Februari

Februari 1

“Chemchemi ya maji ibubujikayo” (Yohana 4:14).

Katika maisha yaliyofurika katika kuwahudumia wengine, twaikuta chemchemi ya kina ya uzima ikifurika juu ya chanzo na kupata njia katika mito ya maji yaliyo hai yaendayo kubariki na kuuokoa ulimwengu utuzungukao. Ni jambo zuri kuona ya kuwa kadiri baraka inavyokuwa isiyo na ubinafsi ndivyo inavyokuwa kubwa zaidi. Maji ndani ya moyo ni kisima tu, lakini yafikiapo mahitaji ya wengine si mto tu, bali delta ya mito mingi ifurikayo kwa baraka tukufu. Upendo huu ufurikao waungana na Nafsi na kazi ya Roho Mtakatifu aliyekusudiwa kumwagwa juu ya wanafunzi baada ya Yesu kutukuzwa.

Hii ndiyo siri ya kweli ya nguvu kwa huduma, moyo uliojaa na kutoshelezwa na Yesu, na uliobatizwa kwa Roho Mtakatifu hata usukumwe na utimilifu wa furaha yake na upendo wake kuwapa wengine kile ulichokipokea kwa wingi; walakini kila huduma mpya hufanya nafasi kwa kujaa kupya na kupokea kwa kina zaidi kwa uzima ukuao kwa kutoa.

Kuachilia ni kumiliki mara mbili, Je, wataka kuizidisha kila baraka, Ipitishie mbele.

Februari 2

“Na ye yote atakaye kuwa mkubwa kwenu, na awe mtumishi wenu. Na ye yote atakaye kuwa wa kwanza kwenu, na awe mtumwa wenu” (Mathayo 20:26, 27).

Mtumwa ndiyo maana halisi ya neno, doulos.

Neno la kwanza litumiwalo kwa huduma ni diakonos, maana yake mtumishi wa wengine kwa njia au kazi yo yote ya kawaida; lakini neno doulos maana yake mtumwa aliyefungwa, na Bwana hapa hutufundisha waziwazi ya kuwa huduma iliyo juu kabisa ni ya mtumwa aliyefungwa.

Yeye mwenyewe alijifanya mtumishi wa wote, naye atakaye kumkaribia zaidi na kusimama karibu naye mwishoni, sharti vivyo hivyo ajifunze roho ya huduma iliyokataa kabisa haki na madai ya ubinafsi milele.

Yawezekana kabisa kuwa mwaminifu kamili kwa Bwana Yesu, na hata kwa ajili ya Yesu, tuwe watumishi sisi wenyewe, na chini ya mamlaka ya wale walio juu yetu katika Bwana.

Roho ya doulos ni roho ya kujikana nafsi na kunyenyekea kwa furaha chini ya mamlaka ipasayo, huduma isiyo na ubinafsi kabisa, ikitoa mapendeleo yetu wenyewe na masilahi yetu pasipo masharti kwa utukufu wa Bwana na kwa ajili ya ndugu zetu. Bwana, tuvike unyenyekevu na utufanye kuwa wako kabisa.

Februari 3

“Akatoka, asijue anakokwenda” (Waebrania 11:8).

Ni imani pasipo kuona. Tuwezapo kuona, si imani bali ni kufikiri. Katika kuvuka Bahari ya Atlantiki tuliliona kanuni hii hasa ya imani. Hatukuona njia juu ya bahari wala dalili ya pwani. Walakini siku kwa siku tuliweka alama ya njia yetu juu ya chati kwa usahihi kana kwamba pametufuata mstari mkubwa wa chaki juu ya bahari; na tulipofika ndani ya maili ishirini ya nchi kavu tulijua tulipo kwa usahihi kana kwamba tumeiona yote maili elfu tatu mbele.

Tulikuwa tumeipimaje na kuiwekea alama njia yetu? Siku kwa siku nahodha wetu alikuwa amechukua vyombo vyake, na kwa kutazama juu angani aliuweka mwendo wake kwa jua. Alikuwa akisafiri kwa nuru za mbinguni, si za dunia. Vivyo hivyo imani hutazama juu na kuendelea kusafiri, kwa Jua kuu la Mungu, isione mstari mmoja wa pwani au mnara wa taa wa dunia au njia njiani. Mara nyingi hatua zake huonekana kuongoza katika kutokuwa na hakika kabisa, na hata giza na maafa. Lakini yeye huifungua njia, na mara nyingi huzifanya saa hizo za usiku wa manane kuwa malango yenyewe ya mchana. Na tutoke siku hii, tusijue lakini tukitumaini.

Februari 4

“Tazama, mimi nipo pamoja nanyi siku zote” (Mathayo 28:20).

Kristo huyu aliye hai si nafsi iliyokuwa, bali nafsi iliyo bado, Bwana wako aliye hai. Huko Preston Pans, karibu na Edinburgh, niliangalia uwanja ambapo siku za kale majeshi yalipigana vita. Katika kilele cha vita chifu alianguka akiwa amejeruhiwa. Watu wake walikuwa karibu kutoweka uwanjani walipoona umbo la kiongozi wao likianguka; mikono yao yenye nguvu ilishika upanga kwa mtetemeko, wakasita kwa kitambo. Ndipo yule chifu mzee alipata nguvu za kutosha kuinuka juu ya kiwiko chake na kulia: “Sijafa, wanangu, ninawaangalia tu—nione watu wa ukoo wangu wakitimiza wajibu wao.” Vivyo hivyo kutoka upande wa pili wa Kalvari yeye anena; hatuwezi kumwona, lakini asema, “Tazama, mimi nipo pamoja nanyi siku zote, hata ukamilifu wa dahari”; naye alisema, “Mimi nipo”—uwepo usiokoma na wa daima. Si “nitakuwapo,” bali uwepo usiokatika bado uko nasi milele.

Punde mapigano yataisha, Punde vita vitashindwa; Punde tawi la mshindi litapepea, Punde Zaburi ya milele itaimbwa; Ndipo wimbo wetu wa furaha utakuwa, Nimeshinda kwa njia yako.

Februari 5

“Pumzika katika Bwana” (Zaburi 37).

Katika uumbaji wa kale juma lilianza kwa kazi na kuisha kwa raha ya Sabato. Juma la ufufuo huanza na siku ya kwanza—raha kwanza, kisha kazi.

Basi sharti kwanza tuache kazi zetu wenyewe kama Mungu alivyoacha kazi zake, na kuingia katika raha yake, kisha tutafanya kazi, kwa mioyo iliyopumzika, kazi zake kwa nguvu yenye matokeo.

Lakini kwa nini “kujitahidi kuingia katika raha”? Tazama meli ile—jinsi isafirivyo kwa raha juu ya maji, matanga yake yakivimba kwa upepo mkali; na ikichukuliwa bila juhudi! Walakini, mtazame mtu yule kwenye usukani. Ona jinsi anavyoushika sukani kwa uthabiti, akikabili upepo, na kuiweka imara katika mahali pake. Na alegeze kwa kitambo mtego wake ulio imara na meli itaanguka bila mwelekeo kando ya upepo. Matanga yatapepea, mawimbi yataitupa meli watakavyo, na raha yote na nguvu vitakuwa vimeondoka. Ni usukani ulio imara uletao nguvu ituliizayo ya upepo. Naye amesema, “Utamlinda yeye ambaye moyo wake umekutegemea katika amani kamilifu, kwa kuwa anakutumaini wewe.” Nia iliyo imara na moyo uliotulia ni vyetu. Kulinda ni kwa Bwana. Basi na tujitahidi kuingia na kukaa katika raha yake.

Februari 6

“Mkiomba kila wakati kwa ajili ya watakatifu wote” (Waefeso 6:18).

Shauri moja jema latosha sasa hivi. Acha kuomba sana kwa ajili ya nafsi yako mwenyewe; anza kuomba mambo yasiyo na ubinafsi, uone kama Mungu hatakupa imani. Ona jinsi itakavyokuwa rahisi zaidi kuamini kwa ajili ya mwingine kuliko kwa ajili ya nafsi yako ndogo. Jaribu matokeo ya kuomba kwa ajili ya ulimwengu, kwa mambo dhahiri, kwa mambo magumu, kwa mambo matukufu, kwa mambo yatakayomheshimu Kristo na kuwaokoa wanadamu, na ukiisha kupokea majibu machache ya ajabu ya maombi katika mwelekeo huu, uone kama hutahisi mwenye nguvu zaidi kuugusa mzigo wako mdogo kwa imani ya Kimungu, kisha urudi tena mahali pa juu pa maombi yasiyo na ubinafsi kwa ajili ya wengine.

Je, umejifunza kamwe sanaa nzuri ya kumwacha Mungu akutunze, na kutoa fikira na nguvu zako zote kuwaombea wengine na ufalme wa Mungu? Itakuondolea mahangaiko elfu. Itakuinua hata mahali pa juu na patukufu, na kukufundisha kuishi na kupenda kama Mungu. Bwana tuokoe na maombi yetu ya ubinafsi na utupe imani itendayo kazi kwa upendo, na moyo wa Kristo kwa ulimwengu upoteao.

Februari 7

“Mwaminifu katika lililo dogo sana” (Luka 16:10).

Mtu aliyeikosa nafasi yake na kupata hukumu ya mtumishi asiye mwaminifu hakuwa mtu mwenye talanta tano, wala mtu mwenye mbili, bali mtu aliyekuwa na moja tu. Watu walio hatarini kuikosa maana kuu ya maisha ni watu wa uwezo na nafasi za kawaida, na wanaojiambia, “Kuna kidogo sana niwezacho kufanya hata sitajaribu kufanya lo lote.” Mojawapo ya madirisha mazuri kuliko yote ya Ulaya lilitengenezwa kwa mabaki aliyoyakusanya kijana mwanafunzi kutoka vipande vya kazi kubwa ya bwana wake. Takataka za kiwanda cha sarafu cha Uingereza zina thamani ya mamilioni. Vibegi vidogo ambavyo juu yake mitambo ya saa yako huzunguka ni muhimu sana hata hutengenezwa kwa vito. Vivyo hivyo Mungu huweka thamani nzito na wajibu juu ya wafanyakazi wanyenyekevu, watu wanaojaribu kujificha nyuma ya udogo wao, nafasi ndogo na talanta moja; na udogo wetu hautatuachilia siku ya hesabu.

Usiseme habari za talanta, una nini wewe wa kufanya? Unazo za kutosha, ziwe tano au mbili. Usiseme habari za talanta; je, wajibu wako umetimizwa? Hili huleta baraka iwe kumi au moja.

Februari 8

“Hatutoshi wenyewe kufikiri neno lo lote kana kwamba latoka kwetu wenyewe” (2Wakorintho 3:5).

Hatutoshi, “atoshaye yote.” Maneno haya mawili hukamilishana na kwa pamoja hutoa ufunguo wa maisha ya Kikristo yenye matokeo. Kugundua na kusadiki kamili ya kuwa hatuwezi lo lote wenyewe ndiyo hali ya daima ya ugavi wa kiroho. Basi lengo la Agano la Kale ni kuonyesha daima kushindwa kwa mwanadamu; na la Jipya, kudhihirisha utoshelevu wa Kristo. Ana vitu vyote kwa ajili yetu, lakini hatuwezi kuvipokea hata tujue ya kuwa hatuna kitu.

Basi kiini chenyewe cha ukamilifu wa Kikristo ni kuukana daima ukamilifu wetu wenyewe, na kupokea daima haki ya Kristo. Na kadiri tupokeavyo mitazamo ya kina zaidi ya ubatili wetu na uovu wetu, ni wito tu wa kudai zaidi ya neema yake tajiri. Lakini yawezekana kujua kabisa kutotosha kwetu na bado tusishike kwa uthabiti “vitu vyake vyote.” Hili nalo sharti lifanywe kwa imani isiyokubali kilicho pungufu kuliko VYOTE. Nabii alikasirika kwa sababu mfalme wa Israeli alikuwa amepiga chini mara tatu tu. Ilimpasa kufanya hivyo mara tano au sita. Angeweza kuwa navyo vyote. Basi na tuikabili ukuu wake na neema yake.

Februari 9

“Sitikiswi na mambo hayo” (Matendo 20:24).

Ushahidi ulio bora kabisa wa uwepo wa Mungu ni mnung’uniko wa ibilisi. Ndivyo alivyoandika Bwana Spurgeon mwema wakati mmoja katika “The Sword and the Trowel,” na sentensi hiyo ndogo imemsaidia mtoto wa Mungu aliyejaribiwa na kuchoka kusimama imara na hata kufurahi chini ya mashambulizi makali kabisa ya adui.

Twasoma katika kitabu cha Samweli ya kuwa mara Daudi alipotawazwa huko Hebroni, “Wafilisti wote wakakwea kumtafuta Daudi.” Na mara tupatapo kitu cho chote kutoka kwa Bwana kinachostahili kupiganiwa, ndipo ibilisi huja kututafuta.

Adui atukutapo katika kizingiti cha kazi yo yote kuu kwa ajili ya Mungu na tuupokee kama “ishara ya wokovu,” na kudai baraka maradufu, ushindi na nguvu. Nguvu hukuzwa kwa upinzani. Mzinga hurusha mbali maradufu kwa sababu nguvu ilipuayo sharti ipate njia yake kupitia upinzani. Namna umeme unavyozalishwa katika nyumba ya nguvu ni kwa msuguano mkali wa magurudumu yanayozunguka. Vivyo hivyo tutaona siku moja ya kuwa hata Shetani amekuwa mmojawapo wa vyombo vya baraka vya Mungu.

Februari 10

“Nimesulubiwa pamoja na Kristo; walakini ni hai” (Wagalatia 2:20).

Uzima wa Kristo unapatana na asili yetu. Bibi mmoja aliniuliza siku moja—mwanamke mwenye fikira na akili ambaye hakuwa Mkristo, lakini aliyekuwa na njaa ya kina ya kilicho haki: “Yawezaje kuwa hivi, na sisi tusipoteze ubinafsi wetu! Hili litaharibu utu wetu, tena lakiuka uwajibikaji wetu kama watu binafsi.”

Nikasema: “Dada mpenzi, utu wako ni nusu tu pasipo Kristo. Kristo aliumbwa kwa ajili yako, nawe uliumbwa kwa ajili ya Kristo, na hata mkutane hamjakamilika, naye anakuhitaji kama umhitajivyo.” Nikasema: “Tuseme mwako ule wa gesi ungesema, ‘Nikiupokea moto huu, gesi itapoteza ubinafsi wake.’ La hasha; ni wakati tu moto ujapo ndipo gesi hutimiza kusudi lake lenyewe la kuwapo. Tuseme kipande cha theluji kingesema, ‘Nifanye nini? Nikianguka chini nitapoteza ubinafsi wangu.’ Lakini huanguka na kufyonzwa na udongo, na vipande vya theluji huonekana baadaye katika maua ya primrose na daisy. Na tujipoteze nafsi zetu na kuinuka katika uzima mpya ndani ya Kristo.”

Februari 11

“Mkifanywa hodari kwa uwezo wote hata mpate saburi yote” (Wakolosai 1:11).

Mtume huwaombea Wakolosai, kwamba “wafanywe hodari kwa uwezo wote, kwa kadiri ya nguvu yake ya utukufu, hata wapate saburi yote na uvumilivu pamoja na furaha.” Ni jambo moja kuvumilia na kuonyesha msongo juu ya kila msuli wa uso wako, na kuonekana kusema kwa kila mkunjo, “Kwa nini hakuna anayenihurumia?” Ni jambo jingine kuustahimili msalaba, “ukiidharau aibu” kwa ajili ya furaha iliyowekwa mbele yetu.

Kuna miti fulani katika bustani ya Bwana ambayo “haitaona hari ijapo”; wala haitahangaika mwaka wa ukame, wala haitaacha kuzaa matunda. Na tuelekeze nyuso zetu kuelekea macheo ya jua na kutumia mawingu yajayo, kufanya upinde wa mvua. Si muda mrefu zaidi tutakuwa na nafasi hii tukufu ya kufurahi katika dhiki, na kujifunza saburi. Mbinguni hatutakuwa na jambo la kufundisha uvumilivu. Tusipojifunza hapa, tutakuwa bila taji yetu iliyong’aa kuliko zote milele, na kutamani turudi kwa kitambo kidogo, katika hali zenyewe ambazo sasa twajitahidi sana kuzitupa.

Februari 12

“Bali utafuteni kwanza ufalme wa Mungu, na haki yake; na hayo yote mtazidishiwa” (Mathayo 6:33).

Kwa kila moyo unaotafuta kitu cho chote kutoka kwa Bwana hii ni kauli mbiu njema. Kitu kile kile, au kutamani kwake, chaweza bila kujua kukutenga na Bwana, au angalau na unyofu wa kusudi lako kwake. Kitu tunachokitamani chaweza kuwa kitu cha haki, lakini twaweza kukitamani kwa roho ya kutokuamini na ya ubinafsi. Na tumkabidhi yeye, wala tusiache kukiaminia, lakini na tuweke, wakati huo huo, kusudi letu likiwa imara juu ya mapenzi yake na utukufu wake, na kudai hata baraka zake alizoahidi, si kwa ajili yazo au kwa ajili yetu, bali kwa ajili yake. Ndipo itakuwa kweli, “Nawe utajifurahisha kwa Bwana, naye atakupa haja za moyo wako.” Vitu vingine vyote ila yeye mwenyewe Mungu atazidisha. Lakini sharti daima vizidishwe, kamwe kwanza.

Ndipo tutaweza kuviamini bila shaka, tunapovidai kwa ajili yake na si kwa ajili yetu wenyewe. Ni wakati tu “tulipo wa Kristo” ndipo “vitu vyote ni vyetu.”

Bwana, unisaidie siku hii kukutafuta wewe kwanza, na kuwa na shauku zaidi ya kukupendeza na kuwa na mapenzi yako kuliko kumiliki baraka nyingine yo yote.

Februari 13

“Maombi yako yamepanda kuwa ukumbusho mbele za Mungu” (Matendo 10:4).

Neno zuri lililoje alilotumia yule malaika kwa Kornelio, “Maombi yako yamepanda kuwa ukumbusho.” Yaonekana karibu kana kwamba dua za miaka mingi zimekusanyika mbele ya Kiti cha Enzi, na mwishowe jibu likavunjika kwa baraka juu ya kichwa cha Kornelio, kama vile mvuke uliokusanyika wa miezi mingi mwishowe hupasuka kwa mafuriko ya mvua juu ya nchi kavu iliyokauka. Basi Mungu huonyeshwa akihifadhi maombi ya watakatifu wake katika vitasa; huelezwa kuwa manukato matamu. Huwekwa kama maua yenye harufu nzuri katika vyumba vya Mfalme, na kutunzwa kwa ukumbusho mtamu mbele yake. Na baadaye huonyeshwa kuwa yamemwagwa juu ya nchi; na tazama, kuna sauti na ngurumo na matendo makuu ya Majaliwa yakitimiza makusudi ya Mungu kwa ufalme wake. Twaitwa “wakumbushaji wa Bwana,” na twaamriwa tusimpe raha, mchana wala usiku, bali tuzijaze mbingu maombi yetu na kwa wakati wake jibu litakuja pamoja na baraka zake zilizokusanyika.

Hakuna pumzi ya maombi ya kweli ipoteayo. Kadiri lisubirivyo zaidi, ndivyo linavyokuwa kubwa zaidi.

Februari 14

“Yeye atawabatiza kwa moto” (Mathayo 3:11).

Moto ni mkali wa ajabu tena wa ndani. Huingia katika kiini chenyewe cha vitu. Kwa namna fulani huchanganyika na kila chembe ya kitu akigusacho.

Kuna majaribu makali yajayo kwa nia nyeti zaidi, kwa nia zenye vituo vingi vya kugusana na kile kiumizacho; hata kadiri asili ilivyo juu ndivyo furaha ilivyo juu, na njia za maumivu zijazo ni kubwa zaidi.

Kisha kuna majaribu ya kina zaidi yajayo tunapoingia katika mikono ya Mungu, tunapopita kutoka asili ya kimwili na kiakili hata ya kiroho.

Yanapokuja kwanza, twarudi nyuma kutoka pumzi yao isiyo ya asili na ya kutisha, nasi twasema: “Lo, hili haliwezi kutoka mkononi mwa Baba mpendao! Hili haliwezi kuwa la lazima kwangu.”

Kisha huja maumivu na mateso kutoka mkono wa Mungu mwenyewe, aketipo kama msafishaji na mtakasaji wa fedha, aiachapo iungue, hata yaonekane sharti tuunguzwe hata majivu, nasi twaunguzwa, kwa kweli, mwishowe hata majivu.

Lakini sharti tupate ushindi kwa imani. Wakati ule uachapo kuiogopa, wakati ule yaacha kukudhuru. Asema, “Miali haitawaka juu yako.”

Februari 15

“Uwe hodari katika neema iliyo katika Kristo Yesu” (2Timotheo 2:1).

Jinsi ya kuifurahia siku hii. Haitakuja kamwe kwa kujaribu kuwa na furaha na bado twawajibika kwa hali za furaha ya kweli.

1. Uwe sawa na Mungu; kwa maana “Furaha imepandwa kwa wanyofu wa moyo.” “Ni furaha yake ikaayo ndani yetu ndiyo ifanyayo furaha yetu itimizwe.”

2. Jisahau nafsi yako na uishi kwa ajili ya wengine; kwa maana “Heri kutoa kuliko kupokea.”

3. Usipoweza kufurahi katika hisia, hali na mazingira, “furahini katika Bwana,” na “hesabuni kuwa ni furaha tupu, mkiangukia katika majaribu ya namna mbalimbali.”

Mwishoni, mtii Bwana na uwe mwaminifu kwa amana yako; na tena na tena Roho wake mbarikiwa atakunong’oneza moyoni mwako, “Vema, mtumwa mwema na mwaminifu, ingia katika furaha ya bwana wako.”

Si furaha wala si huzuni Ndiyo mwisho au njia yetu iliyoamriwa, Bali kutenda hata kila kesho Itukute mbali zaidi kuliko leo. Basi na tuinuke na kutenda Kwa moyo tayari kwa hali yo yote, Tukizidi kutimiza, tukizidi kufuatia, Jifunze kufanya kazi na kungoja.

Februari 16

“Tutadumu katika kuomba” (Matendo 6:4).

Katika mwaminio aliyejiweka wakfu Roho Mtakatifu ni hasa Roho wa maombi. Kama nafsi yetu yote imekabidhiwa kwake, na mawazo yetu yako chini ya amri yake, atatumia kila dakika katika ushirika nasi tutamletea kila jambo lijapo, na kuliombea katika utambuzi wetu wa kiroho kabla hatujalitenda katika maisha yetu. Basi tutajikuta tukiuchukua mizigo ya maisha na kuiombea katika maombi yasiyo na maneno ambayo sisi wenyewe mara nyingi hatuwezi kuyafahamu, lakini ambayo ni kufunuliwa tu kwa wazo lake na mapenzi yake ndani yetu, na yatakayofuatwa na kufunuliwa kwa Majaliwa yake juu yetu.

Kukosa uaminifu na utii kwa mnong’ono hafifu kabisa wa mapenzi yake mara nyingi kutazuia baraka fulani aliyoikusudia kwetu hata baada ya kitambo tuwe wazito na wazembe hata asiweze kutuamini kwa minong’ono yake nasi hivyo tutajikwaa gizani na kuzikosa fikira zake zilizo juu kabisa.

Bwana, tufundishe kuomba katika Roho, kuomba bila kukoma na kutopoteza cho chote cha mapenzi yako.

Februari 17

“Uzima wenu umefichwa” (Wakolosai 3:3).

Wakristo fulani hujitokeza kwa kipimo kikubwa kuliko ipasavyo. Waweza kueleza, na wengine waweza kueleza, ni nafsi ngapi wawaletazo kwa Kristo. Kazi yao yaonekana kugandamana na kuwa ukumbusho wake yenyewe. Wengine tena huonekana kuchanganyika kabisa na wafanyakazi wengine hata ubinafsi wao wenyewe hauwezi kufuatiliwa. Walakini, baada ya yote, hii ndiyo huduma iliyo kama ya Kristo kuliko zote, kwa maana Bwana mwenyewe hata haonekani katika kazi ya kanisa ila kama Uzima wake uliofichwa na Kichwa kilichopaa, na hata Roho Mtakatifu hupotea katika vyombo avitumiavyo. Mzabibu hauzai tunda, na hata utomvu hauonekani katika mtiririko wake usiokoma, na ni matawi madogo yazayo vishada vyote na yaonekana kuwa na heshima yote ya mavuno ya zabibu. Vivyo hivyo kadiri tumkaribiavyo Kristo ndivyo tulivyo radhi kupotewa machoni katika tunda letu, na kuwaacha wengine wawe mashuhuri zaidi, hali sisi tukiwa mashahidi wenye furaha na radhi wa ushuhuda wetu na kuinua mikono yao kwa huduma ya kimya ya upendo na maombi. Bwana, unifanye kama maserafi waliojifunika mbele ya kiti cha enzi, wanaozifunika nyuso zao na miguu yao, na kujificha wenyewe na huduma yao hali warukapo kukutii.

Februari 18

“Kristo ndani yenu” (Wakolosai 1:27).

Tofauti kubwa iliyoje kati ya njia ya kale na njia mpya ya ukombozi! Mguso mmoja wa Kristo wathamani zaidi ya maisha ya kupambana. Mgonjwa mmoja katika mojawapo ya hospitali zetu alikuwa hatarini kupoteza kuona kwake kwa sababu ya kipande kidogo cha sindano iliyovunjika kilichoingia jichoni mwake.

Upasuaji baada ya upasuaji ulikuwa umekiudhi tu, na kukisukuma kile kigeni mbali zaidi katika mishipa nyeti ya kile kiungo chenye hisia. Mwishowe daktari kijana stadi alifikiri hila mpya. Alikuja siku moja bila kisu na vyombo vya kuchunguza, akishika mkononi mwake sumaku ndogo lakini yenye nguvu, aliyoiweka mbele ya jicho lililojeruhiwa, karibu kadiri lilivyoweza kustahimili. Mara kile kipande cha chuma kilianza kusogea kuelekea uvutano ule wenye nguvu, na upesi kikaruka juu kukikuta na kuliacha jicho lililoteseka likipona kabisa, bila juhudi wala mpasuko. Ilikuwa rahisi kama ilivyokuwa ya ajabu. Kwa mguso mmoja wa nguvu kiungo kiliokolewa na taabu hatari ikaponywa kabisa.

Ndivyo hivyo Mungu atuokoavyo, kwa uvutano rahisi wa uzima na nguvu ya Kristo.

Februari 19

“Kwa kadiri niwezavyo, mimi ni tayari” (Warumi 1:15).

Uwe na bidii. Bidii kali, moyo mzima kwa Kristo, ishara ya shauku ya msalaba, moyo wa hamu wa nafsi yetu yote kwa ajili ya Bwana wetu na wanadamu—hili ndilo Bwana alitarajialo, hili ndilo msalaba wake unaostahili, hili ndilo ulimwengu uhitajilo, hili ndilo zama hizi zina haki ya kulitazamia. Kila kitu kinachotuzunguka kina uhai mkali. Maisha ni ya bidii, kifo ni cha bidii, dhambi ni ya bidii, watu ni wa bidii, biashara ni ya bidii, elimu ni ya bidii, zama ni za bidii; Mungu atusamehe tukiwa sisi peke yetu tunacheza katika joto jeupe la wakati huu wa dharura. Lo, kwa ubatizo wa moto! Lo, kwa kaa la moto juu ya midomo iwakayo ya upendo! Lo, kwa watu waliomilikiwa na Mungu na waliojisalimisha nafsi zao, wakilishika wazo kuu la Mungu na kusonga mbele “kuelekea alama ya thawabu ya mwito mkuu wa Mungu katika Kristo Yesu.”

Ulimwengu wote kwa ajili ya Yesu Ndilo litakuwa ombi langu, Na kauli mbiu yangu daima, Yeye mwenyewe kwangu. Ulimwengu wote kwa ajili ya Yesu, Bwana, uje upesi, Ulete ufalme wako ulioahidiwa, Na kutuchukua nyumbani.

Februari 20

“Usiogope, kwa maana mimi ni pamoja nawe” (Isaya 41:10).

Shetani daima hujaribu kuidhoofisha imani yetu kwa hofu. Yeye ni mwanafalsafa mkuu na hujua matokeo ya kupooza ya hofu, ya kuwa ni adui mkuu wa imani, na ya kuwa imani ndiyo siri kuu ya msaada. Akiweza kutufanya tuogope atazuia kuamini kwetu na kuizuia baraka yenyewe tuihitajiyo. Ayubu aliona hatari ya hofu na hutupa ushuhuda wa kusikitisha, “Niliogopa hofu nayo ikanijia.”

Hofu huzaliwa na Shetani, na kama tungetumia tu muda kufikiri kwa kitambo tungeona ya kuwa kila neno asemalo Shetani limejengwa juu ya uongo. Yeye ni baba wa waongo. Hata hofu zake ni uongo na vitisho vyake vyapaswa kuwa kwetu vitia moyo badala yake.

Basi Shetani akuambiapo ya kuwa ubaya fulani utakuja, waweza kwa utulivu kumtazama usoni na kumwambia ya kuwa yeye ni mwongo, ya kuwa badala ya ubaya, wema na fadhili zitakufuata siku zote za maisha yako, kisha umgeukie Bwana wako mbarikiwa na kusema, “Wakati nitakapoogopa nitakutumaini wewe.” Kila hofu ni kutokuamini na kuamini ndiyo dawa ya hofu. “Wakati nitakapoogopa nitakutumaini wewe.”

Februari 21

“Usifadhaike, kwa maana mimi ni Mungu wako” (Isaya 41:10).

Jinsi Mungu daima anavyozifariji hofu zetu kwa wororo! Jinsi asemavyo kwa utamu katika Isaya 41:10, “Usiogope, kwa maana mimi ni pamoja nawe; usifadhaike, kwa maana mimi ni Mungu wako; nitakutia nguvu, naam, nitakusaidia, naam, nitakushika kwa mkono wa kuume wa haki yangu.” Na tena kwa fikira yenye wororo zaidi, “Mimi, Bwana, Mungu wako, nitakushika mkono wako wa kuume, nikikuambia, Usiogope, mimi nitakusaidia.” Si kwamba alisema mara moja tu, bali huendelea kuushika mkono wetu wa kuume na kurudia ahadi kama hizo.

Bwana mbarikiwa ameyafupisha yote katika alama moja tamu ya faraja ya milele katika ujumbe wake kwa wanafunzi juu ya bahari ya Galilaya, “Ni mimi; msiogope.” Hasemi, “Yamekwisha,” au “Ni asubuhi,” au “Ni hali njema ya hewa,” au “Ni maji matulivu,” bali asema, “Ni mimi, msiogope.” Yeye ni dawa ya hofu; yeye ni tiba ya taabu; yeye ni kiini na jumla ya ukombozi. Kwa hiyo, twapaswa kuinuka juu ya hofu. Na tuweke macho yetu yamekazwa juu yake; na tukae daima ndani yake; na turidhike naye; na tushikamane naye kwa ukaribu na kulia, “Hatutaogopa ijapo nchi itaondolewa, ijapo milima itahamishwa moyoni mwa bahari.”

Februari 22

“Yeye aliyeingia katika raha yake amestarehe katika kazi zake mwenyewe, kama Mungu alivyostarehe katika kazi zake” (Waebrania 4:10).

Raha iliyoje ingekuwa kwa wengi wetu kama tungeweza tu kubadilishana mizigo na Kristo, na kwa ukamilifu na milele kumhamishia yeye mahangaiko na mahitaji yetu yote hata tusijisikie tangu sasa kuwajibika kwa mizigo yetu, bali tujue ya kuwa yeye amejitwika uangalizi wote, na ya kuwa imani yetu ni kuichukua tu mizigo yake, na ya kuwa yeye huomba, hufanya kazi, na huteseka kwa ajili yetu na masilahi yetu tu. Hili ndilo atualikalo kweli kufanya. “Njoni kwangu,” asema, “ninyi nyote msumbukao na wenye kulemewa na mizigo, nami nitawapumzisha,” kisha huongeza, “Jitieni nira yangu, mjifunze kwangu.” Yeye huitwaa nira yetu nasi twatwaa yake nasi twaiona ni rahisi mara elfu kuuchukua mzigo mmoja wake kuliko kuuchukua wetu wenyewe. Jinsi ilivyo ya kupendeza zaidi kutumia saa moja katika dua kwa ajili ya mwingine kuliko dakika tano kujiombea nafsi zetu. Je, hatujachoka kuichukua mizigo yetu ya mashaka?

Ni kwa ajili ya hili rehema yake ilikutafuta, Na kukuleta kwa utimilifu wake wote, Kwa damu ya thamani iliyokununua, Ipitishie mbele.

Februari 23

“Kwangu mimi kuishi ni Kristo, na kufa ni faida” (Wafilipi 1:21).

Siri ya mwili wenye afya ni moyo wenye afya, na maombi ya Roho Mtakatifu kwa ajili yetu ni kwamba “tuwe na afya na kufanikiwa kama nafsi yetu ifanikiwavyo.”

Twamkuta Paulo katika Nyaraka kwa Wafilipi akionyesha kutojali kwa unyofu na kutakatifu kwa suala la uzima au kifo. Naam, yumo katika hali ngumu kweli, kama angependelea “kuondoka na kuwa pamoja na Kristo,” au kubaki bado katika mwili.

La kwanza kwa kweli lingekuwa pendeleo lake tamu kuliko yote, lakini la pili lingekuwa wakati huo huo huduma yenye furaha. Kusudi lake pekee la kutaka kuishi ni kuwa baraka. “Kukaa katika mwili ni muhimu zaidi kwa ajili yenu.”

Alipoifikia hali hii ya moyo, ni jambo zuri kuona jinsi upesi ainukavyo hata imani ya ushindi ihitajiwayo kudai nguvu na afya kamili. Kwa sababu ni muhimu zaidi kwenu mimi nikae katika mwili, huongeza, “Najua ya kuwa nitakaa na kudumu pamoja nanyi nyote, kwa faida yenu na furaha ya imani.” Bwana, unisaidie leo “nisiyahesabu maisha yangu kuwa ya thamani kwangu ili niumalize mwendo wangu kwa furaha na ile huduma niliyoipokea kwa Yesu.”

Februari 24

“Dhambi haitawatawala ninyi, kwa maana hamwi chini ya sheria, bali chini ya neema” (Warumi 6:14).

Siri ya kushindwa kwa Musa ilikuwa hii: “Sheria haikukamilisha neno lo lote, bali kuletwa kwa tumaini lililo bora zaidi ndiko kulikofanya.” Na hii ndiyo sababu kazi ya maisha yake nayo ilipungukiwa na kutimizwa kamili. Aliiona lakini hakuingia Nchi ya Ahadi. Mwanzilishi wa sheria alilazimika kuwa mhanga wake, na maisha yake na kifo chake vingeweza kudhihirisha kutoweza kwa sheria kumwongoza mtu ye yote hata Nchi ya Ahadi. Ukweli wenyewe, ya kuwa ni kwa kosa dogo hivyo Musa alipoteza urithi wake, waifanya adhabu nzito ya sheria kuwa nzito zaidi. “Amelaaniwa kila mtu asiyedumu katika yote yaliyoandikwa katika kitabu cha torati, ayafanye.”

Lakini kwa utukufu wa neema ya Mungu twaweza kuongeza ya kuwa yale ambayo sheria haikuweza kumfanyia Musa, Injili iliyafanya; na yeye ambaye hakuweza kuvuka Yordani chini ya agano la kale huonekana juu ya vilele vyenyewe vya Hermoni pamoja na Mwana wa Adamu, akishiriki utukufu wa Kugeuka Sura kwake, na kunena juu ya kifo kile cha Kalvari ambacho kwacho alikuwa na deni la hatima yake tukufu.

Neema hiyo tumeirithi chini ya Injili ya Yesu Kristo.

Februari 25

“Mimi ndimi mzabibu, ninyi ni matawi” (Yohana 15:5).

Nawezaje kumtwaa Kristo kama Mtakasaji wangu, au Mponyaji? ni swali tunaloulizwa daima. Ni lazima kwanza kabisa tuingie katika hali ya imani. Hili sharti lifanywe kwa tendo dhahiri na la hiari, kisha lidumishwe kwa zoea la kawaida. Ni sawasawa kabisa na kupanda mti. Sharti uupande katika udongo kwa tendo dhahiri, kisha sharti uuache ukae na kudumu ardhini hata mizizi midogo ipate wakati wa kujiimarisha na kuanza kuvuta riziki kutoka udongoni. Kuna hatua mbili, kupanda kwa dhahiri kisha kufyonza kwa kawaida unyevu na chakula kutoka ardhini. Nyuzi za mizizi sharti zipumzike hata zifikishe matundu yake yenye sponji na kunywa chakula cha nchi. Baada ya zoea kuthibitika, ndipo kwa sheria fulani ya kawaida, mmea huvuta uzima wake kutoka ardhini bila juhudi, na ni jambo la asili kwake kukua kama ilivyo kwetu kupumua.

Bwana, unisaidie siku hii kukaa ndani yako, na kukua katika zoea la kuvuta uzima wangu wote kutoka wako hata iwe kweli kwangu, “Ndani yake naishi, nakwenda, na kuwapo kwangu ndani yake.”

Februari 26

“Awakamilishe katika kila kazi njema” (Waebrania 13:21).

Katika maombi yale mazuri mwishoni mwa Waraka kwa Waebrania, “Basi Mungu wa amani, aliyemleta tena kutoka kwa wafu, Mchungaji mkuu wa kondoo, Bwana wetu Yesu, kwa damu ya agano la milele, awakamilishe katika kila kazi njema, mpate kuyatenda mapenzi yake,” fungu la maneno, “awakamilishe katika kila kazi njema,” kwa halisi maana yake, husemwa, “awasawazishe katika kila kazi njema.” Ni jambo kuu kusawazishwa, kusawazishwa na mazingira na hali zetu badala ya kujaribu kuvifanya visawazishwe kwetu, kusawazishwa na watu tunaokutanishwa nao, kusawazishwa na kazi Mungu aliyo nayo kwetu, na si kujaribu kumfanya Mungu atusaidie kufanya kazi yetu; kusawazishwa kutenda mapenzi yenyewe na mpango wa Mungu kwetu katika maisha yetu yote. Hii ndiyo siri ya raha, nguvu na uhuru katika kazi ya maisha yetu.

Lo, unijaze utimilifu wako, Bwana, Hata moyo wangu wenyewe ufurike Katika wazo liwakalo na neno ling’aalo, Kutangaza upendo wako, kuonyesha sifa zako. Lo, unitumie, Bwana, unitumie hata mimi, Kama vile utakavyo, na lini, na wapi; Hata nikuone uso wako mbarikiwa, Nishiriki raha yako, furaha yako, utukufu wako.

Februari 27

“Awafanye imara, awatie nguvu, awakamilishe” (1Petro 5:10).

Katika kumtwaa Kristo katika uhusiano wo wote mpya, sharti kwanza tuwe na nuru ya kutosha ya akili itosheleze fikira zetu ya kuwa tuna haki ya kusimama katika uhusiano huu. Kivuli cha swali hapa kitaiharibu imani yetu. Kisha, tukiisha kuona hili, sharti tufanye jaribio, kujitoa, kuchagua, na kushika mahali kwa dhahiri kama vile mti upandwavyo katika udongo, au bibi-arusi ajitoavyo mwenyewe kwenye madhabahu ya ndoa. Sharti iwe mara moja kwa yote, pasipo masharti, pasipo kurudi nyuma.

Kisha kuna majira ya kuthibitisha, kutuliza na kujaribu, ambamo sharti tudumu hata uhusiano mpya uthibitike hata kuwa zoea la kudumu. Ni sawasawa kabisa na pale mpasuaji aunganishapo mkono uliovunjika. Huuweka katika vibao ili kuuzuia usitetemeke. Vivyo hivyo Mungu ana vibao vyake vya kiroho atakavyo kuviweka juu ya watoto wake na kuwaweka kimya na bila kutikisika hata wapite hatua ya kwanza ya imani.

Si kazi rahisi kwetu sikuzote, “lakini Mungu wa neema yote aliyewaita mwingie katika utukufu wake wa milele katika Kristo Yesu, mkiisha kuteswa kwa kitambo, yeye mwenyewe atawakamilisha, na kuwathibitisha, na kuwatia nguvu.”

Februari 28

“Hesabuni kuwa ni furaha tupu” (Yakobo 1:2).

Hatujisikii daima kuwa na furaha, lakini yatupasa kuihesabu kuwa furaha tupu. Neno “hesabu” ni mojawapo ya maneno makuu ya Maandiko. Ni neno lile lile litumiwalo juu ya sisi kuwa tumekufa. Hatujisikii kuwa tumekufa. Twatambua kwa maumivu kitu ambacho kingependa kwa furaha kurudi katika uhai. Lakini yatupasa kujitendea kama waliokufa, wala tusiiogope wala kuitii asili ya kale.

Vivyo hivyo yatupasa kulihesabu jambo lijalo kuwa baraka. Tumeazimia kufurahi, kusema, “Moyo wangu u thabiti, Ee Mungu, nitaimba na kuimba sifa.” Kufurahi huku, kwa imani, upesi kutakuwa zoea, na kutaleta daima kwa haraka roho ya furaha na mfuriko wa asili wa sifa.

Ndipo, “ijapokuwa mtini hautachanua na hakuna tunda litakaloonekana katika mizabibu, kazi ya mzeituni ikikoma na mashamba yasitoe chakula, kundi likikatiliwa mbali na zizi, na ng’ombe wasiwepo mabandani, hata hivyo tutafurahi katika Bwana, na kushangilia katika Mungu wa wokovu wetu.”

Amani, amani kamili, huku huzuni zikituzunguka, Juu ya kifua cha Yesu hakuna ila utulivu; Amani, amani kamili, wakati wetu ujao usiojulikana, Yesu twamjua, naye yu juu ya kiti cha enzi.