Machi

Machi 1

“Umngoje Bwana” (Zaburi 27:14).

Mara ngapi jambo hili linenwa katika Biblia, na jinsi gani lisivyoeleweka! Ndilo yule mtawa wa zamani aliloliita “kuutenda uwepo wa Mungu.” Ni zoea la maombi. Ni ushirika wa daima usiokoma, usioomba tu, bali unaopokea pia. Watu mara nyingi hutuomba tuwaombee, nasi hutulazimika kusema, “Lakini, Mungu ameyajibu maombi yetu kwa ajili yako, nawe sasa yakupasa kuupokea jibu. Lakungoja wewe, nawe una budi kulitwaa kwa kumngoja Bwana.”

Ndilo hili litialo nguvu upya, hata tupae juu kwa mbawa kama tai, tupige mbio wala tusichoke, twende kwa miguu wala tusizimie. Mioyo yetu ni mikubwa mno kupokea ukamilifu wake kwa pumzi moja. Ni lazima tuishi katika hewa ya uwepo wake hata tuunywe uhai wake wenyewe. Hii ndiyo siri ya kina cha rohoni na raha, ya nguvu na ukamilifu, ya upendo na maombi, ya tumaini na utumishi mtakatifu. “Umngoje Bwana, nasema.”

Nangoja katika ushirika penye kiti cha rehema kilichobarikiwa, Nangoja, nangoja kwa utamu, mbele ya Bwana; Nanywa katika ukamilifu wake; naketi miguuni pake; Nasikiliza minong’ono ya neno lake.

Machi 2

“Ile amana njema uliyokabidhiwa uilinde kwa Roho Mtakatifu” (2 Timotheo 1:14).

Mungu hutupa nguvu ya ndani itakayoushika moyo wetu katika ushindi na usafi. “Ile amana njema uliyokabidhiwa, uilinde kwa Roho Mtakatifu akaaye ndani yetu.” Ni Roho Mtakatifu; na kila wazo au shawishi la uovu litokeapo kifuani mwetu, dhamiri iliyo macho yaweza mara moja kumwita Roho Mtakatifu alifukuze, naye atalifukuza kwa amri ya imani au maombi, na kutuweka safi kadiri tunavyokubali kuwekwa. Bali penginepo mapenzi yakisalimu amri na kukubali uovu, Roho Mtakatifu hatauufukuza. Basi Mungu hututaka tusimame katika ulinzi mtakatifu, naye atatutendea kwa wingi mno tunaposhika sana lililo jema, naye pia atakuwa ndani yetu roho ya ulinzi, akituonyesha uovu na kutuwezesha kuugundua, na kuuleta kwake ili ufukuzwe na kuangamizwa.

“Ee Roho wa Yesu, utujaze hata tusiwe na nafasi ila kwa ajili yako!”

Ee, njoo kama moto uchunguzao mioyo, Ee, njoo kama gharika iisafishayo dhambi; Ututeketeze kwa shauku takatifu, Na kutujaza ukamilifu wa Mungu.

Machi 3

“Kila adhabu wakati wake haionekani kuwa kitu cha furaha, bali cha huzuni; lakini baadaye” (Waebrania 12:11).

Yaonekana Mungu apenda kutenda kazi kwa mambo yanayopingana na kinyume chake. Katika mageuzi ya neema, uchungu ndio msingi wa utamu, usiku ndiye mama wa mchana, na mauti ndilo lango la uzima.

Watu wengi hutamani nguvu. Basi, nguvu hupatikanaje? Siku ile tulipita penye viwanda vikuu ambapo mashine za tramu hupewa umeme. Tukasikia mvumo na ngurumo ya magurudumu yasiyohesabika, tukamuuliza rafiki yetu, “Hufanyaje nguvu hizi?” Akajibu, “Lakini, ni kwa mzunguko tu wa magurudumu yale na msuguano wautoao. Kusuguana huzaa mkondo wa umeme.”

Ni jambo rahisi sana, na jaribio dogo laweza kulithibitisha kwa mtu ye yote.

Basi, hivyo, Mungu apendapo kuleta nguvu zaidi katika maisha yako, huleta shinikizo zaidi. Huzaa nguvu za rohoni kwa msuguano mkali. Baadhi yetu hatuupendi. Baadhi yetu hatuelewi, nasi hujaribu kuukimbia msukumo, badala ya kuzipokea nguvu na kuzitumia kupaa juu ya kile kisababishacho maumivu.

Machi 4

“Wote wakajazwa Roho Mtakatifu” (Matendo 2:4).

Siri iliyobarikiwa ya usafi wa rohoni, ushindi na furaha, ya uzima wa mwili na uponyaji, na nguvu zote za utumishi. Uliyejazwa Roho hakuna nafasi ya nafsi wala dhambi, wala fadhaa wala shaka. Tukijazwa Roho twayakataa mausia ya maradhi yaliyomo hewani kama chuma cha moto mwekundu kiyakataavyo maji yakigusanavyo. Tukijazwa Roho twako tayari daima kwa utumishi, naye Shetani hugeuka na kwenda zake amwonapo Roho Mtakatifu akituvika mavazi yake ya mwali mtakatifu. Si kujazwa nusu, bali kujazwa Roho ndiko mahali pa ushindi na nguvu.

Hili si upendeleo tu; ni amri, naye aliyeitoa atatuwezesha kuitimiza tukimletea moyo mtupu, mnyofu, wenye kuamini, na kudai upendeleo wetu kwa jina la Yesu na kwa utukufu wa Mungu.

Roho Mtakatifu, nakukaribisha; Njoo uwe Mgeni wangu Mtakatifu; Njiwa wa mbinguni ndani ya kifua changu, Fanya makao yako na ukae kitovu chako; Niongoze hata ukamilifu wako wote, Niliete Pumziko lako Ulilonliahidi, Roho Mtakatifu, nakukaribisha, Njoo uwe Mgeni wangu Mtakatifu.

Machi 5

“Mimi nimeushinda ulimwengu” (Yohana 16:33).

Kristo ametushindia kila mmoja wa adui zetu wanne wa kutisha—Dhambi, Ugonjwa, Huzuni, Shetani. Ameichukua Dhambi yetu, nasi twaweza kumtwika yote, hata na uovu wetu wenyewe. “Nimeushinda kwa ajili yako.” Ameuchukua ugonjwa wetu, nasi twaweza kujitenga na udhaifu wetu wa zamani na kupaa katika uzima na nguvu zake tukufu. Amezichukua huzuni zetu, wala hatuna budi kubeba hata shaka, bali tufurahi daima, na hata kujisifu katika dhiki pia. Naye amemshinda Shetani kwa ajili yetu vile vile, akamwacha amekwisha gongomewa msalabani, ametekwa nyara na kuvunjiwa heshima, si kitu ila kivuli chake mwenyewe. Na sasa hatuna budi ila kudai upatanisho wake kamili na kuthibitisha ushindi wetu, ndipo “kumshinda kwa damu ya Mwana-Kondoo na kwa neno la ushuhuda wetu.”

Wapenzi, je, twaishinda dhambi? Je, twaushinda ugonjwa? Je, twaishinda huzuni? Je, twamshinda Shetani?

Usiogope, ijapo vita ni ndefu; Usizimie, ijapo adui ni hodari; Utumaini uweza wa Nahodha wako mtukufu; Uwe macho pamoja naye saa moja ndogo, Umsikie akiita, “Nifuate. Nimekushinda kwa ajili yako.”

Machi 6

“Wala usizitegemee akili zako mwenyewe” (Mithali 3:5).

Imani huzuiliwa na kutegemea hekima ya kibinadamu, iwe yetu wenyewe au ya wengine. Chambo cha kwanza cha shetani kwa Hawa kilikuwa toleo la hekima, na kwa ajili hiyo aliiuza imani yake. “Mtakuwa kama Mungu,” akasema, “mkijua mema na mabaya,” na tangu saa ile alipoanza kujua, akaacha kuamini. Ni wale wapelelezi waliokipoteza Nchi ya Ahadi kwa Israeli wa kale. Ni pendekezo lao la kipumbavu la kuipeleleza nchi, na kujua kwa uchunguzi kwamba Mungu alikuwa amenena kweli au sivyo, lililoongoza katika mlipuko wa kutisha wa kutokuamini uliofunga milango ya Kanaani kwa kizazi kizima. Ni jambo la maana sana kwamba majina ya wapelelezi hawa karibu yote yaonyesha hekima ya kibinadamu, ukuu, na sifa.

Basi, katika siku za Kristo, ni utumwa wa Wayahudi kwa mapokeo ya baba zao na maoni ya wanadamu, uliowazuia wasimpokee. “Mwawezaje kuamini,” akauliza, “ninyi mnaopeana utukufu ninyi kwa ninyi, wala hamtafuti utukufu utokao kwa Mungu peke yake?”

Basi na tumtumaini kwa moyo wetu wote, wala tusizitegemee akili zetu wenyewe.

Machi 7

“Ni heri kutoa kuliko kupokea” (Matendo 20:35).

Tutautofautishaje upendo wa kidunia na ule wa mbinguni? Ule huishia katika nafsi zetu wenyewe, nao ni sehemu ya nafsi ikitafuta furaha yake. Huu hunyoosha mkono kwa Mungu na kwa wengine, nao hupata furaha yake katika kumtukuza yeye na kuwabariki wao. Upendo ni kutokujitakia nafsi, na upendo usio wa kujinyima nafsi si wa Kimungu. Twaomba kadiri gani kwa ajili ya wengine, na kadiri gani kwa ajili yetu wenyewe? Kiini cha nafsi zetu ni nini? Ni sisi wenyewe, au Bwana wetu na watu wake na kazi yake? Bwana atusaidie kuujua kwa ukamilifu zaidi maana ya kweli ile kuu, “Ni heri kutoa kuliko kupokea.” “Yeye atakaye kuiokoa nafsi yake ataipoteza, na mtu atakayeipoteza nafsi yake kwa ajili yangu na kwa ajili ya Injili ndiye atakayeisalimisha hata uzima wa milele.”

Je, umepata hazina fulani ya thamani, Ipeleke mbele. Je, umepata furaha fulani takatifu, Ipeleke mbele. Kutoa ni kumiliki mara mbili, Upendo utaidha: kila baraka, Ukisonga mbele kwa utumishi wa juu zaidi, Ipeleke mbele.

Machi 8

“Basi mwombeni” (Luka 10:2).

Maombi ndiyo injini yenye nguvu itakayoisukuma kazi ya umisionari. “Basi mwombeni Bwana wa mavuno apeleke watenda kazi katika mavuno yake.”

Twamwomba Mungu aiguse mioyo ya wanadamu kila siku kwa Roho Mtakatifu, hata washurutishwe kwenda ng’ambo kuihubiri Injili. Twamwomba awaamshe usiku kwa hakika ile nzito ya kwamba wapagani wanaangamia, na kwamba damu yao itakuwa juu ya nafsi zao, naye Mungu ayajibu maombi kwa kutuletea watu kila siku ambao “wahisi kwamba shughuli ya Mfalme yataka haraka.”

Wapenzi, ombeni, ombeni, ombeni; na uvumba upandapo mbinguni, “kutakuwa na kimya mbinguni” kwa muda wa nusu saa na zaidi, na makaa ya moto yatamwagwa juu ya nchi, na kuja kwake Bwana kutaanza kukaribia. Ombeni hata Bwana wa mavuno atakapowatuma watenda kazi katika mavuno yake.

Peleka makaa ya moto wa mbinguni, Kutoka madhabahu za angani; Ijaze mioyo yetu shauku kali, Hata maombi yetu yapae kama uvumba.

Machi 9

“Jinsi iwapasavyo kuenenda na kumpendeza Mungu” (1 Wathesalonike 4:1).

Ni Wakristo wapenzi wangapi walio mahali pale Bwana alipowaweka, na bado shetani anayaudhi maisha yao kwa hisi hafifu ya kutomridhisha Bwana kikamilifu. Kama wangeweza kutulia mahali pale Mungu alipowaagiza na kupajaza kwa utamu na upendo kwa ajili yake, kungekuwa na furaha zaidi mioyoni mwao na nguvu zaidi katika maisha yao. Mungu hututaka sisi sote katika mahali mbalimbali, na siri ya kutimiza mengi zaidi kwa ajili yake ni kuvitambua vyeo vyetu kama vitokavyo kwake na utumishi wetu humo kama wenye kumpendeza yeye. Katika kiwanda kikuu na mtambo mkubwa kuna nafasi kwa parafujo na msumari mdogo kabisa, kama vile kwa gurudumu kubwa liendeshalo na pistoni, na hivyo Mungu ana parafujo zake ndogo ambazo kazi yao ni kukaa tu mahali alipoziweka na kuamini kwamba awataka pale naye anafanya mengi zaidi ya maisha yao katika nafasi ndogo wanazomjazia.

Kuna jambo ambalo wote waweza kufanya, Ujapokuwa si mwenye hekima wala nguvu; Waweza kuwa msaidizi wa kweli, Waweza kusimama rafiki wakiwa wachache, Moyo mmoja upweke wakuhitaji, Waweza kusaidia mbele.

Machi 10

“Amani ya Mungu, ipitayo akili zote, itawahifadhi mioyo yenu na nia zenu” (Wafilipi 4:7).

Si amani na Mungu, bali amani ya Mungu. “Amani ipitayo akili zote” ndiyo pumzi yenyewe ya Mungu ndani ya nafsi. Yeye peke yake aweza kuihifadhi, naye aweza kuihifadhi hata “lisiwepo litakalotukwaza.” Wapenzi, je, mmefika hapo?

Pumziko la Mungu halikuja hata kazi yake ilipokwisha, na letu nalo halitakuja. Twayaanza maisha yetu ya Kikristo kwa kutenda kazi, kujaribu, na kujitaabisha katika nguvu za mwili ili kujiokoa wenyewe. Mwishowe, tuwezapo kuacha kazi yetu wenyewe, Mungu huingia na pumziko lake lililobarikiwa, na kutenda kazi zake za Kimungu ndani yetu.

Ee! je, umelisikia neno lile tukufu La tumaini na furaha takatifu; Kutoka mbinguni juu sauti zake za upendo Zakaa masikioni mwangu; Mfariji aliyebarikiwa amekuja, Na Kristo atakuwa hapa karibuni. Ee, mioyo iugua-yo, msaada u karibu, Mfariji yu karibu; Aja kutuleta kwa Mfalme wetu, Na kutuandaa tumtokee. Nafurahi kwamba Mfariji amekuja, Na Kristo atakuwa hapa karibuni.

Machi 11

“Bali ninyi ni mzao mteule, watu wa milki ya Mungu” (1 Petro 2:9).

Tumekuwa tukifikiri sana siku hizi juu ya njia ya ajabu ambayo kwayo Mungu anawaita watu kutoka katika watu ambao tayari wameitwa. Neno ekklesia, au kanisa, lamaanisha walioitwa nje, lakini Mungu anaita bado mkusanyiko uliochaguliwa zaidi kutoka kanisani uwe bibi-arusi wake—wale walioandaliwa hasa kwa ajili ya kuja kwake.

Twaona kielelezo kizuri cha jambo hili katika habari ya Gideoni. Alipopiga tarumbeta ya Abiezeri mara ya kwanza walimwendea watu zaidi ya elfu thelathini; lakini hawa ilibidi wachaguliwe, basi kipimo cha kwanza kikatiwa, kikiitia ujasiri wao, na wote ila elfu kumi wakarudi; lakini ilibidi pawe na uteule kutoka katika uteule, basi kipimo cha pili kikatiwa, kikiitia busara, hadhari, na nia moja, na wote ila mia tatu wakakataliwa; na kwa kikundi hiki kidogo kiteule, akaisimamisha bendera dhidi ya Wamidiani, na kwa uweza wa Mungu akaupata ushindi wake mtukufu. Basi, tena, katika siku zetu, Bwana anaichagua mia tatu yake, na kwao yeye atauteka bado ulimwengu uwe wake. Na tuwe na hakika kwamba twahesabika miongoni mwa watu “waliojitoa kabisa.”

Machi 12

“Walitanga-tanga jangwani katika njia ya ukiwa” (Zaburi 107:4).

Wote wapiganao vita vya Bwana hawana budi kuridhika kufa kwa maoni yote mema ya wanadamu na sifa zote za kibinadamu. Huwezi kufanya ubaguzi kwa ajili ya maoni mema ya watoto wa Mungu. Ni rahisi sana kwa adui yule mwerevu kulifanya hili nalo kuwa mvuto kwa mwili. Ni vyema Mungu anapotutumia kibali cha wenzetu, lakini kamwe tusifanye jambo hilo kuwa nia katika maisha yetu, bali turidhike na “njia ya ukiwa” na “jangwa” la upweke.

Nia zote za namna hiyo ni sumu na ni kukuondolea nguvu utakazompa Mungu utukufu. Si kweli kwamba wote wauonao uso wa Bwana wanaonana wao kwa wao.

Mtu wa Mungu hana budi kutembea peke yake na Mungu. Hana budi kuridhika kwamba Bwana ajua kwamba Mungu ajua. Ni nafuu iliyoje kwa mtu wa asili aliye ndani yetu kutegemea nyuso za kibinadamu na fikira na huruma za kibinadamu, hata mara nyingi twajidanganya na kuiita “upendano wa kindugu,” hali twapumzika tu katika huruma ya kidunia ya funza mwenzetu!

Machi 13

“Jilindeni katika upendo wa Mungu” (Yuda 21).

Muda fulani uliopita, tulikuwa tukifurahia machweo ya jua mazuri mno. Anga za magharibi zilionekana kama funguvisiwa kubwa la visiwa vya dhahabu, milundo ya mbali ikipaa juu kuwa milima mikubwa ya utukufu. Rangi ya anga ilikuwa ya fahari hata ikaonekana kujionyesha juu ya hewa yote, tulipotazama nyuma kutoka magharibi hata upeo wa mashariki. Nchi yote ilikuwa yaangaza kwa utukufu. Mashamba yalikuwa yamegeuka kuwa wekundu wa ajabu, na nchi ikaonekana imeoshwa kwa umande wa mbinguni.

Na ndivyo ilivyo, upendo wa Mungu uangazapo katika anga letu lote la mbinguni, hufunika kila kitu kilicho chini, na maisha huwa yaangaza kwa nuru yake. Mambo yaliyokuwa magumu huwa mepesi. Mambo yaliyokuwa makali huwa matamu. Kazi huipoteza mzigo wake, na huzuni hupambwa kwa fedha ya tumaini na furaha.

Kuna njia mbili za kuishi katika upendo wake. Moja ni kutumaini daima, na nyingine ni kutii daima, na Neno lake mwenyewe latoa ujumbe kwa zote mbili. “Mkizishika amri zangu, mtakaa katika pendo langu, kama vile mimi nilivyozishika amri za Baba yangu, na kukaa katika pendo lake.”

Machi 14

“Sisi tu kazi ya mikono yake” (Waefeso 2:10).

Kristo hututuma tumtumikie, si kwa nguvu zetu wenyewe, bali kwa akiba na uweza wake. “Sisi tu kazi ya mikono yake, tuliumbwa katika Kristo Yesu tutende matendo mema ambayo Mungu aliyatengeneza tapo awali ili tuenende nayo.” Hatuna budi kuyatengeneza; bali kuyavaa kama mavazi, yaliyoshonwa kwa kila hitaji la maisha yetu.

Hatuna budi kuyapokea kwa imani na kutoka katika kazi yake, tukiamini kwamba yu pamoja nasi, na ndani yetu, kama utoshelevu wetu wote kwa hekima, imani, upendo, maombi, uweza, na kila neema na kipawa ambacho kazi yetu yakihitaji. Katika kazi hii ya imani itatupasa kujihisi wanyonge na wasioweza, na hata kuwa na hisi ndogo ya nguvu. Bali tukiamini na kwenda mbele, yeye atakuwa nguvu na kuleta matunda.

Huduma zenye faida kubwa tuzitoazo ni zile ambazo, kama matunda matamu ya jangwani, huchipuka kutoka saa za utasa. “Nitamleta jangwani, nami nitampa mashamba yake ya mizabibu kutoka huko.” Basi na tujifunze kutenda kazi kwa imani kama tuendavyo kwa imani, ndipo tutakapopokea hata mwisho wa imani yetu, wokovu wa nafsi za thamani, na maisha yetu yatazaa matunda yatakayodhihirika milele yote.

Machi 15

“Kaeni katika pendo langu” (Yohana 15:9).

Hewa nyingi zipo ambazo katika hizo twaweza kuishi. Watu wengine huishi katika hewa ya fikira. Nyuso zao ni za kufikiri, akili zao za elimu. Huishi katika mawazo yao, dhana zao za kweli, ladha zao, na hisi ya urembo. Watu wengine tena huishi katika asili yao ya kinyama, katika tamaa za mwili na za macho, hewa hiyo ya chini na chafu ya maisha ya kihisi, au jambo baya zaidi. Wengine tena huishi katika ulimwengu wa wajibu. Sifa iongozayo katika maisha yao ni dhamiri, nayo huchukua pamoja nayo hofu fulani ya kivuli iondoayo uhuru sahili na furaha ya maisha, lakini kuna unyofu, uadilifu, ukamilifu wa nia na wa mwenendo usiopingika wala kuhojiwa.

Bali Kristo hutuamuru tuishi katika hewa ya upendo. “Kama Baba alivyonipenda mimi, nami nilivyowapenda ninyi; kaeni katika pendo langu.” Katika lugha ya asili ni, “Ishini katika pendo langu.” Upendo ndiyo hewa ambayo yeye angetutaka tuishi ndani yake daima, yaani, kuamini kwamba yeye atupenda daima, na kudai kibali chake kitamu na uangalizi wake wa upole. Haya ni maisha ya upendo.

Machi 16

“Bwana atatoa neema na utukufu” (Zaburi 84:11).

Bwana atatoa neema na utukufu. Neno hili utukufu ni gumu sana kutafsiri, kufafanua, na kueleza; lakini kuna kitu fulani katika ufahamu wa rohoni wa Mkristo aliyehuishwa kilifasirilo. Ni mfuriko wa neema; ni divai ya uzima; ni onjo la kwanza la mbingu; ni mmweko kutoka Kiti cha Enzi na uvuvio kutoka moyo wa Mungu ambao twaweza kuwa nao na kuishi ndani yake. “Ule utukufu ulionipa mimi nimewapa wao,” ndivyo Bwana alivyotuombea. Basi na tuutwae na kuishi ndani yake. Daudi alizoea kusema, “Amka, ee utukufu wangu.” Mwombe Mungu auamshe utukufu wako na kukuwezesha kupaa juu kwa mbawa kama tai, kukaa juu na kuketi pamoja na Kristo katika ulimwengu wa roho.

Tukipaa juu kwa mbawa kama tai, Tukimngoja Bwana twainuka, Tukibadilishana nguvu, tukihuisha uzima, Jinsi roho yetu iendavyo mbinguni. Ndipo miguu yetu iotayo, ikirudi, Yakanyaga njia ya mtakatifu, Tutapiga mbio wala hatutachoka, Tutakwenda kwa miguu wala hatutazimia.

Machi 17

“Naye analikumbuka agano lake milele” (Zaburi 105:8).

Maadamu wajitaabisha chini ya sheria, yaani kwa juhudi zako mwenyewe, dhambi itakuwa na mamlaka juu yako; lakini mara utokapo chini ya kivuli cha Sinai, ukajitupa juu ya neema sahili ya Kristo na kipawa chake huru na kamili cha haki, na kumtwaa awe kwako kile alichojiahidi mwenyewe kuwa, haki yako ya fikira na hisia, na kukulinda ijapokuwa kila kitu, ambacho kingeweza kuwa kinyume chako, katika mapenzi na amani yake kamili, mapambano yamekwisha kwa kweli. Wapenzi, je, mwajua na kuamini kwa kweli kwamba hii ndiyo ahadi yenyewe ya Injili, kiini chenyewe cha agano jipya, kwamba Kristo hujiahidi mwenyewe kuiweka sheria yake moyoni mwenu, na kuwafanya mwende katika amri zake, na kushika hukumu zake na kuzitenda? Je, mwajua kwamba hii ndiyo kiapo alichomwapia Ibrahimu, kwamba angetujalia. “Kwamba, tukiisha kuokolewa mikononi mwa adui zetu, na mikononi mwao watuchukiao wote, tumtumikie pasipo hofu, katika utakatifu na haki mbele zake siku zote za maisha yetu.” Ameapa kukutendea hivi, naye ni mwaminifu, aliyeahidi. Mtumaini daima.

Machi 18

“Wala tauni haitakukaribia hema yako” (Zaburi 91:10).

Twajua maana ya kutoungua kwa moto, kutopenya kwa maji; lakini ni jambo kubwa zaidi kutopenyeka na dhambi. Yawezekana kujazwa Roho na uwepo wa Yesu kiasi kwamba mishale yote ya adui hutelezuka juu ya silaha zetu za mbinguni; kwamba mibaruti na miiba yote ikuayo kando ya njia hushindwa kushikamana na mavazi yetu ya mbinguni; kwamba mivuke yote yenye sumu ya shimoni hutoweka mbele ya pumzi ya moto ya Roho Mtakatifu, nasi twaenenda kwa uhai uliolindwa hata katikati ya bonde la uvuli wa mauti. Chuma cha moto mwekundu huyakataa maji yakigusanavyo, na vidole vipendavyo kuchezea nacho; na kama tumewaka moto wa Roho Mtakatifu, Shetani atatuepusha vidole vyake, na maji ya baridi ayamwagayo juu yetu yatatelezuka na kutuacha bila madhara: “kwa maana yeye aliyezaliwa na Mungu hujilinda, wala yule mwovu hamgusi.”

Yasemekana kwamba kabla ya kuingia nchi yenye malaria, ni vema kuuimarisha mwili kwa chakula chenye lishe. Basi vivyo hivyo tunapaswa kulishwa na kujazwa uzima wa Kristo kwa jinsi ambayo uovu hauugusi kwa kweli uhai wetu.

Machi 19

“Tweka mpaka kilindini” (Luka 5:4).

Magumu na mashaka mengi yahusuyo maisha yetu ya Kikristo yaweza kusuluhishwa vyema kwa uamuzi sahili na ujasiri wa mapenzi yetu wa kwenda mbele kwa nuru tuliyo nayo, na kuyaacha mawazo na nadharia zisizoweza kuamuliwa kwa suluhisho la baadaye. Tunachohitaji ni kutenda, na kutenda kwa nuru bora tuliyo nayo, na tutokapo nje katika wajibu wa sasa na utii kamili, mambo mengi yatawekwa wazi ambayo haifai kungoja ili kuamua.

Wapenzi, kata fundo la Gordio, kama Aleksanda, kwa upanga wa uamuzi. Tweka mpaka kilindini kwa kutumbukia kwa ujasiri, na Kristo atakusuluhishia maswali yote unayoyabishania sasa, na huenda zaidi akakuonyesha ubatili wao, na kukuacha uone kwamba njia pekee ya kuyasuluhisha ni kuyaruka. Ni mitego midogo ya Shetani ya kupoteza wakati wako na kukuweka umesita hali yakupasa kwenda mbele.

Rehema ya Mungu ni bahari ya Kimungu, Gharika isiyo na mpaka wala kina; Tweka kilindini, kata kamba ya pwani, Nawe upotelee katika ukamilifu wa Mungu.

Machi 20

“Wale wapokeao wingi wa neema, na kile kipawa cha haki, watamiliki katika uzima” (Warumi 5:17).

Nafsi za thamani mara nyingine hupigana vita vikubwa mno ili kufikia haki katika mahali pa majaribu. Yamkini moyo umekwisha potoka katika jambo fulani ambapo jaribu limeruhusiwa kuushinda, au angalau kuugeuza kutoka nia yake moja kwa Mungu; na mapambano ni ya kutisha unapotafuta kujirekebisha na kuwa sawa na Mungu, nao hujikuta umezidiwa na adui zake za rohoni, na unyonge, mashaka, na ukaidi wake mwenyewe. Ni giza na uchungu ulioje wa mapambano, na jinsi gani mara nyingi yaonekana pasipo msaada na bure wakati kama huo! Ni karibu hakika kupambana katika roho ya sheria, na tokeo daima ni, na ni lazima liwe daima, hukumu na kushindwa. Kila kutokutii hukutaniwa na pigo la ghadhabu na kukatishwa tamaa, na karibu huzama katika kukata tamaa. Ee, kama yule anayejaribiwa na kupambana angeweza kuelewa au kukumbuka lile ambalo pengine amekwisha jifunza tapo awali, kwamba Kristo ndiye haki yetu, na kwamba si kwa sheria bali kwa neema peke yake, “Kwa maana dhambi haitawatawala ninyi, kwa sababu hamwi chini ya sheria, bali chini ya neema.” Hiyo ndiyo siri ya vita vyote.

Machi 21

“Huku mkimtwika yeye fadhaa zenu zote” (1 Petro 5:7).

Mambo fulani yapo ambayo Mungu hatayavumilia ndani yetu. Hatuna budi kuyaacha. Nehemia hakutaka kuzungumza na Sanbalati juu ya mashtaka na hofu zake, bali alikataa tu kuwa na jambo lo lote katika habari hiyo—hata kuingia hekaluni na kuiombea. Ni mambo machache mno tuliyo nayo kweli katika maisha. Kama tungeacha tu mambo yote yasiyo ya lazima na kutenda tu mambo yale yanayogusa na kudai uangalifu wetu kabisa tangu asubuhi hata usiku, tungeona jinsi maisha yalivyo uzi mwembamba na hafifu; lakini twautungia shanga elfu za kuwaziwa zisizokuja kamwe, na kujitwika mizigo ya mashaka na fadhaa ambayo tungetumaini zaidi, tusingekuwa na haja ya kuituliza akili yetu. Ni wa hekima kweli ushuhuda wa yule mtakatifu mzee mpenzi aliyesema, katika kutafakari maisha yake yaliyopita, “Nimekuwa na taabu nyingi sana maishani mwangu, hasa zile ambazo hazikuja kamwe.”

Tumaini na upumzike kwa moyo ukikaa, Kama kifaranga katika kitovu chake, Ukijificha chini ya manyoya yake, Kunja mbawa zako na utumaini na upumzike. Tumaini na upumzike, tumaini na upumzike, Mungu anafanya kazi kwa lililo jema.

Machi 22

“Kushikamana sana na ujasiri na furaha ya matumaini hata mwisho” (Waebrania 3:6).

Hali ya imani ni kutumaini sahili. Ni Eliya akimwambia Ahabu, “Iko sauti ya mvua nyingi.” Lakini ndipo huja kwa kawaida uzoefu wa ndani zaidi ambao ndani yake ombi hufumwa; ni Eliya juu ya mlima, na uso wake kati ya magoti yake, akijitaabisha, kana kwamba katika uchungu wa kuzaa, kwa ajili ya baraka iliyoahidiwa. Ameiaminia—na sasa hana budi kuitwaa. Ya kwanza ni Yoashi akipiga mshale nje ya dirisha, lakini ya pili ni Yoashi akipiga chini na kuifuatia imani yake kwa uvumilivu na jaribu la ushindi.

Ni katika mahali hapa pa mwisho ambapo wengi wetu hupungukiwa. Twamwomba Mungu mengi, na Mungu aanzapo kutupa, hatukutwi tunalingana na matarajio yake. Twafanywa washirika wa Kristo tukishikilia mwanzo wa uthabiti wetu imara hata mwisho, na kumtumaini katika hayo yote.

Askari uzimiaye wa Bwana, Isikie neno lake tamu litialo moyo, “Nimewashinda adui zako wote. Nimeyateseka masikitiko yako yote; Askari upiganaye, unitumaini mimi, Nimekushinda kwa ajili yako.”

Machi 23

“Amekuwa kiumbe kipya” (2 Wakorintho 5:17).

Amefufuliwa, si kuinuliwa tu. Kuna mengi katika tofauti hii. Fundisho la falsafa ya kibinadamu ni kwamba twapaswa kuuinua ubinadamu hata daraja ya juu zaidi. Hii si Injili. Kinyume chake, fundisho la msalaba ni kwamba ubinadamu una budi kufa na kuzama usionekane, ndipo ufufuliwe, si kuinuliwa. Ufufuo si maboresho. Si kupandishwa, bali ni uzima mpya wa kimuujiza utuinuao kutoka ubatili hata kuingia katika Mungu na kutufanya washirika wa asili ya Kimungu. Ni uumbaji mpya. Ni kupandishwa kusiko na mpaka juu ya daraja iliyo juu kabisa. Basi tusipokee kilicho chini ya uzima wa ufufuo.

Nimesulubiwa pamoja na Yesu, Na msalaba umeniweka huru; Nimefufuka tena pamoja na Yesu, Naye yu hai na kutawala ndani yangu. Hii ndiyo habari ya Bwana, Kupitia msalaba aliufikia kiti cha enzi, Na kama yeye, njia yetu ya utukufu, Sikuzote hupitia mautini peke yake.

Bwana, nifundishe uzima uzaliwao na mauti. Bwana, na niishi katika uweza wa ufufuo wako!

Machi 24

“Tena nasema, Furahini” (Wafilipi 4:4).

Ni jambo jema kufurahi katika Bwana. Yamkini uliona dozi ya kwanza haikufaa kitu. Endelea na dawa yako, na usipoweza kuhisi furaha yo yote, wakati usipokuwa na chemchemi, wala faraja au kitia moyo cho chote kionekanacho, bado furahi, na uihesabu kuwa furaha tupu. Hata uangukapo katika majaribu ya namna mbalimbali, uhesabu kuwa furaha, na shangwe, naye Mungu ataifanya hesabu yako iwe njema. Je, wadhani Baba yako atakuacha uibebe bendera ya ushindi wake na furaha yake mpaka mstari wa mbele wa vita, kisha asimame kando kwa utulivu na kukuona ukitekwa au kurudishwa nyuma na adui? Kamwe! Roho Mtakatifu atakutegemeza katika kusonga kwako mbele kwa ujasiri, na kuujaza moyo wako furaha na sifa, nawe utaukuta moyo wako umependezwa na kuburudishwa na ukamilifu wa moyo ulio ndani.

Bwana, nifundishe kufurahi ndani yako, na kufurahi daima.

Furaha ya Bwana ndiyo nguvu za watu wake. Mwangaza utawanyao huzuni na kiza chao; Chemchemi ibubujikayo katika jangwa la huzuni, Na kumwaga juu ya nyika furaha na uchanuo.

Machi 25

“Uzuri wa utakatifu” (Zaburi 29:2).

Mtu fulani alisema mara moja kwamba hakuwajua watu wenye kuchukiza zaidi kuliko Wakristo waliotakaswa. Yamkini alikusudia watu wanaokiri tu kutakaswa. Kuna namna ya tabia ya Kikristo iliyo na pembe, ngumu, isiyopendeza, isiyo utakatifu wa kweli; angalau si namna iliyo bora kabisa. Ni fupa pasipo nyama iifunikayo; ni jabali tupu pasipo mizabibu na majani yalainishayo pande zake zenye ncha. Yesu hakuwa mwenye adili na safi tu, bali alikuwa pia mzuri na aliyejaa uvutio mtamu wa upendo.

Twasoma habari ya namna mbili za neema: Kwanza, “Yo yote yaliyo ya haki, yo yote yenye kupendeza na yenye sifa njema.” Zipo neema ndogo elfu katika maisha ya Kikristo tusizoweza kuzipuuza. Kwa kweli, hatua za mwisho katika kazi yo yote ya sanaa daima ni migusono ya kumalizia; basi tusistaajabu kama Mungu atatumia muda mwingi kutufundisha mambo madogo ambayo wengi wangeyahesabu si kitu.

Mungu angetaka Bibi-arusi wake awe pasipo doa wala hata kunyanzi.

Machi 26

“Yesu, mwenye kuanzisha na mwenye kutimiza imani yetu” (Waebrania 12:2).

Ongeza kwenye imani yako—usijiongezee nafsi yako. Hapa ndipo tunapokosea. Hatuna budi kuingia kwa imani tu, bali kusonga mbele kwa imani kila hatua ya njia. Katika kila daraja jipya tutajikuta wasioweza na wasiolingana na msukumo kama tulivyokuwa mwanzo, nasi hatuna budi kuitwaa neema na ushindi kwa imani tu. Je, ni ujasiri? Tutajikuta twapungukiwa na ujasiri unaohitajika; hatuna budi kuudai kwa imani. Je, ni upendo? Upendo wetu wenyewe hautakuwa wa kutosha; bali hatuna budi kuutwaa upendo wake, nasi tutaukuta umepewa. Je, ni imani yenyewe? Hatuna budi kuwa na imani ya Mungu, na Kristo aliye ndani yetu atakuwa roho ya imani, kama vile na baraka ambayo imani huidai. Basi maisha yetu yote tangu mwanzo hata mwisho ni Kristo tu ndani yetu—katika wingi upitao wa neema yake; na wimbo wetu wa milele utakuwa: Si mimi; bali Kristo aishiye ndani yangu.

Ni tamu iliyoje kutembea na Yesu, Hatua kwa hatua na siku kwa siku; Kukanyaga katika nyayo zake zenyewe, Kutembea naye njia yote.

Machi 27

“Wakati niogopapo nitakutumaini wewe” (Zaburi 56:3).

Kamwe hatutalisahau neno alilonena Bw. George Mueller mara moja kumjibu bwana fulani aliyemuuliza njia bora ya kuwa na imani thabiti. “Njia pekee,” akajibu yule baba wa imani, “ya kujifunza imani thabiti ni kustahimili majaribu makuu. Nimeijifunza imani yangu kwa kusimama imara katikati ya majaribu makali.” Hii ni kweli sana. Wakati wa kutumaini ni wakati kila kitu kingine kinaposhindwa. Mpenzi, kama huutambui kwa vigumu thamani ya nafasi yako ya sasa, kama unapita katika mateso makuu, u katika nafsi yenyewe ya imani iliyo thabiti kabisa, na kama utaachilia tu, yeye atakufundisha katika saa hizi ushiko ulio na nguvu mkuu juu ya kiti hiki cha enzi ambao waweza kuwa nao kamwe. “Usiogope, amini tu”; na kama unaogopa, tazama juu tu na useme, “Wakati niogopapo nitakutumaini wewe,” nawe bado utamshukuru Mungu kwa ajili ya shule ya huzuni iliyokuwa kwako shule ya imani.

Ee ndugu, isikilize onyo, Na uitii sauti yake leo. Roho anakuita wewe, Ee usimhuzunishe akaenda zake.

Machi 28

“Tunda la Roho ni wema wote” (Wagalatia 5:22).

Wema ni tunda la Roho. Wema ni “U-Mungu” tu. Ni kuwa kama Mungu. Na wema ulio kama wa Mungu una uhusiano wa pekee na hisani hai ya Mungu. Mtume atupa tofauti kati ya wema na haki katika fungu hili katika Warumi, “Kwa kuwa ni shida mtu kufa kwa ajili ya mtu mwenye haki; lakini yamkini mtu kuthubutu kufa kwa ajili ya mtu aliye mwema.” Mtu mwenye haki ni mtu wa unyofu mgumu, usiopindika; lakini aweza kuwa mgumu kama upande wa mlima wa jabali. Mtu mwema ni upande ule wa mlima uliofunikwa wote kwa uyoya laini wa moss na maua, na uliobubujika maporomoko na chemchemi. Wema huheshimu “yo yote yenye kupendeza.” Ni fadhili, upendano, hisani, huruma, kufurahi pamoja nao wafurahio, na kulia pamoja nao waliao. Bwana, utujaze nafsi yako, na utuache tuwe watu-Mungu na watu wema, na hivyo tuuwakilishe wema wako.

Kuna mioyo ya upweke ya kutunza, Wakati siku zisogeapo; Kuna nafsi zilizochoka zinazoangamia, Wakati siku zisogeapo.

Machi 29

“Atailinda miguu ya watakatifu wake” (1 Samweli 2:9).

Hatari kama vile pia upendeleo huandamana na maisha ya Kikristo yaliyo juu. Kadiri tunavyomkaribia Mungu, ndivyo yanavyozidi kuwa mengi majeshi ya giza katika ulimwengu wa roho. Mahali pa salama ni katika kuitii Neno la Mungu, unyofu wa moyo, na ulinzi mtakatifu.

Wakristo wanenapo juu ya kusimama mahali ambapo hawahitaji kuwa macho, wako katika hatari kubwa. Basi na tuenende kwa hakika tamu na takatifu, na bado kwa uangalifu mtakatifu na wa unyenyekevu, naye “atailinda miguu ya watakatifu wake.” Na “sasa yeye awezaye kutulinda tusijikwae, na kutusimamisha bila mawaa mbele ya utukufu wake, Mungu peke yake mwenye hekima, Mwokozi wetu, utukufu una yeye, na enzi, ukuu na uweza, sasa na hata milele. Amina.”

Twafanye nini mara nyingi twashangaa, Tunapotafuta kauli fulani ya kweli, Tazama, jibu Mungu ametupa, Yesu angefanya nini? Wakati mishale ya jaribu kali, Kwa mikuki yao ya moto ikituandama, Hii itakuwa silaha yako ya mbinguni, Yesu angefanya nini?

Machi 30

“Naomba ufanikiwe katika mambo yote na kuwa na afya, kama vile nafsi yako ifanikiwavyo” (3 Yohana 2).

Katika njia ya haki mna uzima, na katika mapito yake hamna mauti. Hiyo ndiyo siri ya uponyaji. Uwe sawa na Mungu. Ukae hivyo. Ishi katika hakika yake, wala hakuna kitu kiwezacho kukudhuru. Juu ya dirii ya haki yatatelezuka mishale yote ya moto ya shetani, na imani itakuwa na nguvu zaidi kwa kila shambulio kali. Ni kweli iliyoje, “Naye ni nani atakayewadhuru, mkiwa wenye juhudi katika mema?” Na ni kweli pia, “ukishika imani na dhamiri njema, ambayo wengine wakiisukumia mbali wamevunjikiwa na imani.”

Na tena, “Kama utakisikiza kwa bidii sauti ya Bwana, Mungu wako, na kuzishika amri zake zote na sheria zake, sitatia juu yako maradhi yo yote niliyowatia Wamisri; kwa kuwa Mimi ndimi Bwana nikuponyaye.”

Kuna swali Mungu auliza Kila dhamiri mbele zake, Na lichunguze ndani ya utu wako, Je, ni sawa na Mungu, sawa kabisa?

Machi 31

“Yo yote myaombayo mkisali, aminini ya kwamba mnayapokea, nayo yatakuwa yenu” (Marko 11:24).

Imani si kujichochea kwa nguvu za mapenzi aina fulani ya hakika kwamba jambo fulani litakuja kutimia, bali ni kuona kama jambo halisi kwamba Mungu amenena kwamba jambo hili litakuja kutimia, na kwamba ni kweli, ndipo kufurahi kujua kwamba ni kweli, na kupumzika tu na kuingia ndani yake kwa sababu Mungu amelinena. Imani huigeuza ahadi kuwa unabii. Maadamu ni ahadi tu, hutegemea ushirikiano wetu; huenda ikawa au isiwe. Bali imani inapoidai, huwa unabii nasi twatoka nje tukihisi kwamba ni jambo lisilokosa kutendeka kwa sababu Mungu hawezi kusema uongo.

Imani ni jibu litokalo kwenye kiti cha enzi likisema, “Imekwisha kutendeka.” Imani ni mwangwi wa sauti ya Mungu. Basi na tuupokee kutoka juu. Na tuurudie, na kutoka nje kushinda katika uweza wake mtukufu.

Isikie jibu kutoka kwenye kiti cha enzi, Idai ahadi, ewe mwenye shaka, Mungu amenena, “Imekwisha kutendeka.” Imani imejibu, “Imekwisha kutendeka”; Maombi yamekwisha, sifa imeanza, Haleluya! Imekwisha kutendeka.