Agosti

Agosti 1

“Kwa maana imetupasa sisi sote kudhihirishwa mbele ya kiti cha hukumu cha Kristo; ili kila mtu apokee mambo aliyoyatenda kwa mwili wake, kadiri alivyotenda” (2 Wakorintho 5:10).

Haitakuwa siku ya taabu na jaribu sikuzote. Siku moja, tutasikia majina yetu yakitangazwa mbele ya ulimwengu wote, na kumbukumbu ikisomwa ya mambo tuliyokwisha yasahau tangu zamani. Jinsi mioyo yetu itakavyotetemeka, na vichwa vyetu vitakavyoinama, tutakaposikia majina yetu wenyewe yakiitwa, na kisha Bwana atakaposimulia ushindi na huduma ambazo sisi wenyewe tulizisahau! Na, labda, toka safu za waliookolewa ataziita mbele nafsi tulizomshindia Kristo, na nafsi ambazo nazo zilizishinda, na tuonapo matokeo ya mambo ambayo, labda, yalionekana kuwa madogo tu wakati ule, tutaanguka mbele ya kiti cha enzi, na kusema, “Si sisi, Bwana, si sisi, bali jina lako upe utukufu!”

Wapenzi, kurasa zinapanda kila siku, kwa ajili ya kumbukumbu ya maisha yetu. Sisi wenyewe twapanga herufi, kwa tendo la kila dakika. Mikono isiyoonekana inatengeneza vibao, na hivi karibuni kumbukumbu itaandikishwa, na kusomwa mbele ya wasikilizaji wa ulimwengu wote, na katikati ya mambo ya milele.

Agosti 2

“Na upole wako umenikuza” (Zaburi 18:35).

Yule Mfariji mbarikiwa ni mpole, mwenye huruma, na amejaa saburi na upendo. Jinsi yalivyo mapole matendo ya Mungu hata kwa wenye dhambi! Jinsi ulivyo na saburi uvumilivu wake! Jinsi ilivyo na huruma nidhamu yake, kwa watoto wake mwenyewe wakosao! Jinsi alivyomwongoza Yakobo, Yusufu, Israeli, Daudi, Eliya, na watumishi wake wote wa kale, hata wakaweza kusema kweli, “Na upole wako umenikuza.”

Moyo ambao Roho Mtakatifu hukaa ndani yake sikuzote utaonyeshwa kwa upole, unyenyekevu, utulivu, upole wa moyo, na uvumilivu. Roho ya jeuri na dhihaka, tabia ya ukali, jibu kali, na neno la kuumiza—yote haya ni ya mwili, lakini hayana sehemu yoyote pamoja na mafundisho mapole ya Mfariji.

Yule Njiwa Mtakatifu hujiepusha na roho yenye makelele, yenye ghasia, yenye msisimko, na yenye kulipiza kisasi, naye hupata makao yake katika kifua kinyenyekevu cha nafsi yenye amani. “Tunda la Roho ni utu wema, upole.”

Bwana, unifanye mpole. Uituliza roho yangu. Uisafishe tabia yangu. Nipe niwe na Kristo katika mwenendo wangu na hata sauti yangu vilevile kama moyoni mwangu.

Agosti 3

“Basi nyenyekeeni chini ya mkono wa Mungu ulio hodari” (1 Petro 5:6).

Shinikizo la mahali pagumu hutufanya kuyathamini maisha. Kila mara maisha yetu yarudishwapo kwetu toka jaribu kama hilo, ni kama mwanzo mpya, nasi twajifunza vizuri zaidi thamani yake, na kuyafanyia mengi zaidi kwa ajili ya Mungu na mwanadamu.

Shinikizo hutusaidia kuyaelewa majaribu ya wengine, na hutuandaa kuwasaidia na kuwahurumia.

Kuna hali ya juujuu, isiyo na kina, ishikayo nadharia au ahadi kwa wepesi, na inenayo kwa maneno matupu juu ya kutokuamini kwa wale wajiepushao na kila jaribu; lakini mtu mume au mke aliyeteseka sana kamwe hafanyi hivi, bali ana huruma na upole mwingi, naye ajua maana halisi ya kuteseka.

Hii ndiyo Paulo aliyoimaanisha aliposema, “Mauti hutenda kazi ndani yetu, bali uzima ndani yenu.” Majaribu na mahali pagumu vinahitajika ili kutusukuma mbele; kama vile mioto ya tanuru katika tumbo la meli ile kubwa itoavyo nguvu isukumayo pistoni, iendeshayo injini, na kuisukuma meli ile kubwa ivuke bahari, ikikabili pepo na mawimbi.

Agosti 4

“Bali ninyi hammo katika mwili, bali katika Roho, ikiwa Roho wa Mungu anakaa ndani yenu. Lakini mtu awaye yote asipokuwa na Roho wa Kristo, huyu si wake” (Warumi 8:9).

Mtu wa kiroho si sana mtu aliye na tabia ya kiroho iliyo imara kama ni mtu aliyejaa Roho Mtakatifu. Ndiyo maana mtume alisema: “Ninyi hammo katika mwili, bali katika Roho, ikiwa Roho wa Mungu anakaa ndani yenu.”

Basi utukufu wa uumbaji mpya si tu kwamba huiumba upya roho ya mwanadamu, bali kwamba huiandaa iwe makao ya Mungu mwenyewe, na kuifanya itegemee jua, kama mtoto amtegemeavyo mama. Kwa hiyo, uroho ulio juu kabisa ni kule kukosa kabisa uwezo, kutegemea kabisa, na kumilikiwa kikamilifu na Roho Mtakatifu. Kwa hiyo, tendo lile zuri la Kristo la kuwapulizia wanafunzi wake, na kuwapa toka midomoni mwake Roho yule yule aliyekuwa tayari ndani yake, lilidhihirisha kwa namna dhahiri kabisa utukufu wa juu wa uumbaji mpya. Na Roho Mtakatifu atumilikipo hivyo, huijaza kila sehemu ya nafsi yetu.

Agosti 5

“Mtu akiisikia sauti yangu, na kuufungua mlango, nitaingia kwake, nami nitakula pamoja naye, na yeye pamoja nami” (Ufunuo 3:20).

Baadhi yetu twakufa njaa, tukishangaa kwa nini Roho Mtakatifu hatujazi. Twapokea tele, lakini hatutoi nje. Itoe baraka uliyo nayo, anza mipango mikubwa zaidi ya utumishi na baraka, nawe utaona hivi karibuni ya kuwa Roho Mtakatifu yu mbele yako, naye atakutangulia “kwa baraka za wema,” na kukupa yote awezayo kukuamini uwape wengine.

Kuna jambo zuri katika asili lililo na mifano yake ya kiroho. Hakuna muziki wa mbinguni kama kinubi cha Aeoli, na kinubi cha Aeoli si kitu ila mkusanyiko wa nyuzi za muziki zilizopangwa kwa upatano, kisha zikaachwa ziguswe na vidole visivyoonekana vya pepo zizungukazo. Na pumzi ya mbinguni ielea juu ya nyuzi, husemwa ya kuwa noti karibu za kimungu huelea hewani, kana kwamba kwaya ya malaika ilikuwa ikizunguka na kuzigusa nyuzi.

Na hivyo yawezekana kuiweka mioyo yetu wazi hivyo kwa mguso wa Roho Mtakatifu hata aweze kuipiga apendavyo, tunapongoja kwa utulivu katika njia ya utumishi wake.

Agosti 6

“Kwa kuwa wote wanaoongozwa na Roho wa Mungu, hao ndio wana wa Mungu” (Warumi 8:14).

Roho Mtakatifu mbarikiwa ni Kiongozi wetu, Mwongozi wetu, na Mahali petu pa Kupumzikia. Kuna nyakati atusukumapo mbele katika maombi, katika utumishi, katika mateso, katika uzoefu mpya, wajibu mpya, na madai mapya ya imani, na tumaini, na upendo, lakini kuna nyakati atuzuiapo katika shughuli yetu, na kutupumzisha chini ya bawa lake litufunikalo, na kututuliza katika mahali pa siri pake Aliye juu, akitufundisha masomo mapya, akitupulizia nguvu au utimilifu ulio na kina zaidi, kisha akituongoza mbele tena, kwa amri yake peke yake. Yeye ni Kiongozi wa kweli wa mtakatifu, na Mwongozi wa kweli wa Kanisa, Mshauri wetu wa ajabu, Rafiki yetu asiyekosea; na yeye atakayeukana uongozi wa binafsi wa Roho Mtakatifu ili apate kuliheshimu Neno la Mungu kuwa kiongozi wetu wa pekee, sharti alivunjie heshima lile neno lingine la ahadi, ya kuwa kondoo wake wataijua sauti yake, na ya kuwa watoto wake wasikiao na kutii watasikia sauti nyuma yao ikisema, “Hii ndiyo njia, ifuateni.”

Agosti 7

“Tukijua neno hili, ya kuwa utu wetu wa kale umesulibishwa” (Warumi 6:6).

Ni jambo la imani tupu, na imani na kuona sikuzote hutofautiana, hata kwa hisia zako haionekani kuwa hivyo, lakini imani yako sharti bado iihesabu kuwa hivyo. Hii ni hali ngumu sana kuishika, na ni kadiri tumwaminivyo Mungu kabisa ndipo twawezapo kuhesabu hivyo juu ya Neno lake na kazi yake, lakini tufanyapo hivyo, imani itaigeuza kuwa jambo halisi, nayo itakuwa hivyo hasa.

Maneno haya mawili, “jitoe” na “hesabu,” ni maneno ya siri ya kuingia katika uzima wa ufufuo. Ni kama makali mawili ya ule “Upanga wa Roho” ambao kwao twaingia katika kusulibishwa pamoja na Kristo.

Kitendo hiki cha kujitoa na kuhesabu huku kwa imani vyatambuliwa katika Agano Jipya kuwa alama ya hatua dhahiri kabisa ya uamuzi katika maisha ya kiroho. Halimaanishi ya kuwa twatazamiwa kupitia kifo kinachoendelea daima, bali ya kuwa pawe na kitendo kimoja dhahiri kabisa cha kufa, na kisha tabia ya kudumu ya kujihesabu kuwa tumekufa, na kukabili kila jambo toka msimamo huu.

“Jihesabuni kuwa wafu kwa dhambi kweli, bali walio hai kwa Mungu, katika Yesu Kristo.”

Agosti 8

“Iweni kama hua” (Yeremia 48:28).

Wapole kama hua, ndivyo Kristo aitafsirivyo ile alama nzuri. Na hivyo Roho wa Mungu ni usafi wenyewe. Hawezi kukaa katika moyo mchafu. Hawezi kudumu katika nia ya asili. Ilinenwa juu ya yale mafuta ya kale, “Hayatamiminwa juu ya mwili wa mwanadamu.”

Usafi ule Roho Mtakatifu auletao ni kama mmea mdogo mweupe usio na waa uotao toka lundo la samadi, au udongo mweusi, bila chembe moja ya uchafu kushikamana na uso wake ung’aao, usio na waa kama bawa la malaika.

Basi Roho Mtakatifu hutoa usafi wa moyo utoao ulinzi wake wenyewe, kwa maana kimsingi hautofautiani na vitu vibaya viotavyo kando yake. Waweza kuzungukwa kwa kila upande na uovu, lakini haujatiwa unajisi na ni safi kwa sababu asili yake yenyewe kimsingi ni takatifu na ya kimungu. Kama manyoya ya hua, hauwezi kutiwa uchafu, bali hutoka katika dimbwi la matope bila kutiwa waa wala uchafu na yale maji ya giza, kwa sababu unalindwa na kifuniko chenye mafuta kizuiacho kila unajisi na kuufanya usiathirike na mguso wa kila waa.

Agosti 9

“Ataweka mikono yake miwili juu ya kichwa cha yule mbuzi aliye hai, na kuungama juu yake maovu yote ya wana wa Israeli; makosa yao na dhambi zao” (Mambo ya Walawi 16:21).

Uovu wowote ujitokezapo, na utambuzi wa kitu chochote kisicho kitakatifu ugusapo hisia zetu za ndani, ni pendeleo letu papo hapo kumkabidhi Roho Mtakatifu na kukiweka juu ya Yesu, kama kitu kilichokwisha sulibishwa pamoja naye, na kama zamani, katika habari ya sadaka ya dhambi, kitachukuliwa nje ya kambi na kuteketezwa kikawa majivu.

Yaweza kuwako mateso ya kina, yaweza kuwako maumivu ya muda mrefu, yaweza kuwa halisi mno; lakini katika yote hayo patakuwa na hisia tamu na takatifu ya uwepo wa Mungu, na usafi mkuu katika roho yetu yote, na kutengwa kwetu na uovu uteketezwao. Kweli, utachukuliwa nje ya kambi, hata bila harufu ya miali juu ya mavazi yetu.

Ni baraka kubwa mno kumwacha Roho Mtakatifu aviue vitu. Hakuna panga ila lake liwezalo kupita kikamilifu hivyo kati yetu na uovu, hata liteketeze dhambi bila kuigusa roho.

Bwana Yesu, Sadaka yangu ya Dhambi, naiweka dhambi yangu, nafsi yangu, hali yangu yote, juu ya Msalaba wako. Uniteketeze kwa moto wako mtakatifu, na uniache nife kwa vyote isipokuwa wewe!

Agosti 10

“Hauna ila ndani yako” (Wimbo Ulio Bora 4:7).

Roho Mtakatifu mbarikiwa amilikiye moyo uliojiweka wakfu ana shauku kubwa kwa ajili ya maisha yetu yaliyo juu kabisa, naye hutuangalia kwa upendo ulio na hisia, hata wenye wivu. Ni nzuri sana tafsiri ya kweli ya fungu lile la kawaida katika Waraka wa Yakobo, “Roho akaaye ndani yetu hutupenda hata kufikia wivu.”

Moyo wa Roho Mtakatifu una shauku kubwa katika kutuhifadhi na kila waa na ila, na kutuleta katika uwezekano ulio juu kabisa wa mapenzi ya Mungu.

Bwana arusi wa Mbinguni angependa Kanisa lake lisiwe tu bila kila waa, bali pia bila “kunyanzi, wala lo lote kama hilo.” Waa ni alama ya dhambi, bali kunyanzi ni ishara ya udhaifu, uzee, na kuchakaa, naye hataki mguso wowote wa namna hiyo uharibuo sura takatifu za Mpenzi wake; na hivyo Roho Mtakatifu, aliye Mtekelezaji wa mapenzi yake, na Mjumbe wa kimungu ampelekaye kumwita, kumtenga, na kumleta nyumbani Bibi arusi wake, ana shauku ya wivu katika kutimiza ndani yetu mapenzi yote ya Bwana.

Bwana, uniondolee kila ila na alama ya udhaifu na kuchakaa, na unifanye niwe Bibi arusi wako asiye na waa.

Agosti 11

“Nchi hii yote uionayo” (Mwanzo 13:15).

Maandalizi halisi ya neema yake hutoka katika maono ya ndani.

Yeye awekaye silika katika kifua cha ndege yule wa mbali ili avuke bara akitafuta jua la kiangazi katika nchi ile ya Kusini ni mwema mno kuweza kumdanganya, na kwa hakika kama alivyoiweka silika kifuani mwake, ndivyo alivyoyaweka pia yale matulizo ya upepo mwanana na jua la mchipuko huko ili likutane naye afikapo.

Yeye aliyempa Ibrahimu maono ya Nchi ya Ahadi, alisema pia kwa kweli na upendo usio na mpaka: “Nchi hii yote uionayo nitakupa wewe.” Yeye apuliziaye mioyoni mwetu tumaini la mbinguni, hatatudanganya wala kutupungukia tusongapo mbele hata kutimizwa kwake. Hakuna kutokuaminika ndani yake yeye aliyesema: “Kama sivyo, ningaliwaambia,” nasi twaweza kujua ya kuwa hatatudanganya kamwe wala kutupungukia, bali yote ayafunuayo kwa Roho wake Mtakatifu atayafanya kuwa yetu, tusongapo mbele na kuingia katika kutimizwa kwake.

Bwana, nipe kwanza maono kisha ushindi. Nionyeshe urithi wangu wote, kisha unipe wote katika Kristo Yesu.

Agosti 12

“Si sisi wenyewe, bali Kristo Yesu” (2 Wakorintho 4:5).

Ushawishi wako wa Kikristo, sifa yako kama mtenda kazi wa Mungu, na cheo chako kati ya ndugu zako, vyaweza kuwa sanamu ambayo lazima ufe kwayo, kabla hujaweza kuwa huru kuishi kwa ajili yake peke yake.

Kama umewahi kuangalia herufi juu ya ukurasa uliochapishwa, lazima uwe umeona ya kuwa herufi ndogo “i” sikuzote ina nukta juu yake, na ni nukta ile iinuayo juu ya herufi nyingine katika mstari.

Basi, kila mmoja wetu ni “i” ndogo, na juu ya kila mmoja wetu kuna nukta ndogo ya kujiona bora, ya utashi wa nafsi, ya kutafuta faida ya nafsi, ya kujiamini nafsi, ya kujiridhisha nafsi, au kitu fulani tushikamanacho nacho na kupigania, ambacho hakika kinadhihirisha maisha ya nafsi kana kwamba ni mlima wa umuhimu halisi.

Herufi hii “i” ni mshindani wa Yesu Kristo, na adui wa Roho Mtakatifu, na wa amani yetu na uzima wetu, na kwa hiyo Mungu ameamuru kifo chake, na Roho Mtakatifu, kwa upanga wake wa moto angoja kuiharibu, ili tupate kuingia kwa milango na kuufikia Mti wa Uzima. Bwana, unisonge nje kwa utimilifu wako kama vile utukufu wa Bwana ulivyomkosesha Musa nafasi katika Maskani.

Agosti 13

“Mawingu na giza yamemzunguka pande zote” (Zaburi 97:2).

Kuwapo kwa mawingu juu ya anga lako, na majaribu katika njia yako, ni ushahidi ulio bora kabisa ya kwamba unaifuata nguzo ya wingu, na unatembea mbele za uso wa Mungu. Iliwapasa kuingia katika wingu kabla hawajaweza kuuona utukufu wa kugeuka sura, na muda mfupi baadaye wingu lile lile likawa gari la kumpokea Bwana apaaye, nalo bado langoja likiwa gari litakaloleta kuja kwake kutukufu.

Bado ni kweli ya kuwa ijapokuwa “mawingu na giza yamekizunguka kiti chake cha enzi, rehema na kweli” zi daima katikati yao, nazo “zitatangulia mbele za uso wake.”

Labda matumizi ya wingu yaliyo mazuri na yenye neema kupita yote yalikuwa ni kuwakinga na jua kali. Kama mwavuli mkubwa, ile nguzo yenye fahari ilitandaza kivuli chake juu ya kambi, na kuwa kivuli cha kuwahifadhi na hari iunguzayo katika jangwa lisilo na miti. Hakuna mtu ambaye hajapata kulihisi jua la Mashariki awezaye kuthamini kikamilifu jinsi jambo hili linavyomaanisha—kivuli wakati wa hari.

Basi Roho Mtakatifu huja kati yetu na miale ya moto iunguzayo ya huzuni na jaribu.

Agosti 14

“Msiwaguse masihi wangu, wala msiwadhuru nabii zangu” (Zaburi 105:15).

Ningependelea kucheza na umeme wa radi uliogawanyika, au kushika mikononi mwangu nyaya zilizo hai, zenye mkondo wao wa moto, kuliko kunena neno la uzembe juu ya mtumishi yeyote wa Kristo, au kurudia bure mishale ya masingizio ambayo maelfu ya Wakristo wanaivurumisha juu ya wengine, kwa hasara ya nafsi zao na miili yao wenyewe.

Labda mara nyingi wajiuliza, kwa nini ugonjwa wako haujaponywa, roho yako haijajazwa furaha ya Roho Mtakatifu, au maisha yako hayajabarikiwa na kufanikiwa. Yaweza kuwa mshale fulani uliouvurumisha kwa sauti ya hasira, au katika saa ya bure ya uchoyo wa maneno, unakufuatia njiani mwake, kama ukamilishavyo mzunguko urudishao sikuzote kwenye chanzo ulikotoka kila mshale wa uchungu, na kila neno la bure na baya.

Na tukumbuke ya kuwa tuwateswapo au kuwadhuru watoto wa Mungu, twamtesa yeye tu, na kujidhuru wenyewe zaidi sana.

Bwana, unifanye niwe na hisia kwa hisia na haki za wengine kama nilivyokuwa mara nyingi kwa zangu mwenyewe, na uniache niishi na kupenda kama wewe.

Agosti 15

“Atawaongoza awatie kwenye kweli yote” (Yohana 16:13).

Roho Mtakatifu haji ili atupe madhihirisho ya ajabu, bali kutoa uzima wake na nuru yake, na kadiri tumkaribiavyo zaidi, ndivyo mwangaza wake na uongozi wake utakavyokuwa rahisi zaidi. Huja ili “atuongoze atutie kwenye kweli yote.” Huja kumulika nuru juu ya mioyo yetu wenyewe, na kutuonyesha nafsi zetu. Huja kumfunua Kristo, kuyatoa, na kisha kuyaangaza, Maandiko Matakatifu, na kuyafanya mambo ya kimungu kuwa dhahiri na wazi kwa ufahamu wetu wa kiroho. Huja kama Roho wa hekima na ufunuo katika kumjua Kristo, ili “kuyatia nuru macho ya mioyo yetu, tupate kujua tumaini la mwito wake ni nini, na utajiri wa utukufu wa urithi wake katika watakatifu ni nini, na ukuu usio na kipimo wa uweza wake ndani yetu tuaminio ni nini, kwa kadiri ya utendaji wa nguvu za uweza wake.”

Ee Roho wa Nguvu! kwa moto wa mbinguni, Uzivalishe nafsi zetu, uzivuvie ndimi zetu; Unyoshe Mkono wako wenye nguvu, Urudishe karama zako za Pentekoste, Maajabu ya uwezo wako tena Uyaonyeshe katika kila nchi.

Agosti 16

“Mimi nipo pamoja nanyi siku zote” (Mathayo 28:20).

Ee, jinsi kunavyotusaidia na kutufariji katika taabu ya maisha kujua ya kuwa tunaye pamoja nasi Kristo aliyeitumia miaka thelathini ya kwanza ya maisha yake katika duka la useremala huko Nazareti, akitikisa nyundo, akiwa amefunikwa na jasho na mavumbi machafu, aliyechoka kimwili kama sisi tuchokavyo mara nyingi, na awezaye kuyaelewa mahangaiko yetu yote ya utumwa na kazi ngumu! naye ni Yeye apendaye bado kushiriki kazi zetu za kawaida na kutuandaa kwa shughuli zetu ngumu za mkono na akili!

Naam, dada mnyenyekevu, atakusaidia katika ubao wa kufulia na sinki la jikoni kwa furaha kama vile katika saa ya maombi. Naam, fundi mwenye shughuli, atakwenda pamoja nawe na kukusaidia kutikisa nyundo, au kushika msumeno, au kushika jembe katika taabu ya maisha, nawe utakuwa fundi bora zaidi, mfanyakazi mstadi zaidi, na mtu mwenye mafanikio zaidi, kwa sababu unaitwaa hekima yake kwa mambo ya kawaida ya maisha. Hakuna mahali wala wakati ambao yeye hana uwezo na hana nia ya kutembea kando yetu, kutenda kazi kwa mikono na akili zetu, na kujiunganisha katika ushirika wa upendo na utoshelevu kwa mahitaji yetu yote na kazi na majaribu, na kuthibitisha utoshelevu wetu kwa mambo yote.

Agosti 17

“Semeni na ule Mwamba” (Hesabu 20:8).

Roho Mtakatifu ana hisia sana, kama upendo ulivyo sikuzote. Waweza kumshinda mnyama wa mwitu kwa mapigo na minyororo, lakini huwezi kuushinda moyo wa mwanamke kwa njia hiyo, wala kuupata upendo wa hali yenye hisia; huo lazima uposwe kwa migusano laini ya kuaminiana na upendo. Basi Roho Mtakatifu lazima apokewe kwa imani iliyo laini na yenye hisia kama moyo mpole ambao anagusana nao. Wazo moja la kutokuamini, usemi mmoja wa kutoamini kwa papara au wa woga, utazuia mara moja uhuru kamili wa matendo yake kama vile pumzi ya baridi kali ingenyausha petali za waridi au yungiyungi lililo na hisia nyingi kuliko yote.

Nena na ule Mwamba, usiupige. Mwamini Roho Mtakatifu na umtendee kwa uhakika ulio mpole kupita yote na tumaini lisiloyumbayumba, naye atakutana nawe kwa jibu na uhakika wa papo hapo.

Mpenzi, je, umeufikia ule mwamba huko Kadeshi? Je, umeifungua nafsi yako yote kwa utimilifu wa Roho, na kisha, kwa uhakika wa mtoto kwa mama, bibi arusi kwa mume, ua kwa mwanga wa jua, umepokea kwa imani, na wanywa uzima wake mbarikiwa?

Agosti 18

“Wale mia tatu wakazipiga tarumbeta” (Waamuzi 7:22).

Hatuoti hata kidogo, wakati mwingine, jinsi neno la haraka, usemi usio na fikira, tendo lisilo la busara, au kukiri kwa kutokuamini na woga kuwezavyo kuzuia manufaa yetu yaliyo juu kabisa, au kuyageuza mbali na fursa fulani kubwa ambayo Mungu amekuwa akituandalia.

Ijapokuwa Roho Mtakatifu huwatumia watu dhaifu, hataki wawe dhaifu baada ya kuwachagua na kuwaita. Ijapokuwa huvitumia vitu vipumbavu ili awaaibishe wenye hekima, hataki sisi tuwe wapumbavu baada ya kuja kutupa hekima yake na neema yake. Hutumia upumbavu wa kuhubiri, lakini si lazima, upumbavu wa wahubiri. Kama mkondo wa umeme, uwezao kutoa nguvu za watu elfu, ni lazima uwe na kiendeshi kizuri, na waya mdogo sana ni bora kuliko kamba kubwa sana.

Mungu ataka vyombo vinavyofaa kwa nguvu yake—mapenzi yaliyotolewa, mioyo iaminiyo, maisha yenye upatano, na midomo itiiyo mapenzi yake; na ndipo aweza kuvitumia vifaa vilivyo dhaifu kabisa, na kuvifanya vyenye uwezo katika Mungu hata kuangusha ngome.

Agosti 19

“Mwaminini Mungu” (Marko 11:22).

Yeye ataka kwetu imani kamili, naye atwambia ya kuwa kama tukiamini bila kuwa na shaka, tutapata lolote tuombalo. Mgusano hafifu kabisa wa kutokuamini utabatilisha tumaini letu.

Lakini tutapataje imani kamili kama hiyo? Je, yawezekana kwa asili ya mwanadamu? La, bali yawezekana kwa asili ya kimungu, yawezekana kwa Kristo aliye ndani yetu. Yawezekana kwa Mungu kuitoa; na Mungu huitoa. Lakini Kristo ndiye Mwenye kuianzisha na mwenye kuitimiza imani yetu, naye hutuamuru tuwe na imani ya Mungu, na tunapokuwa nayo kwa njia ya kupewa Roho wa Kristo, twaamini kama yeye.

Twaomba kwa jina lake, na katika asili yake hasa, nasi twaishi kwa imani ya Mwana wa Mungu aliyetupenda na kujitoa nafsi yake kwa ajili yetu. Upendo autakao kwetu si upendo wa kibinadamu tu, wala si hata kipimo cha upendo kilichotakiwa katika Agano la Kale, bali ni kitu kilicho juu zaidi. Amri mpya ni hii, Pendaneni, si kama nafsi zenu, bali kama mimi nilivyowapenda ninyi.

Upendo kama huo utawezekanaje? Katika hili upendo wetu umekamilishwa, kwa sababu kama yeye alivyo, ndivyo tulivyo na sisi katika ulimwengu huu. Upendo wetu ni upendo wake tu uliofanywa kazi ndani yetu, na kutolewa kwetu kwa njia ya Roho.

Agosti 20

“Hivyo hutukuzwa Baba yangu” (Yohana 15:8).

Njia ya kweli ya kumtukuza Mungu ni Mungu kuudhihirisha utukufu wake kwa kupitia sisi, ang’ae kupitia sisi kama vyombo vitupu vinavyoakisi utimilifu wake wa neema na uweza.

Jua hutukuzwa lipatapo nafasi ya kuonyesha nuru yake kwa kupitia dirisha la kioo, au kuiakisi toka kioo kisicho na waa au bahari ing’aayo kama kioo.

Hakuna kitu kimtukuzacho Mungu kuliko mtu mume au mke aliye dhaifu na asiyejiweza kuweza kushinda, kwa nguvu yake, mahali ambapo sifa za mwanadamu zilizo juu kabisa zitatuangusha, na kuchukua kwa nguvu ya kimungu katika kila namna ya taabu na mateso, roho iliyo dhaifu kwa asili, isiyo na msimamo, yenye ubinafsi, na yenye dhambi, ikigeuzwa kuwa utamu, usafi, nguvu na kusimama katika ushindi katikati ya hali ambazo sifa zake za asili zilipaswa kabisa kutomfaa. Akili isiyo na hekima wala nguvu kwa asili, ikiongozwa na hekima ya kimungu, na kuchukuliwa katika mkondo wa mpango mkuu na wenye nguvu, na kutumiwa kutimiza matokeo makubwa mno kwa ajili ya Mungu na mwanadamu—hiki ndicho kimtukuzacho Mungu.

Basi na nimtukuze Bwana wangu siku hii na kuipamba fundisho la Mungu katika mambo yote.

Agosti 21

“Vita hivi si vyenu” (2 Nyakati 20:15).

Jambo ni kuvihesabu vita kuwa vya Mungu. “Vita hivi si vyenu, bali ni vya Mungu.” Hamtahitaji kupigana katika vita hivi. Maadamu twavihesabu vihatari na majukumu kuwa vyetu, tutasumbuliwa na woga, lakini tutambuapo ya kuwa amejifunga kututunza, kama mali yake na wajumbe wake, tutahisi faraja na usalama usio na mpaka.

Nikimpeleka mtumishi wangu safari ndefu, mimi ndiye ninayewajibika kwa gharama zake na ulinzi wake, na Mungu akinipeleka mahali popote, yeye ndiye anayewajibika. Kama sisi tu wa Mungu, na kuyaweka maisha yetu, jamaa yetu, na yetu yote mikononi mwake, twaweza kujua ya kuwa atatutunza.

Kama mwili wetu ni wake, ni faida yake kututunza tuwe wazima, kama vile ilivyo faida ya mchungaji kuwa na kondoo wake wamelishwa vyema na kutunzwa vyema, na kuwa sifa kwake.

“Lakini Mungu ashukuriwe, atushindishaye daima.”

Simama, simama kwa ajili ya Yesu, Simama katika nguvu yake peke yake; Mkono wa mwili utakuangusha, Hamthubutu kuutegemea wenu wenyewe.

Agosti 22

“Mimi, Bwana, wa kwanza, na pamoja na wa mwisho” (Isaya 41:4).

Maelfu ya watu hukwama baada ya kuanza safari ile kubwa ya utakatifu, kwa sababu wametegemea uzoefu badala ya Mwenye kuuanzisha. Walidhani ya kuwa waliokolewa kabisa na kudumu toka dhambi zote, na katika furaha ya uzoefu wao wa kwanza hufikiri ya kuwa hawatajaribiwa wala kushawishiwa tena kamwe kama kabla, na watokapo kuingia katika mambo halisi ya maisha ya Kikristo na kujiona wakishindwa na kuanguka, hushangaa na kufadhaika, na kuamua ya kuwa lazima walikosea katika uzoefu wao, na hivyo hujaribu upya jambo lilo hilo, na kuanguka tena, hata mwishowe, wakiwa wamechoka na jaribio hilo, huamua ya kuwa uzoefu ule ni udanganyifu, au, kwa uchache, ya kuwa haukukusudiwa kwa ajili yao kamwe, na hivyo hurudi nyuma katika njia ya kale, na hali yao ya mwisho huwa mbaya kuliko ya kwanza.

Kile wanaume na wanawake wakihitajicho leo ni kujua, si utakaso kama hali, bali Kristo kama Mtu aliye hai.

Bwana Yesu, nipe moyo wako, imani yako, uzima wako, nafsi yako.

Agosti 23

“Kama yeye alivyo safi” (1 Yohana 3:3).

Mungu sasa akusudia kuzaa upya ndani yetu kile kielelezo kilichokwisha dhihirika katika Yesu Kristo, Mwana wa Mungu. Maisha ya Kikristo si kumwiga Kristo, bali ni uumbaji mpya wa moja kwa moja katika Kristo, na muungano na Kristo ni kamili kiasi kwamba hutupa asili yake mwenyewe na kuishi uzima wake mwenyewe ndani yetu, na ndipo si kuiga, bali ni chipukizi tu la ile asili iliyopandwa ndani.

Twaishi kwa mfano wa Kristo kwa sababu tuna uzima wa Kristo. Mungu haridhiki na kitu chochote kilicho pungufu ya ukamilifu. Aliutaka huo kwa Mwanawe. Hutaka huo kwetu, wala hapunguzi kipimo katika mwenendo wa neema, bali hutupandisha hata kufikia. Hashushi haki ya torati, bali hutaka kwetu haki izidiyo sana haki ya waandishi na Mafarisayo, na kisha hutupa. Hutuhesabia haki katika utakaso, naye asema juu ya uumbaji mpya, “Yeye atendaye haki ni mwenye haki, kama yeye alivyo mwenye haki.”

Bwana, uishi uzima wako hasa ndani yangu.

Agosti 24

“Upole wenu na ujulikane na watu wote” (Wafilipi 4:5).

Jaribio hasa la kujiweka wakfu ni utayari wetu si kutoa tu vitu vilivyo vibaya, bali kutoa haki zetu, na kuwa radhi kutii. Mungu aanzapo kuinyenyekeza nafsi, mara nyingi hutuagiza kuyatoa mambo yaliyo na umuhimu mdogo yenyewe, na hivyo kuivunja shingo yetu na kuinyenyekeza roho yetu.

Hakuna mtenda kazi Mkristo awezaye kutumiwa na Mungu kamwe hata utashi wa nafsi wenye kiburi uvunjike, na moyo uwe tayari kujitoa kwa kila mguso wa Mungu, hata uje kwa njia ya mtu yeyote.

Watu wengi wataka Mungu awaongoze katika njia yao wenyewe, wala hawatavumilia mamlaka wala kizuizi. Watatoa fedha zao, lakini wataka kuamuru zitumikeje. Watafanya kazi maadamu utawaacha wajipendeze wenyewe, lakini shinikizo lolote lijapo mara utagongana, si na neema ya kujisalimisha, bali na barua ya kujiuzulu, ikijitoa toka wadhifa fulani muhimu, na kuchochea jumuiya nzima ya rafiki wenye kukosoa, walio na mwelekeo uleule wa kuwa na maoni yao wenyewe na utashi wao wenyewe juu yake. Ni jambo liharibulo nguvu yote ya kweli.

Agosti 25

“Nami nitatia Roho yangu ndani yenu, na kuwaendesha katika amri zangu, nanyi mtazishika hukumu zangu na kuzitenda” (Ezekieli 36:27).

Hii ni zaidi sana ya moyo mpya. Huu ni moyo uliojazwa Roho Mtakatifu, Roho wa kimungu, ile nguvu itufanyayo tutembee katika amri za Mungu.

Hii ni hatua kubwa kupita zote ya uamuzi ijayo katika maisha ya Mkristo, ambapo ndani ya roho iliyofanywa upya wakati wa kuongoka, Mungu mwenyewe huja kukaa na kuifanya kuwa makao yake ya kudumu, na kuishika kwa nguvu yake kuu katika utakatifu na haki.

Basi, baada ya jambo hili kutokea, mtu angedhani ya kuwa tungeinuliwa katika roho yenye tumaini na furaha zaidi sana, lakini nabii hutoa picha iliyo tofauti sana. Asema jambo hili litokeapo tutajichukia nafsi zetu machoni petu wenyewe.

Ufunuo wa Mungu hutoa hisia ya ndani ya ubatili wetu na kutokufaa kwetu wenyewe, na hutuangusha kifudifudi mavumbini katika kujikana nafsi.

Kuingia kwa Roho Mtakatifu huisukuma nafsi mahali pake na kuifedhehesha nafsi milele, na utakatifu ulio juu kabisa ni kutembea katika kujikana nafsi.

Agosti 26

“Mjakazi wako hana kitu nyumbani, ila chupa ya mafuta” (2 Wafalme 4:2).

Alimwuliza, “Una nini nyumbani?” Naye akasema, “Sina kitu ila chupa ya mafuta.” Lakini chupa ile ya mafuta iliyatosha mahitaji yake yote, kama tu angejua jinsi ya kuitumia.

Kwa kweli iliwakilisha Roho Mtakatifu, na somo kuu la mfano huu ni ya kuwa Roho Mtakatifu ni wa kutosha mahitaji yetu yote, kama tu tukijua jinsi ya kumtumia.

Kilichohitajika kwake tu ni kupata vyombo vya kutosha kupokea mafuriko, kisha kumimina hata vyote vijae.

Na hivyo Roho Mtakatifu hupimwa tu kwa uwezo wetu wa kumpokea, na Mungu atakapo tuwe na utimilifu mkubwa zaidi, huwapasa kuufanyia nafasi kwa kuumba mahitaji makubwa zaidi.

Mungu hutupelekea vyombo vipya vijazwe Roho wake Mtakatifu katika mahitaji yatujiayo, na majaribu yatukutanayo. Hizi ni fursa za Mungu ili Mungu atupe zaidi ya nafsi yake, na tuyakabilipo huja kwetu kwa utimilifu mkubwa zaidi kwa kila hitaji jipya.

Bwana, unisaidie nikuone wewe katika hali zangu zote zenye kunijaribu na kuzifanya kuwa vyombo vya kupokea neema yako zaidi.

Agosti 27

“Msisumbukie maisha yenu” (Mathayo 6:25).

Bado Bwana anavitumia vitu vinavyodharauliwa. Majina yenyewe ya Mnazareti na Mkristo yalikuwa zamani maneno ya dharau. Hakuna mtu awezaye kuwa na wazo la Mungu lililo juu kabisa na kupendwa na kizazi cha wakati wake. Watu wanaotukanwa zaidi mara nyingi ndio wanaotumiwa zaidi.

Kuna maafa makubwa zaidi ya kutopendwa na kutoeleweka. Kuna mambo mabaya zaidi ya kuonekana katika wachache. Baraka nyingi kubwa za Mungu zimelala nyuma ya vitisha-ndege vya Shetani vya chuki na kupotoshwa. Roho Mtakatifu haoni haya kuwatumia watu wasiopendwa. Na kama akiwatumia, wana haja gani ya kujali watu?

Ee, na tuwe tu na kutambuliwa kwake na kuangaliwa kwa mwanadamu kutakuwa na maana ndogo, naye atatupa yote tukihitajiyo ya msaada na sifa ya kibinadamu. Na tutafute mapenzi yake tu, utukufu wake, kibali chake. Na tuende kwa ajili yake katika ujumbe ulio mgumu kabisa na kufanya kazi zilizo duni kabisa. Ni heshima ya kutosha ya kuwa yeye anatutumia na kutupeleka. Tusiogope siku hii kumfuata nje ya kambi, tukichukua mashutumu yake, na baada ya muda atalikiri jina letu lisilofaa mbele ya majeshi ya nchi na anga.

Agosti 28

“Kwa kadiri ya nguvu itendayo kazi ndani yetu” (Waefeso 3:20).

Tufikapo mahali pa muungano na Mungu, kwa njia ya Roho Mtakatifu akaaye ndani, twaingia katika urithi wa baraka ya nje na kuingia katika nchi ya milki yetu. Ndipo afya yetu ya mwili na nguvu vitujiavyo kwa njia ya nguvu ya maisha yetu ya ndani; ndipo lile ombi latimizwa, ya kwamba tutakuwa na afya na kufanikiwa, kama nafsi zetu zifanikiwavyo. Ndipo, tukiwa na ufalme wa Mungu na haki yake ndani yetu, mambo yote twaongezewa.

Utendaji wa nje wa Mungu sikuzote huenda sambamba na nguvu itendayo kazi ndani yetu. Mungu atawazwapo katika nafsi ya mwanadamu, ndipo Shetani na ulimwengu hulitambua upesi. Hatuna haja ya kutangaza nguvu yetu. Yesu hakuweza kusitirika, na nafsi iliyojaa nguvu ya kimungu na usafi yapasa kuwa kitovu cha kuvuta mioyo yenye njaa na maisha yanayoteseka.

Na tumpokee na kumtambua katika utukufu wake akaao ndani, na ndipo tutakapotwaa yote imaanishayo kwa maisha yetu katika utimilifu wake wote. Bwana, nipe “mahali pa kujificha kwa uweza wako,” na Kristo atukuzwe ndani yangu.

Agosti 29

“Kutii ni bora kuliko dhabihu” (1 Samweli 15:22).

Uponyaji wetu waonyeshwa hivyo kuwa thawabu ya pekee kwa utii. Basi, kama tukitaka kumpendeza Bwana na kupata thawabu ya wale wampendezao, hakuna huduma impendezayo kama sifa zetu.

Na tukutane naye daima kwa moyo wenye furaha na shukrani, naye atairudisha katika afya ya uso wetu na uzima uchangamkao na afya ichipukayo, ambayo ni mwangwi tu wa moyo wenye furaha.

Zaidi ya hayo, shukrani ni maandalizi bora kwa imani. Tumaini hukua chenyewe katika moyo wenye sifa. Shukrani huchukua upande wa jua wa njia na kutazama upande wa mng’ao wa Mungu, na ni kwa njia hii tu ndipo tuwezapo kumwamini kamwe. Kutokuamini hutazama taabu zetu, na bila shaka, huonekana kama milima, na imani hukatishwa tamaa na taswira hiyo. Tabia yenye shukrani sikuzote itapata sababu fulani ya kufurahi, na yenye huzuni itapata wingu katika anga lililo angavu kabisa, na inzi katika marhamu tamu kabisa. Na tusitawishe roho ya uchangamfu, nasi tutapata mengi mno katika Mungu na katika maisha yetu ya kututia moyo hata hatutakuwa na nafasi ya shaka au woga.

Agosti 30

“Heri ninyi mkiyatenda” (Yohana 13:17).

Wajua kidogo tu ile raha itokayo katika mapenzi yaliyotolewa, uchaguzi uliojisalimisha, ulimwengu ulioachwa, moyo mpole na mnyenyekevu uuachao ulimwengu upite, na ujuao ya kuwa utairithi nchi ambayo umeikataa! Wajua kidogo tu ladha iitoayo baraka ya kuona njaa na kiu ya haki, na kushibishwa kwa utoshelevu ambao anasa za kidunia haziwezi kuutoa, na kisha kupaa hata heri iliyo juu zaidi ya wenye rehema, wasamehevu, mioyo iliyojifunza ya kuwa “ni heri kutoa kuliko kupokea,” na maisha yaonayo ya kuwa “kuachilia ni kumiliki maradufu,” na kuwabariki wengine ni kubarikiwa maradufu!

Sivyo, kuna bado johari moja ing’aayo kuliko zote katika taji hili la heri. Ni tone la machozi lililogeuka kuwa almasi, tone la damu lililogeuzwa kuwa yakuti ya taji la milele la mbinguni. Ni furaha ya kuteseka pamoja na Yesu, na kisha kuisahau huzuni yote katika furaha ifurikayo, hata pamoja na Pascal wa mbinguni hatujui la kusema kwanza ni lipi, na hivyo twayasema yote mawili pamoja, “Machozi juu ya machozi, furaha juu ya furaha”.

Agosti 31

“Uniongoze katika njia ya milele” (Zaburi 139:24).

Mara nyingi kwa kuonekana kuna tofauti ndogo tu kati ya maisha mawili tofauti, kati ya ushindi wa daima na ushindi wa mara kwa mara. Lakini tofauti ile moja ndogo hufanya ulimwengu wa mafanikio au wa kushindwa. Ule mmoja ni wa kimungu, mwingine ni wa kibinadamu; ule mmoja ni njia ya milele, mwingine ni ya kupita na isiyo kamili. Mungu ataka kutuongoza katika njia ya milele, na kututhibitisha na kutufanya tusiondoshwe kama yeye. Twajua kidogo tu uzito wa kujisalimisha kudogo kabisa. Ni hatua ya kwanza tu katika mtelemko wa kushuka, na Mungu peke yake ajua utaishia wapi.

Na tuwe “si miongoni mwa wale wasitao na kupotea, bali miongoni mwa wale walio na imani ya kutuokoa roho zetu.”

Ushindi wako leo si kitu ila kuandaa njia kwa ushindi mkubwa zaidi kesho, na kujisalimisha kwako leo ni kufungua mlango kwa kushindwa kutisha zaidi katika siku zijazo. Basi, chochote tulichokidai toka kwa Bwana wetu mbarikiwa, na tukikabidhi kwake kukilinda, na tumtwae yeye atuthibitishe na kutushika imara katika furaha ya tumaini iwe thabiti hata mwisho.