Mei

Mei 1

“Tunda la Roho ni upole” (Wagalatia 5:22).

Ukali wa asili umeyeyuka, na sasa dunia yang’aa kwa tabasamu la majira ya machipuko, na kila kitu kinachotuzunguka hunong’ona juu ya upole wa Mungu. Tunda hili zuri lapatana vyema na mwezi huu wa upole ambao ni ufunguo wake. Roho Mtakatifu na atuongoze, wapenzi, siku hizi, ndani ya utamu wake, utulivu wake, na upole wake, akiitiisha kila tabia mbaya, ya ukatili, ya ukali, na isiyo takatifu, na kutufanya kama yeye, ambaye juu yake imesemwa, “Hatabishana, wala hatapiga kelele; wala mtu hataisikia sauti yake njiani.”

Mtu aliyejaa kweli Yesu daima atakuwa mstaarabu. Mwanamke aliyebatizwa kwa Roho Mtakatifu atakuwa na hisia za mwanamke mwungwana kamili, ijapokuwa amezaliwa katika hali ya chini wala hakulelewa katika shule za adabu za kidunia. Wapenzi, na tupokee na kuakisi upole wa Kristo, roho ya mtoto mtakatifu, hata ulimwengu utakaposema juu yetu, kama vile Chesterfield mstaarabu na asiyeamini alivyowahi kusema juu ya Fenelon mtakatifu, “Kama ningalibaki nyumbani mwake siku moja zaidi, ningelilazimika kuwa Mkristo.”

Bwana, utusaidie leo, tujitoe hivyo kwa Roho mpole aliye kama Njiwa, hata maisha yetu yawe kama maisha yake.

Mei 2

“Sikuzote hutushindisha” (2 Wakorintho 2:14).

Jinsi maneno haya yanavyotusaidia! Yakumbuke watu wanapokukwaruza, shetani anapokuchoma kwa mishale yake ya moto, roho yako iliyo dhaifu na ya kujipenda inapoudhika au kunung’unika; sauti ya upole na isikike juu ya ugomvi, ikinong’ona, “Endelea kuwa mtamu, endelea kuwa mtamu!” Nawe kama utaisikiliza upesi, utaokolewa na maanguko elfu na kuhifadhiwa katika amani kamili.

Ni kweli, huwezi kujiweka mtamu mwenyewe, bali Mungu atakuhifadhi akiona kwamba ni kusudi lako thabiti na lililoazimiwa kuhifadhiwa mtamu, na kukataa kunung’unika au kuwa na kinyongo au kulipiza kisasi. Tatizo ni kwamba, wewe wafurahia kidogo ile hasira na huzuni ya nafsi. Wataka kutunza kinyongo kidogo, na kuhurumia hisia zako zilizoumizwa, na kuulea uchungu wako mdogo.

Wapenzi, Mungu atakupa upendo wote uutakao kweli na kuuchagua kwa unyofu. Waweza kuwa na kinyongo chako au waweza kuwa na amani ipitayo akili zote; lakini huwezi kuwa na vyote viwili.

Kuna dawa ya kuponya maumivu elfu ya moyo, na mbingu ya amani na nguvu katika maneno haya mawili madogo—ENDELEA KUWA MTAMU.

Mei 3

“Amani yangu nawapa” (Yohana 14:27).

Hapa ndipo penye siri ya amani idumuyo—amani ya Mungu. Twajitoa wenyewe kwa Mungu na Roho Mtakatifu huutwaa moyo wetu. Ni kweli “Amani, Amani.” Lakini ni papo hapo shetani huanza kutugeuza, naye hufanya hivyo kwa njia ya mawazo yetu, akiyageuza au kuyavuruga kama nafasi inavyohitaji. Huu ndio wakati wa kudhihirisha unyofu wa kujitoa kwetu na umoja wa moyo wetu. Kama kweli twatamani Uwepo wake kuliko vitu vyote, tutageuka mbali na kila wazo lipinganalo na kumtazama Yesu kwa uthabiti. Lakini kama twatamani kuridhisha tamaa yetu kuliko Uwepo wake, tutajitoa kwa neno la hasira au wazo la upuuzi au anasa ya dhambi, na turudipo Mchungaji wetu amekwisha ondoka, nasi twastaajabu kwa nini amani yetu imeondoka. Kushindwa mara nyingi hutokea katika jambo dogo, kwa kawaida wazo au neno, nayo nafsi ambayo isingaliogopa kupanda mlima kwa kweli imejikwaa juu ya unyasi.

Siri halisi ya raha kamili ni kushughulika na Yesu kwa wivu na kwa mazoea daima.

Mei 4

“Yeye aliye ndani yenu ni mkuu kuliko yeye aliye katika ulimwengu” (1 Yohana 4:4).

Shetani hupenda kutukwaza katika mambo madogo. Sababu ya hili ni kwamba kwa kawaida ni ushindi mkubwa zaidi kwake, nao huonyesha kwamba aweza kututibua kwa kinyoa na kutuangusha kwa unyasi. Ndilo lile jivuno la kale la Myebusi, walipomwambia Daudi wangeweza kuulinda Yerusalemu kwa jeshi la vipofu na viwete. Wengi wetu hufaulu vizuri zaidi katika mapambano yetu makuu kuliko katika madogo. Ni juu ya tunda dogo la tofaa Adamu alianguka, lakini ulimwengu wote ukaharibika. Angalieni, wapenzi, vikwazo vidogo, wala msimwache shetani awacheke, na kuwaambia wafuasi wake jinsi alivyowakwaza juu ya ganda la chungwa. Tena, shetani atakapotaka kuzuia baraka kubwa katika maisha yetu, kwa kawaida hutupa juu yake kivuli fulani kibaya na kukifanya kionekane cha kuchukiza kwetu. Wangapi wetu tumejizuia mbali na kweli, na mahali, na watu ambao ndani yao Mungu amejifunua tena, baraka kubwa kuliko zote za maisha yetu, na shetani amefaulu kututenga nazo kwa chuki fulani ya uongo au ya kipumbavu!

Mei 5

“Basi mkiwa mmefufuka” (Wakolosai 3:1).

Mungu angoja asubuhi hii ili aweke alama saa za mwanzo kwa kila moyo ulio tayari na wenye hiari kwa mguso wa uzima na nguvu utakaoinua maisha yetu hata furaha zilizo juu zaidi na kuweka mbele ya macho yetu upeo mpana zaidi wa tumaini na utumishi mtakatifu.

Hatutahitaji kutafuta mbali ili kumwona Bwana wetu aliyefufuka. Alikuwa mbele hata ya mtafutaji wa kwanza kabisa asubuhi ile ya Pasaka, naye atakuwa akitungoja kabla ya mapambazuko kwa salamu yake ya furaha, “Salamu,” ikiwa tu tuna macho ya kuona na mioyo ya kumkaribisha na kumtii.

Ni ujumbe gani wake kwetu wakati huu wa machipuko? “Basi mkiwa mmefufuka pamoja na Kristo, yatafuteni yaliyo juu, Kristo aliko, ameketi mkono wa kuume wa Mungu. Kwa maana mlikufa, na uhai wenu umefichwa pamoja na Kristo katika Mungu.”

Si kufufuka pamoja na Kristo tu, bali kufufuliwa. Si kupanda juu kidogo katika maisha ya kale, bali ni kufufuka kutoka kwa wafu. Ufufuo hautakuwa na maana kubwa kuliko ile kifo kilichokuwa nayo. Kadiri tulivyo kweli wafu ndivyo tutakavyoishi pamoja naye.

Mei 6

“Jihesabuni ninyi nanyi kuwa hai kwa Mungu” (Warumi 6:11).

Kifo ni cha kitambo tu. Uzima ni wa milele. Basi, ishini, enyi watoto wa ufufuo, kwa uzima wake wa utukufu, zaidi na zaidi tele, na utimilifu wa uzima wenu utaikataa nafsi na dhambi visiingie, na kuushinda uovu kwa wema, na kuwako kwenu hakutakuwa kule kujikandamiza kwa huzuni kwa juhudi zenu wenyewe, bali mafuriko yainukayo ya uzima wa Kristo ushindao wenyewe.

Mara moja katika mkutano wa dini ndugu mpenzi alitupa hotuba ya kuchangamsha sana juu ya maisha ya ufufuo. Kisha ndugu mwingine akasimama na kunena kwa muda mrefu juu ya lazima ya kujisulubisha nafsi. Jasho baridi likatushukia sote, nasi hatukuweza kuelewa kwa nini. Lakini alipomaliza, dada mwema alilifafanua jambo lote kwa kusema kwamba, “Mchungaji S. alikuwa ametutoa sote kaburini kwa hotuba yake, kisha Mchungaji P. ametuweka humo tena.”

Usirudi kaburini tena baada ya kutoka, bali uishi kama yeye, “aliye hai; nami nalikuwa nimekufa, na tazama, ni hai hata milele na milele; nami ninazo funguo za mauti na za kuzimu.” Kaa nje ya kaburi, na uufunge mlango, na funguo zibaki mikononi mwake iliyofufuka.

Mei 7

“Nawaonea utungu wa kuzaa tena hata Kristo aumbike ndani yenu” (Wagalatia 4:19).

Ni wakati wa baraka tunapozaliwa mara ya pili na moyo mpya kuumbwa ndani yetu kwa mfano wa Mungu. Ni wakati wa baraka zaidi ambapo katika moyo huu mpya Kristo mwenyewe azaliwa na wakati wa Krismasi kurudiwa ndani yetu tunapokuwa, kwa maana halisi, mfano wa kuja mwilini kwa Kristo aliye hai. Hii ndiyo maana ya ndani na takatifu kuliko zote ya Ukristo. Yaonyeshwa katika maombi ya Paulo kwa ajili ya Wagalatia. “Watoto wangu wadogo, ambao kwa ajili yenu nawaonea utungu wa kuzaa tena, hata Kristo aumbike ndani yenu.”

Bado kutakuwa na kipindi cha utukufu zaidi ambapo sisi, kama yeye, tutabadilishwa na kugeuzwa sura kuwa katika utukufu wake, na katika ufufuo tutakuwa, katika roho, nafsi na mwili, kama alivyo yeye.

Na tuishi, chini ya nguvu ya wazo hili la kutia moyo, kama mfano wa kuja mwilini kwa Kristo; tusiishi maisha yetu wenyewe, bali maisha ya Kristo, tukidhihirisha wema, si wetu wenyewe, bali wa yeye aliyetuita “kutoka gizani hata nuru yake ya ajabu”; hivyo maisha yetu yawe kwa wote kama kuishi tena kwa maisha ya Kristo katika hali yetu, kama angaliishi, kama angalikuwa hapa.

Mei 8

“Chembe ya ngano isipoanguka katika nchi, ikafa” (Yohana 12:24).

Kifo na ufufuo ndio mawazo makuu ya asili na ya Ukristo. Twayaona katika kubadilika kwa buu kuwa kipepeo, katika mbegu iliyozikwa ikichipuka na kuwa tawi na ua la machipuko, katika kugeuzwa kwa sanda ya majira ya baridi kuwa mavazi ya rangi nyingi ya machipuko. Twayaona katika Biblia yote katika ishara ya tohara, pamoja na maana yake ya kifo na uzima, katika kuvuka Bahari ya Shamu na Yordani kuelekea nje na kuelekea ndani, na katika Msalaba wa Kalvari na kaburi wazi la asubuhi ya Pasaka. Twayaona katika kila maisha ya ndani ya kiroho. Kila maisha ya kweli huzaliwa kwa kifo, na kadiri kifo kilivyo kirefu ndivyo maisha yalivyo ya kweli zaidi. Hatuna shaka miezi iliyopita imetuonyesha sote mahali pengi ambapo pangepaswa kuwa na kaburi, na vipande vingi vilivyosalia vya asili na dhambi ambavyo kwa furaha tungependa kuvilaza katika kaburi lisilo na mwisho. Mungu na atusaidie kupitisha hukumu isiyoweza kutanguliwa ya kifo na kumwacha Roho Mtakatifu, mzishaji mkuu, aufanye mazishi kuwa wa milele. Ndipo maisha yetu yatakapokuwa yakichipuka na kuchanua na kueneza harufu nzuri juu ya vyote sikuzote.

Mei 9

“Salamu” (Mathayo 28:9).

Ilikuwa salamu ya kuchangamsha ambayo Bwana wa Uzima aliwaambia wanafunzi wake wa kwanza asubuhi ya ufufuo. Ni neno angavu na lenye kung’aa ambalo kwa jina lake tungependa kuwaambia watoto wake wapenzi mwanzoni mwa siku nyingine. Lina maana kubwa zaidi kuliko lionekanavyo juu juu. Kwa kweli ni ombi kwa ajili ya afya yetu, ambalo hakuna awezaye kulielewa kikamilifu ila wale waaminio uponyaji wa mwili. Rafiki mmoja mwenye kufikiri alipendekeza mara moja kwamba neno “salamu” kwa kweli lina maana ya afya, nalo ni umbo la kale la neno hilo. Sisi sote twajua kwamba mtu mzima ni mtu mwenye afya. Basi, ujumbe wa Bwana wetu ulikuwa kwa hakika ile salamu ambayo tangu zamani za kale twapeana sisi kwa sisi tukutanapo. “Afya yako ikoje?” “Hujambo?” au, afadhali zaidi, “Nakutakia afya.” Nia ya Kristo yalingana na ahadi na amri. Yafanana sana na baraka ya Mtume Yohana kwa rafiki yake mpenzi Gayo, nasi tungeirudia kwa rafiki zetu wapenzi kwa kadiri ya utimilifu wa mapenzi ya Bwana.

Mei 10

“Ni hai hata milele na milele” (Ufunuo 1:18).

Huu ndio ujumbe wa Kristo wa msalaba na Kristo wa utukufu na thamani zaidi wa ufufuo. Ni jambo zuri na la kutia moyo kuona mguso wa nuru na utukufu ambao maneno haya rahisi huuvika msalaba. Haisemwi Mimi ndiye yeye aliyekuwa amekufa na aliye hai, bali “Mimi ndiye yeye aliye hai; nami nalikuwa nimekufa, na tazama, ni hai hata milele na milele.” Uzima watajwa kabla ya kifo. Kuna njia mbili za kuutazama msalaba. Moja ni upande wa kifo na nyingine ni upande wa uzima. Moja ni Tazama Mtu na nyingine ni Yesu aliyetukuzwa mwenye alama za misumari na mkuki tu. Hivyo ndivyo tunavyopaswa kuutazama msalaba. Hatupaswi kuchukua pamoja nasi udongo wa kaburi, bali utukufu wa ufufuo. Si Tazama Mtu, bali Kristo aliye Hai. Basi kusulubiwa kwetu na kuwe kamili hata kupotelee katika ufufuo wetu nasi tutasahau hata huzuni yetu na kuchukua pamoja nasi nuru na utukufu wa asubuhi ya milele. Basi na tuishi maisha yaliyozaliwa kwa kifo, mapya sikuzote na yaliyojaa uzima usioweza kufa kamwe, kwa sababu ni “yaliyokufa na kuwa hai hata milele.”

Mei 11

“Kila atakaye kuiokoa nafsi yake ataiangamiza” (Luka 9:24).

Kwanza kabisa Kristo hufundisha ufufuo na uzima. Nguvu ya Ukristo ni uzima. Hutuletea si sheria, wajibu, kielelezo tu, pamoja na mafundisho na maonyo matakatifu na ya juu. Hutuletea nguvu ya kufuata bora ile iliyo juu zaidi na uzima ambao wayafanya wenyewe yaliyoamriwa. Lakini si uzima tu, bali uzima wa ufufuo.

Nao huanza kwa hatua halisi, tendo dhahiri, wakati ulio dhahiri kama mapambazuko ya asubuhi. Si kufa kusikoisha na kupambana kwa milele ili kuishi. Bali yote yaonyeshwa katika hali ya kitenzi ionyeshayo udhahiri, uthabiti, na tendo lililokamilika. Kwa kweli tulikufa wakati fulani na kwa kweli tukaanza kuishi maisha ya ufufuo.

Na tujihesabu kuwa tumekufa kabisa kwa dhambi, bali tu hai kwa Mungu katika Yesu Kristo.

Na kifo ni njia tu na lango, La kuiendea hai isiyokufa tena kamwe; Na msalaba waelekeza juu hata taji ya milele, Yordani hata pwani angavu ya Kanaani.

Mei 12

“Niambie ulalizapo wapi kundi lako adhuhuri” (Wimbo Ulio Bora 1:7).

Wapenzi, je, hamtamani utulivu wa Mungu, vyumba vya ndani, kivuli cha Mwenyezi, siri ya uwepo wake? Maisha yenu yamekuwa, labda, ya kuendesha na kutenda tu, au labda ya kujikaza, kupambana, kutamani na kutopata. Ee, kwa raha! Kulala juu ya kifua chake na kujua kwamba una vyote ndani yake, kwamba kila swali limejibiwa, kila shaka imetatuliwa, kila jambo li salama, kila ombi limejibiwa, kila haja imeshibishwa. Paza kilio, “Niambie, Ee wewe nipendaye rohoni, ulishapo wapi, ulalizapo wapi kundi lako adhuhuri”!

Lihimidiwe jina lake! Ana hili kwa ajili yetu, upendo wake wa pekee—upendo ambao kila mmoja kwa namna fulani huhisi ni wake wote peke yake, ambao ndani yake aweza kulala peke yake juu ya kifua chake na kuwa na mahali ambapo hakuna mwingine awezaye kupinga; na bado moyo wake ni mkubwa hata aweza kuwashika maelfu elfu karibu vivyo hivyo, na kila moyo waonekana kummiliki kikamilifu kama wake mwenyewe, kama vile yale madimbwi elfu madogo ya maji pwani yawezavyo kuliakisi jua, na kila dimbwi dogo laonekana kuwa na jua zima ndani ya vilindi vyake vizuri. Na Kristo aweza kutufundisha siri hii ya upendo wake wa ndani kabisa.

Mei 13

“Kaeni ndani yangu” (Yohana 15:4).

Ukristo waweza kumaanisha si zaidi ya mfumo wa dini. Maisha ya Kikristo yaweza kumaanisha si zaidi ya jaribio la bidii na unyofu la kumfuata na kumwiga Kristo.

Maisha ya Kristo ni zaidi ya haya, nayo hueleza muungano wetu halisi na Bwana Yesu Kristo, naye bila shaka yumo ndani yetu akiwa uzima na chanzo cha uzoefu wetu wote na kazi.

Wazo hili la maisha ya Kikristo yaliyo juu kuliko yote ni rahisi na tukufu zaidi kuliko lo lote jingine. Hatufundishi katika kurasa hizi, kwamba kusudi la ukombozi wa Kristo ni kuturudisha katika ukamilifu wa Adamu, kwa maana kama tungaliupata tungaliupoteza kesho; bali afadhali kutuunganisha na Adamu wa Pili, na kutuinua hata kufikia hali iliyo juu zaidi kuliko wazazi wetu wa kwanza walivyowahi kuijua.

Hili ndilo jambo pekee liwezalo kupatanisha vipengele vinavyogombana vya shule mbalimbali za mafundisho kuhusu maisha ya Kikristo.

Roho wa Mungu atatuongoza tusiwe na mabishano juu ya nadharia tupu, bali twashike tu nafsi na uzima wa Yesu Kristo mwenyewe, na pendeleo la kuunganishwa naye, na kuishi kwa kumtegemea daima nguvu yake ihifadhiyo na neema yake.

Mei 14

“Lakini Mungu” (Luka 12:20).

Twahitaji nini kingine kweli? Ni nini kingine anajaribu kutufanya tuelewe? Dini ya Biblia ni ya kimuujiza kabisa. Rasilimali pekee ya imani sikuzote imekuwa Mungu aliye hai, na yeye peke yake. Wana wa Israeli walimtegemea Yehova kabisa walipopita jangwani, na sababu pekee adui zao waliwaogopa na kuharakisha kujitiisha ni kwamba walitambua kati yao sauti kuu ya Mfalme, na uwepo wa Yule ambaye kwa kulinganishwa naye nguvu zao zote zilikuwa bure.

“Ni kwa nini,” akauliza Musa, “tutatofautishwaje na watu wengine wote wa dunia, isipokuwa katika hili kwamba wewe watangulia mbele yetu.”

Kanisa litegemealo hekima ya wanadamu, mali au rasilimali, huacha kuwa mwili wa Kristo na huwa jumuiya ya kidunia. Tunapothubutu kumtegemea Mungu kabisa na pasipo shaka, vyombo vilivyo dhaifu na dhalili zaidi vitakuwa “vyenye nguvu katika Mungu hata kuangusha ngome.” Roho Mtakatifu na atupe nyakati zote wazo lake mwenyewe la maneno haya mawili makuu, “Lakini Mungu.”

Mei 15

“Nakaza mwendo, niifikilie mede” (Wafilipi 3:14).

Tumefikiri sana juu ya yale tuliyopokea. Na tufikiri juu ya vitu ambavyo hatujapokea, juu ya baadhi ya vyombo ambavyo bado havijajazwa, juu ya baadhi ya mahali katika maisha yetu ambayo Roho Mtakatifu bado hajapamiliki kwa ajili ya Mungu, na kupatia alama kwa utukufu wake na uwepo wake.

Je, miezi ijayo itakuwa na alama ya matumizi ya bidii, ya kuupeleleza moyo, ya “mafuta yaliyosalia,” kwa uwezekano ambao bado haujakaliwa wa maisha yetu na utumishi?

Je, tumeujua utimilifu wa neema yake katika maisha yetu ya kiroho? Je, tumeonja kidogo cha utukufu wake? Je, tumeiamini ahadi yake kwa akili, nafsi, na roho? Je, tumejua uwezekano wake wote kwa mwili? Je, tumemjaribu katika nguvu yake ya kuyaongoza matukio ya majaliwa, na kuisogeza mioyo ya watu na mataifa? Je, ametufungulia hazina ya Mungu, na kuzitimiza mahitaji yetu ya fedha kama angeweza? Je, tumeanza hata kuelewa huduma ya maombi, kama Mungu angependa tuifanye? Mungu na atupe “mafuta yaliyosalia”!

Mei 16

“Hakumo kwa mwanadamu aendaye kuongoza hatua zake” (Yeremia 10:23).

Ukiunganishwa na Yesu Kristo aliye Mkombozi wako, umekubaliwa katika Mpendwa. Hachukui nafasi yangu kama mwanadamu na kulipa madeni yangu tu. Hufanya hivyo na zaidi. Huja kutoa kielelezo kamili cha jinsi mwanadamu apaswavyo kuwa. Ndiye mwanadamu wa mfano, si ili tumwige, kwa maana hilo lingeleta kukata tamaa na kushindwa kabisa; bali atakuja na kujinakili mwenyewe ndani yetu. Kama Kristo aishi ndani yangu, mimi ni Kristo mwingine. Mimi si kama yeye, bali nina nia iyo hiyo. Kristo yeye mwenyewe yumo ndani yangu. Huu ndio msingi wa utakatifu wa Kikristo na uponyaji wa Kimungu. Kristo anasitawisha maisha kamili ndani yetu. Wengine husema mwanadamu hawezi kamwe kuwa mkamilifu. “Hakumo kwa mwanadamu aendaye kuongoza hatua zake.” Sisi sote ni kundi la walioshindwa. Hili ni kweli, lakini twapaswa kwenda mbali zaidi. Twapaswa kuchukua tunu ya Mungu kwa ajili ya kushindwa kwetu na kupaa juu yake kwa neema yake. Twapaswa kumchukua Yesu awe badala ya nafsi zetu duni. Twapaswa kuacha jema kama vile baya na kumchukua yeye badala yake. Ni vigumu kwetu kujifunza kwamba hata lililo jema kabisa lazima liondoke, lakini twapaswa kuwa na misukumo ya Kimungu badala ya hata mafanikio yetu bora.

Mei 17

“Yeye ashindaye nitampa” (Ufunuo 2:17).

Siri ya thamani ya maisha ya Kikristo ni kuwa na Yesu akikaa ndani ya moyo na kuvishinda vitu ambavyo hatungeweza kamwe kuvishinda. Ndiyo siri pekee ya nguvu katika maisha yako na yangu, mpenzi. Wanadamu hawawezi kuielewa, wala ulimwengu hautaiamini; lakini ni kweli, kwamba Mungu atakuja kukaa ndani yetu, na kuwa nguvu, na usafi, na ushindi, na furaha ya maisha yetu. Sasa si tena, “Ni jema gani niwezalo kufanya?” bali swali ni, “Ni jema gani awezalo Kristo kufanya?” Yatuwezesha kusema, pamoja na Paulo, katika fungu lile zuri katika Wafilipi, “Najua kudhiliwa, tena najua kufanikiwa; katika hali yo yote, na katika mambo yote, nimefundishwa kushiba na kuona njaa, kuwa na vingi na kupungukiwa. Nayaweza mambo yote katika yeye anitiaye nguvu.”

Kwa maarifa haya naenda kukutana na majaribu yangu, nayo siri hii yanifaa. Yanihifadhi safi na mtamu, kama nisingaliweza kamwe kujihifadhi mwenyewe. Kristo amekutana na adui na kumshinda kwa ajili yangu. Ashukuriwe Mungu atupaye kushinda kwa njia ya Yesu Kristo.

Mei 18

“Kwa maana mlikufa” (Wakolosai 3:3).

Basi, huku kujivua nafsi zetu kwa uhakika, kabisa na hatimaye katika tendo la kifo, ni jambo tusiloweza kulifanya wenyewe. Si kujiua nafsi, bali ni kufa pamoja na Kristo. Hakuna kiwezacho kulifanya ila Msalaba wa Kristo na Roho wa Mungu. Kanisa limejaa watu waliokufa nusu ambao wamekuwa wakijaribu, kama Nero maskini, kujiua kwa miaka mingi, wala hawajapata ujasiri wa kupiga pigo la mauti. Ee, laiti wangejiweka tu miguuni pa Yesu, na kumwacha yeye alifanye, kungekuwa na utimizo na raha. Juu ya msalaba huo ametuandalia kifo chetu kama vile uzima wetu, na fungu letu ni kukiacha tu kifo chake kitumike kwa asili yetu kama vile kilivyotumika kwa dhambi zetu za kale, kisha kuliacha kwake, tusifikiri tena juu yake, na kukihesabu kimekufa, tusikitambue tena kuwa nafsi zetu, bali mwingine, tukikataa kukisikiliza au kukiogopa, kujitambulisha nacho, au hata kujaribu kukisafisha, bali kukihesabu kabisa mikononi mwake, na kimekufa kwetu milele, na kwa maisha yetu yote mapya tukimtegemea yeye katika kila pumzi, kama mtoto aliyezaliwa sasa hivi ategemeavyo uzima wa mama yake.

Mei 19

“Hulisafisha, ili lizidi kuzaa” (Yohana 15:2).

Karibuni tulipita bustani. Mtunza-bustani alikuwa amemaliza kupogoa, na majeraha ya kisu na msumeno yalikuwa yaanza kupona, huku jua la joto la Aprili likilistawisha kwa upole shina lililojeruhiwa hata uzima na nguvu mpya. Tulifikiri tulipolitazama shina lile jinsi ingekuwa ukatili kuanza wiki ijayo na kulikata. Sasa, kazi ya mtunza-bustani ni kulihuisha na kulistawisha hata uzima. Kazi yake si kufa, bali kuishi. Basi, tulifikiri, ndivyo ilivyo kwa nidhamu ya nafsi. Nayo, pia, ina saa yake ya kufa; lakini haipaswi kuwa ikifa sikuzote. Afadhali tujihesabu kuwa tumekufa kabisa kwa dhambi, bali tu hai kwa Mungu katika Yesu Kristo Bwana wetu. Kifo ni cha kitambo tu. Basi ishini, enyi watoto wa ufufuo, kwa uzima wake wa utukufu zaidi na zaidi tele, na utimilifu wa uzima wenu utaikataa nafsi na dhambi visiingie, na kuushinda uovu kwa wema, na kuwako kwenu hakutakuwa kule kujikandamiza kwa huzuni kwa juhudi zenu wenyewe, bali mafuriko yainukayo ya uzima wa Kristo ushindao na udumuo milele.

Mei 20

“Ninyi si mali yenu wenyewe” (1 Wakorintho 6:19).

Ni pendeleo lililoje kwamba twaweza kujiweka wakfu! Ni rehema iliyoje kwamba Mungu atatuchukua sisi minyoo isiyofaa kitu! Ni raha na faraja iliyoje iliyofichwa katika maneno hayo, “Si mali yangu mwenyewe”! Sina jukumu kwa wokovu wangu, sikandamizwi na masumbufu yangu, silazimiki kuishi kwa faida zangu, bali ni wake kabisa; nimekombolewa, nimemilikiwa, nimeokolewa, nimependwa, nimehifadhiwa katika mikono imara, isiyobadilika, ya upendo wake wa milele. Ee, raha itokayo katika dhambi na nafsi na masumbufu yalayo moyo ambayo kujiweka wakfu kwa kweli huleta! Kuweza kumpa maisha yetu maskini na dhaifu, pamoja na uwezekano wake wa kutisha na kutokuwa na msaada kwake kabisa, na kujua kwamba atayakubali, na kupata furaha na fahari kutengeneza kutoka kwake uwezekano mkubwa kabisa wa baraka, nguvu na manufaa; kutoa vyote, na kuona kwa kufanya hivyo tumepata vyote; kujitoa kwake kwa kujisalimisha kabisa, hata alazimike kututunza kama nafsi yake mwenyewe. Twajiweka mikononi mwa Baba mpenzi, ajitaabishaye kwa ajili ya wema wetu kuliko tuwezavyo sisi na atakaye tu tujitie chini yake kabisa ili awe huru zaidi kutubariki.

Mei 21

“Tutakuja kwake na kufanya makao kwake” (Yohana 14:23).

Biblia sikuzote imetoa ahadi mbili kuu kuhusu Kristo. Kwanza, Nitakuja kwenu; na, pili, Nitakuja ndani yenu. Kwa miaka elfu nne ulimwengu ulitazamia utimilifu wa ile ya kwanza. Ile nyingine ndiyo siri ambayo Paulo asema imefichwa tangu zamani zote na vizazi vyote, lakini sasa imefunuliwa kwa watakatifu wake, ambayo ni Kristo ndani yenu, tumaini la utukufu. Hili ni ufunuo mkuu wa Mungu kama vile kuja mwilini kwa Yesu, kwa maana lakufanya uwe kama Kristo, uhuru na dhambi kama alivyo yeye. Kama Kristo yumo ndani yako, matokeo yatakuwa nini? Naam, atakuweka wewe kando kabisa. Ile “mimi” ndani yako itaondoka. Utasema, “Si mimi, bali Kristo.” Kristo huyapigana mapigano yako kwa ajili yako. Kristo huwa usafi na neema na nguvu ndani yako. Hujaribu kuyafikia mambo haya, bali wajua umeyapata ndani yake. Ni raha tukufu pamoja na Bwana. Yesu hasemi, “Sasa lazima tuzae matunda, lazima tuombe sana, lazima tufanye hili au lile.” Hakuna shurutisho juu yake, ila kwamba lazima tukae ndani yake. Ndipo penye kitovu cha furaha yote na msaada.

Mei 22

“Piga vita vile vizuri vya imani” (1 Timotheo 6:12).

Ee, wapenzi, Mungu lazima ahisije juu yetu baada ya kutupa damu ya moyo wake, kuweka faida nyingi katika njia yetu, kutumia juu yetu neema na uangalizi mwingi, kama tutamkatisha tamaa? Yafanya roho ilie, “Ni nani atoshaye kwa mambo haya?” Sikuzote naweza kuona mbele yangu wakati ambao wewe na mimi tutasimama pwani ile na kutazama nyuma miaka iliyopita, miaka hii michache mifupi ya wakati. Ee, na tujitupe miguuni pa Yesu na kusema: “Mara nyingi tumesita; mapigano mengi magumu yamekuja, lakini wewe umenihifadhi na kunishika, ashukuriwe Mungu, aliyenipa kushinda kwa njia ya Bwana Yesu Kristo.” Kutoka viwanja vya vita vya Rasi ya Iberia, kikundi kidogo cha maveterani kilitoka, nao walipewa kila mmoja nishani yenye majina ya vita vyao vyote upande mmoja, na upande wa pili sentensi hii ndogo, “Nilikuwapo.” Ee, saa ile itakapofika, na iwe wazo la furaha, la furaha kutazama nyuma juu ya majaribu na dhabihu za siku hizi na kukumbuka, “Nilikuwapo, na kwa msaada wa Mungu na neema ya Yesu, niko hapa.”

Mei 23

“Utimilifu wa baraka ya injili ya Kristo” (Warumi 15:29).

Wakristo wengi hushindwa kuziona baraka hizi kama zilivyokusanyika ndani yake. Wataka kupata baraka ya wokovu, lakini hiyo si Kristo. Wataka kupata baraka ya neema yake ya kusaidia, lakini hiyo si yeye. Wataka kupata maombi yaliyojibiwa kutoka kwake ili kumfanyia kazi. Waweza kuwa na hayo yote na usiwe na baraka ya Kristo mwenyewe. Watu wengi wameshikamana afadhali na mfumo wa mafundisho. Wasema, “Naam, nimeipata kweli; mimi ni mwaminifu wa mafundisho sahihi.” Hiyo si Kristo. Yaweza kuwa sanamu ya baridi katika chemchemi huku maji yakipita kutoka mikononi na midomoni ya baridi, lakini hakuna uzima humo. Watu wengine wengi wataka kupata baraka ya furaha, lakini si baraka ya Kristo binafsi. Watu wengi wameshikamana afadhali na kanisa lao na mchungaji wao, au na rafiki Wakristo wapenzi, lakini hiyo si Kristo. Baraka ambayo peke yake itakujaza moyo wakati vyote vinginevyo vishindwapo ni moyo wa upendo wa Yesu uliounganishwa nawe, chemchemi ya baraka zako zote na ile isiyokoma wakati zote zinyaukapo na kuisha—Yesu Kristo mwenyewe.

Mei 24

“Iko wapi njia iendayo makao ya nuru” (Ayubu 38:19).

Vito, vyenyewe, havina thamani, isipokuwa vinapogusana na nuru. Vikiwekwa katika hali fulani vitaakisi uzuri wa jua. Hakuna uzuri ndani yavyo vinginevyo. Almasi iliyo nyuma katika ukumbi wake wa giza au chini katika shimo lenye kina, haionyeshi uzuri wo wote. Ni nini ila kipande cha mkaa, chembe ya kaboni ya kawaida, isipokuwa inapokuwa njia ya kuakisi nuru? Na ndivyo ilivyo pia kwa vito vingine vya thamani. Rangi zake mbalimbali si kitu bila nuru. Vikiwa na pande nyingi, huakisi nuru zaidi, na kuonyesha uzuri zaidi. Ukiweka kioo bandia karibu na almasi hakuna mng’ao ndani yake. Katika hali yake ghafi haiakisi nuru hata kidogo. Basi sisi tuko katika hali ghafi na hatufai kitu hata Mungu ajapo na kutuangazia. Nuru iliyo katika almasi si mali yake mwenyewe; ni uzuri wa jua. Ni uzuri gani ulio katika mtoto wa Mungu? Ni uzuri wa Yesu tu. Sisi ni watu wake wa pekee, tuliochaguliwa kudhihirisha wema wake yeye aliyetuita kutoka gizani hata nuru yake ya ajabu. Na tuakisi leo nuru yake na upendo wake.

Mei 25

“Nipate kumjua yeye” (Wafilipi 3:10).

Ni afadhali kumjua Yesu mwenyewe kuliko kujua kweli juu yake kwa ajili ya mambo ya ndani ya Mungu kama yanavyofunuliwa na Roho Mtakatifu. Ilikuwa tamaa kuu ya Paulo, “Nipate kumjua yeye,” si juu yake, si siri za ulimwengu wa ajabu, za mafundisho ya ndani na ya juu zaidi ya Mungu, bali kuingia katika Patakatifu pa Patakatifu, Kristo aliko, Shekina inako’ng’aa na kupafanya mahali kuwa patukufu kwa utakatifu wa Mungu, kisha kuingia katika siri ya Bwana mwenyewe. Ndilo Yakobo alilolijitahidia huko Penieli, alipomsihi Mungu, “Uniambie jina lako.” Ametuambia jina lake, akitupa “nuru ya maarifa ya utukufu wa Mungu katika uso wa Yesu Kristo.” Hiyo ndiyo siri. Ni Bwana mwenyewe, wala si kitu kingine; ni kufahamiana na Mungu; ni kumjua Yesu Kristo kama tusivyomjua mtu mwingine ye yote; ni kuweza kusema, si “Namwamini” tu, bali “Namjua”; si juu yake, bali namjua yeye. Hiyo ndiyo siri kuu kuliko zote ambayo Mungu ataka tuwe nayo; ni tunu yake kwa utukufu na nguvu, nayo hutolewa bure kwa mtafutaji mwenye moyo mmoja.

Mei 26

“Msijisumbue kwa neno lo lote; bali katika kila neno kwa kusali na kuomba, pamoja na kushukuru, haja zenu na zijulikane na Mungu” (Wafilipi 4:6).

Kukabidhi maana yake kutia mikononi mwa mwingine, kumtumaini mwingine kabisa. Basi, kama twampa majaribu yetu, atayachukua. Kama twaenda katika haki atatuchukua hata mwisho. “Basi nyenyekeeni chini ya mkono wa Mungu ulio hodari, ili awakweze kwa wakati wake.” Kuna mikono miwili hapo—mkono wa Mungu ukituminya chini, ukitunyenyekesha, kisha mkono wa Mungu ukituinua juu. Mtwikeni yeye fadhaa zenu zote, ndipo mkono wake utakapokuinua juu, kukukweza kwa wakati wake. Kuna fadhaa mbili katika mstari huu—fadhaa yako na fadhaa yake. Ni tofauti katika lugha ya asili. Moja yamaanisha fadhaa ya wasiwasi, nyingine yamaanisha uangalizi wa Mwenyezi. Mtwike yeye fadhaa yako ya wasiwasi na uchukue uangalizi wake wa Mwenyezi badala yake. Usihesabu tena taabu kuwa kitu, bali amini kwamba aweza kukutegemeza katikati yake. Enzi i begani mwake. Amini kwamba, ukimtumaini na kumtii, na kuyakuta mapenzi yake, atayaangalia mambo yako. Badilishana tu mizigo. Jitwike nira yake, na umwache akutunze.

Mei 27

“Na enzi itakuwa begani mwake” (Isaya 9:6).

Huwezi kuufanya moyo kuwa na raha kwa kusimamisha kupiga kwake. Belladona itafanya hivyo, lakini hiyo si raha. Uache pumzi ya uzima ije—uzima na nguvu za Mungu—ndipo kutakuwa na raha tamu. Vifungo vya nyumbani na upendo wa jamaa havitaileta. Kuokolewa na taabu hakutaileta. Moyo mwingi uliojaribiwa umesema: “Kama taabu hii kubwa ingeondoka tu, ningepata raha.” Lakini mara moja iondokapo nyingine huja. Ayala maskini aliyejeruhiwa ubavuni mwa mlima, hufikiri kama angeweza tu kuoga katika kijito cha zamani cha mlimani angepata raha. Lakini mshale umo mwilini mwake nayo hakuna raha kwake hata jeraha lipone. Ni chungu ziwani mlimani kama tambarare. Hatutapata kamwe raha na amani ya Mungu moyoni hata tumempa Kristo kila kitu—hata kazi yetu—na kuamini kwamba amekwisha kuchukua yote, na sisi tuna la kufanya tu kukaa kimya na kutumaini. Ni lazima kuenenda katika utii mtakatifu na kumwacha awe na enzi begani mwake. Paulo alisema hivi: “Neno moja natenda.” Kuna njia moja nyembamba kwa ajili yetu sote—mapenzi ya Kristo na kazi yake kwa ajili yetu.

Mei 28

“Alijinyenyekeza” (Wafilipi 2:8).

Mojawapo ya mambo magumu kabisa kwa asili iliyo tukufu na bora ni kuwa chini ya mamlaka, kukana mapenzi yake mwenyewe, na kuchukua mahali pa kutiishwa. Lakini Kristo alitwaa umbo la mtumwa, akaacha kujitegemea kwake, haki yake ya kujipendeza mwenyewe, uhuru wake wa kuchagua, na baada ya tangu zamani za milele kujua kuamuru tu, akajitoa ili kutii tu. Nimemwona mara kwa mara mtu ambaye zamani alikuwa mwajiri tajiri sasa akiwa karani katika duka lilo hilo. Halikuwa jambo rahisi wala la kupendeza, nakuhakikishia. Lakini Yesu alikuwa mtumishi mkamilifu hivi hata Baba yake akasema: “Tazama, Mtumishi wangu nimpendezwaye naye.” Maisha yake yote kaulimbiu yake ilikuwa, “Mwana wa Adamu alikuja kutumika.” “Mimi ni kati yenu kama atumikaye.” “Siwezi kufanya neno mwenyewe.” “Si mapenzi yangu, bali yako, yatimizwe.” Je, wewe, mpenzi, umejifunza mahali pa mtumishi?

Na tena, “Akawa mtii hata mauti, naam, mauti ya msalaba.” Maisha yake yote yalikuwa kufa, na mwishoni akajitoa yote kwa mauti, na tena aibu, mauti ya kusulubiwa. Hili la mwisho lilikuwa kilele cha upendo wake.

Mei 29

“Mwili ni kwa ajili ya Bwana, na Bwana kwa ajili ya mwili” (1 Wakorintho 6:13).

Basi, kama vile alivyokuwa Kristo mwenyewe aliyetuhesabia haki, na Kristo mwenyewe aliyefanywa kwetu utakaso, vivyo hivyo ni kwa muungano wa binafsi naye tu ndipo tuwezapo kupokea uzima huu wa mwili na ukombozi. Kwa kweli, si mguso wa nguvu juu ya mwili wetu uurudishao kisha kuuacha kwa rasilimali za nguvu na uzima wa asili tu kwa siku zijazo; bali ni muungano wa uzima na halisi wa mwili wetu wa kufa na mwili uliofufuka wa Bwana wetu Yesu Kristo, hata uzima wake mwenyewe kabisa uje katika kiwiliwili chetu naye mwenyewe afanywe kwetu nguvu, afya na ukombozi kamili wa mwili.

Yu hai hata milele na milele naye hukubali kukaa katika nyumba hizi za udongo. Wale wampokeao hivyo waweza kumjua kama hakuna awezaye kamwe, awamtengaye na miili aliyoiumba kwa ajili yake mwenyewe. Hii ni mojawapo ya siri za ndani na za thamani za Injili. “Mwili ni kwa ajili ya Bwana, na Bwana kwa ajili ya mwili.” “Au hamjui ya kuwa mwili wenu ni hekalu la Roho Mtakatifu aliye ndani yenu, mliyepewa na Mungu? Wala ninyi si mali yenu wenyewe; maana mlinunuliwa kwa thamani. Sasa basi, mtukuzeni Mungu katika miili yenu, ambayo ni ya Mungu.” (R. V.)

Mei 30

“Nami nitatia Roho yangu ndani yenu” (Ezekieli 36:27).

“Nami nitatia Roho yangu ndani yenu, nami nitawafanya kwenda katika amri zangu, nanyi mtazishika hukumu zangu.” “Nami nitatia hofu yangu mioyoni mwenu, nanyi hamtaniacha.” Ee, rafiki, je, hilo lisingekuwa baraka, hilo lisingekuwa raha kwako, wewe uliyechoka kabisa kwa mapambano haya kwa nguvu zako mwenyewe? Je, humtaki mtu hodari akamshinde yule hodari wa nafsi na dhambi? Je, humtaki kiongozi? Je, humtaki Mungu mwenyewe awe pamoja nawe, awe mkaaji wako? Je, hutaki raha? Je, huhisi haja hii? Ee, hisia hii ya kurudishwa nyuma, ya kutamani, ya kuhitaji, lakini bila kutimiza. Ndilo ajalo kulifanya; “Mtapokea nguvu, akiisha kuwajilia juu yenu Roho Mtakatifu.” Bora zaidi ya hilo, “Mtapokea nguvu ya Roho Mtakatifu akiwajilia juu yenu.” Ndiyo tafsiri sahihi, na kwa kweli ni tofauti sana na ile nyingine. Wewe mwenyewe hutapokea nguvu, hata watu waseme: “Ni nguvu iliyoje mtu huyu aliyo nayo. Hutakuwa na nguvu yo yote kabisa, bali utapokea nguvu ya Roho Mtakatifu akiwajilia juu yenu, yeye akiwa na nguvu, ndiyo yote.”

Mei 31

“Basi, ye yote atakayejinyenyekeza kama mtoto huyu mdogo” (Mathayo 18:4).

Hutapata kamwe moyo mnyenyekevu hata uzaliwe kutoka juu, kutoka moyo wa Kristo. Kwa maana mwanadamu amepoteza ubinadamu wake mwenyewe na, ole, mara nyingi mno ana moyo wa pepo. Mungu ataka sisi, kama Wakristo, tuwe wanyofu, wa kibinadamu, wenye kukaribika na kama watoto. Wakristo tuwajuao na kuwapenda zaidi, na walio karibu zaidi na Bwana, ndio wanyofu zaidi. Kila tuchapo kuwa na majivuno tunafaa tu kwa nyumba ya sanaa, nasi twafaa tu juu ya kinara; lakini, kama tutaishi kati ya watu na kuwapenda na kuwaokoa, lazima tuwe wenye kukaribika na wa kibinadamu. Ugumu wote ni umbo tu jingine la kujitambua nafsi. Mwombe Kristo moyo wa kibinadamu, tabasamu litakalokuwa la asili kama la mtoto wako mdogo mbele yako. Ee, jinsi Kristo alivyofanya mengi kwa migusano midogo! Asingemfikia kamwe yule mwanamke wa Samaria kama angemwendea kama nabii. Aliketi, mtu aliyechoka, akasema: “Nipe maji ninywe.” Na hivyo, katika maisha yake yote, ni ubinadamu wake mnyofu na upendo vilivyomwongoza kwa wengine, na kuwaongoza wao kwake na kwa wokovu wake mkuu.