Aprili

Aprili 1

“Vyombo vya rehema, alivyovitengeneza tangu zamani vipate utukufu” (Warumi 9:23).

Baba yetu anatuandaa kwa ajili ya umilele. Chombo kilichoandaliwa kwa jikoni kitajikuta jikoni. Chombo kwa ajili ya jumba la sanaa au chumba cha mapokezi kwa kawaida kitajikuta huko mwishowe.

Unaandaliwa kwa ajili ya nini? Kuwa ndoo ya taka ya kushika machafu yote wayamiminayo watu masikioni mwako, au chombo cha kushika manukato matamu na maua kwa jumba la Mfalme na kinubi cha nyuzi nyingi kizaacho nyimbo na sauti nzuri za upendo na sifa yake? Kila mmoja wetu anakwenda mahali pake mwenyewe. Basi na tuandaliwe sasa.

Siku za mbinguni ni siku za Kikristo, Nuru ya Mbinguni ni yeye; Basi tukienenda ubavuni pake, siku zetu Zingekuwa kama siku za mbinguni. Siku za mbinguni ni siku zisizo na mwisho— Siku za umilele; Basi maisha na kazi zetu na zidumu Maadamu siku za mbinguni zitakuwako. Enenda nasi, Bwana, katika siku zote, Nawe utuache tuenende nawe; Hata kama mapenzi yako yatendekavyo mbinguni, Duniani nayo yatendeke vivyo hivyo.

Aprili 2

“Yeye atakaa mahali pa juu” (Isaya 33:16).

Ni rahisi zaidi kwa Mkristo aliyejiweka wakfu kuishi maisha ya kujitoa kabisa kwa Mungu kuliko kuishi maisha ya kuchanganya. Nafsi iliyokombolewa na kutakaswa na Kristo ni kubwa mno kwa vishoto na fungu la mchanga la maisha ya ubinafsi, ya kidunia, ya dhambi. Meli kubwa ya mvuke, St. Paul, yaweza kusafiri katika maji ya kilindi bila juhudi, lakini haiwezi kupata maendeleo katika kidimbwi kifupi au juu ya mchanga wa Long Branch; boti ndogo kuliko zote ya kuvutia yathaminiwa kama kumi na mbili zake pale; lakini nje katikati ya bahari yaweza kuziacha nyuma kwa saa moja.

Wapenzi, maisha yenu ni makubwa mno, matukufu mno, ya Kimungu mno kwa mahali padogo mnalojaribu kuishi ndani yake. Kusudi lenu ni dogo mno; inukeni na kukaa mahali pa juu katika uzima wa ufufuo wa Yesu, na tumaini litiazo moyo la kuja kwake kulikobarikiwa.

Inuka pamoja na Bwana wako aliyefufuka, Panda pamoja na Kristo juu, Na katika ulimwengu wa roho enenda naye, Yeye ambaye ijapo humwoni, wampenda. Enenda kama mbari ya mbinguni, Wakuu wa damu ya kifalme; Enenda kama watoto wa nuru, Wana na warithi wa Mungu.

Aprili 3

“Matarajio yangu hutoka kwake” (Zaburi 62:5).

Twaaminipo kwa ajili ya baraka, hatuna budi kuchukua hali ya imani, na kuanza kutenda na kuomba kama kwamba tumekwisha ipata baraka yetu. Hatuna budi kumtendea Mungu kama kwamba amekwisha tupa tulichoomba. Hatuna budi kuegemeza uzito wetu juu yake kwa ajili ya kile tulichokidai, na kukitwaa tu kama kwamba amekitoa, na ya kwamba ataendelea kukitoa. Hii ndiyo hali ya kutumaini. Mwanamke aolewapo, huingia mara katika hali mpya, na kutenda sawasawa na jambo hilo, na hivyo tumtwaapo Kristo kuwa Mwokozi, Mtakasaji, Mponyaji, au Mwokozi, hutarajia sisi tuingie katika hali ya kumtambua katika daraja tuliyoidai, na kutarajia awe kwetu vyote tulivyomtumaini kwa ajili yake.

Waweza kumletea kila shaka na mzigo, Waweza kumwambia kila hitaji katika maombi, Waweza kumtumaini katika saa ya giza kuu, Yeye anajali, kwa nini basi wewe ushike shaka? Imani haiwezi kufikia utimilifu wake, Hata tuinue wimbo wa shukrani wa mshindi: Katika mji ule mtukufu wa wokovu, Mungu ametuambia kwamba malango yote ni sifa.

Aprili 4

“Mpingeni Shetani, naye atawakimbia” (Yakobo 4:7).

Mpingeni Shetani, naye atawakimbia. Hii ni ahadi, naye Mungu ataitimiza kwetu. Tukimpinga adui, atamlazimisha akimbie, na kutupa ushindi. Twaweza, nyakati zote, bila hofu kusimama kwa upinzani dhidi ya adui, na kudai ulinzi wa Mfalme wetu wa mbinguni kama vile raia angedai ulinzi wa serikali dhidi ya udhalimu au unyanyasaji wa watu wenye jeuri. Wakati uo huo hatuna budi kusimama juu ya ardhi ya adui po pote kwa hali au kutokutii ko kote, la sivyo twampa uweza wa kutisha juu yetu, ambao, ijapokuwa Mungu atauzuia kwa rehema na fadhili nyingi, hatauondoa kabisa hata tusimame kabisa juu ya ardhi takatifu. Basi, hatuna budi kuvikwa dirii ya haki, kama vile na ngao ya imani, kama twataka kumpinga kwa ushindi mkuu wa giza na enzi zilizo katika ulimwengu wa roho.

Haki yako kamili ya ukombozi Idai kwa ujasiri mtakatifu, Na hata utimilifu wa juu kabisa uthibitishe Uweza wa jina la Yesu.

Aprili 5

“Wengi watajitakasa na kujifanya weupe, na kusafishwa” (Danieli 12:10).

Hii ndiyo ahadi kwa ajili ya kuja kwake Bwana. Ni zaidi ya usafi. Ni kufanywa mweupe, mng’ao, au mwangavu. Kutakaswa ni kuwa na dhambi imeteketezwa; kufanywa mweupe ni kuwa na utukufu wa Bwana umeteketezwa ndani. Moja ni utakaso, nyingine ni kuangazwa na kutukuzwa. Bwana ana yote mawili kwa ajili yetu, lakini ili tuwe na yote mawili, hatuna budi kutiwa motoni ili tujaribiwe, na kuongozwa katika mahali pagumu na pa peke ambapo Kristo atakuwa mkubwa zaidi kwetu kwa sababu ya ugumu wenyewe wa hali. Twakaribia siku hizi. Kwa kweli, tayari ziko kandokando yetu, nazo ni watangulizi wa kuja kwake Bwana.

Heri akeshaye, na kuyatunza mavazi yake, asiende uchi.

Kuna sauti hewani, zikijaza watu tumaini na hofu; Kuna ishara kila mahali kwamba mwisho unakaribia, Kuna maonyo ya kujiweka tayari, kwa maana Mfalme atakuwa hapa karibuni; Ee, ni lazima liwe kuja kwake Bwana!

Aprili 6

“Kama vile tulivyo na viungo vingi katika mwili mmoja, vivyo hivyo sisi tulio wengi tu mwili mmoja katika Kristo” (Warumi 12:4, 5).

Mara nyingine ushirika wetu na Mungu hukatwa, au huvurugwa kwa sababu ya jambo baya na ndugu, au ukosefu fulani wa umoja katika mwili wa Kristo. Twajaribu kumfikia Bwana, lakini hatuwezi, kwa sababu tumetengwa na kiungo fulani cha mwili wa Bwana, au kwa sababu hakuna uhuru wa upendo wake ukitiririka kupitia kila sehemu iliyo hai. Hakuhitaji pigo kichwani ili kupooza ubongo; pigo juu ya neva fulani laweza kufanya hivyo; au jeraha katika ateri fulani penye ncha za mwili laweza kuwa la mauti kwa moyo. Basi, hatuna budi kusimama sawa na watoto wake wote, na kukutana katika mwili wa Kristo kwa ushirika ulio mtamu na kamili zaidi, kama twataka kudumisha ushirika wetu kamili na Kristo mwenyewe. Mara nyingine tutakuta kwamba hali iliyobadilika kwa Mkristo mmoja itatuleta katika mafuriko ya Roho Mtakatifu. Yaonekana haiwezekani kuwa na imani pasipo upendo, au kumpata Kristo peke yake pasipo ukamilifu wa ushirika na watakatifu wake wote wapendwa; na kiungo kimoja kikiteseka, vyote huteseka pamoja, na kimoja kikifurahi, vyote hubarikiwa pamoja.

Aprili 7

“Ndani yake yeye tunaishi, tunakwenda” (Matendo 17:28).

Mkono wa Gehazi, na hata fimbo ya Elisha, havingeweza kumponya yule mtoto asiye na uhai. Kulihitaji mguso hai wa mwili wa nabii mwenyewe uliohuishwa na Mungu ili kutia uzima katika ule udongo baridi. Mdomo kwa mdomo, mkono kwa mkono, moyo kwa moyo, ilimpasa kumgusa mtoto kabla uzima haujaweza kutetema katika mishipa yake isiyo na mpigo.

Hatuna budi kuja katika mgusano wa nafsi na Mwokozi aliyefufuka, na kuwa na uzima wake wenyewe ukihuisha mwili wetu unaokufa kabla hatujaweza kuujua ukamilifu na uhalisi wa uponyaji wake. Hii ndiyo sababu ya mara kwa mara ya kushindwa. Watu mara nyingi hutumaini jambo fulani lililotendwa kwao, au jambo walilolitenda wenyewe, au jambo waliloliamini kiakili; lakini roho zao hazijafikia kwa mguso moyo wa Kristo, wala hawajauvuta upendo wake ndani yao kwa njaa na kiu ya upendo na imani, na hivyo hawajahuishwa. Hitaji kubwa kuliko yote ya nafsi na miili yetu ni kumjua Yesu binafsi, kumgusa daima, kukaa ndani yake sikuzote.

Na tuweke kando leo mambo yote yaliyoweza kuzuia kumkaribia kwetu, na kuenenda mkono kwa mkono, moyo kwa moyo, na Yesu.

Aprili 8

“Moyo uliochangamka ni dawa nzuri” (Mithali 17:22).

Mfalme Sulemani aliacha kati ya misemo yake ya hekima dawa kwa mioyo iliyo mgonjwa na yenye huzuni, nayo ni ile tuwezayo kuitwaa kwa salama. “Moyo uliochangamka ni dawa nzuri.” Furaha ndiyo mrejeshaji na mponyaji mkuu. Furaha ya roho italeta afya mifupani na uzima neva wakati vitia-nguvu vingine vyote vitakaposhindwa, na vituliza-maumivu vingine vyote vitakapoacha kutuliza. Ewe mgonjwa, anza kufurahi katika Bwana, nayo mifupa yako itasitawi kama mche, na mashavu yako yataangaza kwa maua ya afya na upya. Wasiwasi, hofu, kutokuamini, na shaka, ni matone yote ya sumu; furaha ni marhamu na uponyaji; na kama utafurahi tu, Mungu atakupa nguvu. Amekuamuru uwe na furaha na kufurahi; naye hakosi kamwe kuwategemeza watoto wake katika kuzishika amri zake. Furahini katika Bwana sikuzote, asema; maana yake haidhuru u mwenye huzuni kadiri gani, umejaribiwa kadiri gani, u mgonjwa kadiri gani, unateseka kadiri gani, furahini katika Bwana pale pale ulipo, na uanze saa hii.

Furaha ya Bwana ndiyo nguvu za mwili wetu, Furaha ya Yesu, marhamu ya maumivu yetu, Uzima wake na ukamilifu wake, chemchemi yetu ya uponyaji, Furaha yake, dawa yetu kwa mwili na akili.

Aprili 9

“Nafanya sikuzote yale yampendezayo” (Yohana 8:29).

Ni jambo jema kutunza hesabu fupi na Mungu. Tulistaajabishwa sana miaka fulani iliyopita na tafsiri ya mstari huu: “Basi kila mtu miongoni mwetu atatoa habari zake mwenyewe mbele za Mungu.” Wazo lililowasilishwa akilini mwetu ni lile la kumtolea Mungu hesabu kila siku ya maisha yetu, hata hesabu zetu zilipwe kila siku, na kwa ajili yetu hukumu ipite, tulalapo juu ya mto wetu kila usiku.

Hii kwa hakika ndiyo njia ya kweli ya kuishi. Ni siri ya amani kubwa, nayo itakuwa faraja ya kupendeza wakati maisha yakaribiapo kuisha, au Bwana akaribiapo kuja, kujua kwamba hesabu yetu imelipwa, na hukumu yetu imekwisha, na kwa ajili yetu kilichobaki ni kungoja tu neno lile la furaha, “Vema, mtumwa mwema na mwaminifu, ingia katika furaha ya bwana wako.”

Hatua kwa hatua nitatembea na Yesu, Kitambo kimoja tu kwa wakati, Vilele nisivyo na mbawa za kupaa juu yake, Hatua kwa hatua miguu yangu yaweza kupanda. Yesu, niweke karibu—karibu zaidi, Hatua kwa hatua na siku kwa siku, Nikikanyaga katika nyayo zako zenyewe, Nikitembea nawe njia yote.

Aprili 10

“Shikamaneni sana na ujasiri” (Waebrania 3:6).

Ni mara chache tumeona uharibifu wa kusikitisha zaidi hata wa tabia ya Kikristo iliyo juu na tukufu kuliko wakati adui amefanikiwa kuudhoofisha uaminifu sahili wa mtoto wa Mungu, na kumfikisha katika kujilaumu na kujihukumu. Ni mahali pa kutisha wakati nafsi imruhusupo Shetani kutwaa kiti cha enzi na kutenda kama Mungu, akiketi kuhukumu kila wazo na tendo lake; na kuiweka katika giza la hukumu isiyokoma. Ni vyema kweli mtume ametuambia tushike sana ngao ya imani!

Hili ndilo lengo la Shetani katika mashambulizi yake yote juu yako, kuuharibu uaminifu wako. Kama aweza kukufanya upoteze uaminifu wako sahili katika Mungu, ajua ya kwamba atakuwa nawe hima chini ya miguu yake.

Yatosha kuiharibu akili na maisha pia kwa nafsi iliyojua utamu wa upendo wake kupoteza kutumaini kwake kamili katika Mungu. “Wapenzi, shikeni sana ujasiri wenu na furaha ya matumaini yenu imara hata mwisho.”

Usiogope kutwaa nafasi yako Pamoja na Yesu juu ya kiti cha enzi, Na kuamuru nguvu za dunia na kuzimu, Zikubali fimbo yake ya enzi.

Aprili 11

“Umkabidhi Bwana njia yako” (Zaburi 37:5).

Ni mara chache tumesikia ufafanuzi bora wa imani kuliko uliotolewa mara moja katika mojawapo ya mikutano yetu na mwanamke mzee mpenzi mwenye asili ya Kiafrika, alipojibu swali la kijana mmoja jinsi ya kumtwaa Bwana kwa msaada uhitajiwao.

Kwa namna yake ya pekee, akimwelekezea kidole chake, alisema kwa msisitizo mkuu: “Yakupasa tu kuamini kwamba ameifanya, nayo imefanyika.” Hatari kubwa kwa wengi wetu ni kwamba, baada ya kumwomba aitende, hatuamini kwamba imefanyika, bali twaendelea kumsaidia, na kuwapata wengine wamsaidie; tukimsimamia Mungu na kungoja kuona jinsi atakavyoifanya.

Imani huweka amina yake juu ya ndiyo ya Mungu, ndipo huondoa mikono yake, na kumwacha Mungu aimalize kazi yake. Lugha yake ni, “Umkabidhi Bwana njia yako; umtumaini naye, naye atatenda.”

Bwana, naacha mapambano, Kwako nakabidhi njia yangu, Nalitumaini neno lako milele, Na kulisuluhisha yote leo.

Aprili 12

“Wakawa kama wanaonung’unika” (Hesabu 11:1).

Kuna kifungu cha maneno cha ajabu sana katika kitabu cha Hesabu, katika habari ya kunung’unika kwa wana wa Israeli jangwani. Chasomeka hivi: “Watu walipokuwa kama wanaonung’unika.” Kama usomaji mwingi wa pembeni ni bora kuliko maandiko yenyewe, na ulimwengu mkuu wa kweli itoayo mawazo umefichwa nyuma ya sentensi ile ndogo.

Kwa mbali twaweza kuona picha nyingi wazi zikiinuka mbele ya fikira zetu za watu wasiothubutu kutenda dhambi waziwazi na kabisa, bali huweza kuitenda “kama kwamba” tu. Hawasemi uongo waziwazi, bali hukwepa au kupinda, au kudokeza uongo wa kutosha kuponyoka hukumu halisi ya dhamiri. Hawamshtaki Mungu waziwazi kwa ukosefu wa fadhili au uaminifu, bali humpiga kupitia mtu mwingine. Hutafuta hatia katika mazingira na watu na mambo ambayo Mungu ameruhusu yaingie katika maisha yao, na, “Kama kwamba,” hunung’unika. Yamkini hawaendi mbali zaidi. Huhisi kama kufanya hivyo kama wangethubutu kumshtaki Mungu kwa upumbavu.

Mambo haya yaliandikwa ili kutuonya.

Aprili 13

“Furahini siku zote” (1 Wathesalonike 5:16).

Usiipoteze furaha yako lo lote jingine utakalolipoteza. Ishike roho ya majira ya machipuko. “Furahini siku zote,” na “Tena nasema, Furahini.”

Kupotea kwa Kanaani kulianza katika roho ya kunung’unika, “Watu walipokuwa kama wanaonung’unika, ilimchukiza Bwana.” Ufa wa kwanza katika ushirika wao, kigugumizi cha kwanza katika kusonga kwao mbele, kilikuja walipoanza kutia shaka, na kuhuzunika, na kufadhaika.

Ee, uzuie moyo usitobolewe na huzuni, kukatishwa tamaa, kutokuamini na giza, kwa maana Shetani hawezi kuiponda nafsi ifurahiyo na kusifu.

Iangalie mianzo ya dhambi. Usiache mguso wa kwanza wa uovu ukae. Ni hatua ya kwanza ipotezayo yote. Ee, kubaki umefungwa ndani ya Roho Mtakatifu na katika uzima wenyewe wa Yesu hata uovu usiweze kutufikia!

Inzi mdogo aliye ndani ya kioo cha dirisha aweza kushambuliwa na ndege mdogo aliye nje, naye aweza kuona kwamba ameangamia, lakini kile kioo kilicho kati chao humhifadhi salama na hatari zote kwa hakika kama kwamba kingekuwa ukuta mkuu wa chuma.

Aprili 14

“Nami nikiinuliwa juu ya nchi, nitawavuta wote kwangu” (Yohana 12:32).

Maisha ya Kikristo ya kweli na safi huuvuta ulimwengu. Kuna mamia ya wanaume na wanawake wasioona kivutio cho chote katika maisha ya Wakristo wa kawaida ili kuwapendezesha katika dini ya vitendo, lakini watekwao mara moja na kielelezo cha kweli chenye ushindi. Twaamini kwamba wanaume zaidi wa ulimwengu huingia kwa ruka moja katika maisha ya kujitoa kabisa kuliko katika hali ya kati ambayo kwa kawaida huwasilishwa kwao katika daraja ya kwanza.

Katika mkutano mmoja palikuwa na mtu ambaye kwa nusu karne au zaidi alikuwa ameishi pasipo Kristo, naye alikuwa raia mashuhuri sana, mtu wa maisha ya hadhara, wa tabia isiyolaumika, akili tukufu, na roho na tabia zenye kuvuta sana, lakini asiye na huruma kabisa na maisha ya Kikristo.

Mwishoni mwa ibada ya kuendeleza maisha ya kina zaidi ya rohoni alisimama kuomba maombi ya kusanyiko, na kabla ya mwisho wa juma alikuwa yeye mwenyewe mfuasi wa kweli na aliyekiri wa Bwana Yesu Kristo. Alisema, alipokwenda nyumbani usiku ule, “Kama hiyo ndiyo dini ya Yesu Kristo, naitaka.”

Aprili 15

“Mkiwa na shina na msingi katika upendo” (Waefeso 3:17).

Kuna kichaka cha ajabu sana, kimeacho kwa wingi upande wa magharibi, na chapatikana pande zote za Texas. Si kingine ila “mti wa mbu.” Ni kichaka chembamba sana, chenye kuonekana kama mkuyu, na chaonekana kuwa cha faida ndogo kwa shughuli zo zote za viwanda; lakini kina mizizi ya ajabu ikuayo kama mbao kubwa chini ya ardhi, chenye sifa za uvumilivu katika hali zote hata chatumiwa na kuthaminiwa sana kwa barabara nzuri. Mji wa San Antonio wasemekana umefunikwa kwa mizizi hii. Chatukumbusha wale Wakristo wasioonyesha mengi kwa nje, lakini ukuaji wao ni hasa wa chini ya ardhi—usioonekana, katika kina cha Mungu. Hawa ndio wanaume na wanawake ambao Mungu huwatumia kwa msingi wa mambo, na kwa barabara za mji ule wa Mungu utakaosimama wakati mambo yote ya kidunia yatakapokuwa yamebomoka na kuwa magofu na kufutika katika usahaulifu.

Ndani zaidi, ndani zaidi, maji yaliyo hai na yatiririke; Ee Roho Mtakatifu uliyebarikiwa! Mto wa Wokovu! Ukamilifu wako wote na niujue.

Aprili 16

“Fanyeni kiume” (1 Wakorintho 16:13).

Uwe hodari. Waoga sikuzote hupata madhara. Watu hodari kwa kawaida hutoka salama. Yeremia alikuwa shujaa. Hakurudi nyuma kwa lo lote. Aliwakabili mfalme wake na wenzake kwa ushujaa usio na woga, na tokeo lilikuwa hakupata madhara yo yote, bali alipita katikati ya kuzingirwa kwa Yerusalemu bila hata unywele mmoja kudhuriwa. Sedekia, mfalme mwoga, sikuzote aliogopa kumtii Mungu na kuwa mkweli, na tokeo lilikuwa mwishowe alikutana na adhabu ya kikatili kuliko zote iliyowahi kutiwa juu ya moyo wa mwanadamu.

Wanaume na wanawake wasimamao tangu mwanzo kuwa wakweli kwa imani yao huwa na majaribu machache kuliko wote. Mungu akupapo jaribu jema, kama waweza kustahimili mkazo, hazidi kulirudia sikuzote. Ibrahimu alipomtoa mwanawe Isaka juu ya Mlima Moria, kilikuwa kipimo cha mwisho kwa maisha yake yaliyobaki yote. Usimwache Shetani aone kwamba unamwogopa, kwa maana atakufuatia hata mautini kama afikiri kwamba ana nafasi ya kukupata.

Uwe mkweli, uwe mkweli, Rafiki wawe wa uongo au wachache, Lo lote litakalotukia, sikuzote ubavuni pake, Umwache sikuzote akuone u mkweli.

Aprili 17

“Yeye aitawalaye roho yake ni bora kuliko mtu atwaaye mji” (Mithali 16:32).

Kiasi ni kujitawala kwa kweli. Chahusisha neema ya kujinyima nafsi na roho ya akili timamu. Ni ule uthabiti wa roho utuwekao tulivu, tukijimiliki, tukiwaza, tukiwa waangalifu, na tukiwa chini ya sauti ya Mungu na dhamiri ya wajibu daima katika kila hatua tunayochukua. Watu wengi hawana uthabiti huo na roho yenye kuwaza. Hupeperushwa na msukumo wa hisia zao wenyewe, hali zao, ushawishi wa wengine, au mazingira yanayowazunguka. Hakuna tamaa itupasayo kutuongoza kamwe. Hakuna kusudi, hata liwe la haki kadiri gani, litupasalo kutumiliki hata tusiwe huru kikamilifu. Upendo safi waweza kuwa upendo uliozidi kiasi. Kazi yetu yenyewe yaweza kuwa shauku ya ubinafsi. Kile tulichoanza kufanya kwa sababu kilikuwa mapenzi ya Mungu, twaweza kukishikilia na kukikaza mwishowe, kwa sababu ni mapenzi yetu wenyewe. Bwana, utupe roho itawaliwayo daima na Roho na mapenzi yako, na jicho likutazamalo wewe kila kitambo kama macho ya mtumishi kwa mkono wa bibi yake. Hivyo utumishi wako utakuwa uhuru wetu kamili, na kujitiisha kwetu kwako uhuru ulio wa Kimungu kabisa.

Aprili 18

“Watapanda juu kwa mbawa” (Isaya 40:31).

“Watapanda juu kwa mbawa kama tai,” ndio utangulizi wa Mungu; kwa maana ahadi ifuatayo ni, “Watapiga mbio, wala hawatachoka; watakwenda kwa miguu, wala hawatazimia.” Saa za shangwe takatifu ni za lazima kwa saa za kuvumilia, kungoja na kutenda kazi. Asili ina majira yake ya machipuko, na neema nayo inayo.

Basi na tufurahi katika Bwana daima, na tena twasema, furahini. Na tumtwae awe furaha yetu ya daima, ambaye moyo wake ni chemchemi ya baraka, na aliyetiwa mafuta ya furaha kupita wenzake. Hatuna budi kukatishwa tamaa kama mafuriko si makubwa sawasawa daima. Hata wakati wa maji kupwa, bahari imejaa vile vile. Asili ya kibinadamu haingeweza kustahimili msisimko wa daima, hata uwe wa aina ya furaha, na Mungu mara nyingi hupumzika katika upendo wake. Na tuishi bila kujitambua kadiri iwezekanavyo, tukijaza kila kitambo kwa utumishi wa uaminifu, na kumtumaini akoroge majira ya machipuko kwa mapenzi yake, na tuendeleapo katika utumishi wa uaminifu tutasikia, tena na tena, mnong’ono wake wa furaha: “Vema, mtumwa mwema na mwaminifu, ingia katika furaha ya bwana wako.”

Aprili 19

“Umtulie Bwana, umngoje kwa saburi” (Zaburi 37:7).

Ni wazo la kutoa fikira sana kwamba ni katika Injili ya Marko, iliyo Injili ya utumishi, tumsikia Bwana akiwaambia wanafunzi wake, “Njoni ninyi peke yenu mahali pasipokuwa na watu, mkapumzike kidogo.” Mungu ataka watenda kazi waliopumzika. Kuna nguvu iwezayo kuwa isiyochoka na isiyokoma, na bado kimya kama kina cha bahari, kwa amani ya Mungu, ipitayo akili zote. Siri mbili zilizo kuu za pumziko ni, kwanza, kupatana na mapenzi ya Mungu, na, pili, kutumaini. “Wana amani nyingi waipendao sheria yako,” yaeleza ya kwanza. “Utamlinda yeye ambaye moyo wake umekutegemea katika amani kamilifu, kwa kuwa anakutumaini wewe,” yaeleza ya pili. Kuna mengi katika kujifunza “kutulia.” Mara nyingine twasahau kwamba humaanisha kikweli kusimama. Ni baraka kuu hata kusimamisha fikira zote, na hii mara nyingi ndiyo njia pekee ya kujibu kimbunga cha Shetani cha maswali na fikira zichokozazo, kuwa kimya kabisa na kukataa hata kufikiri, na kuikuta sauti yake ya uovu kwa neno sahili na la milele, “Hapana!” Tukiwa kimya Mungu atatupa amani.

Aprili 20

“Walikaa huko pamoja na mfalme kwa kazi yake” (1 Nyakati 4:23).

Ni rahisi kwa maji kuteremka chini kutoka chemchemi za juu, lakini yahitaji msukumo wa Kimungu ili yapande juu kutoka bondeni katika chemchemi za chini. Hakuna kinachotangaza zaidi habari za Kristo kuliko kumwona Mkristo akifurahi na kuwa mchangamfu katika kazi ya kawaida na ya kila siku, kama mabaharia wasimamao gatini wakipakia meli na kuimba wanaposukuma mizigo yao, wakiweka wakati kwa roho ya sifa sawasawa na hatua na mienendo ya kazi na wajibu. Hakuna aliye na huduma tamu au ya juu zaidi kwa Kristo kuliko mfanyabiashara au mwanamke atumikaye ambaye aweza kuchukua nuru ya mbinguni katika nyuso zao mchana kutwa. Kama ndege wa baharini awezaye kuzama chini ya maji ya chumvi na manyoya yake mazuri na yasiyo na doa, na kutoka bila tone moja kushikamana na kifua chake king’aacho na mbawa zake ziangazazo kwa sababu ya mafuta ya siri juu ya manyoya yazuiayo maji kushikamana, basi, ashukuriwe Mungu, sisi nasi twaweza kutiwa mafuta ya Roho Mtakatifu hata dhambi, huzuni na unajisi visishikamane nasi, bali tutapita katika kila bahari kama meli ipitavyo katika mawimbi, ndani, lakini juu ya mafuriko yanayotuzunguka.

Aprili 21

“Mafuta yale mliyoyapata” (1 Yohana 2:27).

Hii ndiyo siri ya maisha ya kina zaidi, lakini “Ili mpate kuwa na shina na msingi katika upendo,” ndio kiini chake, na utamu wake. Ukamilifu wa upendo wa Kimungu moyoni utafanya kila jambo kuwa jepesi. Ni jepesi sana kufanya mambo tuyapendayo, na ni jepesi sana kumtumaini yule tumpendaye, na kadiri tunavyoutambua upendo wao ndivyo tutakavyowatumaini kwa ajili yake. Ni chanzo cha uponyaji. Mawimbi ya upendo yatiririkayo kupitia miili yetu yataitia nguvu kwa ajabu miili yetu yenyewe, na upendo wa Bwana wetu utakuwa chemchemi ya daima ya ujana na upya katika hali yetu ya kimwili. Siri ya upendo ni sahili sana. Ni kuutwaa moyo wa Yesu uwe upendo wetu na kudai upendo wake kwa kila hitaji la maisha, uwe kwa Mungu au kwa wengine. Ni tamu sana kuwafikiri watu kwa njia hii, “Nitautwaa moyo wa Yesu kwao, ili aniache niwapende kama awapendavyo yeye.” Ndipo twaweza kuwapenda hata wasiostahili kwa kiasi fulani, kama tutawaona katika nuru ya upendo na tumaini lake, kama watakavyokuwa, na si kama walivyo sasa, wasiostahili upendo wetu.

Aprili 22

“Kristo ni kichwa” (Waefeso 5:23).

Mara nyingi twataka watu watuombee na kutusaidia, lakini sikuzote twaliangamiza lengo letu tuwatazamapo sana na kuwaegemea. Siri ya kweli ya muungano ni kwa wote wawili kumtazama Mungu, na katika tendo la kutazama zaidi ya nafsi zao hata kwake huunganishwa bila kujitambua. Baharia alikuwa sahihi alipomwona yule mtoto mdogo akianguka baharini na kungoja dakika moja kabla ya kutumbukia kumwokoa. Yule mama aliyefadhaika alipomuuliza kwa uchungu kwa nini alikuwa amengoja muda mrefu hivyo, alijibu kwa hekima: “Nilijua kwamba kama ningeingia kabla angenishika na kunivuta chini. Nilingoja hata mapambano yake yalipokwisha, ndipo nikaweza kumsaidia asiponishika kwa nguvu mno.”

Watu wanapotushika kwa nguvu mno, iwe kwa upendo wao au kwa kutuegemea kwao, twatambua kwa hisi ya ndani kwamba hawamtazami Mungu, nasi twapoozwa katika juhudi zetu za kuwasaidia. Basi, maombi ya pamoja hutaka kwamba yule tunayemwombea awe akitazama mbali nasi hata kwa Bwana Yesu Kristo, nasi kwa pamoja tumtazame yeye peke yake.

Aprili 23

“Kuhani mkuu awezaye kuchukuana nasi katika udhaifu wetu” (Waebrania 4:15).

Muda fulani uliopita tulikuwa tukizungumza na dada aliyeteseka sana juu ya uponyaji, aliyekuwa ameelemewa sana kimwili na mwenye shauku ya kuweza kumtumaini Bwana kwa ukombozi. Baada ya mazungumzo kidogo tuliomba pamoja naye, tukikabidhi shauri lake kwa Bwana kwa kumtumaini kabisa na ukombozi kadiri alivyokuwa tayari kudai. Mara tulipomaliza maombi yetu alishika mkono wetu, akatuomba tuungane naye katika mzigo uliokuwa juu ya moyo wake zaidi, ndipo, bila neno la kutaja uponyaji wake mwenyewe, au mzigo aliokuwa akipondwa hata kufa chini yake, akaanza maombi kwa ajili ya yatima maskini, ambaye alikuwa amesikia habari zake siku ile tu, kama hatujawahi kusikia yaliyopita kwa huruma na upendo, akimsihi Mungu amsaidie na kumwokoa, na kulia kwa uchungu wa ghafula wa upendo mara nyingi wakati wa maombi yake, ndipo akakoma bila hata kutaja hitaji lake mwenyewe. Tuliguswa sana na tamasha hilo la upendo, tukawaza jinsi moyo wa Baba lazima uguswe kwa ajili ya hitaji lake mwenyewe.

Aprili 24

“Usikasirike kwa vyo vyote” (Zaburi 37:8).

Uzima ulipotea katika Israeli kwa sababu jozi ya mikono ya kibinadamu iliwekwa bila kuamriwa juu ya sanduku la Mungu. Iliwekwa juu yake kwa nia njema kabisa ya kulizuia lisiyumbe na kutikisika ng’ombe walipolivuta katika njia mbaya, lakini iligusa kazi ya Mungu kwa jeuri, nayo ikaanguka imepooza na isiyo na uhai. Mengi ya maisha ya imani yamo katika kuyaacha mambo. Kama twamkabidhi Mungu jambo kabisa twaweza kuondoa mikono yetu juu yake, naye atalilinda kwa ajili yetu vizuri kuliko tuwezavyo kumsaidia. “Umtulie Bwana, umngoje kwa saburi. Usikasirike kwa sababu yake yeye afanikiwaye katika njia yake, kwa sababu ya mtu afanyaye hila.” Mambo yaweza kuonekana yanaenda vibaya kabisa, lakini yeye ajua vile vile kama sisi; naye atainuka wakati ufaao kama tunamtumaini kwa ukamilifu hivyo hata kumwacha atende kazi kwa njia na wakati wake mwenyewe. Hakuna kitu kilicho na ufundi kama kutokutenda katika mambo fulani, na hakuna kitu chenye madhara kama kutenda kazi bila kutulia, kwa maana Mungu amekusudia kutenda mapenzi yake makuu.

Aprili 25

“Mungu wa amani mwenyewe awatakase kabisa” (1 Wathesalonike 5:23).

Wimbi kubwa la maji lainua meli iliyokwama, hata inaelea juu ya kizingiti bila mti mmoja kuvutwa wala baharia mmoja kujitaabisha, badala ya juhudi zisizofaa na za taabu za wafanyakazi wapambanao na mkazo wa injini, zilizojaribu bure kuisogeza hata inchi moja hata msukumo ule wa mbinguni ulipoiinua kwa mvuto wake mwenyewe.

Ni sheria kuu ya Mungu ya uvutano ikiinua, kwa miale ya jua yenye joto, jabali kubwa la barafu ambalo watu milioni wasingeweza kuliinua hata inchi moja, lakini layeyuka mbele ya miale na joto la mwangaza wa jua, na kupanda katika mawingu ya mvuke ili kukutana na kumbatio lake hata donge lile baridi na zito lielee katika mawingu laini ya utukufu katika bahari ya samawi ya anga.

Jinsi haya yote yalivyo mepesi! Jinsi yalivyo na uweza! Jinsi yalivyo sahili! Jinsi yalivyo ya Kimungu! Wapenzi, je, mmeingia katika njia ya Kimungu ya utakatifu! Kama mmeingia, jinsi moyo wenu ulazimikavyo kufura kwa shukrani! Kama hamjaingia, je, hamtamani, wala hamtaungana katika ombi la andiko kwamba Mungu wa amani mwenyewe atawatakasa kabisa?

Aprili 26

“Wageni na wasafiri” (Waebrania 11:13).

Kama umewahi kujaribu kulima mtaro ulionyooka mashambani—twamsikitikia mtu asiyejua kulima na kumsikitikia zaidi mtu aliye na kiburi mno hata asitake kujua—umeona kwamba ni lazima kuwa na vigingi viwili katika mstari mmoja na kuwaendesha farasi wako kwa vigingi hivyo. Kama una kigingi kimoja tu mbele yako, hutakuwa na kituo cha uthabiti kwa macho yako, bali waweza kupinda-pinda bila kujua na kufanya mitaro yako iliyopindana kama mzunguko wa nyoka; lakini kama una vigingi viwili na kuviweka katika mstari daima, huwezi kupotoka hata inchi kutoka mstari ulionyooka, nao mtaro wako utakuwa mshale uendao mbio katika njia yake.

Hili limekuwa somo kuu kwetu katika maisha yetu ya Kikristo. Kama twataka kupiga mwendo ulionyooka, twakuta kwamba ni lazima tuwe na vigingi viwili, kilicho karibu na kilicho mbali. Haitoshi kuishi katika sasa tu, bali ni jambo kuu na tukufu kuwa na lengo la mbali, kusudi hakika, na nia iliyo wazi mbele yetu ambayo kwa ajili yake twaishi, na ambayo kwayo twaunda sasa yetu.

Aprili 27

“Utamu wa midomo” (Mithali 16:21).

Hali za rohoni zimeunganishwa bila kutenganika na maisha yetu ya kimwili. Mtiririko wa mikondo ya uzima ya Kimungu yaweza kuvurugwa na donge dogo la damu; mkondo wa uhai waweza kuvuja kupitia jeraha dogo mno.

Kama wataka kutunza afya ya Kristo, jiepushe na vidonda vyote vya rohoni, na majeraha yote ya moyo na uchokozi wote. Saa moja ya kufadhaika itachakaza uzima zaidi kuliko juma zima la kazi; na dakika moja ya chuki, au wivu na husuda ivunjayo moyo, itadhuru zaidi ya kunywa sumu. Utamu wa roho na furaha ya moyo ni ya lazima kwa afya kamili. Utulivu wa roho, upole, uzima wa amani, na amani ya Mungu ipitayo akili zote, vina thamani kuliko dawa zote za usingizi nchini.

Hatustaajabu kwamba watu wengine wana afya mbaya tunaposikia wakizungumza kwa nusu saa. Wana machukio, chuki, mashaka, na hofu za kutosha kuchosha katiba iliyo imara kuliko zote.

Wapenzi, kama mtataka kutunza uzima na nguvu za Mungu, viweke nje vitu viuavyo; viweke kwa ajili yake, na kwa ajili ya kazi yake, nanyi mtakuta vya kutosha na kuzidi.

Aprili 28

“Kwa maana ndiye Mungu atendaye kazi ndani yenu” (Wafilipi 2:13).

Utakaso ni kipawa cha Roho Mtakatifu, tunda la Roho, neema ya Bwana Yesu Kristo, urithi ulioandaliwa kwa wote waingiao, jambo kuu lipatikanalo kwa imani, si linalofikiwa kwa matendo. Ni utakatifu wa Kimungu, si kujiboresha kwa kibinadamu, wala ukamilifu. Ni utiririko ndani ya utu wa mwanadamu wa uzima na usafi wa yule Asiye na Mpaka, wa Milele na Mtakatifu, akileta ukamilifu wake mwenyewe na kutenda mapenzi yake mwenyewe. Jinsi ilivyo rahisi, jinsi ilivyo ya papo hapo, jinsi ilivyo ya kupendeza njia hii ya mbinguni ya utakatifu! Kwa kweli ni “njia kuu” na si njia ya chini ya kujitesa kwa bure na bila matunda kwa mwanadamu.

Ni reli kuu ya Mungu iliyoinuliwa, ikipita juu ya vichwa vya makutano yajitaabishayo yasongamanayo katika barabara ya chini hali yangeweza kuchukuliwa katika njia yake ya kupaa, kwa msukumo wake mwenyewe wa uweza wote. Ni lifti kuu ya Mungu ikitupandisha juu hata vyumba vya juu vya jumba lake, bila juhudi za mno za taabu, hali wengine wajitaabisha kupanda ngazi zizungukazo na kuzimia njiani.

Na leo tumtwae kwa ukamilifu hivyo hata aweze “kutufanya tuende katika amri zake.”

Aprili 29

“Upendo haupungui neno wakati wo wote” (1 Wakorintho 13:8).

Katika kazi yetu kwa ajili ya Mungu ni jambo kuu kupata ufunguo wa mioyo ya wanadamu, na kutambua jambo fulani jema kuwa kituo cha mgusano kwa uvutano wetu wa rohoni. Yesu alipokutana na yule mwanamke huko Samaria mara moja alishika vilivyo bora ndani yake, na kwa hili aliufikia moyo wake, na kutoa kwake kiri cha hiari cha wokovu wake. Mskoti mmoja alisema mara moja kwamba wokovu wake wote ulitokana na jambo kwamba mtu mwema mmoja (Bwana Shaftesbury, twaamini) alimzunguka mikono yake mara moja na kusema, “John, kwa neema ya Mungu tutakufanya mtu bado.”

Hadithi ya zamani yasimulia habari ya mbwa maskini aliyekufa amelala barabarani katikati ya makutano, kila mmoja wao akiwa na neno la kusema, hata Yesu alipopita, na mara akaanza kuvistaajabia meno yake mazuri. Alikuwa na neno la fadhili la kusema hata juu yake.

Yupo Mmoja tu awezaye kuishi na kupenda hivi; Upendo wa Kristo lazima uchipuke kutoka kwa Kristo aliye hai. Ee! Yesu! njoo uishi uzima wako ndani yangu, Na kuleta mbingu yako yote ya upendo na baraka.

Aprili 30

“Upendo huamini yote” (1 Wakorintho 13:7).

Ni nzuri ile kauli katika Kitabu cha Isaya iakisiyo kwa utamu upitao upendo wa Bwana wetu mpendwa. Alisema, “Hakika hao ni watu wangu, wana wasiotenda hila; basi akawa Mwokozi wao.” Walitenda hila, lakini yeye hakutaka kuiamini. Angalau yeye anena kama kwamba asingeiamini katika ukuu wa upendo wake, kwa sababu walikuwa watu wake. Hakuona uovu katika Yakobo wala ukaidi katika Israeli. Uko wa kutosha kuonekana, na shetani auona wote, na watu wengi wako radhi sana kuuona; lakini Baba mpendwa hataki kuuona. Auifunika kwa upendo wake na damu ya thamani ya Mwanawe mpendwa afanyaye upatanisho. Upendo wa ajabu namna hiyo kwa hakika wapasa kutufanya wapole zaidi kwa wengine, na wenye shauku zaidi kusababisha Baba yetu awe na haja ndogo ya kuyaficha macho yake ya upendo mbali na dosari na makosa yetu.

Kama tuna nia na moyo wa Kristo, tutauvika hata ulimwengu neema zile ambazo imani yaweza kuzidai kwao, na kujitahidi kadiri tuwezavyo kuwahesabu kama kwamba ni halisi, na kwa upendo na maombi mwishowe tutawafanya kuwa halisi. “Upendo huamini yote.”