Usiuangalie Mwili Wako

Warumi 4:19-21 Mungu alipoahidi kumpa Abrahamu mwana, huyo baba wa taifa asingaliweza kamwe kuiamini ahadi hii kama angaliuangalia mwili wake mwenyewe, uliokwisha kuwa mkongwe na kuchakaa. Lakini yeye hakutaka kuona kitu kingine ila Mungu na ahadi yake, nguvu na uaminifu wa Mungu aliyemhakikishia kutimizwa kwa ahadi yake.

Jambo hili latuwezesha kushika tofauti yote iliyopo kati ya uponyaji unaotarajiwa kutoka kwa dawa za kidunia na uponyaji unaotafutwa kutoka kwa Mungu peke yake. Tunapozikimbilia dawa kwa ajili ya uponyaji, uangalifu wote wa mgonjwa huwa juu ya mwili, akiuangalia mwili, bali uponyaji wa kimungu hutuita kuutoa uangalifu wetu mbali na mwili, na kujikabidhi wenyewe, nafsi na mwili, katika ulinzi wa Bwana, tukijishughulisha naye peke yake.

Kweli hii vivyo hivyo yatuwezesha kuona tofauti kati ya ugonjwa uliohifadhiwa kwa ajili ya baraka na uponyaji uliopokewa kutoka kwa Bwana. Wengine huogopa kuichukua ile ahadi iliyomo katika Yakobo 5 kwa maana yake halisi, kwa sababu wasema ugonjwa una faida zaidi kwa nafsi kuliko afya. Ni kweli kwamba katika habari ya uponyaji upatikanao kwa dawa za kidunia, watu wengi wangebarikiwa zaidi kwa kubaki wagonjwa kuliko kupata afya, lakini ni tofauti kabisa uponyaji utokapo moja kwa moja mkononi mwa Mungu. Ili kupokea uponyaji wa kimungu, dhambi lazima iungamwe na kukataliwa kwa kweli kabisa, mtu lazima ajisalimishe kwa Bwana kabisa, nafsi lazima itolewe kweli kweli iwe yote mikononi mwake, na mapenzi ya Yesu ya kuutunza mwili lazima yategemewe imara hata uponyaji uwe mwanzo wa maisha mapya ya ushirika wa karibu na Bwana.

Hivyo twajifunza kumkabidhi yeye kabisa utunzaji wa afya, na dalili ndogo kabisa ya kurudi kwa uovu huhesabiwa kuwa onyo la kutouangalia mwili wetu, bali kujishughulisha na Bwana peke yake.

Tofauti gani hii na wingi wa wagonjwa watafutao uponyaji kutoka kwa dawa. Ikiwa wachache wao wametakaswa kwa ugonjwa, wakijifunza kujisahau nafsi zao, ni wangapi zaidi walio wakivutwa na ugonjwa wenyewe kujishughulisha daima na nafsi zao na hali ya miili yao. Uangalifu usio na mwisho kama nini wautumiao katika kuangalia dalili ndogo kabisa, ya kufaa au isiyofaa! Shughuli ya kudumu kama nini kwao ni kula kwao na kunywa kwao, wasiwasi wa kuepuka hili au lile! Jinsi wanavyojishughulisha sana na yale wayaonayo kuwa haki yao kutoka kwa wengine, kwamba wanafikiriwa vya kutosha, kwamba wanauguzwa vizuri vya kutosha, kwamba wanatembelewa mara nyingi vya kutosha! Muda kiasi gani hutumiwa hivyo katika kuuangalia mwili na yale unayodai, badala ya Bwana na uhusiano ambao yeye hutafuta kuuweka na nafsi zao! Ee, ni wangapi walio, kwa ajili ya ugonjwa, wanaojishughulisha karibu na nafsi zao peke yao!

Haya yote ni tofauti kabisa uponyaji utafutwapo kwa imani kutoka kwa Mungu apendaye. Ndipo jambo la kwanza la kujifunza ni hili: Acha kuwa na wasiwasi juu ya hali ya mwili wako, umemkabidhi Bwana naye amechukua wajibu. Usipoona maendeleo ya haraka mara moja, bali kinyume chake dalili zikaonekana kuwa nzito zaidi, kumbuka ya kuwa umeingia katika njia ya imani, na kwa hiyo haikupasi kuuangalia mwili, bali kushikamana na Mungu aliye hai peke yake. Amri ya Kristo, “Msisumbukie . . . miili yenu” (Mathayo 6:25, R.V.), yatokea hapa katika nuru mpya. Mungu alipomwita Abrahamu asiuangalie mwili wake mwenyewe, ilikuwa ni ili apate kumwita katika zoezi kuu la imani lililowezekana, apate kujifunza kumwona Mungu na ahadi yake peke yake. Akitegemezwa na imani yake, alimtukuza Mungu, akisadiki ya kuwa Mungu atafanya alilokuwa ameahidi. Uponyaji wa kimungu ni kifungo cha ajabu cha kutufunga kwa Bwana. Mwanzoni mtu aweza kuogopa kuamini kwamba Bwana atanyosha mkono wake wenye nguvu na kuugusa mwili; lakini katika kulijifunza Neno la Mungu nafsi hupata ushujaa na tumaini. Mwishowe mtu huamua, akisema, Nautoa mwili wangu mikononi mwa Mungu; nami namwachia yeye utunzaji wake. Ndipo mwili na hisia zake husahauliwa, na Bwana na ahadi yake peke yao ndio waonekanao.

Msomaji mpendwa, je! wewe nawe utaingia katika njia hii ya imani, iliyo bora sana kuliko ile ambayo ni desturi kuiita ya asili? Uende katika hatua za Abrahamu. Jifunze kwake kutouangalia mwili wako mwenyewe, na kutokutia shaka kwa kutokuamini. Kuuangalia mwili huzaa mashaka, bali kushikamana na ahadi ya Mungu na kujishughulisha naye peke yake huingiza katika njia ya imani, njia ya uponyaji wa kimungu, imtukuzayo Mungu.