Julai

Julai 1

“Baada ya kuteswa kwenu muda mchache” (1 Petro 5:10).

Wapenzi, je, tunajifunza upendo katika shule ya mateso? Je, mioyo yetu inalainishwa na kuongezwa kina na joto la kiangazi la jaribu, hata tunda la Roho, “ambalo ni upendo, furaha, amani, uvumilivu, utu wema, upole, kiasi, imani,” likomae kwa mavuno ya kuja kwake, na mateso yetu yachukuliwe kwa urahisi kwa ajili yake”? Ee, hii ndiyo shule ya upendo, nayo humfanya awe mpenzi zaidi kwa mioyo yetu kuliko iwezavyo kunenwa, na sisi tuwe wapenzi zaidi kwake. Na kwa njia hii tu ndipo tuwezapo kujifunza pamoja naye upendo ule wa mbinguni “uvumiliao sana, na wenye fadhili.”

Twaona kwamba sifa ya kwanza kabisa na ya mwisho kabisa ya uso wa upendo, kama ulivyochorwa katika picha ya Mtakatifu Paulo (1 Wakorintho 13), ni alama za maumivu na mateso ya uvumilivu, “huvumilia sana,” “hustahimili yote.” Basi na tujifunze hivyo katika shule ya upendo kuteseka na kuwa na fadhili, na kustahimili yote.

Bila shaka haitakuwa vigumu kupenda katika yote, ikiwa ni moyo wa Yesu ndani yetu utakaopenda na kuendelea kupenda hata mwisho kabisa.

Nataka upendo uvumiliao na wenye fadhili, Usio na wivu wala usiojisifu kwa kiburi au sifa, Usiojivuna, usiotenda tendo lisilo na adabu, Usiochokozwa, wala usiotafuta faida yake wenyewe.

Julai 2

“Naye akatufufua pamoja naye” (Waefeso 2:6).

Kupaa ni zaidi ya kufufuka. Mengi yamesemwa juu yake katika Agano Jipya. Kristo hupanda juu ya vitu vyote. Twamwona katika kitendo chenyewe cha kupaa kama tusivyomwona katika kufufuka kwenyewe, hapo, mikono na midomo yake ikiwa katika kubariki, ajitengapo taratibu kutoka ubavuni mwao, kwa unyenyekevu mkubwa, bila fahari, na sherehe ndogo sana ya kujionyesha, hata kuifanya mbingu kuwa karibu sana na maisha yetu ya kawaida kiasi kwamba twaweza kunong’ona tu kupitia humo. Na sisi nasi, lazima tupae, hata hapa. “Basi mkiwa mmefufuliwa pamoja na Kristo, yatafuteni yaliyo juu.” Lazima tujifunze kuishi upande wa mbinguni na kuyatazama mambo toka juu. Jinsi kunavyoishinda dhambi, kunavyomkaidi Shetani, kunavyoyeyusha mashaka, kunavyotuinua juu ya majaribu, kunavyotutenga na ulimwengu na kuushinda woga wa mauti, tuyatafakari mambo yote kama Mungu ayaonavyo, kama Kristo ayatazamavyo, kama tutakavyoyakumbuka siku moja toka katika utukufu wake, na kana kwamba sasa kweli “tumeketishwa pamoja naye,” kama kwa hakika ndivyo tulivyo, “katika ulimwengu wa roho.” Na tuinuke pamoja na kufufuka kwake, na katika ushirika wa kupaa kwake kutukufu tujifunze tangu sasa kuishi huko juu.

Julai 3

“Tazama toka kilele” (Wimbo Ulio Bora 4:8).

Naam, mashaka yetu yangekuwa dhahiri kama tungebaki juu mahali pa kiroho. Mara ngapi msafiri apoteapo njia yake kabisa aweza kuiona tena upesi toka juu ya mti fulani au kilele cha kilima fulani, ambapo njia zote zenye kupinda alizopita zaenea nyuma yake, na barabara yote ya kwenda nyumbani hufunuka mbele yake. Vivyo hivyo, toka juu ya vilele vya maombi na imani, sisi nasi twaweza kuiona njia iliyo wazi, na kujua ya kuwa twaenda nyumbani.

Hakuna njia nyingine ambayo kwayo twaweza kupata ushindi juu ya ulimwengu. Lazima tupande juu yake. Lazima tuutazame toka upande wa thawabu yetu kubwa. Ndipo huonekana kama vitu vya duniani baada ya kuutazama jua kwa kitambo. Tumepofuka kwao. Muuza-matunda wa Kiitalia agunduapo kwamba yeye ni mrithi wa jumba la kifalme, huwezi kumshawishi tena kwa faida duni za biashara yake, wala kwa uandamano wa rafiki zake wa zamani. Yeye yu juu ya hayo yote. Wale wajuao tumaini la mwito wao na utajiri wa utukufu wa urithi wao waweza kuudharau ulimwengu vyema. Ni wale maskini wenye njaa waendao wakiitamani makapi ya dunia. Sisi tumezaliwa toka juu, nasi tuna shauku ya kwenda nyumbani. Na tutoke leo, mioyo yetu ikiwa katika mwendo wa mwisho kuelekea nyumbani.

Julai 4

“Kila akaaye ndani yake hatendi dhambi” (1 Yohana 3:6).

Katika utakaso, hali ile ya kale huwaje? Watu wengi hujishughulisha kupita kiasi kutaka kujua kama yaweza kuuawa kabisa, nao waonekana kutamani cheti fulani cha kifo chake na maziko yake. Yatosha kujua ya kuwa iko nje na Kristo yu ndani. Yaweza kujionyesha tena, hata kubisha hodi mlangoni na kusihi ipate kuingia, lakini iko nje milele maadamu twakaa ndani yake. Tukitoka nje yake na kuingia dhambini, twaweza kuikuta ile maiti ya kale katika kaburi la kutisha, na uvundo wake mbaya waweza tena kufufuka na kutukumbatia mara nyingine. Bali yeye akaaye ndani yake hatendi dhambi, wala hawezi kutenda dhambi maadamu akaa hivyo.

Kwa hiyo na tukae, wala tusiwe na wasiwasi wa kutoroka mkono wa uangalifu wa milele na kukaa kusikokoma. Njia zetu zimekwisha wekwa, na nguvu za kuzifuata pia; na tuzitembee. Mungu ametuandalia utakaso kamili. Je, ni ajabu kwamba autake kwetu, na kutuagiza kuwa watakatifu, kama yeye alivyo mtakatifu, kwa kuwa ametupa utakatifu wake mwenyewe? Basi na tuvae mavazi yetu mazuri, tujiweke tayari kutembea katika weupe pamoja naye.

Julai 5

“Bustani iliyofungwa” (Wimbo Ulio Bora 4:12).

Mfano hapa ni bustani iliyofungwa, si jangwa. Udongo wa bustani ni udongo uliolimwa, tofauti sana na kando ya njia au jangwa. Wazo la bustani ni ustawishaji. Ardhi lazima itayarishwe, ivunjwe kwa kulima, ilainishwe kwa kuhararasha, mawe yote yaondolewe, mizizi ya mimea yote ya asili ing’olewe, kwa maana mambo mema tuyatafutayo si mimea ya asili, wala haitaota katika udongo wetu. Sote twaanza juu ya msingi wa kale na kujaribu kuiboresha hali ya kale, lakini hiyo si njia ya Mungu. Njia yake ni kuiondoa nafsi kabisa, na kumwacha aumbe upya toka katika hali ya bila kitu, ili kwamba vyote viwe vyake; nasi lazima tumkute Yesu kuwa Alfa na Omega.

Jambo utakalotaka kujifunza hapa ni kufa. Hakuwezi kuwa na uzima wa kweli hata nafsi ife; wala usijaribu kujifisha mwenyewe, bali umwombe Mungu akuue, naye ataifanya kazi hiyo kikamilifu.

Hii ndiyo siri asili ifichayo, Kiangazi hufa na kuishi tena, Majira ya mchipuko toka kaburi la baridi hufufuka, Mavuno huota toka mbegu iliyozikwa.

Julai 6

“Mimi ni wa mpendwa wangu” (Wimbo Ulio Bora 7:10).

Kama wataka nguvu, lazima ubane. Ni kule kufungiwa ndani kwa mvuke ndiko kuisukumako injini. Kiasi cha baruti kilichowekwa juu ya uso tambarare, ambacho hupeleka risasi mahali pake kikifungiwa ndani ya bunduki, juu ya uso wazi hutoa mwako tu. Kama wataka kuuchukua umeme, lazima utengwe. Msimamishe mtu juu ya sakafu ya kioo, umgeuzie betri, naye atajaa umeme. Mwache aondoke juu ya kioo, na mara aigusapo nchi hupoteza nguvu.

Lazima tufungiwe ndani ya Agano lake la milele. Hilo hutushika na kutulinda tusianguke. Yeye atakuwa ukuta wa moto pande zote zetu. Yeye mwenyewe huja na kutuzunguka pande zote kwa utukufu ule wa kale wa Shekina, naye atakuwa utukufu katikati yetu. Ataka tufungiwe ndani—kwa kitendo dhahiri cha kujiweka wakfu tukitolewa kwake kabisa. Je, umefungiwa ndani ya maboma yake, amri zake, ahadi zake, agano lake? Je, moyo wako u kwa ajili ya Bwana kweli na yeye peke yake?

Kama sivyo, njoo kwake sasa, umwache akutenge na vitu vyote vinyakuavyo uhai wako, na akutenge kwa ajili yake mwenyewe, yeye Mtoaji wa uhai.

Julai 7

“Na utukufu wa Bwana ukaijaza maskani” (Kutoka 40:35).

Katika sura ya mwisho ya Kutoka twasoma yote Bwana aliyomwamuru Musa afanye, na ya kwamba alipozitimiza amri hizo utukufu wa Bwana ulishuka na kuijaza maskani hata pasiwe na nafasi kwa Musa, na tangu wakati ule nguzo ya wingu iliwafunika, ikawa kiongozi chao na ulinzi wao. Na sisi nasi tumekuwa tukijenga kama Bwana mwenyewe alivyoamuru, na sasa hekalu latakiwa kukabidhiwa kwake ili limilikiwe na kujazwa. Yeye atakujaza hivyo, ukimruhusu, hata nafsi yako na kila kitu kingine kiondolewe njiani, utukufu wa Bwana utalijaza hekalu, ukikuzunguka, ukikuinua, ukikuongoza, ukikutunza; na tangu wakati huu mwezi wako hautaacha kuangaza, wala jua lako halitatua.

Je, wataka nguvu? Unaye Mungu kwa ajili yake. Je, wataka utakatifu? Unaye Mungu kwa ajili yake; na ndivyo katika kila kitu. Na Mungu anainama toka kwenye kiti chake cha enzi leo ili akuinue hata mahali pako pa kweli ndani yake. Tangu wakati huu, lile wingu la utukufu wake na lituzunguke na kutujaza hata tusionekane tena milele.

Julai 8

“Baada ya kuanza katika Roho, sasa mwakamilishwa katika mwili?” (Wagalatia 3:3).

Neema, kwa maana yake halisi, ni kile ambacho hatuna budi kukistahili kwa juhudi zetu. Sikuzote ina maana mbili kuu; huja bure, na huja tunapokuwa hoi; haimsaidii tu yule ajisaidiaye mwenyewe—hiyo si Injili; Injili ni ya kwamba Mungu humsaidia yule asiyeweza kujisaidia mwenyewe. Kisha kuna jambo lingine; Mungu humsaidia mtu ajisaidie mwenyewe, kwa maana kila afanyalo mtu hutoka kwa Mungu. Neema hupewa mtu aliye dhaifu na hoi kiasi kwamba hawezi kupiga hatua ya kwanza. Hiyo ndiyo maana ya neema—sehemu ndogo ya maana yake; hatuwezi kamwe kujua utimilifu ilio nao. Basi, mto huu u huru kama ulivyo mzima, lakini wajua watu wengine wana wazo kwamba wafikapo mbele kidogo itawapasa kulipa ada ya kuingia, na viti vilivyowekwa akiba ni ghali sana, nao hujirudisha nyuma toka baraka zilizo juu za Injili; Wakristo wa kawaida hujitia hofu kuzidai. Kama naielewa maana ya jambo hili, Mungu hakuziweka baraka zilizo juu kando kwa ajili ya jamii ya pekee walio karibu naye zaidi kwa namna fulani. Mungu hana upendeleo.

Julai 9

“Umtwike Bwana mzigo wako” (Zaburi 55:22).

Rafiki wapendwa, wakati mwingine twamletea Mungu mzigo, nasi twaugulia juu yake, hata twaonekana kudhani ya kuwa Mungu naye ana wakati mgumu, kumbe kwa hakika haumlemei hata kidogo. Mungu asema: Ni jambo jepesi kwangu kukufanyia hili. Mzigo wako, ujapokuwa mzito kwako, si mzito kwake. Kristo huubeba wote juu ya bega moja, si mabega mawili. Serikali ya ulimwengu i juu ya bega lake. Yeye hahangaiki wala haugulii nao. Mkono wake wenye nguvu waweza kuibeba mizigo yako yote. Kuna nguvu ndani ya Kristo kwa ajili ya utakaso wetu. Yeye aweza kukutakasa. Naam, naam, Bwana aweza kutakasa, Bwana aweza kuponya, Bwana aweza kufanya lolote. Lazima uwe na imani kwa Mungu. Ukiujia mto huu asubuhi hii, utakuchukua kama Niagara wako ungechukua mtumbwi mdogo, na kukushusha tu—hata kwenye genge? La, sivyo, bali hata kifuani mwa upendo na baraka milele.

Mara nyingi huja ujumbe wa ajabu, Matumaini yangu yanapofifia, Naweza kuusikia katikati ya giza Kama wimbo mtamu wa mbali. Hakuna lililo gumu mno kwa Yesu, Hakuna mtu awezaye kutenda kama yeye.

Julai 10

“Tupate kuyajua tuliyokirimiwa na Mungu” (1 Wakorintho 2:12).

Baraka zilizo juu kabisa za Injili ni bure kama zilivyo zile zilizo chini kabisa; na ukiisha kumtumikia miaka kumi huwezi kuketi na kusema, “Sasa nimepata uzoefu, nami nautegemea huo.” Mara ngapi twafanya hivyo; twasema, “Sasa najua nimeokoka, nahisi hivyo.” Na hivyo twajenga msingi tofauti—twajenga juu ya kitu fulani ndani yetu wenyewe. Sikuzote ipokee neema kama kitu usichostahili, kitu kitolewacho bure. Mto ule mrefu, wenye kina, usio na mpaka, ni bure; u huru mdomoni mwake kama ulivyo huru katika kijito kidogo, na huru njia yote, na kila mtu aweza kuja kunywa, na kila mtu aweza kuja kuoga katika maji yake yasiyo na mpaka. Je, utaamini jambo hili?

Mungu ametupa Roho wake Mtakatifu ili tupate “kuyajua tuliyokirimiwa na Mungu.” Ni jambo gumu kwa mtoto maskini kuchungulia dirishani na kuona moto, na jamaa yenye furaha imekaa mezani, hali yeye anakufa njaa. Kuna faida gani kujua ya kuwa kuna joto, na upendo, na nuru, kama si bure? Mungu amevitoa bure vyema vyote vya neema yake na upendo wake.

Julai 11

“Kwa maana ndiye Mungu atendaye kazi ndani yenu” (Wafilipi 2:13).

Siku pamoja na Yesu. Na tutafute mpango wake na mwelekeo wake toka kwake. Na tutwae wazo lake lililo juu na mapenzi yake kwetu ndani yake. Na tumtazame yeye kwa ajili ya tamaa zetu, matarajio yetu, na mategemeo yetu ndani yake. Ndipo itatuletea kupita kiasi cha yote tuwezayo kuomba au kuwaza. Yeye na awe Kiongozi wetu na Njia yetu. Tusifikirie sana hata mpango wake na njia yake kama tumfikiriavyo yeye kuwa Kiongozi wa Binafsi wa kila dakika, ambaye kwake twategemea daima aiongoze kila hatua yetu.

Yeye na awe pia utoshelevu na nguvu za siku nzima. Tusiisahau kamwe siri hii: “Nayaweza mambo yote katika yeye anitiaye nguvu.” Na tuwe naye Yesu Kristo mwenyewe ndani yetu ili aifanye kazi, na kila dakika tumtegemee yeye, atutakie na kututendea ndani yetu kwa uradhi wake mwema. Utakatifu wetu na uwe “sheria ya Roho wa uzima ule ulio katika Kristo Yesu.” Afya yetu na iwe “uzima wa Yesu udhihirishwao katika mwili wetu upatikanao na mauti.” Imani yetu na iwe “imani ya Mwana wa Mungu aliyetupenda.” Amani yetu na furaha yetu viwe amani yake na furaha yake. Na utumishi wetu usiwe kazi zetu, bali neema ya Kristo iliyo ndani yetu.

Julai 12

“Mkiomba, aminini ya kwamba mnapokea” (Marko 11:24).

Kujiweka wakfu huingiwa kwa kitendo cha imani. Yakupasa kukipokea kile kipawa toka kwa Mungu, uamini ya kuwa unacho, na kuungama ya kuwa unacho. Simama juu yake imara, na umjulishe Shetani ya kuwa unacho kama vile umjulishavyo Bwana. Mara umwambiapo kwa ujasiri, “Mimi ni wako,” yeye hujibu toka juu mbinguni, “Wewe ni wangu,” na mwangwi hulia chini katika maisha yako yote, “Wangu! Wako!” Ukithubutu kumkiri Kristo kuwa Mwokozi wako na Mtakasaji wako, amejifunga mwenyewe kulifanya jambo hilo kuwa halisi, lakini lazima usimame nyuma ya Neno lake lenye nguvu. Ndiyo asili ya ushuhuda kueleza yale Yesu aliyoahidi kuwa kwako. Ni vyema kuwa na maneno matukufu ya shukrani, lakini hayo si ushuhuda hasa. Mungu apenda tuweke muhuri wetu juu ya ahadi, na kuinua mikono yetu na kuzikiri kuwa zetu.

Kisha yakupasa kuyapuuza maisha ya kale na kuyahesabu kuwa si yako tena kama yakijitokeza tena. Kila mara yajitokezapo sema, “Haya yatoka ulimwengu wa chini. Mimi nimeketi mahali pa mbinguni pamoja na Kristo.”

Julai 13

“Kwa kuwa Kristo naye hakujipendeza mwenyewe” (Warumi 15:3).

Siku hii na iwe siku ya huduma ijisahauyo nafsi kwa ajili ya Kristo na wengine. Tusifikiri hata mara moja juu ya kuhudumiwa, bali tuseme daima pamoja naye: “Mimi kati yenu ni kama atumikaye.” Tusiikokote mizigo yetu mchana kutwa, bali tuiache mizigo yetu yote ya masumbufu na kuwa huru kulibeba nira yake na mzigo wake. Na tufanye ubadilishano wenye furaha, tukitoa yetu na kutwaa yake. Agano na liwe: “Utakaa kwa ajili yangu, nami kwa ajili yako.” Ndivyo tutakavyoupoteza mzigo wetu ulio mzito kupita yote—yaani, nafsi zetu—na ndivyo tutakavyoiona furaha yetu iliyo juu kabisa, upendo wa Mungu, kwa kuwa “kutoa” ni heri kuliko “kupokea.” Na tuwatendee watu wote mema kadiri tupatavyo nafasi. Tusipoteze nafasi yoyote ya kubariki, na tutafakari njia za busara za utumishi na manufaa. Hasa na tutafute kuziokoa nafsi.

Siku za Mbinguni ni siku zenye shughuli, Hutumika daima, Siku zetu na zitumike hivyo kwa ajili yako na walio wako, Kama vile Siku za Mbinguni zingekuwa. Siku za Mbinguni ni siku za upendo, Kama mmoja zote zapatana, Zikiwa zimefungamana katika umoja wa upendo, Siku zetu na ziwe kama za Mbinguni.

Julai 14

“Imewapasa watu kuomba sikuzote” (Luka 18:1).

Siku hii na iwe siku ya maombi. Na tuone ya kuwa huduma yetu iliyo juu na nguvu yetu ni kushughulika na Mungu kwa ajili ya watu. Na tuwe watii kwa sauti zote za Roho Mtakatifu za maombi ndani yetu. Na tuhesabu kila shinikizo kuwa mwito wa kuomba. Na tuuthamini roho ya maombi yasiyokoma na ushirika udumuo. Na tujifunze maana ya huduma ya maombi. Na tuwafikie watu siku hii tusioweza kuwafikia ana kwa ana; na tutazamie matokeo ambayo hatujathubutu kuyadai kamwe kabla; na tuhesabu kila ugumu kuwa fursa kubwa zaidi ya kuomba, na tumwite Mungu, atakayetuonyesha mambo mengi makuu na magumu tusiyoyajua.

Nayo na iwe siku ya furaha na sifa. Na tuishi katika ahadi za Mungu na tumaini la wokovu wake na baraka yake. Tusikae kamwe juu ya jaribu, bali sikuzote juu ya ushindi ulio karibu mbele. Tusikae kaburini, bali katika bustani ya Yusufu na nuru ya ufufuo. Na tuelekeze nyuso zetu kuelekea macheo ya jua. Ondoka, uangaze. Furahini sikuzote. Shukuruni kwa kila jambo. Msifuni Bwana.

Bwana, tupe furaha yako mioyoni mwetu itakayotuinua ili tuwainue wengine, na utujaze ili tupate kufurika kwa wengine.

Julai 15

“Mimi ni wa mpendwa wangu, na mpendwa wangu ni wangu” (Wimbo Ulio Bora 6:3).

Kama mimi ni wa Bwana, basi Bwana ni wangu. Kama Kristo ananimiliki, mimi nammiliki yeye. Na hivyo imani lazima inyoshe mkono na kudai urithi wake wote na kuanza kuzitumia rasilimali zake kuu. Dakika kwa dakika sasa twaweza kumtwaa yeye kuwa neema yetu na nguvu yetu, imani yetu na upendo wetu, ushindi wetu na furaha yetu, yeye kuwa yote kwa yote kwetu. Na tumdaipo hivyo tutaiona neema yake yatutosha, na kuanza kujifunza ya kuwa kutoa yote ni kupokea yote tu. Naam, kujiweka wakfu ni kumpata yeye kikamilifu badala ya maisha yetu ya taabu. Kwa kweli, kuna pande mbili za jambo hili. Kuna watu wawili katika kujiweka wakfu. Mmoja wao ni Bwana mpendwa mwenyewe. “Na kwa ajili yao,” asema, “najiweka wakfu mwenyewe, ili na hao watakaswe katika kweli.” Wakati ule tujiwekapo wakfu kwake, yeye hujiweka wakfu kwetu, na tangu hapo, nguvu yote ya uzima wake na upendo wake na uweza wake wa milele imetolewa kulilinda na kulikamilisha wakfu wetu, na kuyafanya maisha yetu ya wakfu kuwa bora na mengi kupita yote. Ni nani asingejitoa kwa Mwokozi kama huyu? Bila shaka sisi tutafanya hivyo leo, kwanza tukijitoa wenyewe na kisha kumtoa yeye kila dakika ijapo, ili tujazwe na kutumiwa.

Julai 16

“Kama ayala aioneavyo shauku mito ya maji, ndivyo nafsi yangu ikuoneavyo shauku wewe, Ee Mungu” (Zaburi 42:1).

Kwanza, ili kuwa na maisha ya wakfu ni lazima kuwe na hisia ya uhitaji, uhitaji wa usafi, wa nguvu, na wa ukaribu zaidi na Bwana. Mara nyingi huja katika maisha ya Kikristo hisia ya pili ya kushtakiwa. Sasa si hisia ya hatia na ghadhabu ya Mungu sana kama ni ya nguvu na uovu wa dhambi ya ndani, na kutokutosheleza kwa maisha ambayo nafsi inaishi. Kwa kawaida huja toka ufunuo wa ndani zaidi wa kweli ya Mungu, toka mafundisho ya kiroho zaidi, toka mifano dhahiri na ushuhuda wa maisha haya kwa wengine, na mara nyingi toka jaribu la ndani, mapambano na majaribu ambapo nafsi imeona mafanikio yake na rasilimali zake haziwatoshi mambo halisi na mahitaji ya maisha. Tokeo la kwanza mara nyingi ni kukata tamaa kwa kina hata ukiwa mkubwa, lakini bonde la Akori ni mlango wa matumaini, na sura ya saba ya Warumi pamoja na kilio chake kichungu, “Ole wangu, maskini mimi!” ni lango la kuingia sura ya nane pamoja na kelele yake ya ushindi, “Sheria ya Roho wa uzima ule ulio katika Kristo imeniacha huru, mbali na sheria ya dhambi na mauti.”

Julai 17

“Maana kwa toleo moja amewakamilisha hata milele hao wanaotakaswa” (Waebrania 10:14).

Je, wakikosa kile kilicho chako? Ameahidi kukutakasa. Ameahidi utakaso kwa ajili yako kwa kuja kwako yeye mwenyewe na kufanywa na Mungu kuwa utakaso kwako. Yesu ni utakaso wangu. Nikiwa naye ninao utii, raha, saburi na kila kitu nikihitajicho. Yeye ni hai hata milele na milele. Ukiwa naye hakuna litakaloweza kuwa juu yako. Majaribu yako hayatakuwa juu yako; hasira yako mbaya haitakuwa juu yako; maisha yako magumu, hali zako, hata Shetani mwenyewe hatakuwa juu yako. Kila mara ajapo kukushambulia, atakuza mizizi yako zaidi ndani ya Kristo. Utakuwa mwoga kwa wazo la kuwa peke yako; utatupwa kwa Yesu kila mara taabu ikushambuliapo. Mambo yote tangu sasa yatafanya kazi pamoja kwa wema wa nafsi yako mwenyewe. Kwa kuwa Mungu yu upande wako, hakuna litakaloweza kuwa juu yako.

Bwana arusi wangu wa mbinguni alinitafuta, akaniita siku moja ya furaha, “Ondoka, mpenzi wangu, mzuri wangu, ondoka, uje zako,” Nikayasikiliza masihi yake, nikampa moyo wangu wote, Nasi tu mmoja milele, wala hatutatengana kamwe.

Julai 18

“Nanyi mmetimizwa katika yeye” (Wakolosai 2:10).

Ndani yake sasa tumetimizwa. Kielelezo kamili cha maisha ya utumishi mtakatifu ambao kwa ajili yake ametukomboa na kutuita, sasa kiko ndani yake mbinguni, kama vile kielelezo cha mbunifu kilivyopangwa na kutayarishwa na kukamilishwa ofisini mwake. Lakini sasa lazima kifanywe kazi ndani yetu na kuhamishiwa katika maisha yetu ya duniani, na hii ndiyo kazi ya Roho Mtakatifu. Yeye huzitwaa karama na neema za Kristo na kuzileta katika maisha yetu, kadiri tuzihitajivyo na kuzipokea siku kwa siku, kama vile sehemu za chombo zinavyofanywa upya katika Bara la mbali, na hivyo twapokea katika utimilifu wake, naam, neema juu ya neema, neema yake kwa neema yetu, ruzuku yake kwa uhitaji wetu, nguvu yake kwa nguvu yetu, mwili wake kwa mwili wetu, Roho wake kwa roho yetu, naye “alifanywa kwetu hekima itokayo kwa Mungu, na haki, na utakaso, na ukombozi.”

Lakini ni zaidi sana ya msaada na neema ya dhahania tu, ni zaidi hata ya Roho Mtakatifu kutuletea nguvu, na amani, na usafi. Ni uandamano wa binafsi na Yesu mwenyewe!

Bwana, utusaidie tupokee toka kwako leo, ile neema katika kila jaribu itakayomaanisha kukamilishwa kwetu ndani yako.

Julai 19

“Walakini Daudi akaitwaa ngome ya Sayuni” (1 Nyakati 11:5).

Wengi wenu mna mapigano mengi mno ya kufanya kwa sababu hamna pigano moja kali la uamuzi la kuanza nalo. Ni rahisi zaidi kuwa na pigano moja kubwa kuliko kuendelea kupigana vipigano vidogo maisha yako yote. Nawajua watu watumiao miaka arobaini wakipigana na kile wanachokiita dhambi iwazingayo, ambayo juu yake hupoteza nguvu za kutosha kuuhubiria ulimwengu injili.

Rafiki wapendwa, je, yafaa kuyatupa maisha yenu? Uwe na pigano moja, ushindi mmoja, kisha umsifu Mungu. Ndivyo walivyopata raha, wakapumzika mbali na adui zao pande zote. Kuna taabu ya kuingia. Kilele ni kikali. Njia ya msalaba si njia rahisi. Ni vigumu kuingia, lakini ukiisha kuingia kuna raha kamili. Mungu na atusaidie na kutupa raha yake kamili.

Ee njoo uiache nafsi yako yenye dhambi milele Chini ya chemchemi ya damu ya Mwokozi; Ee njoo, umtwae yeye kuwa Mtakasaji wako, Njoo pamoja nasi, nasi tutakutendea mema. Njoo hata nchi ambako adui wote wameshindwa, Na huzuni, dhambi, ugonjwa na mauti vimetiishwa; Ee nafsi uliyechoka! uliyechubuliwa na kutatanishwa na Shetani, Njoo pamoja nasi, nasi tutakutendea mema.

Julai 20

“Uwasahau pia watu wako” (Zaburi 45:10).

Sisi nasi, kama Walawi wa kale, lazima tuwe “kila mmoja aliyejiweka wakfu juu ya mwanawe na juu ya nduguye,” na “kuwasahau jamaa zetu na nyumba ya baba yetu” katika kila namna ambayo kwayo wangeweza kuizuia uhuru wetu kamili na utumishi wetu kwa Bwana. Sisi nasi, lazima tuiache biashara yetu kama inasimama kati yetu na Bwana, na kwa vyovyote tangu sasa na iwe biashara yake na yake peke yake, ikifanywa kwa ajili yake, ikitawaliwa naye, na faida zake zikitolewa kwake kabisa, na kutumika kama atakavyoelekeza. Na, kama Yakobo na Yohana, lazima uwe radhi kuwaacha “watumishi wa mshahara” pia. Litafanya tofauti kubwa katika mtindo wako wa kuishi. Itakuwa mabadiliko kuacha starehe yako na anasa, na kuhudumiwa kwako na kudekezwa katika kila haja, na kulazimika kuifanya kazi yako mwenyewe, kuacha kutunzwa na wengine, na kuvumilia mahangaiko, na usumbufu, na fedheha, lakini itakuwa rahisi kuyafanya pamoja naye. Yeye hakuwahi kumiliki hata mguu mmoja wa ardhi. Hakuwahi kupanda gari. Hakuwahi kuwa na mtumishi wa mshahara. Hatimaye alilala katika kaburi la kuazima. Lakini sasa ni tajiri wa kutosha, na wewe nawe utakuwa hivyo siku moja kama tu utakuwa radhi kuteseka na kungoja.

Julai 21

“Tazama toka mahali ulipo” (Mwanzo 13:14).

Basi na tuone sasa heri ya imani. Udogo wetu na ubatili wetu wenyewe wakati mwingine huwa utumwa. Sisi ni wadogo sana machoni petu wenyewe hata hatuthubutu kuzidai ahadi za Mungu zenye nguvu. Twasema: “Kama ningeweza kuwa na hakika ya kuwa nimo katika njia ya Mungu, ningeweza kuamini.” Haya yote ni makosa. Kujitambua nafsi ni kizuizi kikubwa kwa imani. Yaelekeze macho yako juu yake yeye na yeye peke yake; si juu ya imani yako, bali juu ya Mwenye kuianzisha imani yako; si tazamo la nusu, bali tazamo imara, la muda mrefu, kwa moyo wa kweli na uthabiti wa kusudi, usiojua kusita, wala kujadiliana na adui, bila kivuli cha woga. Uogopapo u karibu kabisa kushindwa.

Wasafiri walioivuka milima ya Alps wanajua jinsi zilivyo hatari zile njia za milimani, jinsi mahali pa kukanyaga palivyo pembamba, jinsi mabonde ya miamba yalivyo na kina, na jinsi ilivyo lazima kwa usalama utazame juu daima; tazamo moja la kuelekea chini katika vilindi vya kizunguzungu lingekuwa la mauti; na hivyo kama tutaka kuvishinda vilele vya imani lazima tutazame juu—tutazame juu. Yaondoe macho yako toka kwako mwenyewe, toka hali zinazokuzunguka, toka njia, toka karama, uyapeleke kwa Mtoaji Mkuu.

Julai 22

“Mwenye kuhudumu, na tuwemo katika huduma yetu” (Warumi 12:7).

Wapenzi, je, mnamhudumia Kristo? Je, mwafanya hivyo kwa mikono yenu? Je, mwafanya hivyo kwa mali yenu na kwa mlivyo navyo? Je, yeye anapata kilicho bora cha kile kilicho halisi zaidi kwenu? Je, ana nafasi mezani penu? Na asipokuja kukikalia kile kiti, je, ki huru kwa mjumbe wake, watoto wake maskini na wanyenyekevu? Maneno yenu na matakwa yenu ni rahisi kama hayapati kudhihirika katika vipawa vyenu halisi. Hata Mariamu hakumridhisha kwa uvumba wa moyo wake tu, bali aliviweka vipawa vyake vya thamani kubwa miguuni pake.

Enyi wanawake wenye shughuli, mfanyao kazi kwa bidii kuwavika watoto wenu na kuzipamba nyumba zenu na meza zenu, mikono yenu imempatia Bwana nini, mmefanya nini au mmedhabihu nini kwa ajili ya Yesu? “Je, waweza kumudu?” aliulizwa mwanamke mmoja mtukufu, alipoahidi sadaka ya gharama kubwa kwa kazi ya Bwana. “La,” ndivyo alivyojibu kwa utukufu, “lakini naweza kuidhabihu.” Basi leo na tuangalie pande zote na kuona, tufanyeje na kutoa zaidi kwa Mwokozi mpenzi, aliyeyatoa maisha yake yote kwa ajili yetu.

Julai 23

“Nileteeni hapa kwangu” (Mathayo 14:18).

Kwa nini hamjaupokea utimilifu wote wa Roho Mtakatifu? Nasi twawezaje kupakwa “mafuta yaliyobaki?” Uhitaji ulio mkubwa kupita yote ni kufanya nafasi Mungu aifanyapo. Angalia pande zote hali yako. Je, hukuzungukwa na mahitaji dakika hii hasa, na karibu kulemewa na magumu, majaribu na dharura? Haya yote ni vyombo vilivyoandaliwa na Mungu ili Roho Mtakatifu aijaze, na kama ungeielewa maana yake sawasawa, yangekuwa fursa za kupokea baraka mpya na wokovu ambao huwezi kuupata kwa njia nyingine yoyote.

Vilete vyombo hivi kwa Mungu. Vishike imara mbele zake kwa imani na maombi. Tulia, na uikomeshe kazi yako mwenyewe isiyotulia hata yeye aanze kutenda. Usifanye lolote asilokuamuru yeye mwenyewe kufanya. Mpe nafasi ya kutenda, naye bila shaka atatenda, na yale majaribu yenyewe yaliyotisha kukushinda kwa kukata tamaa na maafa, yatakuwa fursa ya Mungu ya kufunua neema yake na utukufu wake katika maisha yako, kama usivyompata kumjua kabla. “Nileteeni yote (mahitaji yote) kwangu.”

Julai 24

“Maagizo ya torati yapate kutimizwa ndani yetu” (Warumi 7:4).

Katika uzoefu wetu wa awali twamjua Roho Mtakatifu kwa mbali tu, katika mambo yatokeayo kwa mwelekeo wa maongozi, au katika Neno peke yake, lakini baada ya kitambo twampokea kama Mgeni wa ndani, naye hukaa katikati yetu kabisa, naye husema nasi katika vyumba vya ndani kabisa vya nafsi yetu. Lakini basi utendaji wa nje wa nguvu yake haukomi, bali huzidi tu, na kuonekana kuwa mtukufu zaidi. Ile Nguvu ikaayo ndani yetu hutenda kazi nje yetu, ikijibu maombi, ikiponya magonjwa, ikiongoza maongozi, “Ikitenda kupita kiasi cha yote tuyaombayo au tuyawazayo, kwa kadiri ya nguvu itendayo kazi ndani yetu.”

Kuna uwepo maradufu wa Bwana kwa mwamini aliyejiweka wakfu. Yeye yupo moyoni, na yupo kwa nguvu katika matukio ya maisha. Yeye ni Kristo aliye ndani yetu, Kristo wa siku zote, mwenye mamlaka yote mbinguni na duniani.

Na hivyo Roho Mtakatifu ni mtenda-miujiza wetu, Mungu wetu atoshelezaye yote na Mlinzi wetu, naye angoja siku hizi kutenda kwa nguvu kama alivyotenda katika siku za Musa, za Danieli na za Paulo.

Julai 25

“Kwa maana yeye amtumikiaye Kristo katika mambo hayo humpendeza Mungu” (Warumi 14:18).

Mungu aweza kututumia tu tunapokuwa katika hali njema. Shetani hakujali sana kule kumkana kwa Petro Bwana wake kama alivyojali matumizi aliyoyafanya baadaye ili kuiharibu imani yake. Ndiyo maana Yesu alimwambia: “Lakini nimekuombea wewe, imani yako isitindike.” Ni imani ya Petro aliyoishambulia, na hivyo ni imani yetu ambayo Shetani hupambana nayo. “Kujaribiwa kwa imani yenu ni kwa thamani zaidi kuliko dhahabu ipoteayo.”

Chochote kingine tukiachacho, na tushikamane imara na tumaini letu. “Basi msiutupe ujasiri wenu,” na “shikeni sana furaha ya tumaini letu iwe imara hata mwisho.” Na kama utataka kulishika tumaini lako, shika utamu wako, unyofu wa roho yako, utii wako kwa Kristo, ushindi wako kwa kila njia.

Lolote lijalo, lihesabu kuwa la maana ndogo, kuliko wewe kushinda na kusimama imara, na ukiipokea kila hali kama Mungu apendavyo kuiacha itokee, litikise bendera ya ushindi wako mbele ya kila adui, na uendelee, ukipiga kelele katika jina lake, “Lakini Mungu ashukuriwe, atushindishaye daima katika Kristo Yesu.”

Julai 26

“Lakini sasa jicho langu limekuona” (Ayubu 42:5).

Lazima tuutambue tabia ya kweli ya maisha yetu ya kujipenda nafsi, na ukali wake na uchafu wake halisi. Lazima tukubali kuangamizwa kwake, na lazima tuutwae wenyewe, kama Ibrahimu alivyomtwaa Isaka, na kuuweka miguuni pa Mungu kuwa dhabihu ya hiari.

Hii ni kazi ngumu kwa moyo wa asili, lakini mara ile mapenzi yatolewapo na uchaguzi ufanywapo, kifo kile kimepita, uchungu umekwisha, nasi twastaajabu kuona ya kuwa kifo kimetimia.

Kwa kawaida hatua ya uamuzi wa maisha katika mambo kama hayo hutegemea nukta moja tu. Mungu hana haja ya kutupiga mahali mia moja ili atie jeraha la mauti. Kuna nukta moja iguzayo moyo, nayo ndiyo nukta Mungu apigayo kwa kawaida, kile kitu kipendwacho zaidi maishani mwetu, kitu cha uamuzi katika mipango yetu, ngome ya utashi, kitovu cha moyo, na tuyapotoa hapo, hakuna kilichobaki kingi cha kutoa mahali pengine popote, na tukikataa kuyatoa katika nukta hii, roho ya kukwepa na kupatana kimasilahi huingia katika maisha yetu yote yaliyobaki. Bwana, twakutwaa wewe ili kutuwezesha kuyataka mapenzi yako yafanyike katika mambo yote maishani mwetu, ya nje na ya ndani.

Julai 27

“Kuujenga mwili wa Kristo” (R. V., Waefeso 4:13).

Mungu anawaandaa mashujaa wake, na fursa ijapo aweza kuwaingiza mahali pao mara moja, na ulimwengu utastaajabu walikotoka. Mwache Roho Mtakatifu akuandae, rafiki mpendwa, kwa nidhamu yote ya maisha; na mguso wa mwisho wa kumalizia utakapotolewa juu ya marmari, itakuwa rahisi kwa Mungu kuiweka juu ya kitako, na kuiingiza mahali pake.

Kuna siku ijayo, ambapo, kama Othnieli, sisi nasi tutazihukumu mataifa, na kutawala na kumiliki pamoja na Kristo juu ya nchi ya miaka elfu; lakini kabla siku ile tukufu haijaweza kuwa, lazima tumwache Mungu atuandae kama alivyomwandaa Othnieli huko Kiriath-seferi, katikati ya majaribu ya maisha yetu ya sasa, na katika ushindi mdogo, ambao maana yake, labda, hatuioti hata kidogo. Kwa uchache, na tuwe na hakika ya jambo hili, ya kuwa kama Roho Mtakatifu amemtayarisha Othnieli, Bwana wa mbingu na nchi ana kiti cha enzi kilichotayarishwa kwa ajili yake.

Je, ni kwangu mimi kutumiwa na neema yake, Nikisaidia kuuleta ufalme wake, Je, ni kwangu mimi kurithi mahali, Hata juu ya kiti cha enzi cha Mfalme wangu?

Julai 28

“Si mapenzi yangu, bali yako” (Luka 22:42).

Yeye aliyeteseka wakati mmoja huko Gethsemane atakuwa nguvu yetu na ushindi wetu pia. Twaweza kuogopa, twaweza pia kuzama, lakini tusifadhaike, nasi tutamsifu bado, na kutazama nyuma toka mwendo uliokwisha, na kusema, “Halikuanguka hata neno moja katika yote Bwana aliyoyanena.”

Lakini ili kufanya hivi, lazima, kama yeye, tukutane na mapambano, si kwa roho ya kiburi, bali kwa roho ya utii. Ilimbidi aseme, “Si mapenzi yangu, bali yako yatendeke”; lakini katika kuyasema, alikipata kile kile alichokitoa. Basi utii wa Gethsemane si utii wa upofu na uliokufa wa moyo uachao tumaini lake lote; bali ni utii wa hiari uinamishao kichwa, ili kupata nguvu maradufu kwa njia ya imani na maombi.

Twaachilia, ili tupate kushika kwa imara zaidi. Twatoa, ili tupate kupokea kwa ukamilifu zaidi. Twamweka Isaka wetu juu ya Mlima Moria, nasi twamwomba arudishwe, si Isaka wetu tena, bali Isaka wa Mungu, na aliye salama bila kikomo, kwa sababu amerudishwa katika uzima wa ufufuo.

Julai 29

“Watenda kazi pamoja nami katika Kristo Yesu” (Warumi 16:3).

Kanisa la Kristo limejaa maakida. Lina uhitaji mkubwa wa askari wa kawaida wachache zaidi. Mito michache humwaga baharini, lakini idadi kubwa zaidi humwaga katika mito mingine. Hatuwezi sote kuwa wavumbuzi wa kwanza, lakini sote twaweza kuwa wasaidizi, wala hakuna mtu afaaye kwenda mbele hata ajifunze vyema jinsi ya kwenda wa pili.

Roho ya kujiona bora ni mauti kwa kazi yote ya Kristo. Adui aliye mkubwa wa nguvu ya kweli ya kiroho ni kujitambua nafsi kiroho. Yoshua lazima afe kabla Yeriko haujaanguka.

Mara nyingi Mungu huwapasa kuwajaribu watumishi wake wateule kwa kuwaweka mahali pa chini kabla ya kuwaleta mbele. Yusufu lazima ajifunze kutumika jikoni na kuteseka gerezani kabla hajaweza kupanda kwenye kiti cha enzi, na mara Yusufu awapo tayari kwa kiti cha enzi, kiti cha enzi sikuzote humngoja Yusufu. Mungu ana nafasi nyingi kuliko watahiniwa wanaokubaliwa. Tusiogope kuingia darasa la mazoezi, hata kukaa mahali pa chini kabisa, kwa maana tutapanda juu upesi, kama kweli twastahili. Bwana, unitumie hata wewe utukuzwe, nami nifichwe nisijionee mwenyewe wala wengine.

Julai 30

“Kama utaisikiza kwa bidii sauti ya Bwana, Mungu wako, na kuyashika maagizo yake yote” (Kutoka 15:26).

Wakati mwingine watu hushindwa kwa sababu hawana matumaini kwa Tabibu. Sharti la kwanza kabisa la Daktari huyu ni kwamba umwamini yeye, na umwamini bila mashaka, kiasi kwamba wasonga mbele juu ya neno lake tupu, na kutenda kana kwamba umekwisha kupokea uponyaji wake mara uidaipo ahadi yake. Lakini hakuna mtu ambaye angetazamia kuponywa na daktari wa duniani mara tu atiipo amri zake.

Lazima ufanye kile Tabibu Mkuu akuambiacho, kama wataka akuponye ukapone kabisa.

Huwezi kutazamia kuponywa kama unaishi katika dhambi, kama vile usivyoweza kumtazamia daktari aliye bora akuponye ukiwa unaishi katika hewa ya malaria na kuvuta sumu kwa kila pumzi. Basi lazima upande katika hewa safi ya kuamini na kutii kabla Kristo hajaweza kukuponya. Na ndipo, kama utamwamini, na kuzizingatia amri zake, utaona ya kuwa kuna zeri huko Gileadi, na ya kuwa kuna Tabibu Mkuu huko.

Julai 31

“Tulikuwa katika dhiki kwa kila upande” (2 Wakorintho 7:5).

Kwa nini yampasa Mungu kutuongoza hivi, na kuruhusu shinikizo kuwa gumu na la kudumu hivyo?

Basi, kwanza, huonyesha nguvu yake na neema yake itoshelezayo yote vizuri zaidi kuliko kama tungekuwa hatuguswi na shinikizo na jaribu. “Tuna hazina hii katika vyombo vya udongo, ili adhama kuu ya uwezo iwe ya Mungu, wala si kutoka kwetu.”

Hutufanya kutambua zaidi kutegemea kwetu juu yake. Mungu hujaribu daima kutufundisha kutegemea kwetu, na kutushika mkononi mwake kabisa tukining’inia juu ya matunzo yake.

Hapa ndipo mahali Yesu mwenyewe aliposimama, na mahali apendapo sisi tusimame, si kwa nguvu ya kujitengenezea wenyewe, bali kwa mkono uegemeao juu yake daima, na tumaini lisilothubutu kupiga hatua moja peke yake.

Hutufundisha kuamini. Hakuna njia ya kujifunza imani ila kwa jaribu. Ni shule ya Mungu ya imani, na ni bora zaidi kwetu kujifunza kumwamini Mungu kuliko kuyafurahia maisha.

Somo la imani, likiisha kujifunzwa, ni mapato ya milele na utajiri wa milele uliopatikana; na bila kuamini hata utajiri utatuacha maskini.