Ugonjwa na Mauti

Zaburi 91:3, 6, 16; Zaburi 92:14 Pingamizi hili mara nyingi hutolewa juu ya maneno ya mtume Yakobo, “Kule kuomba kwa imani kutamwokoa mgonjwa”: Ikiwa tuna ahadi ya kuponywa sikuzote kwa kujibiwa maombi, itawezekanaje kufa? Na wengine huongeza: Mtu mgonjwa awezaje kujua kama Mungu, aliyeuweka wakati wa maisha yetu, hakuamua kwamba tutakufa kwa ugonjwa fulani? Katika hali kama hiyo, je, maombi hayangekuwa bure, na je, isingekuwa dhambi kuomba uponyaji?

Kabla ya kujibu, tungependa kueleza kwamba pingamizi hili haliwagusi wale wanaomwamini Yesu kuwa Mponyaji wa wagonjwa, bali linaligusa Neno la Mungu lenyewe, na ile ahadi iliyotangazwa waziwazi katika waraka wa Yakobo na kwingineko. Hatuna ruhusa ya kuzibadili wala kuziwekea mipaka ahadi za Mungu kila zinapotuletea ugumu fulani; wala hatuwezi kusisitiza kwamba tufafanuliwe waziwazi kabla hatujaweza kujiletea kuamini yale zinazoyanena. Ni juu yetu kuanza kwa kuzipokea bila kupinga; ndipo tu Roho wa Mungu aweze kutukuta katika hali ya moyo ambamo twaweza kufundishwa na kutiwa nuru.

Zaidi ya hayo, tungependa kueleza kwamba katika kuitafakari kweli ya kimungu iliyopuuzwa kanisani kwa muda mrefu, haiwezekani kueleweka mwanzoni. Ni kidogo kidogo tu ndipo umuhimu wake na maana yake hutambulikana. Kadiri inavyohuika, baada ya kupokewa kwa imani, Roho Mtakatifu ataifuatanisha na nuru mpya. Na tukumbuke kwamba ni kwa kutokuamini kwa Kanisa ndiko uponyaji wa kimungu umeliacha. Imani katika kweli za Biblia haipasi kutegemezwa juu ya majibu ya mtu huyu au yule. “Kwa wanyofu huzuka nuru gizani” (Zaburi 112:4) kwa ajili ya “wanyofu” walio tayari kujitiisha chini ya Neno la Mungu.

Pingamizi la kwanza ni rahisi kulijibu. Maandiko huweka miaka sabini au themanini kuwa kipimo cha kawaida cha maisha ya mwanadamu. Mwaminio ampokeaye Yesu kuwa Mponyaji wa wagonjwa atatosheka basi na tangazo la Neno la Mungu. Atajihisi huru kutumaini maisha ya miaka sabini, lakini si zaidi. Zaidi ya hayo, mtu wa imani hujiweka chini ya uongozi wa Roho, atakayemwezesha kuutambua mapenzi ya Mungu ikiwa jambo fulani litamzuia kufikia umri wa miaka sabini. Kila kanuni ina vighairi vyake, katika mambo ya mbinguni kama katika mambo ya duniani. Kwa hiyo, kwa jambo hili tuna hakika kwa kadiri ya Neno la Mungu, kwamba iwe kwa maneno ya Yesu au ya Yakobo, Baba yetu wa mbinguni hupenda, kama kawaida, kuwaona watoto wake wakiwa na afya njema wapate kufanya kazi katika utumishi wake.

Kwa sababu iyo hiyo hupenda kuwaweka huru kutoka ugonjwa mara wapatapo kuungama dhambi na kuomba kwa imani kwa ajili ya uponyaji wao. Kwa mwaminio aliyekwenda pamoja na Mwokozi wake, akiwa na nguvu itokayo katika uponyaji wa kimungu, ambaye mwili wake kwa hiyo u chini ya uvutano wa Roho Mtakatifu, si lazima kwamba wakati wake wa kufa ufikapo, afe kwa ugonjwa. Ku “lala usingizi katika Kristo Yesu”, ndivyo ilivyo mauti ya mwaminio wakati mwisho wa maisha yake umefika. Kwake yeye mauti ni usingizi tu baada ya uchovu, ni kuingia rahani. Ile ahadi, “Upate kufanikiwa, na kuishi siku nyingi katika nchi” (Waefeso 6:3), imeelekezwa kwetu tuishio chini ya Agano Jipya. Kadiri mwaminio ajifunzavyo kumwona katika Mwokozi Yeye “aliyeutwaa udhaifu wetu”, ndivyo azidivyo kuwa na uhuru wa kudai kutimizwa kwa ahadi hizi kihalisi: “Kwa siku nyingi nitamshibisha”; “Wakati wa uzee watazaa matunda, watakuwa wabichi wenye majani mengi”.

Andiko lilo hilo lahusu pingamizi la pili. Mgonjwa huona katika Neno la Mungu kwamba ni mapenzi yake kuwaponya watoto wake baada ya kuungama dhambi zao, na kwa kujibiwa maombi ya imani. Haifuati kwamba watasamehewa majaribu mengine; lakini kwa habari ya ugonjwa, wao huponywa nao kwa sababu hushambulia mwili, ambao umekuwa maskani ya Roho Mtakatifu. Basi mgonjwa apaswa kutamani uponyaji ili nguvu za Mungu zidhihirishwe ndani yake, na apate kumtumikia katika kuyatimiza mapenzi yake. Katika jambo hili hushikamana na mapenzi ya Mungu yaliyofunuliwa, na kwa yale yasiyofunuliwa yeye ajua kwamba Mungu atawajulisha nia yake watumishi wake waendao pamoja naye. Twapenda kusisitiza hapa kwamba imani si hoja ya kimantiki ipasayo kwa namna fulani kumlazimisha Mungu kutenda kwa kadiri ya ahadi zake. Bali ni mtazamo wa kutumaini wa mtoto amheshimuye Baba yake, ategemeaye upendo wake ili amwone akizitimiza ahadi zake, na ajuaye kwamba yeye ni mwaminifu kuupelekea mwili vilevile na roho ile nguvu mpya itiririkayo kutoka ukombozi, hata utakapofika wakati wa kuondoka.