi wa Kristo hueneza utendaji wake wenye nguvu hata mwilini, na Roho Mtakatifu ndiye anayehusika kuutuma kwetu na kuudumisha ndani yetu. Mwili wetu hushiriki faida ya ukombozi, na hata sasa waweza kupokea dhamana yake kwa njia ya uponyaji wa kimungu. Ni Yesu aponyaye, Yesu atiaye mafuta na kubatiza kwa Roho Mtakatifu. Yesu, aliyewabatiza wanafunzi wake kwa Roho yeye yule, ndiye anayetutuma Roho Mtakatifu hapa duniani— ama kutuepusha na ugonjwa, au kuturudisha katika afya wakati ugonjwa umetushika.

Uponyaji wa kimungu huandamana na utakaso wa Roho. Ni ili kutufanya watakatifu ndipo Roho Mtakatifu hutufanya washirika wa ukombozi wa Kristo. Ndipo jina lake “Mtakatifu.” Kwa hiyo uponyaji autendao ni sehemu iliyo ndani ya utume wake wa kimungu, naye huutoa ama ili kumwongoza mgonjwa aongoke na kuamini (Matendo 4:29, 30; 5:12, 14; 6:7, 8; 8:6—8) au ili kuithibitisha imani yake kama ameshaongoka; hivyo humlazimisha aikane dhambi, na kujiweka wakfu kwa Mungu na kwa utumishi wake kikamilifu (1 Kor. 10:31; Yakobo 5:15, 16; Ebr. 12:10).

Uponyaji wa kimungu huelekea kumtukuza Yesu. Ni mapenzi ya Mungu kwamba Mwana wake atukuzwe, na Roho Mtakatifu hufanya hivyo ajapo kutuonyesha yale ambayo ukombozi wa Kristo hutufanyia. Ukombozi wa mwili upatikanao na mauti waonekana kuwa wa ajabu zaidi kuliko ule wa nafsi isiyoweza kufa. Kwa njia hizi mbili Mungu apenda kukaa ndani yetu kwa njia ya Kristo, na hivyo kuushinda mwili. Mara mwili wetu uwapo hekalu la Mungu kwa njia ya Roho, Yesu hutukuzwa.

Uponyaji wa kimungu hutokea popote pale ambapo Roho wa Mungu hutenda kwa nguvu. Uthibitisho wa jambo hili waweza kuonekana katika maisha ya Wanamatengenezo, na katika ya baadhi ya Wamoravia katika nyakati zao bora. Lakini bado kuna ahadi nyingine zihusuzo kumwagwa kwa Roho Mtakatifu ambazo hazijatimizwa hata wakati huu. Na tuishi katika kutazamia kutakatifu, tukimwomba Bwana azitimize ndani yetu.