Oktoba

Oktoba 1

“Ili katika zamani zijazo audhihirishe wingi wa neema yake upitao kiasi” (Efe 2:7).

Kusudi kuu la Kristo kwa watu wake ni kuwalea hata kulijua tumaini la kuitwa kwao, na utajiri wa utukufu wa urithi wao, na ukuu upitao kiasi wa nguvu zake kwetu sisi tuaminio.

Na tuthibitishe, katika mienendo yetu yote mbalimbali ya maisha, na matukio ya vita, utimilifu wa nguvu zake na neema yake na hivyo tutajua “Katika zamani zijazo wingi wa neema yake upitao kiasi, katika wema wake kwetu sisi katika Kristo Yesu.”

Mpendwa, je, wamfuata hivi Mwalimu wako katika shule ya imani, na kuimaliza elimu ambayo baada ya muda itakuandaa kwa “utukufu wa milele upitao kiasi na kuwa mzito mno”? Hii ni Shule ya Imani tu.

Kwa haba twaweza sasa kuota maana ya mafunzo haya kwetu siku moja, tutakapoketi pamoja naye katika kiti chake cha enzi na kushiriki naye nguvu ya Mungu na utawala wa ulimwengu. Na tuwe wanafunzi waaminifu sasa na hivi karibuni pamoja naye, sisi nasi, tutakuwa “tumeustahimili msalaba na kuidharau aibu,” na tuta“keti mkono wa kuume wa kiti cha enzi cha Mungu.”

Oktoba 2

“Musa hakuwapa urithi; Bwana, Mungu wa Israeli, ndiye urithi wao, kama alivyowaambia” (Yos 13:33).

Hili lina maana kubwa sana. Mungu aliwapa kabila nyingine nchi lakini aliwapa Walawi nafsi yake. Kuna jambo katika maisha ya Kikristo kama urithi utokao kwa Bwana, na kuna jambo kama kumtwaa Bwana mwenyewe kuwa urithi wetu.

Watu wengine hupata utakaso kutoka kwa Bwana ulio na thamani kubwa, lakini ubadilikao, na mara nyingi usiodumu. Wengine wamejifunza funzo lililo juu zaidi la kumtwaa Bwana mwenyewe kuwa mlinzi wao na utakatifu wao, na wakikaa ndani yake hulindwa juu ya mageuzi ya hali zao na hisia zao wenyewe.

Wengine hupata kutoka kwa Bwana vipimo vikubwa vya furaha na baraka, na nyakati za kuburudika.

Wengine, tena, hujifunza kumtwaa Bwana mwenyewe kuwa furaha yao.

Watu wengine huridhika kuwa na amani na Mungu, lakini wengine wameitwaa “amani ya Mungu ipitayo akili zote.”

Wengine wana imani kwa Mungu, hali wengine wana imani ya Mungu. Wengine wana migusano mingi ya uponyaji kutoka kwa Mungu, wengine, tena, wamejifunza kuishi katika afya yenyewe ya Mungu.

Oktoba 3

“Mbweha wadogo waharibuo mizabibu” (Wim 2:15).

Kuna vitu vingine vizuri, bila kuwa vikamilifu. Huhitaji jeshi zima lipige mizinga nje ya chumba chako ili kukuweka macho. Yatosha kabisa kwamba saa yako ndogo ya kengele igonge kengele yake ndogo. Si lazima kuhangaika juu ya kila kitu; yatosha kabisa ikiwa ibilisi atakwaruza akili yako kwa wasiwasi mmoja mdogo, wazo moja dogo lililoharibu amani yako kamili. Ni kama ung’aavu juu ya kioo, au meza nzuri ya kupambia, mkwaruzo mmoja utauharibu; na kadiri ulivyo mzuri zaidi ndivyo mkwaruzo mdogo utakaouchafua. Na hivyo raha yako yaweza kuharibiwa na kitu kidogo sana. Labda umemtumaini Mungu juu ya wokovu wako ujao; lakini je, umemtumaini juu ya biashara yako ya sasa au shughuli za kidunia, fedha zako na jamaa yako?

Maana yake ni nini ile amani ipitayo akili zote? Haimaanishi amani ambayo hakuna awezaye kuielewa. Yamaanisha amani ambayo hakuna kiasi cha kufikiri kitakayoileta. Huwezi kuipata kwa kufikiri. Yaweza kuwa na fadhaa kamili na machafuko pande zote za upeo, lakini bado moyo wako waweza kupumzika katika usalama kamili kwa sababu yeye ajua, yeye apenda, yeye aongoza.

Oktoba 4

“Badala ya mbigili, mti wa mhadasi” (Isa 55:13).

Ukumbusho mtamu kabisa wa Mungu ni mwiba uliogeuzwa na mbaruti uchanuao maua ya amani na utamu, mahali ambapo zamani ilikua mizozo.

Mpendwa, Mungu angoja kufanya ukumbusho kama huohuo katika maisha yako, kutoka katika vitu vikuumizavyo zaidi leo. Chukua manung’uniko, mafarakano, urafiki uliovunjika na mafungamano yaliyokatika ambayo yamekuwa huzuni na kuvunjika kwa moyo wa maisha yako, na umwache Mungu ayaponye, na kukupa neema ya kukufanya upatane na wote ambao waweza kuwa umewakosea, nawe utastaajabu shangwe na baraka itakayotoka katika vitu ambavyo havijakuletea kitu ila majuto na maumivu.

“Heri wapatanishi, kwa kuwa hao wataitwa wana wa Mungu.” Kazi ya milele ya Mkombozi wetu mbarikiwa ni kuwapatanisha wenye hatia na waliofarakana na Mungu, na kazi iliyo juu na ya Kikristo zaidi tuwezayo kuifanya ni, kuwa kama yeye.

Je, twaenda kuzifuta chozi za ulimwengu wenye huzuni, kuwaponya waliovunjika moyo, kuvifunga vidonda vya maisha ya wanadamu, na kuunganisha moyo kwa moyo, na nchi kwa mbingu?

Oktoba 5

“Ameshinda kwa utukufu” (Kut 15:1).

Mpendwa, Mungu atuita kwenye ushindi. Je, yeyote wenu ameuacha ule mvutano, umejisalimisha? Je, umesema, “Jambo hili ni kubwa mno”? Je, umesema, “Naweza kuacha kila kitu kingine ila hiki”? Ukiwa umefanya hivyo, hauko katika nchi ya ahadi. Mungu amaanisha upokee kila jambo gumu lijalo katika maisha yako. Ameanza nawe, akijua kila shida. Nawe ukithubutu kumwacha, atakuchukua uvuke si tu kuwa washindi, bali “zaidi ya washindi.” Je, wautazamia ushindi wote?

Mungu huwapa watoto wake nguvu kwa vita na kuwalinda kwa shauku ya upendo. Anatamani kukukumbatia mikononi mwake na kukuambia, “Nimeuona mvutano wako, nimeyatazama majaribu yako, nimefurahi katika ushindi wako; wewe umeniheshimu.” Wajua alimwambia Yoshua mwanzoni, “Hapatakuwa na mtu atakayeweza kusimama mbele yako siku zote za maisha yako; kama nilivyokuwa pamoja na Musa, ndivyo nitakavyokuwa pamoja nawe; sitakupungukia wala sitakuacha.” Na tena, atuambia sisi, “Usiogope, kwa maana mimi ni pamoja nawe.”

Oktoba 6

“Efraimu amejichanganya” (Hos 7:8).

Ni jambo kuu kujifunza kumtwaa Mungu kwanza, na ndipo aweza kutupa kila kitu kingine, bila hofu ya kwamba kitatuumiza.

Maadamu wataka kitu chochote sana, hasa zaidi ya vile umtakavyo Mungu, ni sanamu. Lakini utakaporidhika na Mungu, kila kitu kingine hupoteza mvuto wake hata aweza kukupa bila madhara, na ndipo waweza kuchukua kadiri upendayo, na kukitumia kwa utukufu wake.

Hakuna madhara yoyote katika kuwa na fedha, nyumba, mashamba, rafiki na watoto wapendwa kabisa, ikiwa huthamini vitu hivi kwa ajili yavyo vyenyewe.

Ukiwa umetengwa navyo rohoni, na kuridhika na Mungu mwenyewe, ndipo vitakuwa kwako mifereji ya kujazwa Mungu ili kukuletea yeye karibu zaidi nawe. Ndipo kila mwana-kondoo aliye kando ya nyumba yako atakuwa kamba laini ya kukufunga kwa moyo wa Mchungaji. Ndipo kila upendo utakuwa kikombe kidogo cha dhahabu kilichojaa divai ya upendo wake. Ndipo kila benki, hisa na uwekezaji utakuwa mfereji tu ambao kwao waweza kumwaga ukarimu wake na kupanua vipawa vyake.

Oktoba 7

“Hakufunua kinywa chake” (Isa 53:7).

Yahitaji neema kiasi gani kustahimili kutoeleweka kwa haki, na kupokea hukumu isiyo ya fadhili kwa utamu mtakatifu! Hakuna kinachojaribu tabia ya Kikristo zaidi ya kunenwa jambo baya juu yake. Hii ndiyo tupa idhihirishayo upesi kama sisi ni bati lililopakwa fedha au dhahabu tupu. Kama tungeweza tu kujua baraka zilizofichwa katika maisha yetu, tungesema, kama Daudi, Shimei alipomlaani, “Mwacheni alaani; yamkini Bwana atanilipa mema kwa kulaani kwake leo.”

Watu wengine hugeuzwa kwa urahisi wakaacha ukuu wa kazi ya maisha yao kwa kufuatia manung’uniko na adui zao wenyewe, hata maisha yao yakageuka kuwa kimbunga kimoja kidogo cha vita. Ni kama kiota cha nyigu. Waweza kuwatawanya nyigu, lakini yamkini utaumwa vibaya sana, na kutopata kitu kwa taabu zako, kwa maana hata asali yao haistahili kutafutwa.

Mungu na atupe zaidi ya Roho wake, yeye, alipotukanwa, hakurudisha matukano; bali alijitia mikononi mwake yeye ahukumuye kwa haki.

Mfikirini yeye aliyestahimili mapingamizi makuu namna hii ya wenye dhambi juu ya nafsi yake.

Oktoba 8

“Halikuanguka neno lo lote katika mema yote Bwana aliyowaambia” (Yos 21:45).

Siku moja, hata wewe, utetemekaye, usitasitaye, utasimama juu ya vilele vile na kutazama nyuma juu ya yote uliyopita, yote uliyoyaokoka kwa shida, hatari zote ambazo kupitia hizo alikuongoza, kujikwaa ambako kupitia hako alikulinda, na dhambi ambazo kutoka hizo alikuokoa; nawe utapiga kelele, kwa maana usiyoweza kuielewa sasa, “Wokovu una yeye aketiye katika kiti cha enzi, na Mwana-Kondoo.”

Siku moja atakaa nasi katika makao yale matukufu, nasi tutakuwa na zama zote za kuielewa hadithi ya maisha yetu. Naye atasoma tena pamoja nasi Biblia hii ya zamani iliyotiwa alama, atatuonyesha jinsi alivyozishika ahadi hizi zote, atatueleza siri ambazo hatukuweza kuzielewa, atatukumbusha mambo tuliyoyasahau tangu zamani, atapitia tena pamoja nasi kitabu cha uzima, atakumbuka hadithi yote iliyokamilika, na nina hakika mara nyingi tutalia: “Ee Kristo mbarikiwa! umekuwa wa kweli sana, umekuwa mwema sana! Je, kulikuwa na upendo kama huu?” Ndipo kwaya kuu itarudiwa tena — “Halikuanguka neno lo lote katika mema yote aliyoyanena; yote yalitokea.”

Oktoba 9

“Amani iwe kwenu” (Yn 20:19, 21).

Hii ndiyo namna ya kuja kwake mara ya kwanza kwa mioyo yetu ajapo kutuletea amani yake na kutufundisha kumtumaini na kumpenda.

Lakini kuna amani ya pili ambayo ana kutupa. Yesu akawaambia tena, “Amani iwe kwenu.” Kuna “amani,” na kuna “amani tena.” Kuna amani na Mungu, na kuna “amani ya Mungu ipitayo ufahamu.” Ni ile amani iliyo na kina zaidi ambayo twaihitaji kabla hatujaweza kumtumikia au kutumiwa kwa utukufu wake.

Maadamu twalemewa na shughuli zetu wenyewe, hawezi kutupa zake. Maadamu twashughulika na nafsi zetu, hatuwezi kuwa na nafasi ya kumtumikia. Akili zetu zitakuwa zimejaa wasiwasi wetu wenyewe hata tusingelingana na amana anayoihitaji kwetu, na hivyo, kabla hajaweza kutukabidhi kazi yake, ataka kutuokoa kutoka katika kila mzigo na wasiwasi.

“Amani, amani kamili, katika ulimwengu huu wa giza wa dhambi, Damu ya Yesu hunong’ona amani ndani. Amani, amani kamili, ingawa wajibu mwingi unasonga, Kufanya mapenzi ya Yesu, huu ndio pumziko.”

Oktoba 10

“Kama mkiyafisha matendo ya mwili kwa Roho, mtaishi” (Rum 8:13).

Roho Mtakatifu ndiye peke yake awezaye kutuua na kutuweka wafu. Wakristo wengi hujaribu kufanya kazi hii isiyopendeza wenyewe, nao hupitia kusulubiwa kusikoisha, lakini hawawezi kamwe kuikamilisha kazi hiyo iwe ya kudumu. Hii ni kazi ya Roho Mtakatifu, na utakapojisalimisha kweli hata kufa, ni jambo la kupendeza kukuta jinsi awezavyo kukuua kwa utamu.

Kwa mgusano wa cheche ya umeme wanatuambia kwamba uzima huzimwa karibu bila kutetemeka kwa maumivu. Lakini, hata iwe hivi katika mambo ya asili, twajua Roho Mtakatifu aweza kugusa kwa moto wa mbinguni kile kilichosalimishwa, na kukiua kwa dakika moja, baada ya kuwa kimesalimishwa kweli kwa hukumu ya mauti. Hiyo ndiyo kazi yetu, na ni kazi ya Mungu kuitekeleza hukumu hiyo, na kuiweka ikitenda kazi daima.

Tusiishi katika maumivu ya kujiua kusikokoma na kusikofaa, bali tukijihesabu kuwa tumekufa kweli, na tujiache wenyewe mikononi mwa Roho Mtakatifu mbarikiwa, naye atakiua chochote kiinukacho kupinga mapenzi yake, na kutuweka kweli kwa hesabu yetu ya mbinguni, na kujazwa uzima wake wa ufufuo.

Oktoba 11

“Na yeye aichunguzaye mioyo aijua nia ya Roho ilivyo, kwa kuwa huwaombea watakatifu kama apendavyo Mungu” (Rum 8:27).

Roho Mtakatifu huwa kwa moyo uliojiweka wakfu Roho wa maombezi. Tuna Mawakili wawili. Tuna Wakili kwa Baba, atuombeaye mkono wa kuume wa Mungu; lakini Roho Mtakatifu ndiye Wakili wa ndani, atuombeaye ndani yetu, akizivuvia dua zetu na kuziwasilisha, kwa njia ya Kristo, kwa Mungu.

Twamhitaji Wakili huyu. Hatujui kuomba jinsi itupasavyo, wala hatujui kuomba ipasavyo, lakini yeye huvuvia katika moyo mtakatifu tamaa ambazo huenda tusizielewe daima, kule kuugua ambako hatukuweza kukutamka.

Lakini Mungu huelewa, naye, kwa moyo wa Baba mwenye upendo, huchunguza mioyo yetu daima kuipata ile sala ya Roho, na kuijibu. Hukuta huko sala nyingi ambazo hatukuzigundua, na kujibu kilio kingi ambacho hatukukielewa kamwe. Nasi tutakapofika nyumbani kwetu na kuzisoma kumbukumbu za maisha, tutamjua vyema zaidi na kumthamini upendo usio na mwisho wa Rafiki huyo wa Kimungu, aliyekesha ndani kama Roho wa maombi, na kuvivuvia kila hitaji letu kwa moyo wa Mungu.

Oktoba 12

“Sheria ya Roho wa uzima ule ulio katika Kristo Yesu imeniacha huru” (Rum 8:2).

Uzima wa Yesu Kristo uletwao katika moyo wetu na Roho Mtakatifu, hutenda kazi humo kama sheria mpya ya nguvu na uhai wa Kimungu, na kupinga, kushinda na kutuinua juu ya ile sheria ya kale ya dhambi na mauti.

Na tuzieleze sheria hizi mbili kwa ulinganisho rahisi. Utazame mkono wangu. Kwa sheria ya uvutano huanguka juu ya dawati na kulala pale, ukivutwa chini na ile sheria ya asili ifanyayo miili mizito kuanguka nchi.

Lakini kuna sheria yenye nguvu kuliko sheria ya uvutano — uzima wangu mwenyewe na utashi wangu. Na hivyo kwa utendaji wa sheria hii iliyo juu zaidi — sheria ya uhai — naipinga sheria ya uvutano, na kuinua mkono wangu na kuushika juu ya mahali pake pa kwanza pa kupumzika, na kuusogeza kama nipendavyo. Sheria ya uhai imeniacha huru mbali na sheria ya uvutano.

Vivyo hivyo kabisa uzima wa Kristo Yesu ukaao ndani, ukitenda kwa nguvu ya sheria, huniinua juu, na kupinga nguvu ya dhambi katika asili yangu iliyoanguka.

Oktoba 13

“Ile nia ya mwili ni uadui juu ya Mungu” (Rum 8:7).

Mwili ni mbaya usioweza kuponywa. “Hautii sheria ya Mungu, wala kwa kweli hauwezi kuitii.” Hauwezi kamwe kuwa mzuri zaidi. Hakuna faida kujaribu kuuboresha mwili. Waweza kuuelimisha kadiri upendavyo. Waweza kuuzoeza kwa njia zilizokubaliwa zaidi, waweza kuuwekea vielelezo vilivyong’aa zaidi, waweza kuupigia filimbi au kuuombolezea, kuutendea kwa kutia moyo au ukali; asili yake itakuwa daima ileile isiyoweza kubadilika.

Kama mwewe wa mwitu ambaye mtoto mdogo humkamata utotoni mwake na kujaribu kumzoeza katika tabia za njiwa, kabla hujajua ataukaza mdomo wake mkatili juu ya vidole laini vitakavyompapasa, na kuonyesha roho ile ya kale ya mwitu ya hofu na ukatili. Ni mwewe kwa asili, wala hawezi kamwe kufanywa njiwa. “Kwa kuwa ile nia ya mwili ni uadui juu ya Mungu. Hautii sheria ya Mungu, wala kwa kweli hauwezi kuitii.”

Dawa pekee ya asili ya kibinadamu ni kuiangamiza, na kupokea badala yake asili ya Kimungu. Mungu haumboreshi mwanadamu. Huusulubisha uzima wa asili pamoja na Kristo, na kumuumba mtu mpya katika Kristo Yesu.

Oktoba 14

“Nenda nyuma yangu, Shetani” (Mt 16:23).

Nafsi yako ya kale irudipo, ukiisikiliza, ukiiogopa, ukiiamini, itakuwa na uvutano uleule juu yako kana kwamba haikufa; itakutawala na kukuangamiza. Lakini ukiipuuza na kusema: “Wewe si mimi, bali ni Shetani ajaribuye kunifanya niamini kwamba nafsi ya kale haikufa; nakukataa, nakutendea kama nguvu ya pepo iliyo nje yangu, najitenga nawe”; ukiitendea kama mke ambavyo angemtendea mume aliyeachwa, ukisema: “Wewe si kitu kwangu, huna nguvu juu yangu, nimekukana, kwa jina la Yesu nakuamuru uende zako,” — tazama! kile kitu kiovu kitatoweka, kivuli kitapotea, fimbo ya imani italaza ile roho iliyofadhaika, na kuirudisha shimoni, nawe utakuta kwamba Kristo yupo pale badala yake, kwa uzima wake wa ufufuo, kuuunga mkono ujasiri wako na kuutia muhuri ushindi wako.

Shetani aweza kuvumilia kila kitu kuliko kupuuzwa. Ukimpuuza huchukizwa na kutoweka. Yesu alikuwa akimgeuzia mgongo na kusema, “Nenda nyuma yangu, Shetani.” Basi na tumkatae, nasi tutakuta kwamba atalazimishwa kutenda kadiri ya imani yetu.

Oktoba 15

“Imani ni bayana ya mambo yasiyoonekana” (Ebr 11:1).

Imani ya kweli hutupa barua yake katika sanduku la posta, na kuiacha iende. Kutokuamini hushikilia pembe yake, na kustaajabu ya kwamba jibu haliji kamwe.

Nina barua fulani dawatini mwangu zilizoandikwa tangu majuma, lakini palikuwa na shaka kidogo juu ya anwani au yaliyomo, hivyo bado hazijatumwa. Hazijanifaidi mimi wala mtu mwingine yeyote bado. Hazitatimiza jambo lolote hata nitakapoziacha zitoke mikononi mwangu na kuzikabidhi kwa mtu wa posta na barua.

Hivi ndivyo ilivyo kwa imani ya kweli. Huikabidhi shauri lake kwa Mungu, na ndipo yeye hutenda kazi.

Kuna mstari mzuri katika Zaburi ya thelathini na saba: “Umkabidhi Bwana njia yako; umtumaini naye, yeye atatenda.” Lakini yeye hatendi kamwe hata tunapokabidhi.

Imani ni kupokea, au bora zaidi, ni kutwaa vipawa vya Mungu vinavyotolewa. Twaweza kuamini, na kuja, na kukabidhi, na kupumzika, lakini hatutafahamu kikamilifu baraka yetu yote hata tutakapoanza kupokea na kuja katika hali ya kukaa na kutwaa.

Oktoba 16

“Kwa kuwa umeachwa na kuchukiwa, nitakufanya kuwa furaha” (Isa 60:15).

Mungu hupenda kuwatwaa waliopotea zaidi miongoni mwa watu, na kuwafanya ukumbusho mtukufu kabisa wa upendo wake ukombozi na nguvu yake. Hupenda kuwatwaa waliokuwa mateka wa chuki ya Shetani, na maisha ambayo yamekuwa mfano wa kutisha kabisa wa uwezo wake wa kuangamiza, na kuyatumia kudhihirisha na kuangaza uwezekano wa rehema ya Mungu na uumbaji mpya wa Roho Mtakatifu.

Hupenda kuvitwaa vitu katika maisha yetu wenyewe ambavyo vimekuwa vibaya kabisa, vigumu kabisa na venye uadui zaidi kwa Mungu, na kuvigeuza hata tuwe kinyume cha nafsi zetu za kale.

Roho tamu kabisa hufanywa kutoka kwa waliokuwa na dhoruba na wenye utashi wa nafsi kabisa, imani iliyo hodari kabisa huumbwa kutoka katika jangwa la mashaka na hofu, na upendo wa Kimungu kabisa hugeuzwa kutoka katika mioyo ya mawe ya chuki na ubinafsi.

Neema ya Mungu yalingana na tabia zisizopendeza kabisa, na hali zisizofaa kabisa; na utukufu wake ni kuigeuza laana kuwa baraka, na kuwaonyesha watu na malaika wa zama zijazo, kwamba “dhambi ilipozidi, neema ilizidi sana zaidi.”

Oktoba 17

“Ibrahimu alimwamini Mungu” (Rum 4:3).

Imani ya Ibrahimu ilitegemea Mungu mwenyewe. Alimjua Mungu aliyeshughulika naye. Ulikuwa ni uhakika binafsi kwa yule ambaye angeweza kabisa kumtumaini.

Siri halisi ya maisha yote ya Ibrahimu ilikuwa ni kwamba alikuwa rafiki wa Mungu, na kumjua Mungu kuwa Rafiki yake mkuu, mwema na mwaminifu, na, akimshika kwa neno lake, alikuwa ametoka nje ya yote aliyoyajua na kuyapenda, na kwenda katika njia isiyojulikana bila mtu ila Mungu.

Mpendwa, je, twatumaini si tu katika neno la Mungu, bali je, tumejifunza kuegemeza uzito wetu wote juu yake mwenyewe, Mungu wa upendo na nguvu isiyo na mwisho, Mungu wetu wa agano na Rafiki wa milele?

Twaambiwa kwamba Ibrahimu alimtukuza Mungu kwa maisha haya ya imani. Njia halisi ya kumtukuza Mungu ni kuuacha ulimwengu uone yeye alivyo, na awezavyo kutenda. Mungu hatutaki sana tufanye mambo, kama vile kuwaacha watu waone awezalo yeye kutenda. Mungu hatafuti tabia za ajabu kuwa vyombo vyake, bali anatafuta vyombo vya unyenyekevu ambavyo kupitia hivyo aweza kuheshimiwa katika zama zote.

Oktoba 18

“Vitu vyote vi utupu na kufunuliwa machoni pake yeye tuliye na jambo naye” (Ebr 4:13).

Tafsiri ya neno kwa neno ya usemi huu ni, vitu vyote vimevuliwa na kupigwa bumbuazi. Hii ndiyo nguvu ya maneno ya Kiyunani. Mfano ni ule wa mwanamichezo katika Uwanja wa Kolisemu ambaye amepigana kadiri ya nguvu zake katika medani, na hatimaye ameanguka miguuni pa adui yake, akiwa amenyang’anywa silaha na kuvunjwavunjwa katika hali ya kutokuwa na msaada. Pale amelala, hawezi kupiga pigo, wala kuinua mkono wake. Amevuliwa na kupigwa bumbuazi, amenyang’anywa silaha na kulemazwa, wala hakuna lililobaki kwake ila kulala miguuni pa adui yake na kuinua mikono yake kuomba rehema.

Basi hii ndiyo hali ambayo Mungu ataka kutuleta, ambapo tutaacha mivutano yetu na majaribio yetu ya kujitetea au kujiboresha, na kujitupa bila msaada juu ya rehema ya Mungu. Hili ndilo tumaini pekee la mwenye dhambi, na alalapo hivi miguuni pa rehema, Yesu yu tayari kumwinua na kumpa ule wokovu wa bure uwangojao wote.

Hili, pia, ndilo hitaji kuu la Mkristo atafutaye maisha yaliyo na kina na yaliyo juu zaidi, kufikia utambuzi kamili wa hali yake ya kutokuwa kitu na kutokuwa na msaada, na kulala chini, akiwa amevuliwa na kupigwa bumbuazi miguuni pa Yesu.

Oktoba 19

“Kukataa ubaya” (Tit 2:12).

Na tuseme, “Hapana,” kwa mwili, ulimwengu na upendo wa nafsi, na kujifunza ule ukanaji-nafsi mtakatifu ambao ndani yake huketi kiasi kikubwa cha maisha ya utii. Msifanye uandalizi wa mwili; msiipe nafasi maisha yenu ya chini. Sema “Hapana” kwa kila kitu cha kidunia na cha kinafsi. Ni kiasi kikubwa jinsi gani cha maisha ya imani kikaacho katika kujikana nafsi kwa unyofu.

Twaanza kwa “Ndiyo” moja kuu, kwa Mungu, na kisha twamaliza kwa “Hapana” ya milele, kwa nafsi zetu, ulimwengu, mwili na ibilisi.

Ukiziangalia amri kumi za Sheria, utakuta kwamba karibu kila mojawapo ni “Usifanye.” Ukisoma sura ya kumi na tatu ya Wakorintho wa Kwanza, na picha yake nzuri ya upendo, utakuta kwamba tabia nyingi za upendo ziko katika hali ya kukanusha, kile upendo “usichokifanya, usichokifikiri, usichokinena, usichokuwa.” Na hivyo utakuta kwamba sehemu kubwa kabisa ya maisha ya kujitoa wakfu kwa kweli ni kusema, “Hapana.”

Mimi si wangu mwenyewe, mimi ni wake. Mimi ni wake peke yake, mimi ni wake.

Oktoba 20

“Tusichoke katika kutenda mema” (Gal 6:9).

Kama Paulo angeweza tu kujua faraja na tumaini alilowahudumia vizazi visivyohesabika ambavyo vimetembea njiani kutoka msalabani hata Ufalme ulio juu, angekuwa radhi kupitia maisha elfu na vifo elfu kama vile alivyostahimili kwa ajili ya baraka iliyofuata tangu kichwa chake kitukufu kilipobiringishwa mavumbini kando ya lango la Ostia la Rumi.

Na kama aliye mdogo kabisa miongoni mwetu angeweza tu kutazamia matokeo ya milele ambayo yaelekea yatatoka katika huduma za unyenyekevu kabisa za imani, tungehesabu dhabihu zetu na taabu zetu kuwa urithi usionenwa wa heshima na fursa, na tungeacha kunena juu ya majaribu na dhabihu zilizofanywa kwa ajili ya Mungu.

Chembe ndogo kabisa ya imani ni mbegu isiyokufa na isiyoharibika, ambayo bado itazipanda mbingu na kuifunika nchi kwa mavuno ya utukufu usioharibika. Inua kichwa chako, mpendwa, upeo ni mpana kuliko mduara mdogo uwezao kuona. Twaishi, twateseka, twafanya kazi, twatumaini, kwa ajili ya zama zijazo!

Oktoba 21

“Ni nani atakayetutenga na upendo wa Kristo?” (Rum 8:35).

Na kisha huja jibu la ushindi, baada ya vizuizi na adui wote wawezekanao kutajwa mmoja mmoja, “La, katika mambo hayo yote tunashinda, na zaidi ya kushinda, kwa yeye aliyetupenda.” Majaribu yetu yatageuzwa kuwa misaada; adui zetu watachukuliwa mateka na kufanywa wapigane vita vyetu. Kama vile vizani vya saa ile, viifanyavyo iende, shida zetu zenyewe zitakuwa vichocheo vya imani na maombi, na nafasi za Mungu kuwa halisi zaidi kwetu.

Tutatoka katika taabu zetu si tu kwa kuokolewa bali kwa ushindi, na katika mambo hayo yote kuwa hata zaidi ya washindi kwa yeye aliyetupenda.

Usalama wetu hautegemei upendo wetu usiobadilika, bali upendo wa Mungu katika Kristo Yesu kwetu. Si mikono ya mtoto mchanga ishikanayo kifuani pa mama ndiyo imzuiayo asianguke, bali mikono yenye nguvu ya mama iliyomzunguka ambayo haitamwacha kamwe aende. Ametupenda kwa upendo wa milele, na ijapokuwa vyote vingine vyaweza kubadilika, hata hivyo yeye hatatuacha kamwe wala hatatutupa.

Oktoba 22

“Aliyeguswa na hisia za udhaifu wetu” (Ebr 4:15).

Baadhi yetu twajua kidogo maana ya kutetemeshwa na hisia ya mateso ya wengine, na wakati mwingine, dhambi za wengine, na dhambi zionekanazo kutulowanisha zinapogusana nasi, na kututupia hisia ya kutisha ya dhambi na uhitaji.

Hili, labda, limekusudiwa kutupa dhana hafifu ya ile huruma aliyoihisi Yesu alipozitwaa dhambi zetu, magonjwa yetu na huzuni zetu. Tusisite kuziweka juu yake! Ni rahisi zaidi kwake kuzichukua kutoka kwetu kuliko kuzichukua pamoja nasi. Amekwisha kuzichukua kwa ajili yetu, katika maisha yake na katika kifo chake. Na tuubiringishe mzigo juu yake, na tuuache ubiringike, na ndipo, tukiwa hodari kwa nguvu zake, na kupumzishwa katika uzima wake na upendo wake, na twende kuwahudumia wengine huruma na msaada ambao ametupa kwa wingi.

Ulimwengu umejaa huzuni, na wale walioujua uchungu wake na uponyaji wake ni wahudumu wa Mungu wa faraja kwa ulimwengu unaolia.

Ee, machozi yatiririkayo pande zetu, Na tuyafute tuwezapo; Waleteni waliovunjika moyo kwa Yesu, Yeye atayafuta machozi yao.

Oktoba 23

“Hata lini mtasitasita katikati ya mawazo mawili?” (1 Fal 18:21).

Ni ajabu kwamba watu hawataki kuiacha fikira ya kwamba maisha yaliyojiweka wakfu ni magumu. Mfano rahisi utajibu dhana hii ya kipumbavu. Tuseme dereva wa gari la mtaani angesema, “Ni rahisi zaidi kuendesha kwa gurudumu moja juu ya reli na lingine nje,” njia yake ingeachwa upesi na umma, nao wangependelea kutembea kwa miguu. Bila shaka, ni rahisi zaidi sana kuendesha kwa magurudumu yote mawili juu ya reli, na daima juu ya reli, na ni rahisi zaidi sana kumfuata Kristo kikamilifu kuliko kufuata kwa moyo nusu na hatua ya kusitasita. Nabii alikuwa sahihi katika swali lake lenye ukali, “Hata lini mtasitasita katikati ya mawazo mawili?” Mtu asiyeamua ni mtu asitaye. Mtu asitaye ni mtu kilema na mtu mwenye taabu, na Mkristo wa dhati kabisa ni furaha ya watu na malaika, na shangwe ya daima kwake mwenyewe.

Sema, je, ni yote kwa ajili ya Yesu, Kama uimbavyo mara nyingi; Je, yeye ni Bwana wako wa Kifalme, Je, yeye ni Mfalme wa kweli wa moyo wako?

Oktoba 24

“Walijitoa nafsi zao kwanza kwa Bwana, na kwetu sisi kwa mapenzi ya Mungu” (2 Kor 8:5).

Ni muhimu, ili kufanikiwa katika kazi ya Kikristo, kwamba uwe mwaminifu si tu kwa Mungu, bali kwa kazi uliyounganishwa nayo. Kadiri mtu amjuavyo Bwana kwa kina zaidi ndivyo ilivyo rahisi zaidi kupatana naye.

Wakristo wa juujuu huwa na tabia ya kuwa na vituko. Wakristo waliokomaa wako karibu na Bwana hata hawaogopi kukosa mwongozo wake, wala hawajaribu daima kusisitiza uaminifu wao kwake na kujitegemea kwao mbali na wengine.

Wakorintho, waliojitoa kwanza kwa Bwana, hawakuwa na tatizo kujitoa kwa Mtume wake kwa mapenzi ya Mungu. Ni jambo la kupendeza kufanya kazi na mioyo ya kweli ambao twaweza kuwategemea kabisa.

Mungu na atupe roho ya moyo mzima na moyo wa “kusaidia mbele.”

Waweza kusaidia kwa maombi matakatifu, Upendo wa msaada na wimbo wa furaha; Ee, mizigo uwezayo kuichukua; Ee, huzuni uwezazo kuzishiriki; Ee, taji uwezazo bado kuzivaa, Ukisaidia mbele.

Oktoba 25

“Sasa ndiyo saa ya kuamka usingizini. Na tuyavue matendo ya giza na kuzivaa silaha za nuru” (Rum 13:11, 12).

Na tuamke usingizini; na tuwe macho; na tuwe hai kwa mahitaji makuu yanayotuhusu kweli.

Na tuzivue nguo za usiku na anasa za usiku; mavazi malegevu ya raha na majoho yaburutayo ya pumziko; anasa za sikukuu za saa za giza si kwa ajili ya watoto wa mchana. Na tuyavue matendo ya giza.

Na tujivike silaha kwa mchana. Kabla hatujavaa nguo zetu, na tuzivae silaha zetu, kwa maana twatoka nje kuingia nchi ya adui na ulimwengu wa hatari; na tuvae chapeo ya wokovu, dirii ya imani na upendo, na ngao ya imani, na tusimame tukiwa na silaha na macho kadiri hatari za siku za mwisho zikusanyikapo pande zetu.

Na tumvae Bwana Yesu Kristo. Hili ndilo joho letu la mchana. Si matendo yetu wenyewe wala haki yetu, bali nafsi na haki ya Bwana Yesu Kristo, aliyetupa uzima wake wenyewe, na kuwa kwetu Utoshelevu-wetu-Wote.

Oktoba 26

“Toka nje uende barabarani, uwashurutishe kuingia” (Lk 14:23).

Katika ule mfano mkuu ulio katika sura ya kumi na nne ya Luka, utoao habari za karamu kuu ambayo bwana mmoja wa kale aliwaandalia rafiki zake na jirani zake, na ambayo, walipoomba wasamehewe, aliwaalika viwete na vilema kutoka mitaa ya jiji na wenye ukoma kutoka nje ya lango, kuna picha yenye maana na funzo la mfano la mpango wa Ukristo katika zama hizi.

Kwanza, ni dhahiri kwa kila akili yenye fikira kwamba Bwana anaanza kuwasamehe watu waliokolewa na Injili wa nchi za Kikristo. Inazidi kuwa vigumu daima kuwavutia wasiookoka wa nchi yetu wenyewe, hasa wale waliozoea kusikia Injili na mambo ya Kristo. Wameomba wasamehewe kutoka karamu ya Injili, na Bwana anawasamehe.

Wakati uleule, mienendo miwili ya ajabu iliyoonyeshwa katika mfano inazidi kudhihirika zaidi na zaidi katika wakati wetu. Mmoja ni Injili kwa mitaa na tabaka zilizopuuzwa nyumbani; mwingine ni Injili kwa wapagani au tabaka zilizopuuzwa ng’ambo.

Oktoba 27

“Tazama, mimi ni Bwana, Mungu wa wote wenye mwili; je! kuna neno lo lote lililo gumu nisiweze kulitenda?” (Yer 32:27).

Koreshi, yule Mfalme, alilazimishwa kuutimiza ono la Yeremia, kwa kutoa amri, mara ile ile unabii ulipotabiri, akitangaza kwamba Yehova amemwamuru kuijenga upya Yerusalemu na kuwaalika mateka wake warudi nyumbani kwao kwao. Hivyo imani ya Yeremia ilithibitishwa na unabii wa Yehova ukatimizwa kwa utukufu, kama imani itakavyoheshimiwa daima. Ee, kwa imani, ambayo katika sasa yenye giza na wakati ujao wenye giza zaidi, itathubutu kuandika ushahidi na kutia muhuri hati kama ikihitajika, kwa wakati wa kungoja, na kisha kuanza kushuhudia hakika ya tumaini lake kama nabii wa Anathothi!

Neno Anathothi lina maana nzuri, “mwangwi.” Hivyo imani ni “mwangwi” wa Mungu na Mungu daima humpa “mwangwi” imani, kama amjibuvyo tena kwa utimilifu mtukufu. Ee, imani yetu na iurudishe mwangwi pia madai jasiri ya nabii wa kale na kutwaa urithi wetu wote, kwa kelele yake tukufu, “Ee Bwana, wewe ndiwe Mungu wa wote wenye mwili, je! kuna neno lo lote lililo gumu kwa Bwana?” na kama mwangwi litarudi jibu la mbinguni kwa moyo wetu, “Mimi ni Mungu wa wote wenye mwili, je! kuna neno lo lote lililo gumu nisiweze kulitenda?”

Oktoba 28

“Mtumwa mwema, kwa kuwa umekuwa mwaminifu katika neno lililo dogo sana, uwe na mamlaka juu ya miji kumi” (Lk 19:17).

Si mafanikio yetu katika utumishi yanayohesabika, bali uaminifu wetu. Kalebu na Yoshua walikuwa waaminifu na Mungu aliyakumbuka siku ya kufikiwa ilipofika. Ilikuwa hali ngumu sana isiyopendwa, na sisi sote twaitwa katika mtihani wa maisha yetu kusimama peke yetu na katika jambo hilihili la kumtumaini Mungu kwa ushindi juu ya dhambi na urithi wetu wote katika Kristo yatupasa sote kujaribiwa kama wao.

Ndugu zetu hata katika kanisa la Mungu, ingawa wanakubali kwa nadharia uzuri na faida za maisha bora namna hii, hutuambia kama walivyowaambia Israeli kwamba haiwezekani kutekelezwa na haiwezekani, na wengi wetu yatupasa kusimama peke yetu kwa miaka tukishuhudia nguvu ya Kristo kuwaokoa watu wake hata mwisho kabisa na kama Kalebu tukimfuata kikamilifu, hata kama peke yetu. Lakini huu ndio ushindi halisi wa imani na uthibitisho wa uaminifu wetu usiokubali maelewano.

Basi tusinung’unike tuteswapo aibu kwa ushuhuda wetu au kusimama peke yetu kwa Mungu, bali tumshukuru kwamba anatuheshimu hivyo, na hivyo kustahimili mtihani hata aweze baadaye kututumia makutano watakapofurahi kufuata.

Oktoba 29

“Mkimwomba Baba neno lo lote, atawapa kwa jina langu” (Yn 16:23).

Watu wawili huenda kwa mtunza-fedha wa benki, wote wakiwa wameshika mikononi mwao kipande cha karatasi. Mmoja amevaa mavazi ya gharama, na kunyoosha mkono uliovaa glavu na kupambwa vito; mwingine ni mfanyakazi mkorofi, asiyeoshwa. Wa kwanza akataliwa kwa sentensi ya adabu, na wa pili apokea dola elfu juu ya kaunta. Tofauti ni nini? Mmoja aliwasilisha jina lisilo na thamani; mwingine aliwasilisha hati iliyoidhinishwa na rais wa benki. Na hivyo mtu mwadilifu kabisa atakataliwa kutoka malango ya rehema, na mwenye dhambi mchafu kabisa atakaribishwa ndani ikiwa awasilisha jina la Yesu.

Tutampa nini usafi na haki isiyo na mwisho? Yesu! Hakuna kipawa kingine kistahilicho Mungu kupokea. Naye ametupa yeye kwa kusudi hili hasa, ili turudishe kama mbadala wetu na kuridhika kwetu. Naye ame“shuhudia” juu ya kipawa hiki kile ambacho hakukishuhudia juu ya kingine chochote, yaani, kwamba katika yeye amependezwa sana na wote wampokeao “wamekubaliwa katika Mpendwa.” Je, tutaukubali ushahidi kwamba Mungu ameridhika na Mwanawe? Je, tutaridhika na yeye?

Oktoba 30

“Kaeni ndani sana” (Yer 49:8).

Uwepo wa Mungu huchanganyika na kila fikira na fahamu nyingine, ukibubujika kwa utamu na kwa usawa katika mipango yetu ya biashara, maongezi yetu ya kijamii, mapendo ya moyo wetu, kazi zetu za mikono, maisha yetu yote, ukichanganyika na yote, ukiyatakasa yote, na kuwa na fahamu katika yote, kama harufu ya ua, au uwepo wa rafiki aliye karibu kwa fahamu, na bado bila kuzuia hata kidogo shughuli iliyo kali na ya daima ya mikono na akili. Jinsi ilivyo nzuri tabia iliyoimarika ya ushirika huu na utegemezi usiokoma, katikati na juu ya fikira na shughuli zote! Jinsi ilivyo ya kupendeza kumwona mtakatifu mpendwa mzee akikunja vitabu vyake usiku na kusema kwa unyenyekevu, “Bwana Yesu, mambo bado ni yaleyale kati yetu,” na kusinzia katika ulinzi wake.

Basi na tuwe tumeegemezwa juu yake. Na tukue ndani yake kwa mizizi na nyuzi zote za kuwa kwetu. Hatachoshwa na urafiki wetu. Hatataka kutuweka kando wakati mwingine. Ni mazuri maneno ya yule mtakatifu aliyeteseka: “Yeye hasemi kamwe kwaheri.” Yeye hukaa. Basi na tuwe tumeegemezwa juu yake.

Oktoba 31

“Neema yangu yakutosha; maana uweza wangu hutimilika katika udhaifu” (2 Kor 12:9).

Mungu aliruhusu mtihani umzunguke Yakobo usiku ule aliposujudu Penieli katika dua ili kumleta mahali ambapo angeweza kumshika Mungu kama asingefanya kamwe; na kutoka kwenye njia ile nyembamba ya hatari Yakobo alitoka akiwa amepanuka katika imani yake na maarifa yake ya Mungu, na katika nguvu ya maisha mapya na ya ushindi. Ilimpasa kumlazimisha Daudi, kwa nidhamu ndefu na yenye maumivu ya miaka, kujifunza uweza wote na uaminifu wa Mungu wake, na kukua hata kufikia kanuni imara za imani na utauwa, ambazo zilikuwa muhimu kwa mwendo wake wa baadaye na wa utukufu kama mfalme wa Israeli.

Hakuna ila hali za dhiki ambamo Paulo aliwekwa daima ambazo zingeweza kamwe kumfundisha, na kulifundisha kanisa kupitia yeye, maana kamili ya ahadi kuu aliyojifunza kuidai, “Neema yangu yakutosha.” Wala hakuna ila majaribu yetu na hatari zetu ambavyo vingeweza kuwaongoza baadhi yetu kumjua kama tumjuavyo, kumtumaini kama tumemtumaini, na kuchota kutoka kwake vipimo vya neema ambavyo hali zetu za dhiki zenyewe zilivifanya kuwa muhimu.